Iseda Haroro Bona Mauri Dalana Hebou Pepana Edia Referens
MARCH 4-10
BAIBEL ENA HEREVA BADADIA | ROMA 12-14
“Keristani Lalokau Hahedinaraia Karana Ena Anina”
(Roma 12:10) Namona be emui abidadama tamona taudia do umui hebogahisi henia bona lalokau henia, tadikaka idia lalokau heheni bamona. Bona umui ta ta dekenai hemataurai hahedinaraia karana do umui gunalaia.
it-1-E 55
Lalokau
Tadikaka lalokau henia karana (Gr., phi·la·del·phiʹa, anina be, “tadikaka lalokau henia”) be Keristani kongrigeisen taudia ibounai edia huanai ia noho be namo. (Ro 12:10; He 13:1; 1Pe 3:8 itaia danu.) Danu, kongrigeisen lalonai, ruma bese ta bamona, ibounai edia hetura karana ia goada bona ta ta dekenai lalokau karana idia hahedinaraia be namo. Ena be kongrigeisen taudia ese tadikaka lalokau henia karana idia hahedinaraia noho, to unai kara idia habadaia be namo.—1Te 4:9, 10.
Inai Grik herevana phi·loʹstor·gos, ena anina be “ta ta lalokau henia karana.” Unai hereva idia gaukaralaia ta tura henia namonamo karana idia herevalaia totona. Inai hereva ena kahana ta, sterʹgo, be ruma bese taudia huanai idia hahedinaraia lalokau karana ia herevalaia. Aposetolo Paulo ese Keristani taudia ia hagoadaia inai kara idia hahedinaraia totona. (Ro 12:10) Danu Paulo ese ia hahedinaraia, dina gabediai taunimanima be “lalokau” karana (Gr., aʹstor·goi) do idia hahedinaraia lasi, bona unai bamona taudia idia mase be maoro.—2Ti 3:3; Ro 1:31, 32.
(Roma 12:17-19) Tau ta ena dika davana umui haloua lasi. Dala umui tahua, taunimanima ibounai vairanai kara namodia umui karaia totona. 18 Bema mai dalana bona bema umui karaia diba, taunimanima ibounai ida maino ai do umui noho. 19 Lauegu lalokau taudia e, ta ena dika davana do umui haloua lasi, to Dirava dekenai umui rakatania, ia ese unai dika dekenai ena badu do ia hahedinaraia, badina Toretore Helagadia ia gwau: “Iehova ia gwau, dika ena davana be egu, lau ese davana do lau haloua.”
“Taunimanima Danu mai Maino Danu Do Umui Noho”
3 Roma 12:17 duahia. Paulo ia gwau ma haida ese ita idia dagedage henia neganai, ita be idia do ita dagedage henia lasi. Tomadiho dalanai idia parara ruma bese lalonai unai sisiba idia badinaia be mai anina bada. Namona be Witnes tauna o hahinena ese iena Witnes lasi adavana ena hereva o kara dika davana do ia henia lou lasi. Dika ena davana henia lou karana ese namo ta do ia havaraia lasi. To, ruma bese lalonai hepapahuahu do ia habadaia sibona.
“Ta Ena Kara Dika Davana Umui Henia Lasi”
12 Paulo ese Iehova idia tomadiho henia taudia bona Iehova idia tomadiho henia lasi taudia ita kara henia dalana be inai bamona ia herevalaia: “Bema tau ta ese umui dekenai ia kara dika henia neganai, iena kara dika davana do umui henia lasi.” Unai be Roma 12:9 ena hereva hegeregerena, ia gwau: “Dika do umui negea momokani.” Bema tau ta ia gwau ia be dika ia negea momokani, to ma haida edia dika edia davana ia henia be edena bamona? Unai tau be taunimanima ia “lalokau henia koikoi.” Paulo ia gwau: “Taunimanima ibounai edia vairana dekenai kara namo sibona do umui karaia.” (Roma 12:9, 17) Edena dala ai unai sisiba ita badinaia?
