Keriso Ena Lalokau Dainai Kara ta Oi Karaia, A?
1 Ena Biaguna ena mauri dalana ia lalohadailaia neganai, aposetolo Ioane ia gwau: “[Iesu ese] sibona ena lalokau taudia dekenai ia lalokau henidia, ia lao bona dokona.” (Ioa. 13:1) Inai Memorial ena hua lalonai, Keriso ese ena lalokau dainai ia karaia karana hereadaena ita laloa. Unai lalokau dainai mauri davalaia boubouna ita abidadama henia, haroro gaukara ita karaia goadagoada bona, Iesu hegeregerena, ita haheauka “ela bona dokona.”—Mat. 24:13; 28:19, 20; Ioa. 3:16.
2 Keriso Ena Lalokau Dainai Oi Karaia Karadia: Ena tanobada maurina ena pura ginigabena lalonai Iesu ia gaukara goadagoada. (Mat. 21:23; 23:1; 24:3) Keriso ita tohotohoa dainai, lalokau ese ita danu ia veria Iehova ena hesiai gaukara ita karaia ‘goadagoada’ totona. (Luka 13:24) April lalonai haroro gaukara totona idia hegaegaelaia daladia ma haida do oi gaukaralaia diba emu haroro gaukara ena nega oi habadaia totona, a?
3 Inai lagani ai, Lohiabada ena Anibou be Wednesday, April 19 ena adorahi ai do ita karaia. Taunimanima hida be unai mai anina bada hebouna dekenai do idia mai? Dala badana ai, unai dekenai iseda kara be mai anina bada. Oi ura boiria mai taudia edia lista oi karaia vadaeni, a—emu Baibel stadi taudia bona kamonai taudia ma haida, emu varavara, idia ida bisinesi oi karaia hebou taudia, bona sikuli turadia? Idia oi hadibaia bona mai momokani ida idia oi boiria vadaeni, a? Dina haida idia do noho bena Memorial ia matamaia neganai, idia do oi hadibaia lou, a? Unuseniai idia lao totona emu heduru idia abia be namo, a? Elda taudia ese haroro gaukara idia hadokoa taudia danu do idia boiria. Ena be Memorial be pura dokona ai lasi to pura ena hanuaboi ta lalonai do ita karaia, to ita ibounai ita mai be mai anina bada.
4 Oi Hegaegae Bona Oi Mai: Gau badana be ita hegaegae, bona Memorial dekenai ita lao neganai lalohadai maorona ita dogoatao be namo. Paulo ese abidadama tamona taudia ia hagoadaia unai hebou ena anina bada do idia laloa bada. (1 Kor. 11:20-26) Reana emui ruma bese stadi lalonai Ioane ena Evanelia bukana amo karoa 13 ia lao 17 umui duahia bona ruma bese taudia ta ta be Iesu ena boubou gauna ena anina idia dekenai idia gwauraia diba. Memorial ena pura totona idia makaia dina ta ta ena Baibel duahiduahi umui laloaboio lasi!
5 Iseda lalokau Keriso dekenai be bada herea, bona April 19 sibona dekenai lasi, to do ita hahedinaraia noho. Iseda lalona ita hadaia eda lalokau ia dekenai do ita hahedinaraia ela bona hanaihanai! Hari lagani ena Memorial ese ita do ia durua unai ura dekenai do ita gini goada totona.