Oiemu Lalona Ena Mamina Oi Gimaia

ENA kompiuta dekenai diba kererena idia atoa peleini ita guia lalohadaina ese gari ia havaraia. To, ta ese peleini ia hakaua gaudia ia hadikaia eiava mai ena ura ida idia atoa dibana ia hadikaia ena dika bada mani oi laloa! Laulau dalanai, ta ese emu lalona bona ena mamina dekenai unai ia karaia toho. Ia ura kara maoromaoro dalana ai oi ia hakaua gauna ia hadikaia. Iena tahua gauna be Dirava vairanai emu dala ia dika!​—⁠Iobu 2:​2-5; Ioane 8:⁠44.

Unai dika ia havaraia toho tauna dikana be daika? Baibel ia gwau ia be “idaunegai gaigaina, bona iena ladana be Diabolo bona Satani. Ia be tanobada taudia ibounai ia koia noho.” (Apokalupo 12:⁠9) Eden umana lalonai ena gaukara dalana ia hedinarai. Edia toana be idia momokani herevadia amo, Heva ena lalona ia veria bona Heva be ia diba ia maoro gauna ia dadaraia bona Dirava ia gwau-edeede henia. (Genese 3:​1-6, 16-19) Unai nega amo, Satani ese orea badana idauidau haginia dalana ia palanilaia, taunimanima iboudiai be Dirava idia tuari henia totona. Unai orea badadia amo tomadiho koikoi oreana be dika herea.​—⁠2 Korinto 11:​14, 15.

Tomadiho Koikoi ese Lalona Ena Mamina Ia Hakererea

Baibel bukana Apokalupo lalonai, tomadiho koikoi be ariara hahine bamona, ena ladana be Babulonia Badana. Iena hadibaia herevadia ese taunimanima momo edia laloa dalana maorona ia hakererea bona unai dainai idia ese tomadiho idauna badinaia taudia idia badu henia bona idia dagedage henia danu. Momokani, Apokalupo ena hereva bamona, Dirava ia laloa “tanobada dekenai idia alaia mase taudia ibounai,” Dirava idia tomadiho henia taudia danu, edia rara idia bubua karadia be tomadiho koikoi ena maduna.​—⁠Apokalupo 17:​1-6; 18:​3, 24.

Iesu ese ena hahediba taudia ia hadibaia bona tomadiho koikoi ese haida edia kara maoromaoro dalana ia hakererea karana ena bada ia hahedinaraia, ia gwau: “Nega do ia mai, umui do ia alaia mase tauna be do ia laloa ia be Dirava ena hesiai gaukara ia karaia.” Unai bamona dagedage taudia be kara maoromaoro idia itaia lasi! Iesu ia gwau: ‘Lauegu Tamana bona lau idia diba lasi.’ (Ioane 16:​2, 3) Iesu ese unai hereva ia gwauraia bona nega sisina murinai, tomadiho gunalaia taudia haida edia oda dainai Iesu idia hamasea, to unai kara ese edia lalona ena mamina ia pidia lasi. (Ioane 11:​47-50) To, Iesu ia gwau taunimanima ese ia murinai idia raka taudia korikoridia do idia diba, badina lalokau be idia huanai ia noho. To edia lalokau ena bada ese unai ia hereaia, idia ese edia inai taudia idia lalokau henia danu.​—⁠Mataio 5:​44-48; Ioane 13:⁠35.

Tomadiho koikoi ese momo edia lalona ena mamina ia hakererea dalana ma ta be, taunimanima idia ura henia karadia, maoro o gageva karadia, ia durua. Aposetolo Paulo ese unai ia perovetalaia, ia gwau: “Negana do ia ginidae, taunimanima be hereva maoromaoro do idia ura lasi kamonai. . . . Idia ura henia hadibaia taudia momo do idia haboua. Vadaeni inai hadibaia taudia ese sivarai kavakava do idia gwauraia, unai taudia idia ura kamonai gaudia sibona.”​—⁠2 Timoteo 4:⁠3.

Hari inai negai, tomadiho gunalaia taudia ese taunimanima idia ura kamonai gaudia idia hadibaia, idia gwau Dirava ese headava lasi taudia idia mahuta hebou karana ia abia dae. Ma haida ese tatau idia sihari heheni karana idia gwauraia dika lasi. Momokani, dubu gunalaia taudia haida be tatau idia sihari henia taudia. Britain ena niuspepa The Times lalonai hereva ta ia gwau “taunimanima idia diba idia be tatau idia sihari henia dubu gunalaia taudia 13” be vouti amo Church of England ena General Synod taudia ai idia halaoa. Dubu gunalaia taudia ese Baibel ena kara maoromaoro taravatudia idia dadaraia bona edia dubu ai unai idia laloa bada lasi neganai, dubu taudia be dahaka taravatu do idia badinaia be namo? Ita hoa lasi taunimanima milioni momo idia daradara bada.