13 Paulo be Korinto kongrigeisen taudia ia tore henia neganai, ia ese aposetolo taudia idia davaria dagedage karana ia herevalaia. Ia gwau: “Ibounai ese edia matana dekenai ai do idia itaia, taunimanima bona aneru danu. . . . Ai dekenai idia hereva dika noho, to ai ese idia ai hanamoa. Ai idia dagedage henia noho, to davana ai henia lasi. Aiemai ladana idia hadikaia noho, to idia dekenai ai hereva mai manau danu.” (1 Korinto 4:9-13) Hari inai negai, tanobada taudia be Keristani taudia korikoridia idia raraia noho. Dagedage ita davaria neganai, idia be iseda kara namodia idia itaia dainai, ita harorolaia sivarai namona idia abia dae.—1 Petero 2:12.
(Roma 12:20, 21) To “bema emu inai tauna ia hitolo, aniani oi henia, bema ia ranu mase, ranu oi henia, badina unai bamona oi karaia neganai, oi ese lahi gidadia be iena kwarana ai oi haboua bamona.” 21 Namo lasi dika ese oi ia halusia, to namona be kara namo amo dika oi halusia noho.
Mai Kudouna Ibounai ida Do Umui Gwauatao Heheni
13 Nega haida reana murimuri tauna ta ese oi do ia habadua. To, ia oi durua diba Baibel ena hadibaia herevadia ia diba totona. Paulo ia gwau: “‘Bema emu inai tauna ia hitolo, aniani oi henia, bema ia ranu mase, ranu oi henia, badina unai bamona oi karaia neganai, oi ese lahi gidadia be iena kwarana ai oi haboua bamona.’ Namo lasi dika ese oi ia halusia, to namona be kara namo amo dika oi halusia noho.” (Roma 12:20, 21) Ena be taunimanima ese oi idia badu henia, to bema oi manau, unai ese idia do ia durua edia kara idia haidaua, bona hemataurai idia hahedinaraia totona. Bema oi ia badu henia tauna dekenai hebogahisi bona laloparara oi hahedinaraia, unai ese ia do ia durua Baibel ena hereva ma haida ia dibaia totona. Herevana dahaka ia vara, to ruma tauna ese emu manau bona hebogahisi karana do ia laloa noho.—1 Pet. 2:12; 3:16.
Hakaua Hereva Namodia Tahua
(Roma 12:1) Unai dainai tadikaka e, Dirava ena hebogahisi dainai umui lau noia, emui tauanina do umui henia, ia be boubou gauna bamona mai mauri, mai helaga, bona Dirava ese ia moalelaia, unai amo mai emui darana ida unai hesiai gaukara helagana do umui karaia.
Moale Karadia Maorodia Abia Hidi Dalana
5 Emu mauri lalonai oi karaia gaudia ibounai be mai anina bada Iehova tomadiho henia karana dekenai. Unai dainai, Paulo be Roma kongrigeisen ia tore henia neganai, mai anina bada herevana ta ia gwauraia. Idia ia sisiba henia: “Emui tauanina umui henia Dirava dekenai. Boubou gauna bamona do umui henia, mai mauri bona mai helaga danu, Dirava umui dekenai do ia moale totona. Inai bamona tomadiho momokani Dirava dekenai umui henia be namo.” (Roma 12:1) “Tauanina” ena anina be emu lalona, kudouna bona goada, bona idia ibounai oi gaukaralaia Dirava oi hesiai henia totona. (Mareko 12:30) Paulo ia hahedinaraia iseda tauanina be “boubou gauna” ta bamona Iehova dekenai ita henia. Unai be sisiba hereva badana, badina Mose ena Taravatu lalonai boubou gauna mai ena bero o toto be Dirava ese ia abia dae lasi. (Levitiko 22:18-20) Unai hegeregerena, bema Keristani tauna ta ena boubou gauna be dala ta ai ia miro, Dirava ese do ia dadaraia. Edena dala ai ia miro diba?
