Iseda Haroro Bona Mauri Dalana Hebou Pepana Edia Referens
APRIL 1-7
BAIBEL ENA HEREVA BADADIA | 1 KORINTO 7-9
“Headava Lasi Maurina be Harihari Gauna Ta”
(1 Korinto 7:32) Oibe, lau ura do umui lalohekwarahi lasi. Headava lasi tauna be Lohiabada ena gaudia totona ia lalohekwarahi, edena dala ai ia ese Lohiabada ena lalonamo ia abia diba.
Headava Lasi Maurina Moalelaia
3 Ia headava lasi tauna ena nega be bada dainai gau idauidau ia karaia diba; to headava tauna be unai bamona lasi. (1 Kor. 7:32-35) Unai dainai headava lasi tauna ese ena haroro gaukara ia habadaia diba, ma haida dekenai kara namodia ia hahedinaraia, bona Iehova ia tura henia diba. Keristani taudia haida idia itaia headava lasi maurina be mai ena namo. Unai dainai edia lalona idia hadaia ‘unai bamona mauri dalana idia abia dae’ totona. Ena be matamanai haida idia ura headava, to adavana ta idia davaria lasi, edia headava ia dika, o edia adavana ia mase, to Iehova idia guriguri henia dainai, edia headava lasi maurina idia moalelaia.—1 Kor. 7:37, 38.
(1 Korinto 7:33, 34) To headava tauna be tanobada gaudia totona ia lalohekwarahi, edena dala ai ia ese ena adavana ena lalonamo ia abia diba, 34 bona ia lalorua. Danu, headava lasi hahinena bona rami-hebou kekenina be Lohiabada ena gaudia totona idia lalohekwarahi, badina idia ura edia tauanina bona lalona ai idia helaga. To headava hahinena be tanobada gaudia totona ia lalohekwarahi, edena dala ai ena adavana ena lalonamo ia abia diba.
Korinto Bukadia Edia Hereva Badadia
7:33, 34—Inai hereva “tanobada gaudia,”—headava tau o hahine ese idia laloa gaudia—ena anina be dahaka? Paulo ese aniani, dabua, ruma o unai bamona gaudia ia herevalaia, bona Keristani headava taudia ese unai gaudia idia laloa be namo. To Paulo be tanobada ena gau dikadia, Keristani taudia ese idia dadaraia gaudia unai, ia herevalaia lasi.—1 Ioa. 2:15-17.
(1 Korinto 7:37, 38) To bema ta be ena lalona ia hadaia do ia headava lasi, bona unai lalohadai ia dogoatao auka, badina ia laloa ia headava be anina lasi bona ia sibona ena ura ia biagua diba, vadaeni unai be namo. 38 Unai dainai bema ta ia headava, unai be namo, to bema ta ia headava lasi, unai be namo herea.
Headava Lasi Maurina—Gaukara Karaia mai Laloa Rua Lasi Ena Iduara Ia Kehoa
14 Headava lasi Keristani tauna be ena mauri ia gaukaralaia sibona ena ura gaudia tahua totona neganai, headava Keristani tauna ena mauri ena “namo” ia hereaia lasi. “Guba Basileia totona” dainai headava lasi maurina ia abia hidi lasi, to ia sibona ena ura dainai. (Mataio 19:12) Ia do headava lasi tau o hahine ese ‘Lohiabada ena gaukara ia laloa’ be namo, “Lohiabada do ia hamoalea daladia” do ia tahua, bona ‘Lohiabada ena gaukara do ia karaia momokani, mai laloa rua lasi.’ Unai ena anina be Iehova bona Iesu Keriso do idia hesiai henia mai edia lalona ibounai ida. Unai dala sibona amo, headava lasi Keristani tatau bona hahine edia noho ena “namo” be headava Keristani taudia edia noho ena “namo” ia hanaia.
