April 2000 be Hua Namo Hereana ai Ita Halaoa Diba, A?
1 Wednesday adorahi, April 19, be iseda hesiai laganina ena dina badana. Unai dina ai, tanobada hegegemadai dina be ia diho lalonai, Iehova ena Witnes taudia edia kongregesen bona grup ibounai ese Keriso ena mase laloatao ena Memorial do idia karaia. Herevana edeseniai ita noho, Iesu Keriso ena boubou ita laloatao karana be unai lagani ena kara badana. Lagani 2000 Calendar of Jehovah’s Witnesses ai, Memorial ena deit be April huana lalonai ia hedinarai.
2 Iehova ena hebogahisi bada karana be ena natuna ena boubou gauna amo ia hahedinaraia, bona April ena hua ese dala namona ia kehoa mai eda lalona ibounai ida iseda tanikiu karana ita hahedinaraia totona. Edena bamona? Aposetolo Paulo ia gwau: “Keriso ena lalokau ese ai ia biagua noho, badina be hari ai diba momokani Tau tamona ese taunimanima ibounai dainai ia mase. Inai anina be ita ibounai Keriso danu ita mase hebou vadaeni. Oibe, Keriso ese taunimanima ibounai dainai ia mase. Unai dainai ia dekena amo mauri ita davaria taudia, be ita sibona iseda mauri bona iseda ura do ita laloa lasi, to ita dainai ia mase, ma ia toreisi lou tauna, ena mauri bona iena ura gaudia do ita laloa bona karaia.” (2 Kor. 5:14, 15) Oibe, April lalonai do ita hahedinaraia diba ita sibona totona lasi to ita dainai ia mase tauna totona ita mauri, bema eda Basileia haroro gaukarana amo April be hua namo hereana ai ita halaoa!
3 April Lalonai Heduru Painia Gaukara Oi Karaia: Aposetolo Paulo ese haheitalai namona ita dekenai ia hahedinaraia, ia gwau: “To lauegu mauri lau laloa lasi, badina be lau ura lauegu heau lau haorea, bona egu gaukara, Lohiabada Iesu ese lau dekenai ia henia gaukara do lau haorea. Inai gaukara be, Dirava ena hariharibada Sivarai Namona do lau gwauraia hedinarai.” (Kara 20:24) Ita danu ese unai gaukara tamona ita abia, Iehova Dirava ita gwauraia hedinarai goevagoeva totona. Unai ia vara totona, ita ura heduru painia gaukarana amo April be hua namo hereana ai ita halaoa!
4 Ia be mai ena pura dokodia ima dainai, April 2000 be hua namona momo be painia gaukara idia karaia totona. Guna, April 1993 ai, heduru painia taudia edia namba badana ita davaria neganai, unai heduru painia taudia 286 be 9 pesen pablisa ibounai amo. Lagani 6 murinai April 1999 ai ripoti idia henia pablisa ibounai edia namba be 11 pesen bamona amo ia bada daekau. Unai ena anina be, dala ia noho guna ita davaria heduru painia taudia edia namba badana ita hanaia totona. Ma danu, hora idia hamaragia dainai, dala ia kehoa kongregesen taudia momo idia painia totona. Namona be bapatiso pablisa ta ta be mai guriguri ida ia laloa namonamo bema April lalonai heduru painia gaukara do ia karaia diba.
5 Lagani 2000 Calendar oi gaukaralaia, April ena sediual be hari oi palanilaia totona. Emu lalona oi hadaia edena dina ai haroro gaukara do oi karaia, bona unai hua lalonai haroro gaukara dekenai oi gaukaralaia diba hora ibounai oi duahia. Ruma ta ruma ta ai bona gabu idauidau ai oi haroro diba negadia oi duahia. Unai namba be heduru painia taudia ese idia abia hora 50 kahirakahira, a? Bema oi abia horadia idia hegeregere lasi, emu sediual dekenai gau haida oi haidaua karana amo nega oi hoia diba, heduru painia gaukara oi karaia diba totona, a? Dina ta ta ai hora tamona bona miniti 40 sibona bema oi gaukaralaia diba, hua lalonai hora 50 do oi abia.
6 Hari regula painia taudia edia hora danu idia hamaragia dainai, ful-taim hesiai gaukara oi lalohadailaia, a? April be hua namona unai gaukara oi hamatamaia totona! Bema oi daradara regula painia ena hora 70 do oi abia diba eiava lasi, April lalonai heduru painia gaukara oi karaia bona hora 70 oi abia toho be namo, ani? Bema oi itaia unai oi karaia diba, do oi ura regula painia gaukara oi karaia.—Hesiai Gaukara bukana ena rau 113-14 itaia.
7 Sivarai Namona Harorolaia Tauna Ena Gaukara Oi Karaia Badabada: Ita ibounai, pablisa bona painia taudia, ese Dirava bona dekena taudia ita lalokau henia dainai, mai iseda goada ibounai ida Iehova ena hesiai gaukara ita karaia, eda noho dalana hegeregerena. (Luka 10:27) Unai amo ita hahedinaraia “ita hekwarahi bona ita hisihisi noho. Badina be Mauri Diravana ita abidadama henia noho. Ia be taunimanima ibounai edia Hamauria Tauna, to ia be abidadama taudia edia Hamauria Tauna momokani.” (1 Tim. 4:10) Unai dainai, ita laloa diba April lalonai iboudiai ese Basileia ena gaukara do idia karaia badabada.
