Emu Natuna ese Ia Dadaraia Gauna Ena Badina Ia Herevalaia Namonamo Diba, A?
1 Dahaka ia dadaraia ena badina ia herevalaia namonamo be namo? Rara abia hanai karana. June 15, 1991, Watchtower, ena hereva ta ladana “Walk as Instructed by Jehovah” ese ia hahedinaraia, namona be Iehova ena Witnes taudia edia natudia ese idia hahedinaraia goevagoeva Dirava ena taravatu rara dekenai be mai anina bada idia bona edia tama sina dekenai. Oiemu natuna danu ese unai ia karaia diba, a?
2 Taravatu be Dahaka Ia Gwau? United States ena kota badana (Illinois Supreme Court) sibona ia gwau, natudia be mai edia maoro rara idia dadaraia totona. Unai kota be Witnes taihu ta, ena mauri lagani be 17, ena kota idia itaia lou neganai, idia gwau: “Bema ai davaria natuna be taunimanima badadia edia lalohadai ia hahedinaraia bona ia laloparara dahaka do ia vara bema rara ia abia lasi, vadaeni taravatu ia gwau natuna be mai ena maoro medikol heduruna ia abia dae eiava ia dadaraia totona.” Bema diadi eiava doketa idia ura diba natuna be sibona ena abia hidi ia karaia diba eiava lasi, vadaeni namona be idia ese natuna idia hereva henia, natuna sibona amo rara ia dadaraia ena badina idia kamonai totona. Namona be memero kekeni ese edia gorere bona idia abia hidi medikol heduru ena namo bona dika idia lalopararalaia namonamo, bona idia sibona ese mai lalogoada ida idia hahedinaraia diba Dirava ena taravatu rara dekenai idia badinaia be namo.
3 Emu Natuna be Dahaka Do Ia Gwau? Emu natudia be idia hegaegae Dirava ena taravatu rara dekenai idia gwauraia hedinarai totona, a? Mai kudouna ibounai ida idia abia dae ‘rara ania lasi’ karana be Dirava ena taravatu ta, a? (Kara 15:29; 21:25) Unai taravatu be Baibel amo idia hahedinaraia diba, a? Bema tama sina idia noho lasi lalonai, doketa be natuna dekenai ia gwau do ia mase bema rara ia abia lasi, natuna be mai gari lasi ida rara do ia dadaraia, a? ‘Nega dika idia vara kava’ dainai, edena dala ai emu natudia oi durua diba, bena idia hegaegae unai bamona nega dikadia lalonai Dirava idia badinaia totona?—Had. 9:11; Efe. 6:4.
4 Tama Sina E, Dahaka Do Umui Karaia? Emui maduna Dirava ena lalohadai rara dekenai be emui natudia dekenai umui hadibaia. (2 Tim. 3:14, 15) Herevalaia bukana ena rau 339-42 ese unai ia gwauraia hedinarai goevagoeva. Emui ruma bese ida unai kahana umui stadilaia namonamo. Herevalaia bukana ena rau 342-44 dekenai be inai kahana “Bema Ta Ia Gwau—” ia noho, emu natudia ida unai umui tohoa be namo, unai amo idia umui durua rara idia dadaraia bona ena badina idia herevalaia totona. (1 Pet. 3:15) Rara dekenai diba ma haida ita abia totona, heduru gaudia be inai: Iehova Ena Witness Taudia Bona Lalohadai Haida Rara Dekenai buklet, How Can Blood Save Your Life? buklet, bona July 1, 2004 Gima Kohorona, rau 4-14.
5 Emu natudia oi durua bena do idia diba “edena kara be namo, edena kara Dirava ia ura henia, bona edena kara be goeva momokani” rara dekenai. Bena natudia ese idia dadaraia ena badina idia herevalaia namonamo diba, bona Iehova ese idia do ia hanamoa.—Roma 12:2.
[Study Questions]
1. Witnes memero kekeni edia lalohadai rara abia hanai karana dekenai be dahaka? Haheitalai ta gwauraia.
2. Kota badana ta be dahaka ia gwau rara ia dadaraia natuna totona, bona unai haheitalai amo Keristani tama sina bona edia natudia be dahaka idia dibaia?
3. Tama sina ese edena henanadai idia laloa be namo, bona dahaka dainai?
4, 5. (a) Tama sina edia maduna be dahaka, bona edena dala ai unai idia hagugurua diba? (b) Tama sina idia durua gaudia haida be dahaka?