Heduru Totona Oi Noinoi
1 “Nega aukadia mai edia hekwarahi,” unai Dirava ena lauma amo ia vara herevana be hari iseda nega mai ena metau momo ia herevalaia goevagoeva. (2 Tim. 3:1, NW ) Unai dainai, dahaka oi karaia diba bema lauma dalanai hekwakwanai oi davaria, bona reana oi laloa oi hegeregere lasi hanaia totona?
2 Oi ura kongregesen lalonai lauma dalanai ia lo vadaeni tauna ta oi hereva henia, a? Ta be reana ia ura lasi badina ia hemarai, ia laloa ta ena nega ia halusia kava, eiava ia daradara ta ese do ia durua momokani diba eiava lasi. Momokani, mai eda goada ibounai ida ita hekwarahi be namo sibona eda maduna ita huaia totona, to namona be nega ibounai mai gari lasi ida heduru ita tahua iseda namo lauma dalanai ita naria totona.—Gal. 6:2, 5.
3 Heduru Oi Abia Matamaia Dalana: Reana oi ura emu buka stadi naria tauna oi nanadaia bema haroro gaukara lalonai ia ida oi gaukara hebou diba. Unai ese dala do ia kehoa emu ura lauma dalanai oi tubu totona do oi hamaoroa. Bema ia be hesiai tauna ta, oi hadibaia lauma dalanai heduru oi ura abia bona elda taudia do ia noia oi do idia durua totona. Eiava elda taudia, bona sekit naria taudia dekenai oi lao diba oi laloa bada gaudia oi hamaoroa totona.
4 Dahaka heduru oi ura abia? Gau ta ese emu lalo-goada karana ia hamaragia, a? Oi be ia sibona ese ena natudia ia durua tama eiava sina ta bona oi ura emu natudia be kongregesen kahirakahira idia noho, a? Oi be buruka tauna ta bona heduru oi abia be namo, a? Eiava hekwakwanai ta ese oi ia hamanokaia noho, a? Inai metau negadia ita haheaukalaia be auka—to ita karaia diba. Heduru ia noho.
5 Elda Taudia ese Heduru Idia Henia Dalana: Elda bona sekit eiava distrik naria taudia ese ita idia laloa bada. Oi laloa momo gaudia do idia kamonai. Bema pablisa ma haida ese unai bamona hekwakwanai idia davaria, elda taudia eiava sekit naria tauna ese kongregesen ena naria bona hadibaia gaukara idia karaia neganai unai do idia laloa diba. Mamoe oreana dekenai ‘kara namodia idia hahedinaraia’ bona idia noho hegaegae mai moale ida oi danu idia gaukara hebou totona. (1 Pet. 5:3) Lo tadikaka be Baibel ena hakaua herevadia idia gwauraia neganai oi kamonai karana amo emu haroro gaukara oi hanamoa diba bona oi do ia durua emu mauri lalonai.—2 Tim. 3:16, 17.
6 Iesu ese ita dekenai harihari gaudia momo ia henia, idia be “harihari gaudia taunimanima dekenai.” (Ef. 4:8) Unai ena anina be elda, sekit, bona distrik naria taudia ese oi idia durua diba. Idia noho hegaegae oi idia durua totona. Momokani, idia “be umui emui.” (1 Kor. 3:21-23) Unai dainai oi ura herevalaia gauna oi dogoatao lasi, to oi herevalaia. Oi ura abia heduru totona oi noia be namo.