“Dirava ese Gau Ibounai be Ia Karaia Diba”
1 Keristani kongregesen ena mai anina bada gaukarana be tanobada ibounai dekenai Basileia sivaraina idia harorolaia. (Mat. 24:14) Unai be gaukara badana. Unai gaukara idia itaia taudia momo dekenai, toana be sibona eda goada amo unai gaukara do ita karaia diba lasi. Ma haida idia lalo-parara lasi edena dala ai inai gaukara ita hagugurua diba, badina taunimanima ese ita idia kirikirilaia, inai henia, bona dagedage henia. (Mat. 24:9; 2 Tim. 3:12) Baibel ena hereva idia abia dae lasi taudia idia laloa inai gaukara be do ita hagugurua diba lasi. To, Iesu ia gwau: “Dirava ese gau ibounai be ia karaia diba.”—Mat. 19:26.
2 Ita Tohotohoa Haheitalai Namodia: Iesu be sibona inai tanobada ena oromana dikana lalonai ena hesiai gaukara ia matamaia. Dagedage taudia ese ena gaukara idia koua totona hahemaraia herevadia idauidau idia gwauraia, dokonai hisihisi bada herea dalanai ia idia hamasea. To, dokonai, Iesu be mai lalo-goada ida ia gwau: “Tanobada lau halusia vadaeni.” (Ioa. 16:33) Momokani ia karaia gaukarana be gaukara badana!
3 Iesu ena hahediba taudia danu be Keristani hesiai gaukara lalonai ura goadana bona boga-auka idia hahedinaraia. Idia momo idia kwadia, dadabaia, dibura dekenai idia atoa, bona idia hamasea danu. To, idia “moale badina be, Dirava ese idia ia abia hidi vadaeni Iesu ena ladana dainai hisihisi do idia abia.” (Kara 5:41) Ena be unai gaukara be mai ena hekwarahi bona toana be do idia karaia diba lasi, to sivarai namona be “tanobada ena kahana ibounai” dekenai idia harorolaia.—Kara 1:8; Kol. 1:23.
4 Iseda Negai Ita Kwalimu Dalana: Herevana gaukara be mai ena hekwarahi, to ita danu be mai eda ura bada ida Basileia harorolaia gaukarana ita karaia. Ena be iseda gaukara idia taravatua, idia dagedage henia, dibura dekenai ita idia atoa, bona dagedage karadia ma haida amo ita idia koua toho, to ita kwalimu noho. Edena bamona unai ia vara diba? “Siahu Ibounai Lohiabada ia gwau: ‘Goada dekena amo lasi, bona siahu dekena amo lasi, to egu Lauma dekena amo do oi kwalimu.’ ” (Sek. 4:6) Iehova ese ita ia durua dainai, gau ta ese iseda gaukara do ia koua diba lasi!—Roma 8:31.
5 Ita haroro neganai, ita hemarai, o gari, o ita laloa ita hegeregere lasi be badina lasi. (2 Kor. 2:16, 17) Ita be mai eda badina goadana, Basileia sivaraina namona ita harorolaia noho totona. Iehova ena heduru amo, ita ese do ita “karaia diba lasi gaudia” do ita karaia guguru!—Luka 18:27.