Kara Maoromaoro Taudia ese Dirava Do Idia Hanamoa Hanaihanai
“Tau namona be . . . taunimanima ese ia do idia laloatao . . . Iena kara maoromaoro be do ia noho ela bona hanaihanai.”—SAL. 112:6, 9.
1. (a) Dirava ese ia gwauraia kara maoromaoro taudia ibounai edia vaira negana be edena bamona? (b) Edena henanadai ia vara?
DIRAVA ese ia gwauraia kara maoromaoro taudia edia vaira negana be namo herea! Hanaihanai mai moale ida Iehova ena kara namodia ma haida do idia dibaia. Dirava ese ia karaia gaudia momo do idia dibaia dainai, idia ura dikadika Dirava idia hanamoa. Unai hahenamo ita abia totona, gau badana be “kara maoromaoro” ita karaia—Salamo karoa 112 be unai kara ia herevalaia badabada. To edena dala ai Iehova, helaga bona kara maoromaoro Diravana ese goevadae lasi taudia ia gwauraia diba kara maoromaoro taudia? Ena be dala idauidau ai ita hekwarahi kara maoromaoro ita karaia totona, to kerere ita karaia—nega haida kerere badadia ita karaia.—Roma 3:23; Iam. 3:2.
2. Lalokau Diravana be dahaka hoa karadia rua ia karaia?
2 Idia goevadae lasi taudia be kara maoromaoro taudia ai idia lao totona, Dirava be hoa karadia rua ia karaia. Unai be dahaka? Ginigunana be, ena Natuna lalokauna ena mauri be guba amo ia abia oho, bona rami-hebou kekeni ta ena bogana lalonai ia atoa, unai amo Iesu be Natuna goevadaena ai ia lao diba. (Luka 1:30-35) Gabeai, Iesu idia inai henia taudia ese idia hamasea neganai, Iehova be hoa karana iharuana ia karaia. Gauna be inai: Dirava ese mase amo Iesu ia hamauria, bona lauma tauna mai hairaina ai ia lao.—1 Pet. 3:18.
3. Dahaka dainai Dirava be mai moale ida ena Natuna dekenai guba maurina ia henia?
3 Iesu ese ia abia ahuna be guna tanobada ai ia do mai lasi neganai ia abia gauna amo ia idau. Unai ahuna be inai: Iesu be guba dekenai gau ta ese do ia hadikaia diba lasi maurina ia abia. (Heb. 7:15-17, 28) Iehova be mai moale ida unai ahuna ia henia, badina hahetoho idauidau lalonai Iesu be Dirava ia badinaia ela bona ia mase. Oibe, Iesu ena abidadama dainai, ena Tamana be Satani ena hereva ia hakoikoia—badina Satani ia gwau Dirava ena hesiai taudia ibounai be sibona edia ura idia tahua bona Dirava idia lalokau henia lasi.—Aon. 27:11.
4. (a) Guba ai Iesu be ita totona dahaka ia karaia, bona Iehova be dahaka ia karaia? (b) Iehova bona Iesu edia kara be edena bamona oi laloa?
4 Guba ai Iesu be kara ma haida ia karaia. “Unuseni Dirava ena vairanai, ita durua totona” ia be “sibona ena rarana ia abia vareai.” Iseda lalokau guba Tamana be mai moale ida Iesu ena boubou gauna ia abia dae, badina “Keriso sibona be iseda kara dika gwauatao dalana.” Ena rara be ‘iseda lalona ia hagoevaia’ dainai, “mauri Diravana ena hesiai gaukara helagana” ita karaia diba. Unai badina dainai, Salamo 112:1 (BHğ) ena hereva ita gwauraia be maoro: ‘Iehova ita hanamoa’!—Heb. 9:12-14, 24; 1 Ioa. 2:2.