6 Paulo ese Roma Keristani taudia ia sisiba henia: “Emui mauri [“tauanina ena,” NW] kahana ta umui henia lasi kara dika dekenai, dika do ia karaia totona.” Danu Paulo ese idia ia hamaoroa: “Tauanina ena kara umui hamasea.” (Roma 6:12-14; 8:13) Iena revareva matamanai “tauanina ena kara” ena haheitalai haida ia gwauraia. Kara dika taudia ia herevalaia neganai, ia gwau: “Edia uduna be, taunimanima hadikaia bona hereva dagedage dekenai idia honu. Taunimanima alaia totona, edia aena idia heau haraga.” “Dirava dekenai gari henia kara idia laloa lasi.” (Roma 3:13-18) Keristani tauna be ena tauanina do ia hamiroa bema ena “tauanina ena kahana ta” ia gaukaralaia unai bamona kara dikadia ia karaia totona. Hegeregere, hari bema Keristani tauna ta be mai ena ura ida matabodaga laulaudia o ponografi eiava dagedage muvi ia raraia momo, ia be “[ena matana] ia henia kara dika dekenai” bona iena tauanina ibounai ia hamiroa noho. Tomadiho dalanai ia henia boubou gauna be ia helaga lasi bona Dirava ese do ia abia dae lasi. (Deuteronomi 15:21; 1 Petero 1:14-16; 2 Petero 3:11) Keristani tauna ese moale karadia dikadia ia abia hidi dainai ena hetura karana Iehova ida ia hadikaia diba!
(Roma 13:1) Namona be taunimanima ibounai be gavamani henunai do idia noho, badina bema Dirava ese gwaumaoro ia henia lasi, gavamani ta be do ia noho lasi. Idia noho gavamani ibounai be Dirava ese ia henia dagi idauidau hegeregerena idia noho.
Roma Bukana Ena Hereva Badadia
13:1—Edena dala ai “gavamani ibounai be Dirava ese ia henia dagi idauidau hegeregerena idia noho”? Gavamani ibounai be Dirava ese ia henia dagi idauidau hegeregerena idia noho ena anina be Dirava ese gwaumaoro ia henidia idia lohia totona, bona nega haida Dirava ese gavamani edia lohia dalana ia perovetalaia. Baibel ese ia hahedinaraia lohia taudia haida be Dirava ese edia gaukara ia perovetalaia.
Baibel Duahiduahi
MARCH 11-17
BAIBEL ENA HEREVA BADADIA | ROMA 15-16
“Iehova Oi Noia Haheauka Bona Goada Ia Henia Totona”
(Roma 15:4) Badina guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.
“Taitai Taudia ida Umui Taitai”
11 Dirava ena Hereva lalonai, hagoadaia siri momo idia noho, Lasaro ia mase negana ai Iesu ese ia mamia hisihisina be idia ta. Momokani, “guna Toretore Helagadia dekenai idia torea herevadia ibounai be ita hadibaia totona idia torea. Bona unai hereva ese ita idia durua ita haheauka totona, bona Toretore Helagadia ese ita dekenai goada ia henia, unai amo helaro ita abia.” (Roma 15:4) Bema oi be oi taitai noho, henunai idia noho siri amo goada oi abia diba:
▪ “Lohiabada be lalohisihisi taudia kahirakahira ia noho, bona ia ese edia lalona ia ore taudia ia hamauria noho.”—Sal. 34:18, 19.
▪ “Egu lalona ia hekwarahi momo neganai, oi ese lau oi hagoadaia, bona egu lauma oi hamoalea noho.”—Sal. 94:19.
▪ “Dirava iseda Tamana ese ita ia lalokau henia. Bona iena hebogahisi hereadaena amo ita ia hagoadaia hanaihanai bona ita dekenai helaro namona ia henia. Namona be Ia bona iseda Lohiabada Iesu Keriso ese emui kudouna idia hagoadaia, vadaeni . . . do umui gini goada.”—2 Tes. 2:16, 17.
(Roma 15:5) Vadaeni namona be haheauka bona goada ia henia Diravana ese umui ibounai dekenai, Keriso Iesu ena laloa dalana ia henia.
“Namona be Haheauka ese Ena Gaukara Ia Hagugurua”
5 Iehova ena heduru noia. Iehova be “haheauka bona goada ia henia Diravana.” (Roma 15:5) Ia sibona ese iseda hekwakwanai ia lalopararalaia diba, iseda noho dalana, hemami, bona ita ia karaia dalana danu. Unai dainai ia ese ita ia durua diba ita haheauka totona. Baibel ia gwau: “Ia dekenai idia gari taudia dekenai, idia ura henia gaudia ia henia noho. Edia taitai ia kamonai, bona ia ese idia ia hamauria noho.” (Sal. 145:19) To, edena dala ai Dirava ese iseda guriguri do ia haerelaia?
