Tiokratik Haroro Sikuli Ena Henanadai

Tiokratik Haroro Sikuli ena henanadai May 7 ia lao August 20, 2001, edia wiki herevadia dekenai. Henanadai negana lalonai henanadai edia haere be ma pepa ta dekenai oi torea.

[Itaia: Henanadai negana lalonai, Baibel sibona oi gaukaralaia haere oi torea totona. Henanadai murinai ai torea stadi gaudia be oi sibona emu stadi karaia totona. Gima Kohorona edia amo ai abia hereva haida edia rau bona paragraf namba ai torea lasi.]

Henuna hereva oi gwauraia Momokani eiava Koikoi:

1. Nehemia 2:4 ai ia noho gurigurina be dara-doko gurigurina, miniti haida sibona lalonai ia gwauraia gurigurina ta. [1,Wiki ta ta ena Baibel duahiduahi; w86-E 2/15 rau 25 par. 8 itaia.] Koikoi. Ierusalema ena noho dikana dainai Nehemia be “dina bona hanuaboi” nega daudau lalonai ia guriguri (1:​4, 6); Dala ia kehoa neganai, Nehemia ia guriguri lou, guna ia karaia bamona.

2. Inai hereva “kongregesen” be Greek gado herevana ek·kle·siʹa amo idia hahanaia, unai hereva ena anina ese lalo-tamona bona heduru heheni karadia ia hahedinaraia danu. [2, w99 5/15 rau 25 par. 4] Momokani.

3. Iehova ena hesiai taudia ese taunimanima be mase dainai idia karaia karadia, Dirava ena Hereva idia utua karadia unai, idia dadaraia, to mase dainai taunimanima ese idia karaia karadia ibounai idia dadaraia lasi. (Ioa. 19:40) [7, rs rau 278 par. 4] Momokani.

4. Iobu ia mauri noho negana lalonai, ia sibona taunimanima iboudiai amo be Iehova ia abidadama henia. (Iobu 1:8) [6, Wiki ta ta ena Baibel duahiduahi; w92 8/1 rau 31 par. 3-4 itaia.] Koikoi. Ena be tau ta be Iobu bamona ia kara maoromaoro lasi, Elihu ese Iobu ena lalohadai kererena ia hamaoromaoroa, Dirava momokanina ia hanamoa bada, bona ia be Dirava ese ia gwauraia kara maoromaoro tauna; reana ma haida danu be kara maoromaoro taudia.

5. Saulo eiava Paulo be sibona ia naria totona palai rumadia ia karaia ese ia hahedinaraia ia be ogogami tauna. (Kara 18:​2, 3) [7, w99 5/15 rau 30 par. 2–​rau 31 par. 1] Koikoi. Paulo be Roma tauna, ena toretore lalonai Greek gado namo herea momokani ia gaukaralaia, bona ia be momo ese idia matauraia tauna, Gamaliela, ese ia hadibaia. (Kara 22:​3, 27)

6. Ena be Davida be kara dika rohorohona ia karaia, to ena helalo-kerehai karana bona kara namodia dainai, Iehova ese ia be inai bamona ia gwauraia, “egu murinai ia raka momokani.” (1 Kin. 14:8) [9, w99 6/15 rau 11 par. 4] Momokani.

7. Bema ita gwauhamatalaia gauna ta be Baibel amo ia mai lasi do ita karaia lasi, to namona be iseda gwauhamata ita hagugurua ena be gabeai ita davaria unai ita karaia totona be ia auka. (Sal. 15:4) [13,Wiki ta ta ena Baibel duahiduahi; w89-E 9/15 rau 28 par. 5 itaia.] Momokani.

8. Salamo 22:1 ese ia hahedinaraia Davida be lalo-metau dainai ena abidadama be nega sisina lalonai ia haboioa. [14, Wiki ta ta ena Baibel duahiduahi; w86-E 8/15 rau 20 par. 19 itaia.] Koikoi. Davida be taunimanima ese idia davaria hisihisi bona hekwakwanai ia abia neganai abidadama lasi karana ia hahedinaraia lasi, badina Iehova ese do ia hamauria totona mai lalo-goada ida ia guriguri. (Sal. 22:​16-19)

9. Keristani tauna ta be reana lalohisihisi, bona taravatu, eiava moni ena siahu ia diho dainai do ia “moru,” to Dirava ena lauma bona mai lalokau ida Ia idia tomadiho henia taudia edia heduru dainai, ia be lauma dalanai do ia “diho momokani lasi.” (Sal. 37:​23, 24) [16, Wiki ta ta ena Baibel duahiduahi; w86-E 11/1 rau 30 par. 14 itaia.] Momokani.

