Hegaegae Karana ese Moale Ia Havaraia
1 Haroro gaukarana ese moale bada ia havaraia ita dekenai. (Sal. 89:15, 16) Momokani, unai bamona moale davaria totona, hegaegae be gau badana. Bema ita hegaegae namonamo, gaukara do ita karaia namonamo diba, bona bema gaukara ita karaia namonamo neganai, moale bada herea do ita abia.
2 Idia Noho Tuludia Oi Gaukaralaia: Oiemu hegaegae dalana oi matamaia neganai, namona be Iseda Basileia Gaukara pepana lalonai idia noho herevadia oi duahia bona oi lalodia namonamo. Nega momo, Basileia ena sivarai oi harorolaia namonamo bona ena anina namona oi havaraia totona, oi do idia durua hamatamaia hereva namodia idia hegaegaelaia. Ia lalonai do oi davaria edena dala amo ta ena koua herevana oi hanaia diba. Baibel stadi ta oi hamatamaia totona, lou henia do oi karaia namonamo daladia idia gwauraia noho danu. Unai heduru herevadia be oiemu ura hegeregerena oi gaukaralaia diba ela bona dala ta be ia namo oi dekenai. Heduru gauna ma ta be Buka Helaga Herevalaia bukana, hamatamaia herevadia bona koua herevadia haerelaia daladia idauidau ia gwauraia, unai ese dala idauidau ai oi do ia durua, oi davaria hekwakwanaidia hanaia totona.
3 Do oi hariharilaia buka o magasin oi duahia, bena ruma tauna ena lalona ia veria diba herevana ta eiava rua oi abia hidi. Reana nius dekenai oi kamonaia eiava oi duahia sivaraina ta, ena lalona ia veria diba sivaraina, amo hereva oi hamatamaia diba. Momo ese idia gwauraia koua herevadia oi laloa bona edena bamona do oi haere diba oi lalohadailaia. Bena miniti haida lalonai, ruma tauna dekenai do oi gwauraia herevana oi tohoa.
4 Hesiai Hebou Reaia Lasi: Hesiai Hebou lalonai, Iseda Basileia Gaukara pepana dekenai idia torea gaudia idia herevalaia, riviulaia, bona idia haheitalaia neganai, namona be oi hakala namonamo. Emu hereva lalonai do oi gaukaralaia diba herevadia oi lalodia. Oiemu haroro gaukara lalonai nega momo idia vara gaudia haida oi laloa, bena emu haroro gaukara amo anina namona do oi havaraia daladia oi lalohadailaia. Hebou ia do matamaia lasi eiava hebou murinai, namona be pablisa taudia haida ida unai gaudia umui kikilaia hebou.
5 Bema ‘oi hegaegae gaukara namodia ibounai do oi karaia totona,’ moale bada herea do oi davaria bona ma haida do oi durudia mauri dalanai idia raka totona.—2 Tim. 2:21.