Lagani 2002 Ena Tiokratik Haroro Sikuli
1 Taunimanima momo ese herevahereva karana idia laloa maragi. To, ita hereva diba karana be Iehova ena harihari gauna ta. Dala ia kehoa ma haida do ita hereva henia bona iseda lalohadai bona hemami ita gwauraia totona. Gau badana be, herevahereva karana dainai iseda Dirava ita hanamoa diba.—Sal. 22:22; 1 Kor. 1:4-7.
2 Tatau, hahine, bona natudia be Tiokratik Haroro Sikuli amo diba idia abia, Iehova ena ladana idia gwauraia hedinarai. (Sal. 148:12, 13) Lagani 2002 ena sikuli program ese Baibel herevadia idauidau ia hahedinaraia, idia amo namo do ita abia bona haroro gaukara ai do ita gaukaralaia. Sikuli totona ita hegaegae bona kahana ta ita henia neganai, iseda diba ita habadaia bona ita be Dirava ena Hereva hadibaia taudia dainai iseda hadibaia dalana ita hanamoa.—Sal. 45:1.
3 Dina Ta Ta ai Baibel Duahia: Bema hanaihanai Baibel ta ita abia loaloa, namona be iseda laga-ani negadia ita gaukaralaia Baibel ita duahia totona. Ita momo be dina ta ta lalodiai mai eda miniti haida, namona be ita gaukaralaia Baibel ita duahia. Namo bada do ita abia bema dina ta ta lalodiai Baibel ena rau ta ita duahia, unai be ia hegeregere sikuli ena sediual ai ia noho Baibel duahiduahi ena program ita badinaia totona!—Sal. 1:1-3.
4 Baibel duahia namonamo karana ese ita do ia durua diba ita idia kamonai henia taudia edia kudouna ita hamarerea bona edia lalona ita veria Iehova idia hanamoa totona. Hereva Namba 2 ia abia tadikakana ese ena hereva ia hegaegaelaia lalonai ia duahia badabada bona loulou be namo. Sikuli naria tauna ese hanamoa hereva bona heduru hereva do ia henia ena duahiduahi karana ia hanamoa totona.
5 Herevalaia Bukana Gaukaralaia: Hereva Namba 3 bona 4 be Herevalaia bukana amo idia abia. Namona be ita hekwarahi inai buka be hanaihanai haroro gaukara lalonai ita gaukaralaia totona. Taihu ese edia teritori dekenai do idia gaukaralaia diba kahana idia abia hidi. Namona be sikuli naria tauna ese stiuden taudia edia hadibaia dalana bona Baibel idia gaukaralaia dalana ia itaia namonamo.
6 Tiokratik Haroro Sikuli ese ita ibounai do ia durua noho Dirava ese ia henia harihari gauna, hereva karana, do ita gaukaralaia sivarai namona ita harorolaia bona iseda Dirava badana, Iehova, ita hanamoa totona!—Sal. 34:1; Efe. 6:19.