Iehova Ena Heduru Abia Totona Oi Guriguri
1 Iesu ese ena hahediba taudia ia hadibaia Iehova ena hahenamo edia haroro gaukara lalonai idia abia be gau badana. (Mat. 9:37, 38) Mai eda lalona bona kudouna ibounai ida guriguri amo Iehova ita hanamoa bona ita tanikiu henia neganai, ita hahedinaraia heduru abia totona Iehova dekenai ita tabekau momokani. (Fil. 4:6, 7) Baibel ese ita ia hagoadaia “guriguri bona noinoi” daladia idauidau do ita goadalaia, bona unai be mai anina bada iseda haroro gaukara gurigurilaia karana dekenai.—Ef. 6:18.
2 Iehova ena kara hereadaedia bona ia karaia gaudia dainai, guriguri amo ia ita hanamoa. Ia be ita ese ita harorolaia sivarai namona ia Henia Tauna dainai ita hanamoa. Ia do ita hanamoa ena badina be ia dainai iseda hesiai gaukara ita karaia namonamo.—Sal. 127:1.
3 Iseda tanikiu guriguridia amo ita hahedinaraia Iehova ena ura bona palani ita lalo-pararalaia karana ita laloa bada. Ma haida dekenai Basileia ena hereva momokani ita harorolaia karana be hahenamo badana, ani? Iseda haroro gaukara lalonai ita hagugurua gaudia dainai, Iehova ita tanikiu henia.—Sal. 107:8; Ef. 5:20.
4 Baibel stadi do idia abia dae taudia ita davaria totona, bona edia kudouna lalonai hereva momokani do ita atoa totona, Iehova ena heduru ita noia be maoro. Unai bamona guriguri amo ita hamomokania Iehova sibona ese iseda haroro gaukara ena anina do ia havaraia.—1 Kor. 3:5-7.
5 Taihu ta ia laloa hahine ta dekenai Gima Kohorona bona Awake! magasin ia henia neganai ia duahidia lasi. Taihu ia ura lasi unai anina bada magasin ia henia kava dainai, Iehova ia noia bema unai hahine ese ia duahidia lasi ia dadaraidia be namo. Gabeai taihu ia vadivadi lou neganai, unai hahine ena adavana ia gwau: “Oi lau tanikiu henia inai magasin oi mailaidia hanaihanai dainai. Lau duahidia noho bona lau ura henidia bada.”
6 Mai manau bona momokani ida Iehova ena heduru ita noia goadagoada diba, taunimanima idia kamonai lasi eiava ita idia kirikirilaia karana ita haheaukalaia bona taunimanima gari henia mamina ita negea totona, unai amo ma haida do ita haroro henidia mai eda goada ida. (Kara 4:31) Iseda hesiai gaukara helagana lalonai bema “guriguri bona noinoi” daladia idauidau ita karaia loulou, ita diba momokani Iehova ese ita do ia durua.—1 Ioa. 3:22.