Baibel Duahia Karana Oi Moalelaia, A?

LORRAINE ia gwau: “Baibel lau duahia matamaia neganai, ia auka. Bona lau laloparara lasi dainai, gau idauidau ese egu lalona idia veria.”

Ma haida danu idia gwau Baibel idia duahia matamaia neganai, ia auka. To, Baibel idia duahia noho badina idia diba unai be mai anina bada. Marc ia gwau: “Baibel duahia karana bona sibona egu stadi lau karaia neganai, gau momo ese egu lalona idia veria. Iehova lau guriguri henia loulou bona lau hekwarahi egu Baibel duahiduahi lau atoa guna totona.”

Dirava ena Hereva oi laloa bada totona, dahaka oi karaia diba? Edena dala ai Baibel duahia karana oi moalelaia diba? Henunai ai torea dala haida mani oi laloa.

Tahua Gaudia Bona Hagugurua Daladia

Oi guriguri bona gau ma haida oi laloa lasi. Iehova oi noia oi do ia durua iena Hereva stadilaia urana oi habadaia totona. Ia oi noia emu lalona ia kehoa ena aonega herevadia oi lalopararalaia totona. (Sal. 119:34) Bema unai oi karaia lasi, emu Baibel duahia karana do oi moalelaia lasi. Lynn ia gwau: “Nega haida Baibel lau duahia haragaharaga dainai, mai anina bada herevadia lau reaia. Danu, nega momo point badadia haida lau lalopararalaia namonamo lasi. To, Iehova lau noia lau do ia durua egu lalona lau biagua totona, unai amo lau duahia gauna sibona lau laloa.”

Oi dibaia gaudia oi laloa bada. Namona be oi laloatao, Baibel ena hereva momokani oi lalopararalaia bona oi badinaia neganai, mauri hanaihanai oi abia diba. Unai dainai, namona be oi hekwarahi oi dibaia gaudia oi badinaia totona. Chris ia gwau: “Baibel lau duahia neganai, egu kara bona lalohadai kereredia lau hamaoromaoroa daladia lau davaria. Bona Baibel bona buka ma haida edia hereva ese lau idia durua bada, ena be unai toretore taudia be lau idia diba lasi.”

Oi ura hagugurua gaudia oi abia hidi. Baibel ese ia herevalaia taudia amo gau matamatadia oi dibaia diba. Insight on the Scriptures eiava Watch Tower Publications Index amo Baibel ese ia herevalaia taudia edia sivarai ma haida oi duahia diba. Baibel ese ia herevalaia taudia edia sivarai oi duahia neganai, edia kara do oi diba namonamo.

Siri gaukaralaia dala matamatadia oi tahua. (Kara 17:​2, 3) Sophia be unai bamona ia karaia. Ia gwau: “Haroro gaukara bona nega ma haida ai siri do lau gaukaralaia dala matamatadia lau tahua. Unai amo Baibel ena hereva momokani be ma haida dekenai lau herevalaia namonamo diba. Gima Kohorona be tulu namona unai karaia totona.”​—⁠2 Tim. 2:⁠15.

Baibel sivaraidia be emu lalona ena matana amo oi itaia. Heberu 4:12 ia gwau: “Dirava ena hereva be ia mauri noho.” Baibel oi duahia neganai, Baibel ese ia herevalaia taudia ese idia itaia gaudia be emu lalona ena matana amo oi itaia toho. Idia kamonai gaudia oi kamonai bona edia hemami oi lalopararalaia toho. Idia davaria hekwakwanai be oi ese oi davaria hekwakwanai ida oi hahegeregerea. Bona edia hekwakwanai idia hanaia dalana amo gau haida do oi dibaia. Unai amo Baibel ena hereva oi lalopararalaia bona laloatao diba.

Nega oi atoa siri aukadia edia anina oi tahua bona lalopararalaia totona. Emu stadi negadiai, nega bada oi atoa unai oi karaia totona be namo. Danu, henanadai haida edia haere oi diba totona, buka ma haida oi duahia be namo. Nega Matamata Baibel ena Diksenari, Baibel Herevadia Edia Indeks bona Apendiks dekenai oi diba namonamo lasi siri o hereva haida oi tahua diba. Oi duahia gaudia oi lalopararalaia bona oi badinaia neganai, Baibel duahia karana do oi moalelaia. Vadaeni, Salamo torea tauna bamona do oi gwau: “[Iehova] oiemu oda hereva be nega ibounai lau dogoatao noho, badina inai hereva be egu kudouna ena moale gauna.”​—⁠Sal. 119:111.

