Haroro Ena Hebou amo Namo Bada Abia
1 Teritori dekenai ita do lao lasi neganai, haroro ena hebou namodia ese iseda lalona idia hagoadaia bona haroro dekenai do ita gaukaralaia diba heduru hereva namodia idia henia. Unai hebou ese ita ia durua diba pablisa ma haida ita bamoa totona, unai amo ta ta ita durua bona hadibaia heheni diba. (Aon. 27:17; Had. 4:9, 10) Unai hebou amo namo bada ita abia totona, dahaka ita karaia be namo?
2 Haroro Ena Hebou Ia Naria Tadikaka: Haroro ena hebou ai tadikaka be program ta idia badinaia lasi. Unai dainai, bema oi be haroro ena hebou do oi naria, oi hegaegae namonamo be namo. Namo lasi unai hebou dekenai dina ena siri oi gaukaralaia momo, to bema ia be haroro gaukara ia herevalaia, vadaeni oi gaukaralaia diba. Namona be unai dina dekenai idia haroro taudia do ia durua dala namona oi laloa. Hegeregere, haroro ena kiki herevana ta oi haheitalaia eiava oi herevalaia. Eiava Herevalaia bukana, Haroro Sikuli bukana, eiava vanegai Hesiai Hebou ena kahana ta oi abia hidi. Nega ma haida ai, emu teritori ai ia vara diba hekwakwanai hanaia dalana ta umui herevalaia. Eiava kamonai tauna ena lalona ia veria dalana bona Baibel stadi hamatamaia daladia oi herevalaia diba, bema pablisa momo be lou henia do idia karaia. Herevana dahaka oi herevalaia, to unai hebou ese tadikaka edia haroro urana ia habadaia bona hagoadaia be namo.
3 Nega korikorina ai haroro ena hebou oi hamatamaia be namo, herevana oi diba haida be do idia mai leiti. Namona be mai laloa maoromaoro ida grup oi haria, bona teritori ena bada ia hegeregere grup taudia idia haroro totona. Guriguri amo haroro ena hebou umui koua be namo. Namona be haroro ena hebou ena lata be miniti 10 ia lao 15 ia hanaia lasi, eiava umui hakwadogia diba bema unai hebou be kongrigeisen ena hebou murinai do umui karaia. Unai hebou oi do koua lasi neganai, namona be pablisa ibounai idia diba idia be daika do idia bamoa bona edeseniai do idia haroro. Namona be unai hebou be guriguri amo umui koua.
4 Umui Durua Diba: Kongrigeisen heboudia dekenai hegeregerena, bema haroro ena hebou totona ita leiti lasi, ita hahedinaraia Iehova ita matauraia bona ma haida ita laloa bada. Herevahereva lalonai haere ita henia. Haroro ena hebou naria tauna ese emu bamona ia abia hidi diba, eiava hebou ia do matamaia lasi neganai, oi sibona ese emu bamona oi abia hidi diba. Bema oi ura oi sibona emu bamona oi abia hidi, namo lasi emu turana namona sibona oi abia hidi loulou, to emu hebamo karana oi “habadaia” totona, pablisa idauidau ida oi gaukara hebou be namo. (2 Kor. 6:11-13) Haroro ena hebou ia ore neganai, namo lasi senisi haida umui karaia, to karaharaga haroro teritori dekenai umui lao.
5 Unai hebou bona kongrigeisen heboudia ita karaia edia badina be tamona. Unai hebou amo ‘ta ta dekenai durua henia daladia do ita laloa’ bona ‘lalokau dekena amo kara namodia do ita karaia.’ (Heb. 10:24, 25) Bema ita hekwarahi unai hebou amo namo bada ita abia, unai ese ita do ia durua iseda haroro gaukara ita karaia totona—unai be ‘kara namona’ momokani!
[Study Questions]
1. Haroro ena hebou ese edena bamona ita ia durua diba?
2. Haroro ena hebou ia naria tauna ese dahaka gaudia ia herevalaia be namo?
3. Namona be haroro ena hebou ena lata be hida, bona unai nega lalonai dahaka oi karaia be namo?
4. Ibounai be haroro ena hebou amo namo idia abia totona, dahaka idia karaia be namo?
5. Haroro ena hebou ita karaia ena badina be dahaka?