(Roma 15:13) Namona be helaro ia henia Diravana ese emui abidadama dainai, umui be moale bona maino bada amo ia hahonua, vadaeni lauma helaga ena siahu amo emui helaro be do ia bada ia lao.
“Namona be Iehova Emu Dirava Oi Lalokau Henia”
11 Iehova amo ‘ia mai helaro ese moale bona maino bada amo ita ia hahonua.’ (Roma 15:13) Dirava amo ia mai helarona ese ita ia hagoadaia dainai, hahetoho ita haheaukalaia diba. Bema horoa taudia be ‘abidadama dekenai idia gini goada ela bona mase, guba ai mauri ena korona do idia abia.’ (Apok. 2:10.) Danu, abidadama taudia ma haida edia helaro be tanobada Paradaisona ai mauri hanaihanai do idia abia. (Luka 23:43) Unai hahenamo dainai, iseda hemami be edena bamona? Ita moale, lalomaino ita davaria bona Dirava ita lalokau henia, badina “harihari gaudia namodia ibounai bona harihari gaudia hereadaedia ibounai” be ia amo idia mai.—Iam. 1:17.
Hakaua Hereva Namodia Tahua
(Roma 15:27) Momokani, mai moale ida unai idia karaia, to idia be mai edia abitorehai Ierusalema ai idia noho helaga taudia dekenai. Badina bema idau bese taudia be idia amo Dirava ena gaudia idia abia, idia danu be mai edia maduna Ierusalema ai idia noho helaga taudia be tauanina dalanai idia durua totona.
w89-E 12/1 24 par. 3
“Lau Ura Tohoa Bema Emui Lalokau be Momokani Eiava Lasi”
Momokani, hekwakwanai idia vara neganai, Idau Bese tadikaka taihu ese heduru idia henia be namo. Badina Ierusalema ai idia noho Keristani taudia dekenai idia be mai edia “abitorehai.” Idau bese taudia ese sivarai namona be Ierusalema amo idia kamonai, ani? Paulo ia gwau: “Bema idau bese taudia be idia amo Dirava ena gaudia idia abia, idia danu be mai edia maduna Ierusalema ai idia noho helaga taudia be tauanina dalanai idia durua totona.”—Roma 15:27.
(Roma 16:25) Dirava ese umui ia hagoadaia diba. Unai be lau harorolaia sivarai namona ida ia hegeregere, bona Iesu Keriso dainai idia harorolaia herevana ida ia hegeregere. Ia hedinarai vadaeni hunia hereva helagana be sivarai namona ena diba ida ia hegeregere. Unai hunia hereva be nega daudau herea lalonai ia hunia,
it-1-E 858 par. 5
Vaira Negai Do Idia Vara Gaudia
Mesia, o Keriso, be Dirava ese ia gwauhamatalaia garana, bona ia amo kara maoromaoro taudia ibounai be hahenamo do idia abia. (Ga 3:8, 14) Eden umana ai ia vara gwau-edeede karana murinai, Dirava ese unai “garana” ia herevalaia, to unai negai Abela ia do vara lasi. (Ge 3:15, NWT) Lagani 4, 000 gunanai, “unai hunia hereva” be Dirava ese ia gwauraia bona gabeai ia hahedinaraia unai “garana” be Mesia. Unai dainai, ita gwau diba unai be “nega daudau herea lalonai ia hunia.”—Ro 16:25-27; Ef 1:8-10; 3:4-11.
Baibel Duahiduahi
MARCH 18-24
BAIBEL ENA HEREVA BADADIA | 1 KORINTO 1–3
“Oi be Dirava Ena Lauma ese Ia Hakaua Tauna Eiava Sibona Ena Ura ese Ia Hakaua Tauna?”
(1 Korinto 2:14) To sibona ena ura ese ia hakaua tauna be Dirava ena lauma amo idia mai gaudia ia abia lasi, badina ia dekenai unai be kavakava, bona unai gaudia do ia diba lasi, badina tau ta ese Dirava ena lauma ia abia be namo, unai gaudia ia tahua totona.
