Abidadama Momokanina—Hari Oi Abia Diba, A?
“Abidadama ena anina be ta ia diba momokani mai gari lasi ida Dirava ena hebogahisi dekenai ia tabekau diba, bona unai dainai abidadama tauna ia hegeregere nega tausen momo ena mauri do ia haboioa.”—MARTIN LUTHER, 1522.
“Kahirakahira ita ibounai ese tauanina gaudia sibona ita laloa bona Keristani abidadama bona kara be idia boio momokani.”—LUDOVIC KENNEDY, 1999.
ABIDADAMA dekenai lalohadai be idauidau. Guna, taunimanima ese Dirava idia abidadama henia. Hari, Baibel idia daradaralaia bona hisihisi momo tanobadana ai, abidadama momokanina Baibel bona Dirava dekenai be ia boio.
Abidadama Momokanina
Momo idia laloa “abidadama” ena anina be tomadiho ta ena hahediba herevadia ita abia dae eiava tomadiho karana ta ita badinaia. To, Baibel lalonai “abidadama” ena anina be Dirava abidadama henia momokani karana—ta be mai ena goada ibounai ida Dirava bona ena gwauhamata dekenai ia tabekau momokani. Unai kara be Iesu Keriso ena hahediba tauna ena maka ta.
Nega ta, Iesu Keriso ia gwau namona be idia guriguri bona “do idia hesiku lasi.” Unai ia karaia neganai, ia henanadai bema hari abidadama momokanina ita abia diba, eiava. Ia nanadaia: “Taunimanima ena Natuna do ia mai neganai, tanobada dekenai [unai bamona] abidadama do ia davaria o?” Dahaka dainai unai bamona henanadai ia henia?—Luka 18:1, 8.
Abidadama Ia Boio
Gau momo dainai taunimanima ese idia abia abidadama idia haboioa diba. Idia haida be dina ta ta ena hisihisi bona hahetoho gaudia. Hegeregere, lagani 1958 ai, Munich dekenai peleini ia moru bona Manchester United futbol tim taudia momo idia mase neganai, Profesa Michael Goulder be pris tauna ta Manchester, England dekenai. BBC ena televisen program ta lalonai, hereva halasia hahine Joan Bakewell ia gwau Goulder “ia laloa taunimanima edia lalohisihisi ia bada herea dainai gau ta ia karaia diba lasi.” Unai amo ia vara gauna ta be, “taunimanima edia mauri ia naria Diravana dekenai iena abidadama ia haboioa.” Goulder ia gwau hari ia laloa “Baibel be ia kerere diba lasi Diravana ena hereva . . . lasi,” to ia be “idia kerere diba taudia edia hereva, bona reana iena kahana haida be Dirava ena lauma amo idia vara.”
Nega haida abidadama ia mase kava sibona. Unai be toretore tauna bona hereva halasia tauna Ludovic Kennedy dekenai ia vara. Ia gwau maragi negana amo iena “[Dirava] daradaralaia lalohadaina idia mai bona idia lao bona [iena] abidadama ia manoka ia lao.” Toana be, tau ta lasi ese ena henanadai dekenai haere maorodia ia henia diba. Iena tamana be davara dekenai ia mase dainai ena abidadama manokana ia boio momokani. Dirava idia guriguri henia “davara ena dika bona eda inai taudia edia dagedage karadia amo ia hamauridia totona,” to haere be lasi, badina Tanobada Tuarina Iharuana lalonai ena tamana be taunimanima udaia boutina ai ia guia neganai, Germany ena tuari boutina ese ia hadikaia.—All in the Mind—A Farewell to God.
Unai bamona gaudia be nega momo idia vara. Aposetolo Paulo ia gwau, “taunimanima haida sibona be mai edia abidadama Dirava dekenai.” (2 Tesalonika 3:2) Dahaka oi laloa? Inai Baibel daradaralaia tanobadana ai Dirava bona ena Hereva dekenai abidadama momokanina ita abia diba, a? Hereva gabena ese unai gauna ia herevalaia, mani oi itaia.