8 Iesu ena hagoadaia herevana ita laloaboio lasi, ia gwau: “Uiti ena anina abia negana ia ginidae vadaeni, to utua taudia be momo lasi. Uma ena biaguna dekenai umui noinoi, ia ese utua taudia ma haida do ia siaia, iena uiti do idia utua.” Maoromaoro unai ia herevalaia murinai, Iesu ese ena aposetolo taudia 12 ia boiria bona ia siaia idia haroro totona. (Mat. 9:37, 38; 10:1, 5, 7) Lagani ta murinai, haroro gaukara be aposetolo taudia 12 dekenai ia hadibaia namonamo murinai, Iesu ese ‘tatau 70 ia abia hidi bona ia siaia,’ hadibaia hereva tamona ia henia, ia gwau: “Uiti anina be ia momo herea vadaeni . . . Unai dainai uma biaguna dekenai do umui noinoi, ia ese uiti utua taudia haida do ia siaia, iena uiti do idia utua.” (Luka 10:1, 2) Iehova ese unai guriguri ia haerelaia dalana be Baibel ena Kara bukana lalonai idia torea. Pentekoste 33 C.E. ai, hahediba taudia edia namba ia bada daekau lao 120 dekenai. Bena, hahediba taudia 3,000 bona ia murinai 5,000 idia abia. (Kara 1:15; 2:41; 4:4) Unai murinai, “diba tahua taudia idia momo daekau.” (Kara 6:7) Unai hegeregerena, hari inai negai, namona be Biaguna ita noia Basileia ena haroro taudia ma haida totona! Iseda guriguri hegeregerena, namona be kongregesen ena pablisa ta ta ese dala ia hegaegaelaia hua ibounai lalonai ia haroro totona.
9 Mani emu kara lagani 2000 Calendar dekenai April huana oi itaia namonamo. Badina unai hua ena dina ginigunadia rua be Saturday bona Sunday dainai, palani oi karaia diba unai dina rua lalonai oi haroro bona unai hua oi hamatamaia namonamo totona, a? Unai hua lalonai emu Kongregesen Buka Stadi grup ida “Magasin Dina” ibounai dekenai do oi gaukara diba, a? Hora ta eiava haida be Sunday ta ta ai haroro gaukara dekenai do oi gaukaralaia diba, a? Dala oi karaia diba adorahi haida lalonai haroro gaukara oi karaia totona, a? Bona namona be dala namodia ibounai, gaukara gabudia dekenai, sikuli dekenai, eiava dina ta ta ena gaukara idauidau oi karaia lalonai, do oi gaukaralaia oi haroro totona. Haroro gaukara oi karaia diba dinadia oi makaia, bona kalenda oi gaukaralaia hua lalonai emu haroro negadia oi laloatao totona.
10 April be nega namona idia hegeregere bona gwaumaoro idia abia taudia ibounai be bapatiso lasi pablisa ena gaukara idia hamatamaia totona. Bema ta ida Baibel oi stadilaia, unai tauna ena diba ia hegeregere kongregesen ena gunalaia tauna oi hadibaia bena idia laloa sivarai namona ena pablisa ai ia lao diba, eiava? (Elda taudia idia noho lasi gabudia dekenai, pablisa ai idia ura lao taudia ia henanadai henia totona sekit naria tauna sibona ia hegeregere.) Bema oi be mai emu bapatiso lasi natudia, lauma dalanai idia goada idia lao karana be elda taudia eiava sekit naria tauna ida oi kikilaia vadaeni, a? Reana inai be nega namona idia haroro matamaia totona, ani?—Hesiai Gaukara bukana ena rau 97-100 itaia.
11 April 2000 be hua namo hereana ai ita halaoa totona, ita ibounai ita haroro be namo bena hua dokonai iseda haroro gaukara ena ripoti ita henia. (Mareko 6:30 itaia.) Namona be nega ginigunana haroro gaukara idia karaia bapatiso lasi pablisa matamata ita hagoadaia edia gaukara ena ripoti idia henia haraga totona. Iseda kahana ita karaia neganai, April ena ripoti bona eda haroro gaukara amo Iehova hanamoa boiboi badana ita durua diba.
12 Memorial Dekenai Haida Oi Mailaia: Lagani 2000 ai Iesu ena mase laloatao ena Memorial dekenai idia mai taudia edia namba badana matamatana ita itaia neganai, do ita moale, ani? Oibe! Unai ena anina be taunimanima momo herea idia hebou bona Iehova Dirava bona Iesu Keriso ese ita dainai idia hahedinaraia lalokau bada hereana dainai edia tanikiu karana idia hahedinaraia! (Ioa. 3:16; 15:13) Dala oi karaia gau ta ese oi bona emu ruma bese do ia koua lasi bena Memorial dekenai do umui lao diba.