Edia gabu ai idia noho dala makaia gaudia bamona kara maoromaoro taravatudia bona Baibel ese lauma dalanai ia hadibaia hereva momokanidia ese ita idia hakaua be namo! (Salamo 43:3; Ioane 17:17) Hegeregere, Baibel ese ita ia hadibaia sihari kava bona heudahanai taudia ese “Dirava ena Basileia do idia davaria lasi.” (1 Korinto 6:​9, 10) Ita ia hadibaia ‘hahine idia sihari henia hahinedia bona tatau idia sihari henia tataudia’ ese Dirava ena matana ai “hemarai karadia” idia karaia. (Roma 1:​26, 27, 32) Unai bamona kara maoromaoro taravatudia idia hahedinaraia hereva momokanidia be goevadae lasi taudia idia karaia gaudia lasi; idia be Dirava ena taravatu helagadia, bona idia ia haidaua lasi. (Galatia 1:8; 2 Timoteo 3:16) To Satani ese dala ma haida ai, lalona ena mamina ia hakererea danu.

Moale Karadia Oi Abia Hidi Namonamo

Ta ese ma ta ia doria kara dika ia karaia totona be kara ta, to ta ese ma ta ena lalona ia veria ela bona ia ura unai kara ia karaia be kara idauna. “Tanobada ena lohia,” Satani, ena tahua gauna be unai bamona. Ia ese idia kara kava eiava idia naria lasi taudia​—⁠dika idia davaria haraga matamata taudia danu⁠—edia lalona bona kudouna dekenai ena lalohadai ia atoa totona buka bona magasin, muvini piksa, miusiki, bona kompiuta gadara dikadia, bona Internet dekenai matabodaga laulaudia ia gaukaralaia.​—⁠Ioane 14:30; Efeso 2:⁠2.

Sivarai ta magasin ladana Pediatrics lalonai ia gwau: “Lagani ta ta ai [United States dekenai], matamata taudia ese dagedage karadia 10 000 idia itaia, bona natudia totona idia karaia program lalonai dagedage karadia be momo herea.” Unai sivarai ese ia hahedinaraia danu, “lagani ta ta ai, memero kekeni ese nega 15 000 bamona idia itaia sihari kava karadia idia herevalaia, unai bamona lalohadai idia gwauraia, eiava unai kara idia hevasehalaia.” Adorahi kahanai, taunimanima momo herea ese televisen idia raraia negana ai, “hora iboudiai sihari kava karadia 8 idia hahedinaraia, unai be lagani 1976 ai idia hahedinaraia karadia edia momo be nega 4 ia hanaia.” Ita hoa lasi, unai tahua karana amo idia davaria, “hereva dikadia gaukaralaia karana ia bada ia lao” danu. To, Baibel bona saiens taudia edia tahua gaukara momo ese idia hahedinaraia unai bamona gaudia be taunimanima edia kara idia hadikaia. Unai dainai, bema oi ura momokani Dirava oi hamoalea bona namo oi abia, Aonega Herevadia 4:23 oi badinaia, ia gwau; “Oiemu kudouna, oiemu laloa ia havaraia gauna, do oi naria namonamo, badina be oiemu laloa dekena amo, oiemu mauri be ia heau noho.”​—⁠Isaia 48:⁠17.

Hari idia ura henia miusiki momo danu ese lalona ena mamina ia hakererea. Australia ena niuspepa The Sunday Mail ia gwau, West tanodia momo dekenai ena anedia be lista edia ataiai momokani ia noho ane abia tauna “ia hekwarahi bada taunimanima be mai gari ida idia hoa totona.” Unai sivarai ia gwau, “iena anedia ese drag, famili taudia sihari henia karana bona hahine hadikaia karana idia hahairaia” bona ia ese “ena hahine hamasea bona ena mase tauanina be gohu dekenai negea karana ia anelaia.” Idia gwauraia ane herevadia ma haida idia dika momokani dainai iniseniai ai torea diba lasi. To, iena miusiki dainai ia ese momo idia laloa bada ahuna ta ia abia. Oi ura ataiai ai gwauraia lalohadai dikadia be oiemu lalona bona kudouna dekenai oi hadoa, herevana miusiki amo idia hanamodia toho, a? Emai ura be oi ura lasi, badina unai bamona idia karaia taudia ese sibona edia lalona ena mamina idia hamiroa bona gabeai idia “laloa kerere” momokani, bona Dirava tuari henia taudia ai idia lao.​—⁠Heberu 3:12; Mataio 12:​33-35.

Unai dainai moale karadia oi abia hidi namonamo. Baibel ese ita ia hagoadaia: “Lauegu varavara taudia e, lauegu hereva orena be inai. Inai bamona karadia sibona do umui laloa: Kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia.”​—⁠Filipi 4:⁠8.

Hebamo ese Emu Lalona Ena Mamina Ia Hakererea Diba

Neil bona Franz idia maragi neganai, lalo-momokani Keristani taudia edia hebamo namona idia moalelaia.a To, Neil ia gwau, gabeai “namo lasi turadia lau bamoa matamaia.” Unai amo ia vara gauna be taravatu ia utua bona dibura dekenai ia noho, bona unai dainai hari ia lalohisihisi. Franz ena sivarai be unai bamona danu. Ia lalohisihisi bona ia gwau: “Lau laloa tanobada ena matamata taudia lau bamoa diba bona egu kara idia haidaua lasi. To Galatia 6:7 ia gwau bamona: ‘Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia.’ Gau dikadia amo lau davaria lau kerere bona Iehova ia maoro. Lau karaia dika dainai, egu mauri orena ibounai be dibura dekenai do lau noho.”

