Magasin ese Basileia Idia Harorolaia
1 Taunimanima momo idia diba Iehova ena Witness taudia ese Dirava ena Basileia idia harorolaia goadagoada. Ita hariharilaia Gima Kohorona bona Awake! magasin be mai edia siahu bada, idia ese taunimanima milioni momo idia durua Dirava ena ura idia diba totona. Idia lalonai ia noho sivarai be sivarai namona momokani, badina ia hahedinaraia taunimanima edia helaro tamona be Dirava ena guba Basileiana.
2 Unai magasin ese taunimanima idia durua momokani gaudia—edia hemami, noho dalana, bona lauma gaudia—idia herevalaia. Gabu ibounai dekenai, kara goeva bona ruma bese laloa bada karadia idia dika idia lao lalonai, Gima Kohorona bona Awake! ese taunimanima dekenai Baibel ena hakaua herevadia badinaia dalana idia hadibaia, bona unai amo edia mauri dalana idia hanamoa. April bona May lalonai unai magasin edia sabskripsen do ita hariharilaia mai eda moale ida.
3 Taunimanima ese Idia Ura Henia: Taunimanima be Gima Kohorona bona Awake! magasin idia ura henia ena badina haida be inai:
◼Idia be magasin mai edia kara maoromaoro bona hereva momokani dainai, idia ese namo bona dika edia idau idia hahedinaraia goevagoeva.
◼Idia ese Dirava ena gwauhamata tanobada be iena Basileia ena siahu henunai do ia halaoa bona kara maoromaoro Paradaisona do ia mailaia gwauhamatana idia herevalaia.
◼Idia ese nega korikori ai hereva idauidau mai edia anina bada idia hahedinaraia, bona idia be gabu bona mauri dala idauidau taudia edia lalona idia veria.
◼Edia hereva be kwadogi, taunimanima idia hadibaia, idia be momokani, bona taunimanima lalo-dika henia herevadia idia hahedinaraia lasi.
◼Edia laulau namodia ese taunimanima edia lalona idia veria, bona anina ia hedinarai haraga dalanai idia torea dainai taunimanima ese idia duahidia be auka lasi.
4 Oi be mai Emu Sabskripsen, A?: Oi be mai emu Baibel bona ane buka, a? Vadaeni, sibona emu sabskripsen oi abia danu be namo, ani? Iseda magasin edia namo oi diba murinai, do oi ura taunimanima ma haida oi durua edia namo idia diba totona.
5 Mai Lalo-Goada ida Sabskripsen Hariharilaia: Tau ta oi do hereva henia lasi neganai oi laloa lasi sabskripsen do ia abia lasi, to namona be mai emu kudouna bona mai emu goada ida oi hereva henia bona ena lalona oi veria. Nega momo taunimanima idia ura sabskripsen idia abia, to namona be sibona eda lalohadai sabskripsen henia gaukarana dekenai ita haidaua. Dirava amo goada ita abia be namo bona mai lalo-goada ida sabskripsen ita hariharilaia.—Kara 9:27; 1 Tes. 2:2.
6 Ruma Tauna Ena Toana Hegeregerena Oiemu Hereva Oi Haidaua: Tau ta, hahine ta, buruka tauna ta, eiava matamata tauna ta, oi diba vadaeni tauna ta eiava oi diba lasi tauna ta dekenai oi hereva totona, oi haidaua diba auka lasi herevana oi hegaegaelaia. Namona be October 1996 ena Iseda Basileia Gaukara pepana ai idia noho heduru herevadia ita duahia lou bona ita badinaia.
7 Sabskripsen Abia Daladia: Inai dala idauidau amo sabskripsen ita abia diba: ruma-ta-ruma-ta gaukara ai, lou henia gaukara ai, dala gaukara ai, bisinesi gabudia ai, bona dekena taudia, iseda gaukara hebou taudia eiava sikuli taudia, tisa taudia, Memorial dekenai idia mai taudia, magasin idia abia loulou taudia dekenai ita hariharilaia, eiava harihari gauna bamona iseda varavara taudia dekenai ita henia.
8 Heduru Herevadia: Mani inai heduru herevadia haida oi tohoa.
◼Magasin haida mai edia hereva idauidau oi abia loaloa.
◼Sibona emu sabskripsen ena kumia pepana mai emu ladana oi abia lao, bona pos opesi amo do ia mai dalana oi hahedinaraia.
◼Magasin ena volium ta eiava maua ta oi abia lao Baibel stadi ta eiava lou henia ta oi karaia neganai, bona lagani tamona lalonai K10.00 amo idia abia diba ena bada oi hahedinaraia.
9 Ura Lasi Herevadia Hanaia Daladia: Inai hereva “sabskripsen” ese taunimanima momo ia hagaria. Idia laloa unai hereva ena anina be orea ta lalonai idia “vareai”. Reana inai hereva ese oi do idia durua:
◼“Magasin idia halasia taudia amo maoromaoro oiemu pos opesi mauana dekenai gabeai idia mai magasin 24 do oi abia diba.”
◼“Lagani ta lalonai magasin be oi dekenai do idia siaia, bona oi dekenai maduna ta idia henia lasi. Lagani tamona murinai do idia hadokoa bema oi sibona be sabskripsen oi hamatamaia lou lasi.”
◼“Hereva haida mai edia henanadai ida idia printaia gaudia amo lagani-tamona Baibel stadi kosi ta do oi abia diba.”
10 Sabskripsen Ena Davana be Maoro: Niuspepa ena davana ese lagani tamona ena sabskripsen ena magasin ta ta edia davana ia hanaia. Namo lasi oi laloa taunimanima haida be moni lasi sabskripsen idia abia totona. Taunimanima momo ese anina bada lasi, bona idia hadikadia diba gaudia, hegeregere kuku bona buatau, dekenai edia moni idia negea. Pablisa ta ia daradara bema dabua dikadia ia karaia bona ena ruma be namo lasi tau burukana dekenai sabskripsen ia hariharilaia be namo eiava. Ia hoa bada unai tau be sabskripsen ia abia neganai! Bema taunimanima idia kamonai namonamo to idia gwau unai negana ai idia be moni lasi sabskripsen totona, sabskripsen ena fom oi hahonua be namo bona gabeai oi giroa lou davana oi abia totona.
11 April Bona May ai Gaukara Goada: Gima Kohorona bona Awake! magasin idia duahia taudia milioni momo ese edia hereva idia abia dae bona idia laloa bada. Idia ese Basileia idia harorolaia namonamo dainai, namona be idia ita huaia loaloa, bona dala ia kehoa neganai ita hariharilaia toho. Namona be April bona May huadia dekenai sabskripsen momo ita abia bona iseda magasin hariharilaia gaukarana ita habadaia!