“Heduru Emu Ruma Bese Totona”
1 Ita diba momokani, tanobada hegegemadai bese idauidau lalonai, ruma bese ena mauri ia dika ia lao noho. Unai dainai gau badana be ‘iseda ruma taudia ita hagoadaia’ bona ma haida ita durua unai bamona idia karaia totona.—Aon. 24:3, 27.
2 Heduru Nega Korikorina Ai: Ita ura negana ai heduru ita abia be hagoadaia gauna! (Heb. 4:16) “Dirava Ena Peroveta Herevana” Distrik Hebouhebou dekenai, buka matamatana Ruma Bese Ena Moale Davaria Dalana idia halasia neganai ita moale bada. Ruma bese ena moale habadaia dala badadia hani ia herevalaia badabada: (1) Sibona eda ura koua karana, (2) kwara dagina matauraia karana, (3) herevahereva namonamo karana, bona (4) lalokau. Unai buka lalonai idia noho hereva momokanidia mai edia siahu ese ruma bese taudia ta ta do ia durua edia mauri dala idauidau dekenai. Unai hereva idia badinaia ruma bese be do idia moale bona Dirava ena amo ia mai mainona do idia moalelaia.—Isaia 32:17, 18 itaia.
3 May 1 ai ia matamaia purana lalonai, Ruma Bese Ena Moale Havaraia Dalana bukana be Kongregesen ena Buka Stadi lalonai do ita stadilaia. Pablisa taudia, kamonai matamata taudia, bona natudia ibounai ai boiria, oibe, ai hagoadaia, pura ta ta do idia noho unai nega korikorina ai ita abia herevana idia stadilaia totona. Namona be pura ta ta ena stadi totona oi hegaegae namonamo, bona haere henia karana oi moalelaia.
4 Buka Matamatana Oi Gaukaralaia Namonamo: Oi ai hagoadaia nega oi atoa unai buka matamatana oi duahia namonamo totona, bona ena kahana idauidau oi diba namonamo totona, unai amo haroro gaukara lalonai ma haida dekenai oi hariharilaia toho neganai do oi gaukaralaia namonamo. Bema unai oi do karaia lasi, namona be emu ruma bese ida Ruma Bese bukana umui stadilaia hebou be namo, ani? Danu, bema emu ruma bese ese hekwakwanai eiava hahetoho matamatadia ia davaria, unai idia herevalaia karoa umui riviulaia bona mai guriguri ida unai sisiba umui badinaia diba dalana umui lalohadailaia. Karoa ta ta ena dokonai, heduru ia henia hadibaia mauana ia noho, ia ese Dirava ena lalohadai unai hereva dekenai ia hahedinaraia.—Isa. 48:17.
5 Dirava idia badinaia ruma bese be lauma dalanai do idia goada bona idia lalo-tamona bona idia gini hegaegae Satani ia havaraia hahetoho idauidau lalonai do idia gini goada totona. (1 Tim. 4:7, 8; 1 Pet. 5:8, 9) Ita tanikiu bada badina ruma bese ia Havaraia Tauna ese ita ia hadibaia dainai!
This article is unique to PNG.