April Lalonai “Kara Namodia Do Ita Karaia”!

¹ Lagani gunanai tanobada hegegemadai, Basileia Sivaraina Namba 34 pepapepa milioni momo ita henia, guna unai bamona haroro gaukara ita karaia lasi. Kongregesen pablisa bona painia taudia be mai edia ura ida unai gaukara idia karaia. Oi be idia huanai oi gaukara, a? Bema idia ida oi gaukara, ai diba unai sivarai halasia gaukarana oi moalelaia bada. Reana hari oi laloa noho, Lagani 1996 ai edena bamona “kara namodia do ita karaia”?​—Tito 2:​14.

² April ai, April-June, 1996, Noga!, ena hereva badana be “Tuari be Lasi Vaitani Negana,” do ita hariharilaia; unai nega totona idia hegaegaelaia magasin. Badina be taunimanima momo ese unai hereva do idia ura dainai, iseda magasin henia gaukarana do ita habadaia. Unai Noga! ena hereva be mai anina bada gauna dainai, namona be April bona reana May lalonai umui hariharilaia, ela bona iboudiai umui henia.

³ Iseda Tahua Gauna​—Pablisa Iboudiai Idia Haroro: Bema Papua New Guinea dekenai idia noho pablisa taudia ibounai be April lalonai unai gaukara idia karaia, unai be hagoadaia gauna badana. Memorial, Keriso ena mase laloatao hebouna, bona Dirava ena kara namo ita laloa noho dainai, ita be “hanamoa Dirava dekenai do ita henia” iseda haroro gaukara amo.​—Heb. 13:15.

⁴ Namona be kongregesen taudia iboudiai oi durua idia be April lalonai haroro gaukara idia karaia diba mai edia ura ida. (Roma 15:1) Buka stadi naria taudia be edia grup dekenai idia noho tadikaka bona taihu edia mauri dalana idia dibaia bona idia durudia, bema mai dalana. Haida be lao dalana lasi, a? Daidia be mai edia motuka, eiava durua dalana ta idia henia diba? Haida be manau momokani taudia dainai idia gari, a? Idia manada vadaeni pablisa taudia be idia ida idia gaukara diba, a? Haida be gorere eiava badina idauidau dainai ruma idia rakatania diba lasi, a? Telefon, revareva, eiava dala ma ta amo haroro gaukara idia karaia diba, a?

⁵ Reana haroro gaukara idia manokalaia taudia oi hagoadaia noho, reana idia oi ha-uraia bena haroro gaukara do idia hamatamaia lou. Hari inai Noga! hariharilaia gaukarana be nega namona edia hesiai gaukara hamatamaia lou totona.

⁶ Emui Natudia Hadibaia Bena Do Idia Haroro: Iehova ena Witness taudia edia natudia momo be lagani momo lalodiai edia tama sina idia bamoa ruma-ta-ruma-ta gaukara dekenai, to idia be bapatiso lasi pablisa ai idia do lao lasi. Hari be nega namona unai gaukara idia hamatamaia totona, a? Mai anina bada ruma-ta-ruma-ta gaukara be mai edia kudou ibounai ida idia hamatamaia diba hari, a? Famili kwaradia be famili ena Baibel stadi negana do idia gaukaralaia idia hegeregere natudia edia kiki herevana hegaegaelaia totona, edia mauri laganidia bona diba hegeregerena. Idia bada sisina natudia be henanadai namona idia abia hidi, ruma tauna dekenai do idia henia bena magasin lalonai ena haere do idia hahedinaraia. Maragidia be hereva kwadogina ai idia haroro diba. Hegeregere, ruma tauna dekenai idia gwau diba, “inai hua lalonai tanobada ibounai lalonai inai magasin ai hariharilaia” bona hagoadaia idia duahia totona. Umui hegaegae neganai, namona be ura lasi herevadia hanaia daladia umui kikilaia. Herevalaia bukana lalonai lalohadai namodia momo do umui davaria. Aniani negadia ai bona nega idaudia ai, famili taudia umui hagoadaia edia ekspiriens namodia idia herevalaia.

⁷ Idia Hegeregere Baibel Stiuden Taudia ese Iesu Ia Karaia Gaukarana Idia Karaia: Iesu ese hahediba herevadia ia herevalaia sibona lasi. Iena stiuden taudia ia bamoa haroro gaukara dekenai bona haroro dalana ia hadibadia. (Luka 8:1; 10:​1-​11) Hari inai nega lalonai be edena bamona? Momokani, dala maorona ai ita hagoadaia Baibel stiuden taudia haida be do idia hegeregere bapatiso lasi pablisa gaukara idia karaia matamaia April lalonai.

⁸ Bema Baibel stadi ta oi naria, namona be inai henanadai oi laloa: Stiuden tauna be ena mauri laganidia bona diba hegeregerena, lauma dalanai ia tubu noho, a? Ia ese ia dibaia vadaeni gaudia be ma haida dekenai ia herevalaia, a? Ia ese ‘mauri matamata ia kwatua vadaeni,’ a? (Kol. 3:​10) Ia be bapatiso lasi pablisa taudia edia taravatu, Hesiai Gaukara bukana, rau 97-9 ai idia torea gaudia, ia badinaia vadaeni, eiava? Bema oi laloa ia hegeregere vadaeni, namona be umui kikilaia, ani? Stiuden haida oi boiria neganai, maoromaoro idia ura unai gaukara idia karaia. Bema ia gwau ia ura, gau ginigunana be kongregesen naria tauna ese elda rua do ia abia hidi ia ida do idia kiki totona. To danu, reana gau ta dainai ia do ura lasi. Reana elda ta ese oi do ia bamoa emu Baibel stadi dekenai bona stiuden ena lalohadai hereva momokani dekenai do umui tahua. Iena hereva ia kamonaia murinai, reana elda tauna be Baibel amo sisiba namona ia henia diba.