10. Genese karoa 1 ese ia hahedinaraia Dirava ese dina 6, unai dina ta ta edia daudau be hora 24 lalonai inai tanobada dekenai idia noho gaudia ibounai ia havaraia. [16, rs rau 117 par. 1] Koikoi. Baibel ia gwau lasi unai dina ta ta edia daudau be hora 24; nega momo Baibel ese unai hereva “dina” ia gaukaralaia nega daudau ia herevalaia totona. (2 Pet. 3:8)

Henuna henanadai oi haerelaidia:

11. Edena dala ai Esera bona ena durua taudia ese Taravatu ena ‘anina idia hahedinaraia?’ (Neh. 8:8) [2, Wiki ta ta ena Baibel duahiduahi; w86-E 2/15 rau 26 par. 4 itaia.] Esera bona ena durua taudia ese hereva idia gwauraia goevagoeva sibona lasi, to idia ese Taravatu idia gwauraia hedinarai namonamo, bona ena hakaua herevadia idia badinaia, unai amo taunimanima ese idia lalo-pararalaia goevagoeva diba.

12. ‘Iehova dainai ita moale’ karana be dahaka ese ia havaraia? (Neh. 8:​10) [2, Wiki ta ta ena Baibel duahiduahi; w86-E 2/15 rau 26 par. 9 itaia.] Unai hereva ese ia hahedinaraia bamona, ‘Iehova dainai ita moale’ karana be Dirava ena Hereva ita lalo-pararalaia, sibona eda mauri lalonai ita badinaia, bona tiokratik dalana badinaia karana amo ia vara.

13. Dahaka dainai ‘sibodia edia ura dainai, Ierusalema dekenai idia noho’ taudia idia hanamoa? (Neh. 11:2) [3, Wiki ta ta ena Baibel duahiduahi; w86-E 2/15 rau 26 par. 12 itaia.] Edia tano idia rakatania bona Ierusalema lalonai idia vareai karana amo gau haida idia haboioa bona hekwakwanai idia davaria; unai hanua dekenai idia noho taudia be reana dika idauidau idia davaria danu; hanamoa idia abia badina sibona edia ura idia dadaraia.

14. Dahaka dainai Eseta ese ena ura gauna be king dekenai ia gwauraia haraga lasi? (Est. 5:​6-8) [5, Wiki ta ta ena Baibel duahiduahi; w86-E 3/15 rau 24 par. 18 itaia.] Unai be gari dainai lasi, badina guna king ia hereva henia totona kahirakahira ena mauri ia haboioa diba; to reana ia ura king ena lalo-namo ia abia guna; Dirava ena hakaua dalana ia badinaia danu, badina unai murinai ia vara nega kwadogina lalonai gau haida idia vara. (Unai bamona hereva ia hegeregere)

15. Iobu bukana ese edena henanadai badadia rua ia haerelaia? [6, bsi01 rau 16 par. 1] Inai buka ese inai henanadai ia haerelaidia: Dahaka dainai kerere lasi taudia ese hisihisi idia ania? Dahaka dainai Dirava ese tanobada dekenai kara dika ia koua lasi?

16. Dahaka dainai Elipasa ena sisiba ese Iobu ena lalona ia hamanokaia bona ia hagoadaia lasi? (Iobu 21:34; 22:​2, 3) [9, Wiki ta ta ena Baibel duahiduahi; w95 2/15 rau 27 par. 5-6 itaia.] Badina be ia sibona ena lalohadai ia gwauraia bona Dirava ena aonega herevadia ia gwauraia lasi; unai be hereva koikoi bona lalohadai kava.

17. Salamo be dahaka? [12, bsi01 rau 19 par. 2] Salamo be ane helagana, Dirava idia hanamoa bona idia tomadiho henia lalonai idia gaukaralaia.

18. Salamo 2:1 ena hereva bamona, bese idauidau ese dahaka lalohadai “kavakava” idia “laloa”? [12, Wiki ta ta ena Baibel duahiduahi; w86-E 8/15 rau 20 par. 5 itaia.] Lagani 1914 amo, bese idauidau be sibodia edia siahu bona edia lohia siahuna idia “laloa,” (eiava, lalohadailaia noho) to Iehova ese ia horoa, King, Iesu Keriso, idia abia dae lasi.

19. Filipo ese Samaria taudia bona Etiopia tauna ia haroro henidia karana amo, taunimanima edia toana laloa lasi karana dekenai, dahaka kara namona ita dibaia? (Kara 8:​6-13, 26-39) [15, w99 7/15 rau 25 par. 2] Namo lasi ita laloa idau tano, idau bese, eiava mai ena dagi tauna ta be sivarai namona do ia kamonaia lasi; namona be Basileia sivaraina ita harorolaia “taunimanima idauidau” dekenai. (1 Kor. 9:​19-23)

20. Iobu ese edena bamona ia hahedinaraia ia abia dae Iehova ese mase gurina amo do ia hatoreaisi lou, unai gabu be ena hekwakwanai momo amo do ia hunia gabuna bamona ia laloa? (Iobu 14:​7, 13-15) [7, Wiki ta ta ena Baibel duahiduahi; w00 5/15 rau 27 par. 7–​rau 28 par. 1 itaia.] Iobu ese au ta ia herevalaia, (reana ia be olive auna ta) idia utua diba eiava nega daudau lalonai medu ia diho lasi dainai ia mase diba bona gabeai ia vara lou.