Baibel oi duahia haragaharaga lasi. Sibona emu stadi totona oi atoa nega oi lalohadailaia namonamo. Kongrigeisen hebou totona do oi hegaegae negana oi laloa danu. Raquel ia gwau: “Nega momo gau idauidau lau lalohekwarahilaia dainai, egu stadi negana lau moalelaia lasi. Unai dainai, lau laloa stadi nega kwadogidia be lau dekenai ia hegeregere. Unai bamona lau karaia neganai, egu stadi lau moalelaia.” Chris ia gwau: “Egu stadi lau karaia haragaharaga neganai, lau moale lasi, badina gau momo lau dibaia lasi bona lau duahia gaudia be lau laloatao lasi.” Unai dainai, nega oi atoa bona oi haragaharaga lasi.

Dirava ena hereva oi ura henia dikadika. Aposetolo Petero ia gwau: “Beibi matamata ese rata idia ura henia dikadika bamona, Dirava ena hereva amo ia mai rata goevagoeva do umui ura henia dikadika, unai amo do umui tubu daekau bona hahemauri do umui abia.” (1 Pet. 2:⁠2) Ta ese beibi dekenai rata ura henia dikadika karana ia hadibaia lasi. To idia vara neganai, unai ura be ia noho vadaeni. To Baibel ia gwau, ita ese Dirava ena Hereva ura henia karana ita habadaia be namo. Bema dina ta ta ai Baibel ena rau tamona oi duahia, unai ese Baibel duahia urana do ia habadaia. Matamanai, oi laloa Baibel duahia karana be ia auka, to gabeai do oi moalelaia.

Baibel siridia oi laloa dobu. Namo bada do oi davaria bema oi duahia gaudia oi laloa dobu. Unai amo oi duahia gaudia ibounai do oi lalopararalaia namonamo. Unai bamona oi karaia neganai, Baibel ena aonega herevadia be ageva mai hairaina bamona emu aiona dekenai do oi kwatua.​—⁠Sal. 19:14; Aon. 3:⁠3.

Nega Gaukaralaia Namonamo

Stadi negana namona oi badinaia be mai ena hekwarahi, to ena hahenamo be momo. Baibel siridia do oi lalopararalaia namonamo. (Heb. 5:​12-14) Baibel duahia karana amo oi abia aonega ese emu kara do ia hanamoa, danu maino bona moale do oi davaria. Bona Dirava ena Hereva lalonai ia noho aonega idia dibaia bona badinaia taudia ese “mauri namona” do idia abia.​—⁠Aon. 3:​13-18.

Baibel oi stadilaia namonamo neganai, oi be “laloa kehoa tauna” ai do oi lao. (Aon. 15:14) Unai ese oi do ia durua Baibel ena hereva amo ma haida do oi hagoadaia diba. Baibel bona ‘igui hesiai tauna mai ena kamonai bona kara maoromaoro’ ese ia halasia buka bona magasin edia hereva amo emu abia hidi oi karaia neganai, do oi moale bona lo Keristani tauna ai do oi lao. (Mat. 24:45) Lalohadai maorodia do oi abia, emu hereva bona kara ibounai be Iehova ena Hereva hegeregerena bona do oi moale. Danu, emu hetura karana Iehova ida be do ia goada ia lao.​—⁠Sal. 1:​2, 3.

Mai emu kudouna ibounai ida Dirava oi lalokau henia karana ese oi do ia doria emu abidadama be ma haida dekenai oi herevalaia totona. Unai ese anina namona do ia havaraia. Sophia ena ura be Baibel siri idauidau ia laloatao, unai amo ruma tauna ena lalona ia veria diba bona ena haroro gaukara ia hanamoa danu. Ia gwau: “Baibel ena hereva dainai taunimanima be edia mauri idia haidaua lau itaia neganai, lau moale bada.”

To, mai anina bada gauna be Dirava ena Hereva ita stadilaia neganai, Iehova ena turana namona ai ita lao diba. Baibel stadi amo iena taravatu ita lalopararalaia bona iena lalokau, hariharibada bona hahemaoro goeva karadia do ita laloa bada. Dirava tura henia karana be mai anina bada bona gau ibounai ia hereaia. Oibe, namona be Dirava ena Hereva stadilaia karana oi goadalaia. Unai oi karaia neganai, oi be emu nega oi gaukaralaia namonamo unai.​—⁠Sal. 19:​7-11.

[Box/Pictures on page 5]

TAHUA GAUDIA BONA HAGUGURUA DALADIA

▪ Oi guriguri bona gau ma haida oi laloa lasi.

▪ Oi dibaia gaudia oi laloa bada.

▪ Oi ura hagugurua gaudia oi abia hidi.

▪ Siri gaukaralaia dala matamatadia oi tahua.

▪ Baibel sivaraidia be emu lalona ena matana amo oi itaia.

▪ Nega oi atoa siri aukadia edia anina oi tahua bona lalopararalaia totona.

▪ Baibel oi duahia haragaharaga lasi.

▪ Dirava ena hereva oi ura henia dikadika.

▪ Baibel siridia oi laloa dobu.

[Picture on page 4]

Baibel ena sivarai ta oi duahia neganai, namona be oi laloa oi danu be unai nega ai oi noho