5. (a) Dirava ese ita ia gwauraia kara maoromaoro taudia totona, dahaka ita karaia be namo? (b) Edena dala ai Salamo karoa 111 bona karoa 112 be idia hegeregere? (Futnout itaia.)
5 Dirava ese ita ia gwauraia kara maoromaoro taudia totona, namona be nega ibounai Iesu ena mauri davalaia boubouna ita abidadama henia. Dina ta ta ai, Iehova ita tanikiu henia be namo, badina ita ia lalokau henia bada. (Ioa. 3:16) Danu, dina ta ta ai Baibel ita stadilaia bona ita hekwarahi ena hereva ita badinaia totona. Bema ita ura Dirava vairanai iseda lalomamina ia namo, Salamo karoa 112 ena sisiba namodia ita badinaia be namo. Unai bona Salamo 111 idia torea daladia o sitaelo be idia hegeregere. Unai karoa ruaosi edia hamatamaia herevana be inai: “Lohiabada [“Iehova,” BHğ] umui hanamoa!” eiava “Aleluia!”a
Ta Ia Moale Ena Badina
6. Salamo karoa 112 ese ia gwauraia “tauna” be edena dala ai Dirava ese ia hanamoa?
6 “Lohiabada dekenai ia gari tauna be namo [“be ia moale,” NW ]. Lohiabada ena taravatu ia moalelaia noho tauna danu be namo. Inai bamona tau namona ena natuna, be do idia goada edia tano lalonai. Iena bese taudia, gabeai do idia vara taudia, ese Dirava ena hanamoa do idia davaria.” (Sal. 112:1, 2) Salamo torea tauna be siri 1 ai inai hereva ‘tau’ ia herevalaia, to siri 2 ai be inai hereva “taudia” ia gaukaralaia. Unai ese ia hahedinaraia Salamo karoa 112 be taunimanima momo idia noho oreana ia kikilaia. Unai dainai, Paulo be Dirava ese Keristani taudia ginigunadia ia kara namo henia karana ia kikilaia neganai, Salamo 112:9 ena hereva ia gwauraia lou. (2 Korinto 9:8, 9 duahia.) Unai salamo be hari tanobada ai Keriso murinai idia raka taudia edia moale dalana ia herevalaia!
7. Dahaka dainai Dirava ena hesiai taudia ese Dirava idia gari henia be maoro? Bona Dirava ena oda be edena bamona oi laloa?
7 Salamo 112:1 ena hereva hegeregerena, unai Keristani taudia momokanidia be Iehova idia “gari” henia bona idia moale bada. Unai gari—idia ura lasi Iehova idia habadua garina—ese idia ia durua Satani ena tanobada ena lauma idia dadaraia totona. To, Dirava ena Hereva stadilaia bona ena oda badinaia karana idia “moalelaia.” Unai oda ta be inai: Basileia ena sivarai namona be tanobada ibounai dekenai idia harorolaia. Danu, idia gaukara goada bese ibounai be diba tahua taudia ai idia halaoa sibona lasi, to gwau-edeede taudia idia hadibaia Dirava ena kota dinana be ia mai noho.—Ese. 3:17, 18; Mat. 28:19, 20.
8. (a) Dirava ena oda idia badinaia taudia be hari dahaka hanamoa idia abia noho? (b) Tanobada ai mauri hanaihanai helarona do idia abia taudia be vaira negana ai dahaka hahenamo do idia abia?
8 Dirava ena hesiai taudia be unai oda idia badinaia dainai, hari edia namba be 7 milioni mai kahana. Momokani, Dirava ena hesiai taudia be tanobada ai “idia goada” idia lao. (Ioa. 10:16; Apok. 7:9, 14, NW ) Dirava ese ena ura ia hagugurua neganai, idia be “Dirava ena hanamoa do idia davaria” noho! Tanobada ai mauri hanaihanai helarona do idia abia taudia be “hisihisi badana” amo do idia roho mauri bona “tanobada matamata” ai do idia lao, “unai gabu dekenai be kara maoromaoro sibona do ia noho.” Momokani, Aramagedono amo do idia roho mauri taudia be “Dirava ena hanamoa” momo do idia abia. Idia ese toreisi lou taudia milioni momo do idia welkam henia. Unai be moale negana! Dirava ena oda idia “moalelaia” taudia be goevadae taudia ai do idia lao bona “Dirava ena natuna edia hairaina bamona do idia abia.”—2 Pet. 3:13; Roma 8:21.