Henuna herevadia dekenai idia torea lasi herevadia oi torea:

21. Eseta 8:​17 ia gwau, taunimanima be “sibodia Iuda taudia idia halaoa”; unai hegeregerena hari inai negai, “hutuma bada herea” taudia “mamoe idaudia” amo, be horoa orena taudia idia bamoa. (Apok. 7:9; Ioa. 10:16; Sek. 8:23) [5, Wiki ta ta ena Baibel duahiduahi; w86-E 3/15 rau 25 par. 14 itaia.]

22. Kara 1:7 ese ia hedinaraia bamona, ena be Iehova ese nega ia laloa bada, ena hahemaoro dinana be henao tauna ta bamona do ia mai, taunimanima idia laloa lasi negana ai do ia ginidae. (2 Pet. 3:10) [8, w99 6/1 rau 5 par. 2-3]

23. 2 Petero 3:​7, 10 dekenai, “guba” bona “tanobada” be laulau dalanai idia gaukaralaia; unai siri ese ia hahedinaraia bamona, “tanobada” ese Dirava idia negea taudia, eiava taunimanima dikadia ia herevalaia. [11, rs rau 368 par. 2-4]

24. Herevahereva namonamo karana be abidadama heheni bona lalo-parara amo ia vara bona unai bamona kara idia hedinarai bema headava be noho daudau gauna ai idia halaoa bona edia lalona idia hadaia do idia badinaia totona. [14, w99 7/15 rau 21 par. 3]

25. Bamodia edia lalo-ani karadia namodia ese ita do ia durua diba kara goeva bona lauma taravatudia ita badinaia bona ita ia durua mai lalona ibounai ida Iehova ita hesiai henia totona. [16, w99 8/1 rau 24 par. 3]

Henuna herevadia dekenai haere maorona oi abia hidi:

26. Morodekai be “king ena ruma dekenai,” ia helai ese ia hahedinaraia ia be (king ena gima tauna; King Ahasuero ena ofesa ta; king itaia totona ia naria noho). (Est. 2:​19, 20) [4, Wiki ta ta ena Baibel duahiduahi; w86-E 3/15 rau 24 par. 9 itaia.]

27. Iobu 19:​25-27 ena hereva hegeregerena, Iobu be mai abidadama danu ia gwau “Dirava do lau itaia” anina be (matahanai ta do ia itaia; do ia toreisi lou guba mauri dekenai; lalo-parara matana amo hereva momokani Iehova dekenai ia itaia). [8, Wiki ta ta ena Baibel duahiduahi; w94 11/15 rau 19 par. 17 itaia.]

28. Iobu ena (lalokau; hebogahisi; haheauka) karana dainai momo ese ia idia laloatao. (Iam. 5:11) [11, bsi01 rau 18 par. 41]

29. Salamo bukana idia torea negana ena daudau be lagani (300; 500; 1000) bamona. [12, bsi01 rau 20 par. 4]

30. (Davida; Asapa; Esera) be Salamo bukana ibounai ia hegaegaelaia vaitani. [13, bsi01 rau 21 par. 6]

Henuna herevadia dekenai siri maorona oi abia hidi:

Neh. 3:5; Sal. 12:2; 19:7; 2 Tim. 3:​16, 17; Iam. 5:​14-16

31. Namona be ita gaukara goada bona namo lasi hekokoroku karana dainai ita laloa gaukara goada be hemataurai lasi karana, bona ita karaia lasi. [Neh. 3:5] [1, Wiki ta ta ena Baibel duahiduahi; w86-E 2/15 rau 25 par. 12, 19 itaia.]

32. Kara dika badana ia karaia Keristani tauna ta ese elda taudia dekenai ena kara dika ia gwauraia hedinarai be namo. [Iam. 5:​14-16] [4, rs rau 237 par. 7]

33. Gunaguna, nihi amo Dirava ese ena orea taudia ia sisiba henidia, ia hadibadia, bona gabeai do idia vara gaudia ia hahedinaraia, to hari ia ese ena lauma helaga amo ia havaraia Herevana amo hamauria dalana ia henia. [2 Tim. 3:​ 16, 17] [8, rs rau 314 par. 5]

34. Bema Dirava ena hetura karana ita ura, hereva momokani ita gwauraia, ita koikoi lasi. [Sal. 12:2] [13, Wiki ta ta ena Baibel duahiduahi; w89-E 9/15 rau 26 par. 7 itaia.]

35. Iehova ena taravatu badinaia karana ese tau ta ia hamauria diba bona ta ena noho dalana ia hanamoa. [Sal. 19:7] [14, Wiki ta ta ena Baibel duahiduahi; w00 10/1 rau 13 par. 4 itaia.]