Henanadai Mauana
◼ Teritori dikadia dekenai ita haroro neganai, edena dala ai ita naria namonamo be gau badana?
Tano ena kahana iboudiai dekenai, dagedage, hahine hadikaia, kohu henaoa karadia, bona hepapahuahu karadia edia sivarai ita kamonai. Ena be unai gaudia dainai ita laloa momo, to ita diba unai gabu dikadia dekenai kudou-maoro taudia haida idia noho, bona Basileia ena sivarai namona do idia abia dae. Unai dainai nega namona dekenai, namona be do ita gari lasi bona ita lao haroro, badina ita diba Iehova be ita do ia naria.—Aon. 29:25; 1 Tes. 2:2.
Gabu dikana dekenai ita lao haroro neganai, Iehova ia ura ita naria namonamo bona ita laloa namonamo. Ita gima noho. “Aonega tauna ese dika ia itaia noho, bona unai dika dekena amo ia raka siri, to aonega lasi tauna, be unai dika dekenai do ia raka lao, bona gabeai hisihisi do ia davaria.” (Aon. 22:3) Idia manada vadaeni pablisa taudia idia diba gabu haida dekenai tadikaka rua rua eiava ma haida idia haroro hebou be aonega karana. Hadibaia Tauna 4:9, 12 ia gwau: “Tau rua ese tau tamona idia hereaia noho. . . . Tau tamona be tau ta ese do ia halusia diba, to tau rua ese unai heatu tauna idia koua diba.” Raskol taudia be sibona ia loaloa tauna idia tahua badina idia hagaria be auka lasi.
Ruma badana mai ena noho rumadia momo gabuna dekenai oi vareai neganai, taunimanima idia noho lasi raka gabudia bona vadavada gabudia dekenai oi naria namonamo. Ta ese ena ruma lalonai oi ia boiria neganai, oi naria namonamo. Oi ia hagaria toho eiava oi ia habadua toho tauna ida oi hepapahuahu lasi. Bema mai dalana, idia kekero eiava drag idia ania taudia amo oi raka siri. Oi hahedinaraia haraga oi be Iehova ena Witnes tauna ta. Pablisa haida be hanaihanai edia imana dekenai Baibel eiava Gima Kohorona eiava Awake! magasin idia dogoatao, unai amo taunimanima idia diba idia be daidia.
Unai gabu dekenai idia gini eiava loaloa kava taudia oi naria namonamo. Unai teritori dekenai idia noho tadikaka oi kamonai henia bema oi idia hadibaia taunimanima haida be gau dikana ta idia karaia gwauraia. Unai bamona ia vara neganai, namona be unai gabu umui rakatania bona ma gabu ta umui karaia. Dala ia ore gabudia dekenai eiava oi idia koua diba eiava kerere ia vara neganai heau dalana be lasi gabudia dekenai motuka amo oi vareai lasi. Bema hanuaboi ai oi loaloa, reana hebou murinai, mani grup dekenai umui raka. Namo lasi dika umui davaria diba dala kwadogina umui abia, taunimanima momo idia loaloa gabu dekenai ita raka. Haroro gaukara dekenai moni momo eiava dava bada gaudia oi abia lao lasi. To, oi idia dogoatao diba dainai, oi dekenai moni sisina ia noho danu be lalohadai namona. Henao taudia be edia ura gauna idia abia dainai oi idia rakatania haraga diba. Bema oiemu moni bona kohu sibona idia ura, oi koudia lasi; oiemu mauri be gau badana, kohu be anina lasi.—Mar. 8:36.
Haroro gaukara idia gunalaia taudia idia gima be gau badana, namona be teritori dekenai nega ibounai idia diba pablisa taudia be edeseniai idia noho. Taihu taudia idia naria namonamo be namo. Nega momo grup taudia be gabu tamona dekenai idia gaukara be namo, unai neganai ma haida be idia kahirakahira dekenai idia gaukara. Bema unai gabu dekenai dagedage ta eiava hepapahuahu ta ia vara, grup taudia be karaharaga unai gabu idia rakatania be namo.
Bema ita gima noho bona ita laloa namonamo, raskol momo gabudia dekenai ita haroro diba bona “kara dika rohoroho ibounai, hanua lalonai idia karaia noho, dainai idia taitai noho, bona idia lalohisihisi noho taudia” ita davaridia diba.—Ese. 9:4.
This is a repeat of article in km 11/94 taken from km-E 11/94 “Question Box.”