Dirava Ena Lauma ese Ta Ia Hakaua Ena Anina be Dahaka?
4 Sibona ena ura ese ia hakaua tauna ena kara mani ita laloa. Tanobada taudia be nega momo sibodia edia ura idia tahua. Paulo ia gwau unai “lalohadai be hari kamonai lasi taudia edia lalona dekenai ia gaukara.” (Efe. 2:2) Oibe, unai lalohadai ese taunimanima momo ia hakaua kerere dainai, idia momo be ma haida edia lalohadai idia abia dae sibona. Unai dainai momo be sibodia edia lalohadai idia badinaia bona Dirava ena taravatu idia laloa bada lasi. Sibona ena ura ia laloa bada tauna dekenai ena dagi, moni, o kohu be mai anina bada.
5 Sibona ena ura ese ia hakaua tauna ena kara ma haida be dahaka? Ia be nega ibounai “tauanina ena kara dikadia” ia karaia. (Gal. 5:19-21) Paulo ese Korinto kongrigeisen dekenai ia siaia revareva ginigunana lalonai, sibodia edia ura ese ia hakaua taudia edia kara ma haida ia herevalaia. Unai be: orea idia hapararaia, ma ta ena kara idia durua, badu idia dogoatao, kota dekenai ta ta idia abia lao, kwara dagi idia matauraia lasi, aniani bona inuinu gaudia idia laloa bada. Danu, sibona ena ura ia laloa bada tauna be hahetoho negadiai ia moru haraga. (Aon. 7:21, 22) Iuda bukana ese ia hahedinaraia unai bamona kara idia karaia noho taudia be “Dirava ena lauma helaga idia abia lasi.”—Iuda 18, 19.
(1 Korinto 2:15, 16) To Dirava ena lauma ese ia hakaua tauna be gau ibounai ia tahua namonamo, to tau ta ese unai tauna ena kara do ia tahua lasi. 16 Toretore Helagadia ia gwau: “Daika be Iehova ena lalohadai ia diba bona ia do ia hadibaia?” To ita be Keriso ena lalohadai ita abia vadaeni.
Dirava Ena Lauma ese Ta Ia Hakaua Ena Anina be Dahaka?
6 “Dirava ena lauma ese ia hakaua tauna” ena kara be edena bamona? “Dirava ena lauma ese ia hakaua tauna” be Dirava ia laloa bada, ia be sibona ena ura ese ia hakaua tauna bamona lasi. Unai bamona taudia be idia hekwarahi “Dirava [idia] tohotohoa” totona. (Efe. 5:1) Anina be gau ta idia do karaia lasi neganai, Iehova ena lalohadai idia tahua guna, bona unai hegeregerena idia kara. Idia dekenai Dirava be ia noho momokani. Bona edia kara ibounai lalonai Iehova ena taravatu idia badinaia, to sibona ena ura idia tahua taudia be unai bamona lasi. (Sal. 119:33; 143:10) Danu, tauanina ena kara dikadia idia dadaraia, bona idia hekwarahi “lauma helaga ena huahua” idia hahedinaraia totona. (Gal. 5:22, 23) “Dirava ena lauma ese ia hakaua tauna” ena kara ita diba namonamo totona, mani inai ita laloa: Bisinesi karadia ia diba namonamo tauna be idia gwauraia bisinesi tauna. Unai hegeregerena, tomadiho karadia ia laloa bada tauna be idia gwauraia Dirava ena lauma ese ia hakaua tauna.
Dirava Ena Lauma ese Ta Ia Hakaua Ena Anina be Dahaka?
15 Edena dala ai ita ta ta ese Keriso ita tohotohoa diba? Korinto Ginigunana 2:16 ese ita ia hagoadaia “Keriso ena lalohadai” ita abia totona. Bona Roma 15:5 ia gwau “Keriso Iesu ena laloa dalana” ita abia be namo. Unai dainai Keriso ita tohotohoa totona, namona be iena lalohadai, hemami, bona kara ita diba namonamo. Bena ena aena gabudia ai ita raka. Iesu ese ena hetura karana Dirava ida ia laloa bada. Unai dainai ia ita tohotohoa neganai, ita be Iehova ita tohotohoa. Unai badina idauidau dainai, Iesu ena laloa dalana hegeregerena ita laloa be mai anina bada.