Hakaua Hereva Namodia Tahua
(1 Korinto 7:11) To bema ia ese ena adavana ia rakatania, namona be do ia headava lasi, eiava ena adavana ida maino ia karaia lou. Bona namo lasi tau ese ena adavana ia rakatania.
lvs-E 251
Endnote
Ena be headava haida lalonai ta be ia heudahanai lasi, to hekwakwanai badadia haida dainai, Keristani taudia haida be abia hidi idia karaia edia adavana idia rakatania totona. (1 Korinto 7:11) Keristani tauna o hahine be inai hekwakwanai badadia haida dainai headava idia hapararaia diba.
• Ia ura lasi ena adavana bona natudia ia naria: Reana tau be moni gaukara ia karaia, to iena ruma bese idia ogogami badina tauanina durua gaudia ia henia lasi.—1 Timoteo 5:8.
• Ia dagedage bada: Tau be ena adavana ia dagedage henia bada bona ia dadabaia dikadika, iena tauanina ia haberoa o kahirakahira ia hamasea.—Galatia 5:19-21.
• Mai dagedage ida adavana ena hetura karana Iehova ida ia koua: Tau o hahine ese ena adavana ia koua Iehova ia hesiai henia totona.—Kara 5:29.
(1 Korinto 7:36) To bema ta ia headava lasi bona ia be ena tauanina ena ura ia biagua diba lasi, bona bema ia be ena matamata negana ia hanaia vadaeni, namona be inai ia karaia: Ia headava be namo, bema unai be iena ura gauna. Ia be ia kara dika lasi. Unai bamona taudia idia headava be namo.
Matabodaga Tanobadana Dekenai Oi Kara Goeva Diba
Unai dainai, matamata taudia be mahuta hebou urana ena hemami idia abia matamaia neganai, namona be karaharaga idia headava lasi. Headava taudia ese edia headava do idia badinaia be gau badana, bona unai maduna huaia totona ta be lo tauna vadaeni be namo. (Genese 2:24) Namona be ta ia naria ela bona ena “matamata negana ia hanaia,”—unai nega lalonai mahuta hebou urana ia goada bona laloa namonamo karana ia hadikaia diba. (1 Korinto 7:36, NW ) Bona ia ura headava tauna eiava hahine ese matabodaga karadia ia karaia badina ia adavaia diba tauna o hahine ta ia noho lasi, be aonega lasi karana bona kara dikana!
Baibel Duahiduahi
APRIL 8-14
BAIBEL ENA HEREVA BADADIA | 1 KORINTO 10-13
“Iehova be Ena Hereva Ia Badinaia”
(1 Korinto 10:13) Umui davaria hedibagani be vaia taunimanima ibounai ese idia davaria hedibagani bamona. To Dirava be ena hereva ia badinaia, ia ese dala do ia kehoa lasi emui goada ia hereaia hedibagani umui davaria totona, to hedibagani idia vara neganai, ia ese dala do ia kehoa, unai hedibagani umui haheaukalaia totona.
Duahia Taudia Edia Henanadai
Aposetolo Paulo ia gwau Iehova “ese dala do ia kehoa lasi emui goada ia hereaia hedibagani umui davaria totona.” (1 Kor. 10:13) Unai ena anina be Iehova ia diba ita be edena bamona hedibagani ita haheaukalaia diba bona unai hegeregerena abia hidi ia karaia, a?
▪ Unai bamona lalohadai idia abia taudia mani ita laloa. Tadikaka ta ena natuna be sibona ia hamasea neganai, tadikaka ia henanadai: ‘Iehova be ia diba lau bona egu adavana be emai natuna ena mase do ai haheaukalaia, a? Ai dekenai unai ia vara badina Dirava ia laloa unai ai haheaukalaia diba, a?’ Badina namona ta dainai ita abia dae Iehova be iseda mauri lalonai idia vara gaudia ia abia hidi, a?
Paulo ena hereva, 1 Korinto 10:13 ai, ita laloa namonamo neganai, inai ita dibaia: Baibel ena siri ta ese ia hamomokania lasi, Iehova be ita haheaukalaia hedibagani ia diba, bona unai hegeregerena ita abia hedibagani ia abia hidi. Unai ena badina 4 mani ita herevalaia.
