Iesu Ena Toreisi Lou Idia Kota Henia
“Umui lau hamaoroa diba, ena be ita diba momokani guna Iesu ia mauri . . . , to ita gwau diba lasi ita diba momokani Dirava ese Ia be mase amo ia hatoreaisi lou.” Unai be Church of England ena bisop badana, Archbishop of Canterbury, ese ia gwauraia herevana.
KERISTANI aposetolo tauna Paulo be unai ia daradaralaia lasi. Idaunegai Korinto Keristani tadikakadia dekenai ia torea revareva helagana ginigunana ena karoa 15 lalonai, Paulo ia gwau: “Lau davaria hereva badana umui dekenai lau hamaoroa guna: Keriso be ita dainai ia mase, Buka Helaga lalonai ia torea hegeregerena. Idia guria vadaeni danu, to dina toi murinai mase dekena amo ia toreisi lou, Buka Helaga lalonai ia torea hegeregerena.”—1 Korinto 15:3, 4.
Iesu Keriso ena hahediba taudia be iena toreisi lou idia abidadama henia dainai, idia ese evanelia sivaraina be Greek bona Roma tanodia iboudiai—“tanobada ibounai”—dekenai idia harorolaia. (Kolose 1:23) Momokani, Iesu ena toreisi lou be Keristani abidadama ena badina.
To, matamanai, taunimanima momo be Iesu ena toreisi lou idia daradaralaia bona idia abia dae lasi. Iuda taudia ibounai dekenai, bema Iesu murinai ia raka tauna ta ia gwau idia hasatauroa tauna be Mesia, ia be Dirava ia hadikaia. Bona edukeisen badana idia abia Greek taudia momo dekenai, souli ia mase diba lasi herevana idia abia dae dainai, toreisi lou lalohadaina idia inai henia vaitani.—Kara 17:32-34.
Hari Idia Abia Dae Lasi Taudia
Vanegai laganidia lalodiai, diba bada taudia haida, sibona idia gwauraia Keristani taudia, be buka bona sivarai idauidau idia halasia, idia gwau Iesu ena toreisi lou herevana be sivarai momokanina lasi bona unai hereva dainai hepapahuahu badana ia hamatamaia. Diba bada taudia haida ese “ia noho momokani tauna Iesu” idia tahua neganai, idia gwau Evanelia Bukadia ese idia gwauraia tauanina ia noho lasi gara gabuna bona Iesu ia toreisi lou murinai ia hedinarai sivaraidia be koikoi, bona Iesu ia mase daudau murinai idia torea, guba amo iena siahu ia abia herevana idia hamomokania toho totona.
Hegeregere, Germany ena diba bada tauna Gerd Lüdemann, New Testament ena profesa tauna bona buka ladana What Really Happened to Jesus—A Historical Approach to the Resurrection ia torea tauna, ena lalohadai oi laloa. Ia gwau Iesu ena toreisi lou be “anina lasi herevana,” bona “saiens ena aonega idia gaukaralaia taudia” ese idia dadaraia be namo.
Profesa Lüdemann ia gwau aposetolo tauna Petero dekenai ia hedinarai toreisi lou tauna Keriso be matahanai ta sibona, unai ia vara badina Petero ese Iesu ia gorea dainai ia lalohisihisi bona iena lalona ena mamina ia dika. Bona Lüdemann ia gwau, nega ta ai abidadama taudia 500 mai kahana dekenai Iesu ia hedinarai be “hutuma edia hoa kava karana.” (1 Korinto 15:5, 6) Vadaeni, diba bada taudia momo idia gwau Baibel dekenai ia toreisi lou tauna Iesu ena sivarai be taunimanima idia laloa ia vara to ia vara momokani lasi karana, to unai ese hahediba taudia edia lalona ia veria lauma dalanai idia lalo-goada bona misinari urana ia hagoadaia totona.
To momokani, taunimanima momo be diba bada taudia edia hepapahuahu herevadia idia laloa lasi. To, namona be ita ibounai ese Iesu ena toreisi lou herevalaia karana ita laloa. Dahaka dainai? Badina, bema ia toreisi lou lasi, Keristani tomadiho be badina koikoina latanai idia haginia. To, bema Iesu ena toreisi lou be guna ia vara momokani sivaraina, Keristani tomadiho be hereva momokani latanai idia haginia. Unai neganai, Keriso ena hereva idia hamomokania sibona lasi, to iena gwauhamata herevadia idia hamomokania danu. Ma danu, bema toreisi lou ia vara momokani, iseda inai tauna mase do ia kwalimu lasi, to do ita hadarerea.—1 Korinto 15:55.
[Picture Credit Line on page 3]
From the Self-Pronouncing Edition of the Holy Bible, containing the King James and the Revised versions