Moni Bona Kohu Gaukaralaia Namonamo
9, 10. Keristani taudia momokanidia ese Dirava ena diba bona aonega be edena bamona idia gaukaralaia? Bona edena dala ai edia kara maoromaoro be do ia noho ela bona hanaihanai?
9 “Iena famili taudia, be do mai edia moni bona kohu momo, bona iena kara maoromaoro, be do ia noho ela bona hanaihanai. Momokani dibura ia noho, to tau namona durua totona diari be ia diari noho, vadaeni ia be mai ena hariharibada, bona mai ena bogahisihisi, bona mai ena kara maoromaoro danu.” (Sal. 112:3, 4) Baibel negadia ai, Dirava ena hesiai taudia haida be mai edia moni bona kohu momo. Ma haida be mai edia moni bona kohu momo lasi, to Dirava ena lalonamo idia abia bona Dirava vairanai idia be taga taudia bamona. Iesu ena negai, reana Dirava vairanai idia manau taudia momo be idia ogogami bona ma haida ese idia matauraidia lasi. (Luka 4:18; 7:22; Ioa. 7:49) Herevana ta be mai ena moni bona kohu momo eiava lasi, to Dirava amo diba bona aonega ia abia be gau badana.—Mat. 6:20; 1 Tim. 6:18, 19; Iamesi 2:5 duahia.
10 Horoa taudia bona hutuma bada be Dirava ena diba bona aonega idia hunia lasi. To, idia ese tau namona dekenai edia “diari” idia hahedinaraia noho, herevana Satani ena tanobada ai “dibura ia noho.” Unai idia karaia dalana ta be inai: Idia ese ma haida idia durua Dirava ena diba bona aonega idia abia totona. Dagedage taudia ese Basileia harorolaia gaukarana idia koua toho, to idia kwalimu lasi. Unai gaukara namona ese ia havaraia huahuana “be do ia noho ela bona hanaihanai.” Danu, bema Dirava ena hesiai taudia be hahetoho lalonai kara maoromaoro idia karaia noho, idia diba idia be do idia “noho ela bona hanaihanai.”
11, 12. Horoa taudia bona hutuma bada taudia ese edia moni bona kohu be edena bamona idia gaukaralaia?
11 Horoa oreana bona “hutuma bada” be edia kohu bona moni amo ma haida idia durua. Salamo 112:9 ia gwau: “Mai edia gau lasi taudia dekenai, harihari gaudia ia henia vadaeni.” Hari, nega momo Keristani taudia momokanidia be edia moni bona kohu amo edia tadikaka bona dekena taudia, idia dabu taudia unai, idia durua. Ma danu, tano mareremarere bamona gaudia idia vara neganai, tadikaka taihu be edia moni bona kohu amo heduru idia henia. Iesu ia gwauhamata hegeregerena, unai ese moale ia havaraia danu.—Kara 20:35; 2 Korinto 9:7 duahia.
12 Mani oi laloa: Gima Kohorona be gado 172 ai idia halasia. Danu, ia be matakepulu bona taia kudima taudia totona idia karaia.
