Hemataurai Karadia—Dirava Badinaia Taudia Edia Kara Korikori
1 Hari inai negai, taunimanima momo ese hemataurai karadia idia hahedinaraia lasi. Badina be dahaka? Taunimanima idia kara haraga dainai hereva namodia, hegeregere “Mani emu kara,” “Tanikiu,” eiava “Ekskius” idia gwauraia momo lasi. Dirava ena Hereva ese nega dokonai taunimanima edia kara do ia dika ia lao ia herevalaia guna, ia gwau taunimanima ‘ese sibona edia ura do idia tahua, do idia hekokoroku bona heagi, tanikiu henia kara do idia diba lasi, idia be lalokau do idia diba lasi, kara namodia do idia ura henia lasi, bona do idia kara kava.’ (2 Tim. 3:1-4) Unai bamona kara ibounai be hemataurai lasi karadia. Keristani taudia be Dirava badinaia taudia dainai, namona be idia naria namonamo, unai amo inai tanobada ena hemataurai lasi karana do idia tohotohoa lasi.
2 Hemataurai Karadia be Dahaka? Hemataurai karadia be idia gwauraia, ma haida edia hemami lalo-pararalaia karana, bona ma haida ida maino ai noho diba karana. Hemataurai karadia haida be taunimanima laloa bada karana, kara namo, hebogahisi, manau, gado-namo bona ma haida laloa guna karana. Inai kara ibounai be Dirava bona dekena tauna lalokau henia karana amo idia matamaia. (Luka 10:27) Idia be davana lasi, to iseda hebamo hanamoa karana lalonai idia be mai anina bada momokani.
3 Iesu Keriso be haheitalai namo hereana ia hahedinaraia. Ia be nega ibounai inai Taravatu Hereadaena ia badinaia: “Umui be umui ura taunimanima ese umui dekenai idia karaia hegeregerena, umui danu inai bamona do umui karaia idia dekenai.” (Luka 6:31) Iesu ese ena hahediba taudia ia laloa bona lalokau dalanai ia kara henidia karana ita hoalaia lasi, a? (Mat. 11:28-30) Iena hemataurai karadia be buka ta dekenai idia torea kara namo taravatudia dainai ia karaia lasi. Idia be mai ena momokani ida ena kudouna namona amo idia vara. Iena haheitalai namodia ita tohotohoa be namo.
4 Keristani taudia be edena negai hemataurai karadia do idia hahedinaraia be gau badana? Dina badadia sibona dekenai, idia ura taunimanima vairanai toana namona idia hahedinaraia dainai, a? Ma haida edia lalona idia veria negadia sibona ai idia karaia, a? Lasi! Nega ibounai hemataurai karadia ita hahedinaraia be namo. Kongregesen taudia ita bamoa negadiai edena dala haida ai unai kara do ita laloa be namo?
5 Kingdom Hall Dekenai: Kingdom Hall be iseda tomadiho gabuna. Unuseniai ita lao badina Iehova ese ita ia boiria dainai. Unai dala dekenai, ita be vadivadi taudia. (Sal. 15:1) Kingdom Hall dekenai ita mai neganai, ita be vadivadi taudia namodia, a? Iseda dabua bona toana ita laloa maoromaoro, a? Namona be iseda toana be loaloa taudia bamona lasi eiava ia idau herea momokani lasi. Herevana Iehova ena taunimanima be hebouhebou badadia eiava pura ta ta kongregesen heboudia idia lao henia, to taunimanima ese edia hemataurai toana idia itaia, unai be Dirava idia matauraia taudia edia toana korikorina. (1 Tim. 2:9, 10) Unai dala amo, ita ese iseda guba Heabidae Tauna bona ia boiria vadivadi taudia ma haida ita laloa bada bona matauraia karana ita hahedinaraia.
6 Hemataurai karadia ita hahedinaraia dalana ma ta be nega korikori ai hebou dekenai ita ginidae. Momokani, unai be mai ena hekwarahi. Taunimanima haida edia noho gabuna be reana daudau eiava reana edia famili be bada. To, kongregesen haida dekenai, pablisa taudia 25 pesen bamona be hanaihanai hebou kehoa anena bona gurigurina ia ore murinai idia ginidae. Unai be do idia hamaoromaoroa kara badana ta. Namona be ita laloatao hemataurai karadia edia badina ta be ma haida edia hemami ita laloa. Iehova, iseda harihari bada Heabidae Tauna, be iseda namo totona unai lauma aniani ia hegaegaelaia. Nega korikori ai ita ginidae karana amo ita hahedinaraia iena kara ita laloa bada bona iena hemami ita laloa. Bona hebou dekenai ita ginidae leiti karana ese idia ginidae vadaeni taudia edia kamonai karana ia hadikaia bona idia ita matauraia lasi toana ia hahedinaraia.