Neil bona Franz bamona taudia be karaharaga raskol karadia idia karaia lasi; matamanai unai bamona lalohadai idia dadaraia. Unai be metairametaira ia vara, nega momo kara ginigunana be hebamo dikana. (1 Korinto 15:33) Reana murinai drag ania kava eiava inuinu kekero karadia idia karaia. Momokani, lalona ena mamina idia gwauraia “kekero muramura dekenai ia veve kahana ta” bona unai be maoro. Unai karadia murinai, taravatu utua karadia eiava sihari kava karadia idia karaia.

Unai dainai, unai kara ginigunana oi karaia be anina lasi, ani? To, Dirava idia lalokau henia momokani aonega taudia oi bamoa be namo. Idia ese oi do idia durua, sibona emu lalona ena mamina oi hagoadaia totona, bena dala maorona dekenai oi do ia hakaua, vadaeni dika momo do oi reaia. (Aonega Herevadia 13:20) Ena be Neil bona Franz be dibura dekenai idia do noho, to hari idia abia dae edia lalona ena mamina be Dirava ia henia harihari gauna bona dala maorona ai idia hadibaia bona idia naria be namo. Danu, idia gaukara goada, edia Dirava, Iehova, ida hetura karana namona idia abia lou totona. Namona be oi aonega, bona edia kerere amo diba oi abia.​—⁠Aonega Herevadia 22:⁠3.

Oiemu Lalona Ena Mamina Oi Naria

Ita hahedinaraia ita ura iseda lalona ena mamina ita naria, bema Dirava dekenai iseda lalokau bona abidadama ita hagoadaia, bona dala maorona ai ia ita gari henia. (Aonega Herevadia 8:13; 1 Ioane 5:⁠3) Baibel ese ia hahedinaraia, bema unai karadia ese ta ena lalona ena mamina idia hagoadaia lasi, kara maoromaoro dalanai do ia goada lasi. Hegeregere, Salamo 14:1 ese taunimanima ia herevalaia, edia kudouna ai idia gwau: “Dirava be ia noho lasi.” Edena dala ai unai abidadama lasi karana ese edia kara ia haidaua? Unai siri be ma ia gwau “idia ibounai be dika, kara mirodia idia karaia vadaeni.”

Dirava dekenai abidadama korikorina idia abia lasi taudia be vaira negana ena helaro namona idia abia lasi. Unai dainai, hari mauri idia laloa bada, bona edia tauanina ena ura gaudia idia hagugurua toho. Idia badinaia lalohadai be inai: “Laloa lasi, ita aniani bona ita inuinu, badina be kerukeru do ita mase.” (1 Korinto 15:32) To, nega daudau do idia noho lasi tanobada ena namo gaudia ese mauri hanaihanai ena ahuna namona idia raraia noho taudia idia hakaua kerere diba lasi. Dala ia davaria kompiuta namona hegeregerena, idia hadibaia lalona ena mamina ese idia hakaudia, mai kamonai ida Dirava idia badinaia dalana dekenai idia raka noho totona.​—⁠Filipi 3:⁠8.

Oiemu lalona ena mamina ia goada noho bona ia gaukara namonamo totona, Dirava ena Hereva ese ia hakaua hanaihanai be gau badana. Baibel ese laulau herevana amo ita ia hadibaia unai bamona ita ia hakaua diba, ia gwau: “Bema idiba kahanai o lauri kahanai do umui raka siri neganai, emui Hadibaia Tauna ena gadona do umui kamonai, do ia gwau, ‘Dala be inai, ia dekenai do umui raka lao.’ ” (Isaia 30:21) Unai dainai, namona be dina ta ta ai Baibel oi duahia totona nega oi atoa. Kara maoromaoro karaia totona oi hekwarahi neganai eiava lalo-hekwarahi ese emu lalona ia hametaua neganai unai ese oi do ia hagoadaia. Namona be oi diba momokani, bema Iehova dekenai oi tabekau, ia ese lauma dalanai bona kara maoromaoro dalanai oi do ia hakaua. Oibe, namona be salamo torea tauna oi tohotohoa, ia gwau: “Nega ibounai lau diba, Lohiabada be lau dekenai ia noho. Ia be lau kahirakahira dainai, gau ta ese lau ia hagaria lasi.”​—⁠Salamo 16:8; 55:⁠22.

[Footnote]

[Pictures on page 5]

Tomadiho koikoi, Baibel ese ia gwauraia “Babulonia badana,” ese momo edia lalona ena mamina ia hakererea

[Credit Line]

Priest blessing troops: U.S. Army photo

[Pictures on page 6]

Dagedage bona matabodaga karadia itaia karana ese emu lalona ena mamina ia hakererea

[Picture on page 7]

Hanaihanai Dirava ena Hereva ese oi ia hakaua be gau badana, oiemu lalona oi gimaia totona