Kara Maoromaorodia Oi Karaia
13. Daidia be henia karana idia haheitalaia namo herea, bona edena dala ai idia ita tohotohoa diba?
13 “Haida dekenai harihari gaudia ia henia, bona mai laloa namona danu haida dekenai ia heniatorehai. . . . Unai bamona tauna be do ia moale noho.” (Sal. 112:5) Reana oi itaia, ma haida idia durua taudia be nega momo mai hekokoroku ida edia harihari gaudia idia henia eiava idia henia gaudia dainai idia lalohisihisi. Oi ura lasi unai bamona taudia amo heduru oi abia, ani? To, bema tau ta be mai moale ida harihari gaudia ia henia, oi be unai tauna dekenai oi moale, ani? Iehova ena haheitalai be namo herea, ia be mai moale ida ena harihari gaudia ia henia. (1 Tim. 1:11, NW; Iam. 1:5, 17) Iesu Keriso be Tamana ena haheitalai ia tohotohoa. (Mar. 1:40-42) Unai dainai, bema ita ura Dirava ese ita ia gwauraia kara maoromaoro taudia, vadaeni mai moale ida harihari gaudia ita henia, hegeregere haroro gaukara lalonai eda dekena taudia ita durua Iehova idia dibaia totona.
14. Edena kara haida be mai maoromaoro danu ita karaia be namo?
14 “Iena gaukara be, mai ena maoromaoro danu ia karaia.” (Sal. 112:5) Baibel ia peroveta bamona, kohu naria tauna mai ena kamonai be mai ena maoromaoro ida Biaguna ena kohu ia naria namonamo. (Luka 12:42-44 duahia.) Hegeregere idia ese elda taudia dekenai Baibel ena hakaua herevadia idia henia, bona nega haida elda taudia be unai idia gaukaralaia kongrigeisen ai kara dika badadia idia hamaoromaoroa totona. Ma danu, hesiai tauna mai ena kamonai ese hakaua herevadia ia henia dainai, tadikaka be kongrigeisen, misinari rumadia, bona Betele rumadia idia naria o haheaua namonamo diba. Elda taudia sibona lasi, to danu, Witnes taudia ibounai ese edia tadikaka, Witnes lasi taudia, bona bisinesi karadia dekenai kara maoromaoro idia hahedinaraia be namo.—Mika 6:8, 11 duahia.
Kara Maoromaoro Taudia be Hahenamo Idia Abia
15, 16. (a) Kara maoromaoro taudia be sivarai dikadia dainai idia gari, a? (b) Dirava ena hesiai taudia idia ura dahaka idia karaia noho?
15 “Tau namona be nega ta do idia hamorua lasi. Taunimanima ese ia do idia laloatao hanaihanai. Dika bada ia vara ena sivarai ia kamonai neganai, unai tau be do ia gari lasi, badina ia ese Lohiabada dekenai ia abidadama henia goada noho. Ia be ia laloa hekwarahi lasi, bona ia gari lasi, badina ia diba momokani, ia idia hadikaia gwauraia taudia be, ia ese mai kwalimu danu edia moru do ia itaia.” (Sal. 112:6-8) Hari, sivarai dikadia be momo, guna be unai bamona lasi—hegeregere tuari, terorist karana, gorere matamatadia, gorere gunadia idia hedinarai lou, raskol, hitolo, bona tanobada hadikaia karadia. Dirava ese ia gwauraia kara maoromaoro taudia be unai dika idia itaia o davaria danu, to idia gari lasi. Momokani, “idia laloa hekwarahi lasi” bona “gari lasi,” badina idia diba Dirava ena kara maoromaoro tanobada matamatana be kahirakahira do ia vara. Dika ia vara neganai, idia haheauka diba badina Iehova dekenai idia tabekau. Iehova be heduru ia henia, badina ia ura lasi ena kara maoromaoro taudia idia “moru.”—Fili. 4:13.
