Revareva ta Mexico amo
“Ena be Ai be Indian Taudia to Iehova ese Ai Ia Lalokau Henia, A?”
MELESIO, O’odham gado ia diba tauna ta, be nega haida ororo amo ia diho mai taoni dekenai gaukara ia tahua totona. Ia be Keristani heboudia ia lao, bona Baibel idia herevalaia bukadia ia abia ena hanua taudia totona. Ia noinoi ta ese idia do ia vadivadi henia bona Baibel amo idia do ia hadibaia.
O’odham taudia be Mexico ena not kahana ena ororo gabudiai idia noho. Iehova ena Witnes taudia edia kongrigeisen amo ena daudau be kilomita 240. Ai haida be emai lalona ai hadaia idia do ai vadivadi henia.
Ai ese motuka ta, palai, mahuta gaudia, aniani, bona petrol ai abia hegaegae, dina toi ena laolao totona, bona Durango ena siti ai rakatania. Daba 4 oklok ai heau matamaia, bona hora eit bamona kahu bada ororo daladia amo ai heau lao ela bona dala ena dokona. Unai be O’odham hanua ena vareai dalana. Ai vairanai be koura ta bona ororo ma ta ia noho.
Motuka be hanua ta dekenai ai rakatania, bona emai kohu ai huaia bena hora toi bamona ai raka ela bona koura ena henuna kahanai ai ginidae. Unuseniai kamepa ai karaia, au ai haboua, bona lahi ai karaia dagedage animal lulua totona, danu ai haida be hora toi ai mahuta bona ma haida idia noga, lahi naria totona.
Daba maragi ai, ororo ai daekau matamaia. Unuseniai raka daladia be momo dainai nega haida ai diba lasi edeseni ai lao. Ai ida ia lao tauna ta be O’odham gado ia diba sisina, unai dainai dala badinai idia noho rumadia dekenai ai davaria taudia ida Baibel ai herevalaia sisina. Ai hoa badina taunimanima be ai idia hamaoroa Los Arenalas—ai ura lao henia gabuna—dekenai haida idia noho, idia be sibona idia gwauraia Iehova ena Witnes taudia, bona unuseniai hebou idia karaia Baibel idia herevalaia totona. Unai sivarai dainai ai hoa, to unai ese ai ia hagoadaia danu.
Los Arenalas dekenai ai ginidae neganai, emai aena be mai edia blista. Unai hanua taudia edia ruma be raro amo idia karaia bona guhi be kadibodi amo idia karaia. Unuseniai sikuli bona paua be lasi. Danu idia be ma haida amo idia daudau, idia ogogami, bona edia aniani be koni amo idia karaia paraoa bona ma aniani haida sibona. Ai ese Melesio ai davaria bona ai ia itaia dainai ia moale dikadika. Ai ia boiria iena ruma dekenai bona ia gwau ia be dina ibounai Iehova ia guriguri henia, Witnes taudia do ia siaia, ena ruma bese bona hanua taudia dekenai Baibel idia hadibaia totona. Ia laloa edia henanadai ibounai ia haerelaia diba lasi.
O’odham taudia be lauma idia tomadiho henia. Idia ese ugava apena bona ena turia idia gaukaralaia idia ia gimaia totona, dina bona medu idia tomadiho henia, bona babalau taudia idia gari henia, unai taudia ese edia mauri idia hadikaia. Melesio ia gwau taoni ia lao loulou neganai, ia diba Iehova be Dirava momokani, unai dainai ena kaivakuku ibounai ia hadikaia ore. Hanua taudia idia laloa edia dirava ese ia do idia panisia. Gau ta ia vara lasi neganai, idia laloparara Iehova ena siahu ese edia dirava edia siahu ia hereaia. Unai dainai idia be Melesio ena famili edia Baibel stadi lalonai idia vareai. Melesio ese unai stadi lalonai iseda buka ia gaukaralaia.
Melesio ia gwau: “Idia lau hamaoroa namona be gimaia gaudia, hegeregere toni bona kaivakuku ibounai idia gabua guna.” Momo ese lauma gari henia karadia idia hanaia, bona Baibel stadi dekenai idia lao taudia edia namba ia daekau 80 mai kahana. Unai ai kamonai neganai, ai moale bona ai laloa unai adorahi ai hebou ta do ai karaia. Bena hosi guia taudia amo hereva ai siaia Melesio ena ruma ai idia hebou loulou taudia do idia hadibaia. Herevana unai be wiki lalonai bona nega kwadogi ai unai hadibaia hereva ai siaia, to taunimanima 25 idia mai, haida idia raka bona haida be doniki amo idia mai.
Taunimanima edia henanadai be Baibel amo ai haerelaia neganai, Melesio ese gado ai ia hahanaia. Edia henanadai haida be inai: “Ena be ai be Indian taudia to Iehova ese ai ia lalokau henia, a?” “O’odham gado ai ai guriguri neganai ia kamonai, a?” “Aramagedono do ia mai neganai, ena be taoni amo ai daudau, to Iehova be ai do ia laloa, a?” Ai moale badina Baibel amo unai manau taudia dekenai ai hahedinaraia, Iehova be manau taudia ia laloa bada, herevana idia be edena gado ai idia hereva o edia noho gabuna be daudau. Ai idia noia ta do ai siaia idia ia hadibaia totona.
Unai hebou murinai, emai tura matamatadia ida ai aniani hebou. Hanuaboi ai, gabu ia keru momokani, to ai moale badina idia ese ai dekenai ruma ta idia henia ai mahuta totona. Daba ai, idia ese ai idia bamoa bona dala kwadogina ta amo ai lao emai motuka dekenai, bena Durango dekenai ai giroa lou. Ena be ai hesiku to ai moale bada.
Unai kudou-maoro taudia ai hedavari henia be hahenamo badana, idia momo be duahiduahi o toretore idia diba lasi, bona Spanish gado idia herevalaia lasi, to idia ura Dirava momokanina idia dibaia bona tomadiho henia! Ai vadivadi murinai, Witnes taudia siks be unai hanua dekenai idia lao, bona wiki toi idia noho. Idia ese taunimanima 45 bamona idia durua, unai taudia idia ura Iehova idia hesiai henia. Idia ibounai be hanaihanai hebou dekenai idia lao.
Gau namona ma ta be inai: Los Arenales ai ia noho sitoa maragina tamona dekenai kuku idia hoihoilaia lou lasi. Badina momo be Baibel idia stadilaia bona idia ibounai ese kuku ania karana idia hadokoa. Danu edia headava idia hamaoromaoroa.
[Picture on page 23]
Melesio bona ena adavana, edia natudia kekeni foa, bona ena ravana
[Pictures on page 24]
Los Arenales ai, Baibel stadi ta bona Keristani hebou
[Picture Credit Line on page 24]
Servicio Postal Mexicano, Correos de Mexico