⁹ “Nega Namona Ia Noho” Heduru Painia Gaukara Karaia Totona: Lagani ta ta Memorial ena nega ai, tadikaka tausen momo be Iesu ena boubou karana idia laloa bada dainai edia ‘nega idia haorea kava lasi,’ heduru painia gaukara idia karaia. (Ef. 5:​15-​17) Ena be gau haida idia dadaraia, to ahuna namodia do idia abia. Matamata taudia haida be sikuli holide edia nega ai heduru painia gaukara idia karaia. Ful-taim moni gaukara idia karaia tau bona hahine badadia be adorahi bona Saturday bona Sunday ai edia heduru painia gaukara idia karaia. Unai dainai, nega haida, famili taudia iboudiai ese heduru painia gaukara idia karaia hebou diba! Kongregesen haida lalonai edia elda bona hesiai taudia bona edia adavadia kahirakahira iboudiai, ese heduru painia gaukara karaia totona edia ladana idia torea. Kongregesen taudia momo be idia edia haheitalai namona ese ia hagoadaia dainai, April ai heduru painia gaukara idia karaia danu.

¹⁰ Herevana heduru painia gaukara oi karaia diba eiava lasi, to namona be April lalonai emu haroro gaukara oi habadaia. Dahaka oi ura o karaia toho oi laloa guna, reana do oi hekwarahi to do oi karaia diba gauna oi abia hidi. Bema oi ura emu ‘kohu do oi haorea, emu tauanina danu do oi haorea’ Iehova ena hesiai gaukara lalonai, iena hahenamo do oi davaria.​—2 Kor. 12:15.

¹¹ Haroro Heboudia: Noga! hariharilaia negana ai, namona be dina ta ta iboudiai daba ai haroro hebou umui karaia bena haroro umui hamatamaia haraga diba. Namona be adorahi haroro grup umui karaia danu. Pablisa momo do idia haroro Saturday bona Sunday ai dainai, namona be Noga! hariharilaia negana lalonai kongregesen ese daba bona adorahi ai haroro hebou idia karaia.

¹² Namona be haroro hebou idia naria taudia ese teritori sisina bada idia hegaegaelaia. Nega daudau oi karaia lasi teritori dekenai umui lao guna.

¹³ Magasin Hida Do Oi Hariharilaia? Oi sibona ese unai henanadai oi haerelaia diba. Noga! hariharilaia negana lalonai, hida oi abia hidi neganai, emu teritori, emu mauri laganidia, emu goada, unai gaukara lalona do oi haorea negana ena bada, bona unai bamona gaudia ma haida oi laloa guna be namo. January 1, 1994, Gima Kohorona ena sisiba be inai: “Pablisa ese magasin 10 hua ta ta lalodiai hariharilaidia dalana do idia tahua be namo reana; pioneer taudia ese 90.” Unai bamona tahua gauna be hegeregere oi dekenai, a?

¹⁴ Elda Taudia​—Hegaegae Namonamo Guna: Kongregesen elda taudia ese April ena haroro gaukara badana ta do idia naria. Bema mai dalana, namona be elda ese tadikaka idia hagoadaia teritori ibounai dekenai inai Noga! idia hariharilaia. Namona be emu kongregesen ena bisinesi teritori umui karaia namonamo. Unai teritori idia karaia tadikaka bona taihu ese mai hemataurai ida dabua namodia idia atoa be namo. Hamatamaia hereva latana oi karaia lasi. Bisinesi tauna dekenai oi lao neganai, ia oi hamaoroa bisinesi taudia momo oi davaria lasi edia ruma ai, unai dainai edia gaukara gabudia ai oi lao, do ia ura henia sivaraina oi henia totona. Bena magasin ena hereva tamona oi hahedinaraia. Dala gaukara emu kongregesen ena teritori lalonai umui hegaegaelaia namonamo danu. Dala gaukara karaia namonamo dalana namona be idia lao mai taudia dekenai oi lao; oi dekenai idia mai totona oi naria lasi. Taunimanima momo be oiemu gaukara do idia itaia dainai, namona be hemataurai toana oi hahedinaraia. Reana emu teritori dekenai idia noho gabudia ma haida oi vadivadi henia diba danu, hegeregere airport, hospital, maketi, bona motuka atoa gabudia. Emu kongregesen ena elda oreana do idia abia hidi edena bamona gaukara do umui karaia unai bamona gabudia emui kongregesen ena teritori ai.

¹⁵ Iehova be gaukara dekenai ia hesiku lasi. (Ioa. 5:​17) Ia ese guba bona tanobada, planet bona animal danu ia havaraia; to ena gaukara ia karaia noho ela bona tanobada ai ia havaraia gauna hereadaena ta ia karaia​—taunimanima. Dirava ia ura ia gaukara noho dainai, mauri ita abia. Ita be “Dirava ena kara bamona” ita karaia taudia dainai, iseda lalokau ia totona ese ita do ia hagoadaia “kara namodia” do ita karaia goadagoada. (Ef. 5:1; Tito 2:​14) Badina be Iehova dekenai iseda goada ibounai ita henia be maoro momokani, bona vaia ita gaukara goada neganai ita ura anina ia vara dainai, namona be iseda hesiai gaukara ita karaia namonamo. Momokani, Iehova ese iseda gaukara ia totona ia laloa bada, bona ita diba ita hekwarahi kava lasi. (1 Kor. 15:58) Unai dainai, mai eda lalona ibounai ida, April lalonai do ita haroro goadagoada, bona ita diba Iehova ese iseda gaukara do ia abia dae bona do ia hanamoa, bona anina bada herea do ia havaraia!