(1) Iehova be taunimanima dekenai ura kwalimu ia henia. Ia ura ita sibona ese abia hidi ita karaia. (Deu. 30:19, 20; Ios. 24:15) Bema abia hidi maorona ita karaia, Iehova ese ita do ia hakaua. (Aon. 16:9) To bema abia hidi kererena ita karaia, namona be unai kerere dainai ia vara gauna ita abia dae. (Gal. 6:7) Bema ita davaria hedibagani be Iehova ese ia abia hidi, reana do ita gwau ia be iseda ura kwalimu ia laloa bada lasi, ani?
(2) Iehova be idia “vara kava” dika amo ita ia gimaia lasi. (Had. 9:11) Nega haida hekwakwanai eiava aksiden idia vara badina ita be nega bona gabu kereredia ai ita noho. Iesu ese sivarai ta ia gwauraia, kohoro ta be taunimanima 18 latanai ia moru bona ia hamasedia, bena ia hahedinaraia unai dika be Dirava ena ura dainai idia vara lasi. (Luka 13:1-5) Namo lasi ita laloa nega idauidau ai idia vara gaudia ese idia hahedinaraia, Dirava ese do idia mauri bona mase taudia ia abia hidi guna vadaeni?
(3) Ita ta ta be hepapahuahu badana lalonai ita noho. Laloatao, Satani ia gwau hedibagani ita davaria neganai, Iehova do ita badinaia noho lasi, unai amo ia ese Iehova idia hesiai henia taudia ibounai edia Dirava badinaia karana ia hepapahuahulaia. (Iobu 1:9-11; 2:4; Apok. 12:10) Bema Iehova be hedibagani haida ia koua, badina ia laloa unai hedibagani ita haheaukalaia diba lasi, unai ese Satani ena hereva do ia hamomokania, ia gwau ita be siboda eda ura gaudia abia totona Dirava ita hesiai henia.
(4) Iehova be ita dekenai idia vara gaudia ibounai ia diba be anina lasi. Bema Dirava be do ita davaria hedibagani ia abia hidi guna, unai ese reana ia hahedinaraia ia be iseda vaira nega ia diba. To Baibel be unai bamona ia hereva lasi. Dirava be iseda vaira nega ia diba. (Isa. 46:10) To Baibel ia gwau ia ese vaira nega ai do idia vara gaudia ia abia hidi namonamo. (Gen. 18:20, 21; 22:12) Ena be ia be mai ena siahu vaira negai do idia vara gaudia ia gwauraia hedinarai totona, to ia ese iseda ura kwalimu ia matauraia danu. Unai ese ia hahedinaraia, Dirava be iseda ura kwalimu ia laloa bada bona nega ibounai dala maorona ai iena kara badadia ia gaukaralaia.—Deu. 32:4; 2 Kor. 3:17.
Vadaeni, edena dala ai Paulo ena hereva ita lalopararalaia diba: “Dirava . . . ese dala do ia kehoa lasi emui goada ia hereaia hedibagani umui davaria totona.” Paulo ena hereva amo ia ese hedibagani ita davaria neganai Iehova ese ia karaia karana ia herevalaia. Paulo ena hereva amo ita diba, herevana iseda mauri lalonai dahaka hedibagani ita davaria, Iehova ese ita do ia durua, bema ia ita abidadama henia. (Sal. 55:22) Paulo ena hereva be inai mai anina bada hereva rua ese idia hamomokania.
Ginigunana, ita davaria hedibagani be “vaia taunimanima ibounai ese idia davaria.” Oibe, ita davaria hedibagani be guna idia noho taudia ese idia mamia danu. Unai bamona hedibagani be iseda goada amo ita hanaidia diba lasi, unai dainai Dirava dekenai ita tabekau be namo. (1 Pet. 5:8, 9) Korinto Ginigunana 10:13 ai, Paulo be Israela taudia ese tano gagaena ai idia davaria hedibagani ia herevalaia. (1 Korinto 10:6-11) Unai abidadama Israela taudia ese idia davaria hedibagani ibounai be idia haheaukalaia diba. Paulo be nega 4 ia gwau, “idia haida” be idia kamonai lasi. