Iseda Haroro Bona Mauri Dalana Hebou Pepana Edia Referens
FEBRUARY 4-10
BAIBEL ENA HEREVA BADADIA | ROMA 1-3
“Emu Lalomamina Oi Hadibaia Noho”
(Roma 2:14, 15) Vadaeni taravatu idia diba lasi idau bese taudia be edia lalona ese ia hadibaia, taravatu idia badinaia totona. Ena be unai taudia dekenai taravatu be lasi, to edia kudouna ai taravatu ia noho. 15 Unai taudia ese idia hahedinaraia, taravatu ena hereva badadia be edia kudouna ai idia noho, bona edia lalomamina danu ese unai ia hahedinaraia, bona unai idia lalohadailaia neganai, edia lalona ese idia ia gwauraia kerere eiava idia ia gwauraia maoromaoro.
Emu Lalomamina Ia Goeva Noho Dalana
6 Iehova ena hesiai taudia sibodia be mai edia lalomamina, a? Aposetolo Paulo ia gwau: “Vadaeni taravatu idia diba lasi idau bese taudia be edia lalona ese ia hadibaia, taravatu idia badinaia totona. Ena be unai taudia dekenai taravatu be lasi, to edia kudouna ai taravatu ia noho. Unai taudia ese idia hahedinaraia taravatu ena hereva badadia be edia kudouna ai idia noho, bona edia lalomamina danu ese unai ia hahedinaraia, bona unai idia lalohadailaia neganai, edia lalona ese idia ia gwauraia maoromaoro eiava idia ia gwauraia kerere.” (Roma 2:14, 15, NW) Iehova ena taravatu idia diba lasi taudia danu be nega haida edia lalomamina ese ia hadibaia diba Dirava ena taravatu idia badinaia totona.
(Roma 2:15) Unai taudia ese idia hahedinaraia, taravatu ena hereva badadia be edia kudouna ai idia noho, bona edia lalomamina danu ese unai ia hahedinaraia, bona unai idia lalohadailaia neganai, edia lalona ese idia ia gwauraia kerere eiava idia ia gwauraia maoromaoro.
Emu Lalomamina Ia Goeva Noho Dalana
8 Taunimanima haida be edia ura bona hemami idia laloa bada bona unai hegeregerena abia hidi idia karaia. Idia gwau: “Lau laloa unai be maoro, ia kerere lasi.” Kudouna ena ura be ia goada neganai, iseda lalomamina ia hakaua kerere diba. Baibel ia gwau: “Taunimanima edia kudouna be mai koikoi bada, bona mai dika rohoroho danu. Daika ese kudouna ena dala ia diba?” (Ieremia 17:9) Unai dainai, namo lasi iseda kudouna ena ura gaudia ita laloa bada. To, mai anina bada gauna be, ita ura diba dahaka ese Iehova Dirava do ia hamoalea.
9 Bema iseda lalomamina be Dirava ena ura hegeregerena ita hadibaia, bona unai hegeregerena abia hidi ita karaia neganai, do ia hedinarai ita be Dirava ita gari henia, bona sibona eda ura ita badinaia lasi. Mani inai sivarai oi laloa. Gavana tauna Nehemia be mai ena maoro Ierusalema ai idia noho taudia amo takisi moni ia gogoa totona. To, unai bamona ia karaia lasi. Dahaka dainai? Ia ura lasi unai kara amo Dirava ena taunimanima ia hametaua bona Iehova ena lalonamo ia haboioa. Ia gwau: “Lau ese Dirava lau gari henia dainai, unai bamona lau karaia lasi.” (Nehemia 5:15) Dirava ita gari henia be gau badana; ita ura lasi iseda guba Tamana ita habadua. Ita ura abia hidi ta ita karaia neganai, Dirava gari henia karana ese ita do ia durua Baibel ena hakaua herevadia ita tahua guna totona.
Hakaua Hereva Namodia Tahua
(Roma 3:4) Lasi vaitani! Dirava be ia hereva momokani sibona, ena be taunimanima ibounai idia koikoi. Toretore Helagadia ena hereva bamona, ia gwau: “Oiemu hereva amo taunimanima do idia hamomokania oi be maoromaoro, bona oi idia hahemaoro henia neganai, do oi kwalimu”.
Roma Bukana Ena Hereva Badadia
3:4. Bema taunimanima edia hereva be Baibel ena hereva amo ia idau, namona be Baibel ena hereva ita abidadama henia bona Dirava ena ura hegeregerena ita kara, badina Dirava tamona be nega ibounai “ia hereva momokani.” Basileia harorolaia bona hahediba taudia halaoa gaukarana ita goadalaia neganai, ita ese ma haida ita durua bona idia abia dae Dirava be nega ibounai ia hereva momokani.
(Roma 3:24, 25) To Dirava ese hebogahisi hereadaena be idia dekenai ia hahedinaraia, bona Keriso Iesu ia henia mauri davana amo idia ia ruhaia bona idia ia gwauraia maoromaoro, unai be iena davana lasi harihari gauna. 25 Dirava ese ia be boubou gauna ta bamona ia henia, bona Keriso ena rara abidadama henia karana amo, taunimanima be Dirava ida maino idia karaia diba. Dirava ese unai ia karaia ena kara maoromaoro ia hahedinaraia totona, badina idaunegai idia vara kara dika ia gwauatao neganai, haheauka ia hahedinaraia.
Roma Bukana Ena Hereva Badadia
3:24, 25—“Keriso Iesu ia henia mauri davana amo,” edena dala ai Dirava be “idaunegai idia vara kara dika ia gwauatao” diba? Mesia idia perovetalaia herevana ginigunana Genese 3:15 ai be lagani 33 C.E. ai, Iesu be au dekenai idia hamasea neganai ia guguru. (Gal. 3:13, 16) Iehova ia ura do ia karaia gaudia be gau ta ese ia koua diba lasi, to idia guguru vaitani. Unai dainai, Iehova ese unai peroveta herevana ia gwauraia neganai, unai be hegeregere Iesu be ena mauri davana ia henia vadaeni. Unai dainai, Iesu Keriso ese ia karaia boubouna ese dala ia kehoa bona Adamu ena tubudia ese unai boubou gauna idia abidadama henia neganai, Iehova ese edia dika do ia gwauatao. Keriso ia do mai lasi neganai idia noho taudia danu be unai mauri davalaia boubouna dainai idia toreisi lou diba.—Kara 24:15.
Baibel Duahiduahi
FEBRUARY 11-17
BAIBEL ENA HEREVA BADADIA | ROMA 4-6
“Dirava ese Ita Dekenai Iena Lalokau Ia Hahedinaraia”
(Roma 5:8) To Dirava ese ita dekenai iena lalokau ia hahedinaraia dalana be inai: Ita be do kara dika taudia neganai, Keriso be ita totona ia mase.
(Roma 5:12) Unai dainai, tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.
Dirava ese Ita Dekenai Iena Lalokau Ia Hahedinaraia
5 Paulo ese unai ia herevalaia, ia gwau: “Tau tamona dekena amo kara dika be tanobada dekenai ia vareai, bona kara dika ese mase ia mailaia. Bona unai dainai mase be taunimanima ibounai dekenai ia hanaia lao, badina idia ibounai be idia kara dika vadaeni.” (Roma 5:12) Unai ita lalopararalaia diba, badina Dirava ese taunimanima edia mauri ia matamaia sivaraina be Baibel ai ia torea. Iehova ese Adamu bona Heva ia havaraia. Havaraia Tauna ia goevadae dainai, idia ruaosi idia goevadae danu. Dirava ese idia dekenai taravatu ta ia henia bona ia hamaorodia bema idia badinaia lasi, vadaeni do idia mase. (Gen. 2:17) To Dirava ena taravatu idia utua karana amo, Taravatu Henia Tauna bona Siahu Ibounai Diravana idia dadaraia.—Deu. 32:4, 5.
(Roma 5:13, 14) Taravatu ia do hedinarai lasi neganai, kara dika be tanobada ai ia noho vadaeni. To bema taravatu be lasi, ta ese ia karaia kara dikadia dainai ia do idia samania lasi. 14 Adamu ena nega amo ia mai bona Mose ena nega ai, mase be king ta bamona ia lohia. Bona Adamu ia karaia kara dikana idia karaia lasi taudia be mase ese ia lohiaia danu. Adamu be do ia mai tauna ena toana hegeregerena.
Dirava ese Ita Dekenai Iena Lalokau Ia Hahedinaraia
6 Adamu ia karaia dika murinai natudia ia havaraia, unai amo idia ibounai dekenai kara dika ia henia hanai. To, idia be Adamu amo idia idau, badina Dirava ena taravatu idia utua lasi, bona unai kara dika dainai davana idia abia lasi. Bona danu, unai negai Mose ena Taravatu ia noho lasi. (Gen. 2:17) To, idia ibounai be Adamu ena natudia dainai, idia be mai edia kara dika. Unai dainai kara dika bona mase ia noho ela bona Dirava ese Israela taudia dekenai Taravatu ia henia, bona unai ese ia hahedinaraia idia be mai edia kara dika. (Roma 5:13, 14 duahia.) Adamu amo ita abia hanai kara dika be iseda tama sina amo ita abia hanai gorerena ida ita hahegeregerea diba. Ena be ruma bese lalonai natudia haida be tama sina amo unai gorere idia abia hanai, to natudia haida be unai gorere idia abia hanai lasi. To kara dika be unai bamona lasi. Ita ibounai be Adamu amo kara dika ita abia hanai dainai, do ita mase. To unai ita hanaia dalana ta ia noho, a?
(Roma 5:18) Vadaeni tau tamona ena kara dika dainai, taunimanima idauidau ibounai be Dirava ese ia gwauraidia dika. Unai hegeregerena, tau tamona ena kara maoromaoro dainai, Dirava ese taunimanima idauidau ibounai ia gwauraidia maoromaoro, mauri do idia abia totona.
(Roma 5:21) Unai ena badina be dahaka? Ena badina be inai, kara dika bona mase be king bamona idia lohia hegeregerena, kara maoromaoro amo, hebogahisi hereadaena be king bamona do ia lohia, bona iseda Lohiabada Iesu Keriso amo mauri hanaihanai do ia mailaia.
Dirava ese Ita Dekenai Iena Lalokau Ia Hahedinaraia
9 Inai hereva “ia gwauraidia maoromaoro” ena anina be dahaka? Baibel hahanaia tauna ta ese unai ia herevalaia, ia gwau: “Unai hereva be kota taudia ese idia gaukaralaia herevana ta lasi. To ia hahedinaraia, Dirava ena lalohadai kara dika tauna dekenai ia idau, to unai tauna ena kara be ia idau lasi . . . Unai be hegeregere, Dirava be diadi tauna bona kara dika ia karaia tauna be Iena vairanai ia gini, ia hahemaoro henia totona. To Dirava ese unai kara dika tauna ena dika ia gwauatao.”
10 “Tanobada ibounai ena kota biaguna” ese edena dala ai kara maoromaoro lasi tauna ena dika ia gwauatao diba? (Gen. 18:25) Unai ia karaia totona, Dirava ese ena Natuna tamona sibona be tanobada dekenai ia siaia mai. Ena be Iesu ese hahetoho ia davaria, ia idia kirikirilaia bona dagedage henia danu, to ena Tamana ena ura ia karaia guguru. Dirava ia badinaia ela bona hisihisi auna dekenai ia mase. (Heb. 2:10) Iesu ena mauri goevadaena be boubou gauna bamona ia henia neganai, Adamu ena natudia be kara dika bona mase amo ia ruhaia.—Mat. 20:28; Roma 5:6-8.
Hakaua Hereva Namodia Tahua
(Roma 6:3-5) Eiava umui diba lasi, a? Keriso Iesu lalonai bapatiso ita abia taudia ibounai be iena mase lalonai ita bapatiso. 4 Unai dainai ita be ena mase lalonai bapatiso ita abia karana amo, Dirava ese ita be ia ida ia guria hebou. Vadaeni Tamana ena siahu amo Keriso be mase amo ia hatorea isi lou hegeregerena, ita danu be mauri dala matamatana ita badinaia be namo. 5 Bema ita be ia mase hegeregerena ita mase, vadaeni ita be ia toreisi lou hegeregerena do ita toreisi lou, bona unai dala ai ita be ia ida ita hakapua.
Roma Bukana Ena Hereva Badadia
6:3-5—Inai hereva “ita bapatiso neganai, Keriso Iesu danu ita hakapua tamona,” bona “ita be Iesu danu ita mase” ena anina be dahaka? Keriso murinai idia raka taudia be Iehova ena lauma helaga amo ia horoa neganai, idia be Iesu ida idia hakapua tamona bona idia be horoa Keristani kongrigeisen ai idia lao. Unai kongrigeisen be Iesu ena tauanina bona Iesu be ena Kwarana. (1 Kor. 12:12, 13, 27; Kol. 1:18) Idia bapatiso neganai Iesu danu idia hakapua tamona ena anina be unai. Horoa Keristani taudia edia mase be boubou gauna bamona, badina ‘Iesu danu idia mase’ anina be, idia be tanobada dekenai mauri hanaihanai do idia reaia bona guba dekenai idia lao. Unai dainai, edia mase be Iesu ena mase hegeregerena, boubou gauna bamona, to edia mase ese iseda kara dika ia hoia lou lasi. Idia mase bona lauma taudia bamona guba dekenai idia toreisi lou neganai, idia be Keriso ena mase lalonai idia bapatiso unai.
(Roma 6:7) Badina ia mase vadaeni tauna be ena kara dika ese ia guia lou lasi.
w14-E 6/1 11 par. 1
Idaunegai Idia Mase Vadaeni Taudia Dekenai Dahaka Helaro ia Noho?
Kara dika taudia idia toreisi lou neganai, Dirava ese edia kara gunadia dainai idia do ia hahemaoro henia, a? Lasi. Roma 6:7 ia gwau: “Badina ia mase vadaeni tauna be ena kara dika ese ia guia lou lasi.” Kara dika taudia be mase amo edia dika davana idia karaia. Unai dainai, idia toreisi lou murinai do idia karaia karana amo hahemaoro do idia abia, to idia do mauri lalonai idia karaia kara dika dainai lasi. Edena dala ai namo do idia abia?
Baibel Duahiduahi
FEBRUARY 18-24
BAIBEL ENA HEREVA BADADIA | ROMA 7-8
“Mai Ura Bada ida Oi Naria Noho, A?”
(Roma 8:19) Badina Dirava ese ia havaraia gaudia ibounai be mai edia ura bada ida, Dirava ena natudia edia hairai do ia hedinarai negana idia naria noho.
Iehova be Ura Kwalimu Korikorina Dekenai Oi Ia Hakaua Lao
17 Iehova ese ena taunimanima dekenai do ia henia ura kwalimu be Paulo ese ia herevalaia. Ia gwau: “Dirava ese ia havaraia gaudia ibounai be mai edia ura bada ida, Dirava ena natudia edia hairai do ia hedinarai negana idia naria noho.” Bena ma ia gwau: “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.” (Roma 8:19-21) “Havaraia gaudia” be tanobada ai mauri hanaihanai helarona idia abia taudia ia herevalaia. Bona idia be “Dirava ena natudia,” horoa taudia unai, “edia hairai do ia hedinarai negana” ai hahenamo do idia abia. Keriso be horoa taudia ida kara dika taudia idia haorea, bona tanobada matamatana ai “hutuma bada” taudia idia hakaua vareai neganai, “Dirava ena natudia edia hairai do ia hedinarai negana” do ia matamaia.—Apok. 7:9, 14.
(Roma 8:20) Dirava ese ia havaraia gaudia ibounai be anina lasi maurina idia abia, unai be sibodia edia ura dainai lasi, to Dirava ena ura dainai, to unai neganai danu helaro ia henia
Iseda Helaro Dainai Ita Moale
11 Dirava ia gwauhamata “garana” ta amo taunimanima be Satani Diabolo ena igui amo do ia ruhaia neganai, idia dekenai “helaro” ia henia. (Apok. 12:9; Gen. 3:15, BHğ) Unai garana ena kahana ginigunana be Iesu Keriso. (Gal. 3:16) Iesu ena mase bona toreisi lou ese taunimanima be kara dika bona mase amo ia ruhaia. Guba ai “Dirava ena natudia edia hairai do ia hedinarai negana” ese unai helaro ia hamomokania. Idia be garana ena kahana iharuana. Bona Keriso ida Satani ena tanobada dikana idia hadikaia ore negana ai do idia hedinarai. (Apok. 2:26, 27) Unai ia vara neganai, hutuma bada be hisihisi badana amo do idia roho mauri.—Apok. 7:9, 10, 14.
(Roma 8:21) vadaeni Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.
Iseda Helaro Dainai Ita Moale
12 Keriso ena lagani 1,000 lohia negana ai taunimanima edia mauri be do ia namo herea! Unai nega ai, “Dirava ena natudia edia hairai” be dala ma ta ai do ia hedinarai. Keriso ida hahelaga gaukara do idia karaia bona taunimanima do idia durua mauri davalaia boubouna ena hahenamo idia abia totona. Dirava ena Basileia ese tanobada ia lohiaia neganai, Dirava idia kamonai henia taudia be “dika ena igui amo do ia ruhadia.” Anina be kara dika bona mase amo do ia ruhadia. Bema lagani 1,000 lalonai bona hahetoho ginigabena ai taunimanima ese Iehova idia badinaia noho, edia ladana be “mauri bukana” lalonai do ia noho ela bona hanaihanai. Bona “Dirava ena natudia edia ura kwalimu hereadaena” do idia abia. (Apok. 20:7, 8, 11, 12) Momokani, unai be helaro hereadaena!
Hakaua Hereva Namodia Tahua
(Roma 8:6) Tauanina ena ura gaudia laloa karana ese mase ia mailaia, to lauma helaga ena gaudia laloa karana ese mauri bona maino ia mailaia,
Inai Oi Laloatao, A?
“Tauanina ena ura gaudia laloa karana” bona “lauma helaga ena gaudia laloa karana” edia idau be dahaka? (Roma 8:6)
Tauanina ena ura gaudia ia laloa tauna be ena ura sibona ia laloa bona badinaia, bona nega ibounai unai gaudia ia herevalaia. Lauma helaga ena gaudia ia laloa tauna be Dirava ena laloa hegeregerena do ia laloa; unai bamona Keristani tauna be lauma helaga ese ena lalohadai ia biagua. Tauanina ena ura gaudia laloa karana ese mase ia mailaia, to lauma helaga ena gaudia laloa karana ese mauri bona maino ia mailaia.—w16.12, rau 15-17.
(Roma 8:26, 27) Bona danu ita manoka neganai, Dirava ena siahu ese ita ia durua diba. Nega haida ita diba lasi, dahaka do ita gurigurilaia. Unai bamona negadia ai, ena be ita diba lasi dahaka do ita gwauraia, to Dirava ena siahu amo heduru ita abia. 27 Dirava ese taunimanima edia kudouna ia tahua bona lauma helaga amo idia vara herevadia edia anina ia lalopararalaia. Badina lauma helaga be Dirava ena ura hegeregerena ia noinoi bona unai bamona ia karaia helaga taudia durua totona.
Emu Guriguri Dalana Ia Hahedinaraia Oi be Iehova Ena Turana, A?
20 Nega haida, reana ita sibona eda guriguri lalonai ita diba lasi dahaka do ita herevalaia. Paulo ia gwau: “Nega haida ita diba lasi, dahaka do ita gurigurilaia. Unai bamona negadia ai, ena be ita diba lasi dahaka do ita gwauraia, to Dirava ena siahu amo heduru ita abia. Dirava ese taunimanima edia kudouna ia tahua bona lauma helaga amo idia vara herevadia edia anina ia lalopararalaia.” (Roma 8:26, 27) Iehova ese tatau haida ia abia hidi Baibel lalonai guriguri momo idia torea totona. Unai guriguri herevadia ia abia dae hegeregere idia be iseda guriguri bamona bona ia haerelaia. Dirava be ita ia diba bona ena lauma helaga amo idia torea guriguri edia anina ia lalopararalaia. Lauma helaga be ita totona Iehova ia “noia” neganai, Ia ese iseda guriguri ia haerelaia diba. To, Dirava ena Hereva ita duahia momo neganai, do ita diba dahaka gaudia totona do ita guriguri.
Baibel Duahiduahi
FEBRUARY 25–MARCH 3
BAIBEL ENA HEREVA BADADIA | ROMA 9-11
“Olive Auna Ena Haheitalai”
(Roma 11:16) Danu, bema paraoa ena kahana ginigunana be ia helaga, vadaeni paraoa ibounai danu be ia helaga. Bona bema au ena ramuna be ia helaga, vadaeni ena rigi danu be idia helaga.
‘Dirava Ena Aonega be Dobu Momokani!’
13 Aposetolo Paulo ese Aberahamo ena garana ena kahana iharuana ai idia lao taudia be olive auna ena rigidia ida ia hahegeregerea. (Roma 11:21) Uma lalonai ia tubu olive auna ese Dirava be Aberahamo ida ia karaia gwauhamata do ia hagugurua karana ia laulaulaia. Unai au ena ramuna be ia helaga bona Iehova ia laulaulaia, badina Iehova ese lauma Israela dekenai mauri ia henia. (Isa. 10:20; Roma 11:16) Unai au ena gabana ese Iesu ia laulaulaia, ia be Aberahamo ena garana ena kahana ginigunana. Unai au ena rigidia be Aberahamo ena garana ena kahana iharuana ia laulaulaia. Bona idia ese Aberahamo ena garana ena namba idia hagugurua.
(Roma 11:17) To bema au ena rigi haida idia utua oho to oi, ena be oi be ia tubu kava olive auna ena rigi, to oi be unai au ena rigi haida edia huanai idia atoa vareai, vadaeni oi be unai au ena ramuna amo namo bada oi abia,
(Roma 11:20, 21) Momokani, edia abidadama lasi karana dainai, Dirava ese idia ia utua oho, to abidadama dainai oi be oi gini noho. Namo lasi oi hekokoroku, to namona be oi gari. 21 Badina bema Dirava ese unai au ena rigi korikoridia ia utua, ia ese oi do ia utua danu.
‘Dirava Ena Aonega be Dobu Momokani!’
15 Vadaeni, Iehova be dahaka ia karaia iena ura ia hagugurua totona? Paulo ia gwau ia tubu kava olive auna ena rigidia be uma ai ia tubu olive auna dekenai idia atoa vareai, idia utua oho rigi edia gabu abia totona. (Roma 11:17, 18 duahia.) Unai dainai, Roma kongrigeisen ai idia noho Idau Bese horoa Keristani taudia, be Paulo ese ia herevalaia uma ai ia tubu olive auna ai idia atoa vareai rigidia bamona. Unai dala amo idia be Aberahamo ena garana ena kahana ai idia lao diba. Guna idia be ia tubu kava olive auna ena rigidia, bona idia be dala lasi Aberahamo ena garana ena kahana ai idia lao totona. To, Iehova ese dala ia kehoa idia be lauma Israela besena ai idia lao totona.—Roma 2:28, 29.
(Roma 11:25, 26) Tadikaka e, lau ura inai hunia hereva helagana do umui lalopararalaia, unai amo sibona emui matana ai umui aonega lasi. Gauna be inai, Israela taudia haida edia darana ia dibura noho ela bona idau bese taudia edia namba ia guguru bona idia vareai. 26 Bona unai dala ai Israela taudia ibounai be hahemauri do idia abia. Toretore Helagadia ai idia torea bamona, ia gwau: “Hamauria tauna be Siona amo do ia mai bona Iakobo ena bese do ia durua, kara dika idia rakatania totona.
‘Dirava Ena Aonega be Dobu Momokani!’
19 Oibe, Iehova ena ura “Dirava ena Israela” dekenai be hoa dalana ai ia guguru noho. (Gal. 6:16) Paulo ena hereva bamona, “Israela taudia ibounai be hahemauri do idia abia.” (Roma 11:26) Iehova ese ia abia hidi negana ai, “Israela taudia ibounai”—ena namba ia guguru vadaeni lauma Israela taudia—be guba ai king bona hahelaga gaukara do idia karaia. Gau ta ese Iehova ena ura do ia koua diba lasi!
Hakaua Hereva Namodia Tahua
(Roma 9:21-23) Edena bamona? Uro karaia tauna be mai ena siahu, raro tamona amo uro rua ia karaia, ta be anina bada gaukaradia totona bona ma ta be anina lasi gaukaradia totona, ani? 22 Ena be Dirava ia ura ena badu bona ena siahu ia hahedinaraia, to bema ia badu henia urodia, oibe, dika do idia davaria gaudia dekenai ia boga-auka, be edena bamona? 23 Bona bema unai bamona ia karaia, ia hebogahisi henia urodia dekenai iena hairai bada ia hahedinaraia totona, unai urodia be guna ia hegaegaelaidia hairai do idia abia.
Iehova Ena Matahakani ese Oi Ia Hamaoromaoroa be Namo
5 Bema taunimanima idia ura lasi Iehova, Uro Karaia Tauna Badana, ese edia kara ia hamaoromaoroa be edena bamona? Edena dala ai Iehova ese ena siahu ia gaukaralaia? Bema uro karaia tauna ese ia gaukaralaia raro be ia dika, dahaka do ia karaia? Unai raro ia gaukaralaia diba uro idauna ta ia karaia totona, eiava unai raro ia negea diba! Bema raro be ia namo lasi, nega momo unai be uro karaia tauna ena kerere. To, Uro Karaia Tauna Badana be unai bamona lasi. (Deu. 32:4) Bema tau ta ia ura lasi Iehova ena matahakani ese ia hamaoromaoroa, unai be Iehova ena kerere lasi. Unai tau ena kara dainai, Iehova ese ena matahakani dalana ia haidaua diba. To, Iehova ena matahakani idia abia dae taudia be namo idia davaria. Hegeregere, horoa Keristani taudia be “ia hebogahisi henia urodia” bona idia be “anina bada gaukaradia” karaia totona ia hamaoromaorodia. To, Dirava ena matahakani idia abia dae lasi taudia be “ia badu henia urodia” bamona bona “dika do idia davaria.”—Roma 9:19-23.
(Roma 10:2) Idia dekenai lau gwauraia hedinarai, idia be idia ura dikadika Dirava idia hesiai henia, to diba maoromaoro hegeregerena idia karaia lasi.
it-1-E 1260 par. 2
Mai Ura Bada Ida Gau Ta Oi Karaia
Ura Kererena. Ena be ta be mai ura bada ida ia gaukara goadagoada, to ia karaia kerere dainai Dirava ese ia lalonamo henia lasi. Keristani taudia ginigunadia edia negai idia noho Iuda taudia momo dekenai unai ia vara. Idia laloa Mose ena Taravatu idia badinaia dainai, idia be kara maoromaoro taudia. To Paulo ese ia hahedinaraia, ena be unai taudia idia ura dikadika Dirava idia hesiai henia, to idia dekenai diba maoromaoro be lasi. Unai dainai Dirava ena kara maoromaoro dalana idia badinaia lasi. Namona be edia kara dika amo idia helalo-kerehai bona Keriso idia abidadama henia, unai amo kara maoromaoro taudia ai idia lao diba bona Mose ena taravatu henunai do idia noho lasi. (Ro 10:1-10) Unai ura kererena ia hahedinaraia tauna ta be, Taso tauna, Saulo. Ia be Iuda tomadiho ia badinaia goadagoada dainai, ‘Dirava ena kongrigeisen ia dagedage henia bada bona ia ura ia hadikaia.’ Ia ese Mose ena Taravatu ia badinaia auka dainai, ia laloa ‘ia be kerere lasi.’ (Ga 1:13, 14; Fp 3:6) To Iuda tomadihona totona ia hahedinaraia ura goadana be kerere. To ena kara dika amo ia helalo-kerehai dainai, Iehova ese Keriso amo ia dekenai hebogahisi karana ia hahedinaraia bona ia durua tomadiho momokani ia badinaia totona.—1 Ti 1:12, 13.
Baibel Duahiduahi