7 Ita hebou neganai, nega ginigunana hebou dekenai idia mai taudia ita laloa, a? Idia ita abia dae karana be kara namona ta. (Mat. 5:47; Roma 15:7) Hahenamo hereva namodia, imana ita udeudea, kiri toana—unai ibounai be gau maragidia, to unai gaudia danu ese ia hahedinaraia ita be Keristani taudia momokanidia. (Ioa. 13:35) Tau ta be ena nega ginigunana Kingdom Hall ta dekenai ia lao murinai, ia gwau: “Lau diba lasi taudia, lalokau momokani taudia momo herea be dina tamona ai lau hedavari henidia, to lau tubu daekau dubuna dekenai unai bamona taudia momo lau davaria lasi. Ia hahedinaraia hereva momokani lau davaria.” Unai dainai, ena mauri dalana ia haidaua, bona hua 7 murinai ia bapatiso. Oibe, hemataurai karadia be mai edia siahu!
8 Bema ita diba lasi taudia ita kara namo henidia, ita ese “Keriso ena abidadama henia taudia do ita durua bada herea” be namo, ani? (Gal. 6:10) Hakaua herevana ta ia gwau: “Buruka taudia ibounai do umui matauraia.” (Lev. 19:32) Iseda hebou lalodiai unai bamona taudia ita laloaboio lasi be namo.
9 Ita Kamonai Namonamo: Kongregesen heboudia lalonai, Dirava ena Keristani hesiai taudia be lauma ena harihari gaudia haida idia henia totona edia hereva idia gwauraia, unai amo ita idia hagoadaia. (Roma 1:11) Bema ita mahuta, PK ita ania mai regerege danu, ita badinai ia helai tauna ita hereva henia loulou, mei rumana dekenai ita lao kava, eiava buka idauna ita duahia, eiava hebou dekenai gau ma haida ita karaia, unai be hemataurai lasi momokani karana. Elda taudia be haheitalai namona idia hahedinaraia be namo. Keristani hemataurai karadia ita laloa bada dainai hereva ia henia tauna ita matauraia bona iena hereva Baibel amo ita kamonai henia namonamo totona.
10 Natudia Bona Edia Kara: Namona be tama sina be nega ibounai edia natudia edia kara idia laloa. Bema hebou lalonai natuna maragina ia tai matamaia eiava ia regerege bona unai ese ma haida edia kamonai karana ia hadikaia, dala namona be hebou rumana amo ita abia raka-lasi ia regerege lasi totona. Nega haida unai be do ia auka, to oi laloa boio lasi, unai ese ia hahedinaraia oi ese ma haida edia hemami oi laloa bada. Nega momo tama sina mai edia regerege momo natudia maragidia be hebou rumana ena vareai gabuna kahanai idia helai, unai dala amo bema badina ta dainai idia toreisi neganai, ma haida edia kamonai karana idia hadikaia lasi. Momokani, hebou idia mai taudia ma haida ese unai bamona ruma bese idia laloa bada dalana be idia totona murinai idia noho helai gabudia idia rakatania.
11 Tama sina ese natudia edia kara hebou vairanai bona murinai idia diba be namo. Natudia be hebou rumana lalonai idia heau loaloa lasi be namo, unai ese aksiden do ia havaraia diba. Hanuaboi ai idia itaia namonamo lasi neganai, Kingdom Hall murimurinai idia heau loaloa karana danu be dika ia havaraia diba. Murimuriai hereva badabada karana ese dekena taudia edia maino do ia hadikaia diba bona iseda tomadiho karana do idia laloa kerere. Kingdom Hall murimurinai bona lalona dekenai edia natudia edia kara idia naria namonamo tama sina ita hanamodia be namo badina unai amo mai lalo-tamona ida ita noho hebou ena moale idia habadaia.—Sal. 133:1.
12 Buka Stadi Dekenai: Edia ruma ai kongregesen hebou idia karaia noho ruma bese edia heabidae karana ita moalelaia bada. Unai dainai Buka stadi ita lao henia neganai, hemataurai karadia ita hahedinaraia bona edia kohu ita laloa bada be namo. Ita do vareai lasi neganai iseda tamaka ita kokia be namo, bena foloa o kapet ita hamiroa lasi. Tama sina ese natudia idia naria namonamo, buka stadi idia karaia rumana dekenai idia noho sibona be namo. Ena be buka stadi grup be ia maragi sibona bona gabu be idau, namo lasi ma haida edia ruma dekenai iseda ura karadia ita karaia. Tama sina ese edia natuna maragina idia bamoa bema mei ruma ia gaukaralaia gwauraia. Danu, buka stadi be kongregesen ena hebou ta dainai, namona be dabua namodia ita atoa, Kingdom Hall ita lao neganai ita atoa dabua hegeregerena.
13 Hemataurai Karadia be mai Anina Bada: Keristani hemataurai karadia be iseda haroro gaukara ena namo ia hahedinaraia sibona lasi to ma haida ida iseda hetura karana ia hanamoa. (2 Kor. 6:3, 4, 6) Ita be moale Diravana ita tomadiho henia dainai, namona be ma haida ita kiri henia, ita lalo-tamona, bona kara namo maragidia danu ita karaia be iseda kara, unai amo ma haida dekenai moale ita havaraia. Unai hemataurai karadia ese ita Dirava badinaia taudia eda mauri do ia hahairaia.