“Lau Moalelaia Gauna Badana”
SPAIN ai, haisikuli tisa ta ia gwau: “Lagani handred mai kahana lalonai, Iehova ena Witnes taudia ese lalotamona korikorina idia hahedinaraia, hereva momokani idia gwauraia, bona mai anina bada gauna be, edia abidadama dekenai idia gini goada.” Unai tisa ese Dirava be lasi lalohadaina ia abia dae, to dahaka dainai unai hereva ia gwauraia?
Badina unai haisikuli dekenai Iehova ena Witnes kekenina ta, Noemí be eksam dokona ai ripoti ta ia torea. Unai ripoti ena sinado be inai: “Iehova Ena Witnes Taudia Nazi Ena Lohia Henunai.”
Dahaka dainai unai sinado ia abia hidi? Noemí ia gwau: “Tisa ese egu gaukara do ia sekea dainai, lau laloa inai be nega namona ia lau haroro henia totona. Iehova ena Witnes taudia be Nazi Germany ai Dirava idia badinaia karana ena sivarai ese lauegu kudouna ia hamarerea. Bona lau abia dae unai sivarai ese ma haida edia lalona do ia veria danu.”
Noemí ia laloa unai ripoti be taunimanima momo ese do idia duahia lasi. Lagani 2002, October 5 ai, Spain ena sikuli ibounai ai kompetisen ta idia karaia, bona Noemí be ena ripoti namona dainai prais ta ia abia. Spain lalonai idia noho iunivesiti idauidau ena diba bada taudia 20 ese unai kompetisen ena prais idauidau idia henia.
Spain ena edukeisen minista, Pilar del Castillo, ese Noemí dekenai prais ia henia. Bena Noemí ese unai minista dekenai Jehovah’s Witnesses Stand Firm Against Nazi Assault vidio ta be harihari gauna ta bamona ia henia. Unai minista ese unai harihari gauna ia abia dae.
Noemí ena noho gabuna, Manresa ai, niuspepa ta ese ena kwalimu sivaraina bona ia torea ripotina ia herevalaia danu. Bona Sikuli ena hedmasta be Noemí ese ia torea ripoti ena kopi ta ia noia, badina ia ura unai haisikuli ena lagani 75 moalelaia negana ena program lalonai idia atoa.
Noemí ia gwau: “Egu haisikuli laganidia lalonai, lau moalelaia bada gauna be inai: Egu tisa Mr. Jorge Tomás Calot, be egu ripoti ena hamatamaia kahanai ia torea herevana lau duahia neganai, lau moale bada herea.
Unai tisa ia gwau: “Lau be Dirava ia noho lasi lalohadaina lau abia dae, to hari lau diba momokani Atai Herea Diravana be ia noho, bona Iena hesiai taudia ia hagoadaia edia dekena taudia idia lalokau henia totona.”