Hakaua Hereva Namodia Tahua
(1 Korinto 1:20) Aonega taudia be edeseni? Taravatu hadibaia taudia be edeseni? Inai nega oromana ai idia hepapahuahu momo taudia be edeseni? Dirava ese inai tanobada ena aonega be kavakava gauna ai ia halaoa, ani?
it-2-E 1193 par. 1
Aonega
Ena be tanobada taudia be mai edia aonega, to Dirava ese Keriso amo ia hahedinaraia hebogahisi karana idia dadaraia bona idia laloa unai be hereva kavakavana; ena be edia lohia taudia be hahemaoro karana idia karaia, to idia ese “Lohiabadana be au dekenai” idia kokoa kau. (1Ko 1:18; 2:7, 8) To, Dirava ese tanobada taudia edia aonega be kavakava gauna ai ia halaoa, bona Dirava ese idia ia hahemaraia badina idia dekenai, “Dirava amo ia mai kavakava gauna,” bona taunimanima ese idia laloa ‘kavakava, manoka, bona anina lasi’ taudia be ia ese ia gaukaralaia ena ura Ia hagugurua totona. (1Ko 1:19-28) Paulo ese Korinto Keristani taudia ia hadibaia, “inai nega oromana ena aonega [bona] inai nega oromana ena lohia taudia edia aonega” be do idia ore; unai dainai unai bamona aonega be aposetolo taudia ese idia harorolaia lasi. (1Ko 2:6, 13) Danu, Kolose Keristani taudia ia hagania “tanobada ena aonega [phi·lo·so·phiʹas, anina be, aonega ura henia karana],” “anina lasi hereva koikoidia,” bona “taunimanima edia sene herevadia” dekenai do idia naria namonamo, dika unai gaudia ese idia ia hakaua kerere.—Kl 2:8; siri 20-23 hahegeregerea.
(1 Korinto 2:3-5) Bona umui dekenai lau mai neganai, lau manoka, lau gari, bona lau heudeheude bada. Bona lau hereva bona haroro neganai, lalona veria aonega herevadia lau gaukaralaia lasi, to egu hereva amo lauma helaga ena siahu lau hahedinaraia. Unai amo emui abidadama be taunimanima edia aonega dekenai do ia gini lasi, to Dirava ena siahu dekenai do ia gini.
Korinto Bukadia Edia Hereva Badadia
2:3-5. Paulo be Korinto—Greek diba bada taudia edia sikuli gabuna—dekenai ia haroro neganai, reana Paulo ia laloa momo gauna be, taunimanima be ia harorolaia herevadia do idia abia dae eiava lasi. To gau ta ese ia koua lasi o ia gari lasi dainai, Dirava ese ia henia gaukarana ia karaia noho. Unai hegeregerena, namo lasi gau haida ese ita idia koua bena Dirava ena Basileia ena sivarai namona ita harorolaia lasi. To Iehova ita abidadama henia noho, Paulo ia karaia bamona.
Baibel Duahiduahi
MARCH 25-31
BAIBEL ENA HEREVA BADADIA | 1 KORINTO 4–6
“Hatubua Muramura Sisina ese Paraoa Ibounai Ia Hatubua”
(1 Korinto 5:1, 2) Lau kamonai umui huanai matabodaga karana ia vara. Unai bamona matabodaga karana be Dirava diba lasi taudia huanai danu ia vara lasi. Tau ta be iena tamana ena adavana ida ia noho hebou. 2 Bona unai umui heagilaia, a? To umui taitai be namo bona unai kara ia karaia tauna be emui huana amo umui atoa siri be namo, ani?
(1 Korinto 5:5-8) unai tauna be Satani dekenai do umui henia be namo, iena kara dika ena siahu umui haorea totona, unai amo Lohiabada ena dina ai kongrigeisen ena laloa dalana do umui gimaia. 6 Umui emui hekokoroku karana be namo lasi. Umui diba lasi, a? Hatubua muramura sisina ese paraoa ibounai ia hatubua. 7 Hatubua muramura gunana umui kokia, unai amo umui be paraoa matamata, oibe, umui dekenai hatubua gauna ia noho lasi. Oibe, Keriso, iseda Pasova mamoena be idia bouboulaia vadaeni. 8 Unai dainai unai aria ita karaia be namo. Hatubua muramura gunana ida lasi, eiava hatubua gauna ida lasi, badina ia be dika bona kara dika ia laulaulaia, to hatubua lasi paraoana ida, badina ia be laloa momokani bona hereva momokani ia laulaulaia.