16 Danu, dagedage taudia ese Dirava ena kara maoromaoro taudia idia inai henia bona samania koikoi, to unai ese Keristani taudia momokanidia edia haroro gaukara ia koua diba lasi. Momokani, Dirava ena hesiai taudia be idia gini goada noho bona Iehova ia henia gaukara idia karaia noho, hegeregere Basileia ena sivarai namona idia harorolaia bona hahediba taudia halaoa gaukarana idia karaia. Ita diba, inai nega dokona lalonai kara maoromaoro taudia be dagedage bada do idia davaria. Ela bona Satani Diabolo, Magoga tauna Goga ese Dirava ena hesiai taudia ia tuari henia neganai, unai dagedage karana do ia dika rohoroho. To ‘ita idia hadikaia gwauraia taudia’ edia moru do ita itaia. Momokani, Iehova ena ladana hahelagaia negana ita itaia be moale bada gauna!—Ese. 38:18, 22, 23.
“Mai Hairaina ida Ia Abia Isi”
17. Edena dala ai kara maoromaoro tauna be “mai hairaina ida ia abia isi”?
17 Diabolo bona ena tanobada ia ore neganai, taunimanima ibounai ese Iehova ena ladana idia hanamoa hebou be moale negana! Dirava ese ia gwauraia kara maoromaoro taudia be Iehova ena ladana do idia hanamoa ela bona hanaihanai. Ta ese idia do ia halusia diba lasi, badina Iehova ia gwauhamata kara maoromaoro tauna “ena doa be mai hairaina ida ia abia isi.” (Sal. 112:9, BHğ) Kara maoromaoro tauna be ia kwalimu dainai do ia roho isi, badina ia itaia Iehova ena lohia siahuna idia inai henia taudia ibounai be idia lusi vadaeni.
18. Salamo karoa 112 ena hereva ginigabedia be edena bamona do idia guguru?
18 “Kara dika taudia ese inai iena goada idia itaia noho, bona idia badu noho. Idia ese unai tau namona do idia badu henia, bona do idia boio momokani. Kara dika tauna ena ura gauna ena anina, be do ia vara lasi.” (Sal. 112:10) Dagedage henia taudia edia inai karana bona mama karana be kahirakahira “do idia boio momokani.” “Hisihisi badana” ia vara neganai, edia ura gauna—iseda haroro gaukara do idia koua urana—be do ia guguru lasi.—Mat. 24:21, NW.
19. Ita diba momokani dahaka do ia vara?
19 Oi ura Satani ena tanobada hadikaia karana amo oi roho mauri, a? Bema inai tanobada dikana ia do ore lasi lalonai oi be gorere o buruka amo oi mase, oi ura gabeai kara maoromaoro taudia ida oi toreisi lou, a? (Kara 24:15) Haere be oibe bema Iesu ena mauri davalaia boubouna oi abidadama henia bona Iehova oi tohotohoa—Salamo karoa 112 ese ia gwauraia taudia idia karaia bamona. (Efeso 5:1, 2 duahia.) Iehova be idia bona edia kara maoromaoro do ia “laloatao.” Oibe, Iehova be idia do ia laloatao bona lalokau henia ela bona hanaihanai.—Sal. 112:3, 6, 9.
[Footnote]
a Salamo karoa 112 bona karoa 111 idia torea daladia o sitaelo be idia hegeregere. Salamo karoa 111 be Dirava ena kara ia herevalaia bona Salamo karoa 112 be unai kara ia badinaia tauna ia kikilaia; Salamo 111:3, 4 be Salamo 112:3, 4 ida ita hahegeregerea neganai, unai ita itaia diba.
Ita Laloa Dobu Henanadai
• “Aleluia” herevana ita gwauraia ena badina haida be dahaka?
• Dahaka dainai hari Keristani taudia momokanidia idia moale?
• Iehova be edena bamona ia henia tauna dekenai ia moale?
[Picture on page 25]
Dirava ese ia gwauraia kara maoromaoro taudia ese Iesu ena mauri davalaia boubouna idia abidadama henia be namo
[Pictures on page 26]
Kontribusen dainai tadikaka be dika negadiai heduru idia henia bona Baibel idia herevalaia bukadia idia halasia