Palani Karaia—Dahaka Totona?
1 Ita ibounai be iseda vaira negana totona palani haida ita karaia. Tanobada helarona idia abia taudia be Dirava ena kara maoromaoro tanobada matamatana dekenai do idia mauri hanaihanai negana idia naria noho. To lalona veria gaudia momo ese ta ena helaro idia kokia diba. Iseda mauri lalonai Basileia atoa guna karana ita habadaia totona ita gaukara goada bona tauanina ena ura dikadia ita dadaraia be gau badana.—1 Ioa. 2:15-17.
2 Tanobada taudia ese lauma gaudia idia laloa taudia edia tahua gauna idia lalo-pararalaia lasi. (1 Kor. 2:14) Taunimanima haida be idia hekwarahi ladana badana, siahu, eiava taga idia abia totona, to ita hekwarahi lauma dalanai kohu ita abia totona. (Mat. 6:19-21) Bema iseda lalohadai ita haidaua, tanobada taudia ese vaira negana idia laloa hegeregerena do ita laloa totona, lauma dalanai ita tahua gaudia do ita abia, a? Tanobada gaudia ese iseda kudouna do idia hahonua. Edena bamona unai do ita koua diba?
3 “Lohiabada Iesu Keriso Ena Tuari Dabua Do Umui Atoa”: Vaira negana totona palani ita karaia lalonai Basileia ita atoa guna eiava lasi ita itaia dalana ta be ita herevalaia gaudia ita tahua. Ita be hanaihanai tauanina gaudia bona siboda eda mauri gaudia ita herevalaia, a? Bema unai bamona ita karaia, namona be ita tahua namonamo, mai iseda kudouna ibounai ida lauma gaudia ita tahua noho eiava lasi. Reana ita hekwarahi bada be namo, ‘Lohiabada Iesu Keriso ena tuari dabua ita atoa bona iseda tauanina ena ura dikadia totona palani ita karaia lasi.’—Roma 13:14.
4 Matamata taudia be ful-taim hesiai gaukara lalonai do idia vareai dinana totona palani idia karaia neganai ‘Keriso ena tuari dabua idia atoa’ diba. Matamata tauna ta be ia ura regula painia gaukara do ia karaia to ena gabu ena kastom be tatau matamatadia be moni gaukara namona ta idia abia guna be namo. Unai dainai, bisinesi karadia ia goadalaia bada, bona gabeai hebou ia lao henia bona ia haroro be ia karaia kava sibona. Ia ese Iesu ena hereva Mataio 6:33 dekenai ia abidadama henia bona ia goadalaia bisinesi karadia ia hadokoa neganai, ful-taim hesiai gaukara ia karaia matamaia. Hari, ena lalona ena mamina ia namo, bona ia gwau Iehova ia hesiai henia ‘mai ena goada ibounai ida.’
5 Baibel ia gwau vaira negana totona palani ita karaia be aonega karana. (Aon. 21:5, NW ) Namona be ita ibounai ese unai ita karaia bona ita karaia lalonai Iehova ena ura ita atoa guna be namo.—Ef. 5:15-17.