(1 Korinto 5:13) bona Dirava ese kongrigeisen ai idia noho lasi taudia do ia hahemaoro henia, ani? Toretore Helagadia ia gwau: “Kara dika tauna be umui emui huana amo umui kokia.”
it-2-E 230
Hatubua Muramura
Aposetolo Paulo ese Korinto ai Keristani kongrigeisen taudia ia hamaoroa matabodaga tauna be kongrigeisen amo do idia atoa siri neganai, inai haheitalai ia gaukaralaia, ia gwau: “Umui diba lasi, a? Hatubua muramura sisina ese paraoa ibounai ia hatubua. Hatubua muramura gunana umui kokia, unai amo umui be paraoa matamata, oibe, umui dekenai hatubua gauna ia noho lasi. Oibe, Keriso, iseda Pasova mamoena be idia bouboulaia vadaeni.” Bena Paulo ese ia herevalaia “hatubua muramura” ena anina ia hahedinaraia, ia gwau: “Unai dainai unai aria ita karaia be namo. Hatubua muramura gunana ida lasi, eiava hatubua gauna ida lasi, badina ia be dika bona kara dika ia laulaulaia, to hatubua lasi paraoana ida, badina ia be laloa momokani bona hereva momokani ia laulaulaia.” (1Ko 5:6-8) Paulo be laulau dalanai Iuda taudia ese idia karaia Hatubua Lasi Paraoana ena Aria ia herevalaia, badina unai aria murinai be Pasova ariana do idia karaia. Hatubua muramura sisina ese paraoa ibounai do ia hatubua hegeregerena, bema kara dika tauna be kongrigeisen amo idia kokia lasi, Dirava ena matanai unai kongrigeisen ibounai be do ia miro. Namona be edia huanai ia noho “hatubua muramura” idia kokia, Pasova ariana ai Israela taudia ese edia ruma ai hatubua muramura idia kokia bamona.
it-2-E 869-870
Satani
Tau ta be ‘Satani dekenai do umui henia be namo, iena kara dika ena siahu umui haorea totona,’ ena anina be dahaka?
Korinto kongrigeisen ai, tau ta be iena tamana ena adavana ida matabodaga karana ia karaia dainai, aposetolo Paulo be idia ia hamaoroa, ia gwau: “Unai tauna be Satani dekenai do umui henia be namo, iena kara dika ena siahu umui haorea totona.” (1Ko 5:5) Unai be hahegani ta, kongrigeisen amo unai tauna idia atoa siri bona do idia bamoa lasi. (1Ko 5:13) Satani dekenai idia henia karana ese ia hahedinaraia unai tauna be kongrigeisen amo idia atoa siri bona Satani ese ia lohiaia tanobada lalonai ia vareai. “Hatubua muramura sisina” ese “paraoa ibounai” ia hatubua hegeregerena, “kara dika” ia karaia tauna ese kongrigeisen ia hamiroa diba; bona unai matabodaga tauna ena “kara dika” siahuna idia haorea totona, unai tauna be kongrigeisen amo idia kokia be namo, unai amo kongrigeisen ena laloa dalana do idia gimaia. (1Ko 5:6, 7) Unai hegeregerena, Paulo ese Humenaio bona Alesana be Satani dekenai ia henia, badina abidadama bona lalomamina namona idia negea, bona edia abidadama ia dika, bouti be nadi ia botaia bamona.—1Ti 1:20.