13 Hari danu be nega namona haida oi boiria matamaia, Memorial dekenai idia mai totona. Oi ura Memorial dekenai oi itaia taudia ibounai edia ladana oi torea. Guna Baibel idia stadilaia taudia, hari idia stadi noho taudia, bona emu lou henia taudia ibounai edia ladana oi torea. Emu lista dekenai oi diba taudia gaukara eiava sikuli gabuna ai, emu noho gabuna ai, bona idia ida bisinesi oi karaia taudia danu edia ladana oi torea. Namona be oi diba taudia ma haida bona varavara oi laloaboio lasi. Edia ladana oi torea murinai, mai momokani ida idia ta ta oi boiria matamaia. Oi hahedinaraia goevagoeva edena negai bona edeseniai Memorial do umui karaia. April 19 ia mai kahirakahira neganai, emu lista dekenai idia noho taudia oi hadibaia lou, oi lao henia eiava telefon amo oi hereva henia. Oi hamaoroa unai hanuaboi ai Memorial dekenai umui lao hebou diba.
14 Guna Society ese idia hahedinaraia dalana hegeregerena, elda taudia edia orea ia gaukara goada emui gabu dekenai idia noho manoka pablisa ibounai idia hagoadaia, Memorial dekenai idia mai totona. (Mat. 18:12-14) Elda taudia idia ura Society ena revareva February 2, 1999 do idia riviulaia. (Elda taudia idia noho lasi gabudia dekenai sekit naria tauna ese idia manoka pablisa taudia do ia durua mai ena ura ida.) Kongregesen ena seketere ese idia manoka pablisa taudia ibounai edia ladana ia torea, bona haroro naria tauna ese elda taudia do ia abia hidi idia vadivadi henia bona Memorial dekenai idia boiria mai totona. Bema ta ese ia vadivadi henia bona ia hagoadaia haraga, reana unai manoka taudia idia durua diba haroro gaukara idia karaia lou totona, reana April lalonai unai do idia karaia. Idia do ia hagoadaia bema idia boiridia, ia manada pablisa ida haroro gaukara idia karaia totona.
15 Hagoadaia April Lalonai Do Idia Gaukara Goadagoada! Namona be elda taudia, hesiai taudia, bona ruma bese kwaradia idia hegaegae namonamo, April 2000 be hua namo hereana ai ita halaoa totona. Elda taudia idia gaukara goada be namo, gau ibounai idia hegaegae namonamo bona idia gunalaia totona. (Heb. 13:7) Dala namona idia karaia be namo, pura lalonai bona Saturday bona Sunday edia haroro heboudia totona. Haroro heboudia ma haida be reana adorahi kahanai idia karaia diba. Namona be April lalonai do idia karaia totona idia palania gaudia ibounai edia sediual be notisbod dekenai idia atoa. Haroro hebou ta ta totona naria tauna idia abia hidi be namo. Teritori idia hegaegaelaia be namo, bena ena bada be haroro totona idia hebou taudia ibounai edia nega hegeregerena.
16 April lalonai Gima Kohorona bona Awake! magasin do ita gaukaralaia. Baibel stadi ita hamatamaia totona, Dahaka Ita Karaia? buklet be idia kamonai taudia ibounai dekenai ita henia toho be namo. Unai dainai, magasin bona buklet momo idia noho be namo.
17 Hua ena dokonai, buka stadi idia naria taudia bona edia durua taudia ibounai ese edia buka stadi taudia ta ta idia hagoadaia, hua ia doko murinai maoromaoro edia ripoti do idia henia. Reana Sunday April 30 ai unai idia karaia diba. Bena ripoti idia haboua neganai, bema idia itaia pablisa haida ese edia ripoti idia do henia lasi, mai hebogahisi ida idia hadibaia edia ripoti idia henia May 6, kongregesen ena ripoti be Society dekenai idia henia dinana, ia do abia lasi neganai. Buka stadi naria taudia idia boiria diba edia ripoti idia henia lasi taudia amo ripoti idia gogoa totona.
18 Memorial nega be lagani ena mai anina bada negana Dirava ena taunimanima dekenai. Namona be unai negana lalonai Iehova ena hesiai gaukara dainai ita bisi bada. Do ita bisi bada, bema ita ibounai ese sivarai namona harorolaia pablisa ena gaukara ita karaia badabada, bema heduru painia gaukara idia karaia diba taudia be unai idia karaia, bona bema ita gaukara goada ma haida be Keriso ena mase laloatao ena Memorial dekenai ita mailaia totona. April 2000 be hua namo hereana ai ita halaoa totona, Iehova ena hahenamo totona ita guriguri be namo, unai ibounai amo Dirava do ita hanamoa bona hahairaia!—Heb. 13:15.
[Box on page 3]
Heduru Painia Taudia
Iseda Namba Badana: 286
(April 1993)
[Box on page 4]
Pablisa Ibounai
Iseda Namba Badana: 3,575
(August 1998)
[Box on page 5]
Memorial Dekenai Idia Mai Taudia
Iseda Namba Badana: 15,973
(1999)