(1 Korinto 5:9-11) Lauegu revareva lalonai, umui lau hamaoroa matabodaga taudia do umui bamoa lasi. 10 Lau gwau lasi, inai tanobada ena matabodaga taudia, eiava mataganigani eiava henaohenao taudia, eiava kaivakuku tomadiho henia taudia do umui dadaraia momokani. Badina bema unai bamona umui karaia, anina be tanobada taudia do umui rakatania momokani. 11 To hari umui lau tore henia, bema tadikaka ta be matabodaga tauna, eiava mataganigani tauna, eiava kaivakuku tomadiho henia tauna, eiava hereva dika tauna, eiava kekero tauna, eiava henaohenao tauna, ia do umui bamoa lasi bona ia ida do umui aniani lasi danu.
lvs-E 241, endnote
Kongrigeisen amo Ta Atoa Siri Karana
Bema ta be kara dika badana ta ia karaia, ia helalo-kerehai lasi bona ia ura lasi Iehova ena taravatu ia badinaia, vadaeni unai tauna be ia hegeregere lasi kongrigeisen lalonai ia noho totona. Namona be kongrigeisen amo idia atoa siri. Ta be kongrigeisen amo idia atoa siri neganai, unai tauna do ita bamoa lasi bona hereva henia lasi. (1 Korinto 5:11; 2 Ioane 9-11) Kara dika tauna atoa siri karana ese Iehova ena ladana bona kongrigeisen ia gimaia. (1 Korinto 5:6) Danu, kara dika tauna atoa siri karana be matahakani karana, badina unai tauna ia durua ia helalo-kerehai bona Iehova dekenai ia giroa lou totona.—Luka 15:17.
▸ Karoa 3, paragraf 19
Hakaua Hereva Namodia Tahua
(1 Korinto 4:9) Lau dekenai toana be Dirava ese ai aposetolo taudia be heatu heluluna ena dokonai ia atoa, do idia mase taudia bamona. Lau be unai bamona lau laloa badina tanobada taudia bona aneru ese ai idia raraia noho.
Aneru—“Dirava Ena Hesiai Gaukara Laumadia”
16 Ita be hisihisi ita davaria neganai, aneru be ‘aneru ese ita idia raraia noho.’ (1 Kor. 4:9) Dirava ita badinaia neganai aneru idia moale, bona kara dika tauna ta be ia helalo-kerehai neganai idia moale. (Luka 15:10) Keristani hahine edia kara namodia be aneru ese idia itaia. Baibel ese ia hahedinaraia “hahine ese ena kwarana ia koua be namo, unai be toa ta bamona, ia hahedinaraia ia be ena tau henunai ia noho, bona aneru ese unai idia itaia.” (1 Kor. 11:3, 10) Oibe, aneru idia moale bema Keristani hahine bona Dirava ena hesiai taudia ma haida tanobada ai be tiokratik dalana bona kwara dagina idia matauraia. Unai bamona badinaia karana ese Dirava ena guba natudia ia durua.
(1 Korinto 6:3) Umui diba lasi, a? Ita ese aneru do ita hahemaoro henidia. Unai dainai do ita hegeregere inai mauri lalonai idia vara gaudia ita hamaoromaoroa totona, ani?
it-2-E 211
Taravatu
Taravatu Aneru Totona. Ena be Aneru edia siahu bona goada ese taunimanima edia ia hereaia, to idia danu be Dirava ena taravatu bona hahegani idia badinaia. (He 1:7, 14; Sa 104:4) Iehova ese ena inai tauna, Satani dekenai taravatu ia atoa danu. (Iob 1:12; 2:6) Aneru badana Mikaela danu ese, Hahemaoro Tauna Badana, Iehova, ena dagi, ia matauraia, badina Diabolo ida ia hepapahuahu neganai, ia gwau: “Iehova ese oi do ia gwau henia.” (Iu 9; Sek 3:2 hahegeregerea.) Iehova Dirava ese aneru ibounai be Iesu Keriso ena siahu henunai ia atoa. (He 1:6; 1Pe 3:22; Mt 13:41; 25:31; Fp 2:9-11) Danu, Iesu ese aneru ta ia siaia ia gwauraia hereva be Ioane dekenai ia abia lao totona. (Apo 1:1) To, 1 Korinto 6:3 ai, aposetolo Paulo ese ia hahedinaraia Keriso ena lauma tadikaka ese aneru do idia hahemaoro henidia, anina be idia ese Keriso do idia durua aneru dikadia idia hahemaoro henidia totona.
Baibel Duahiduahi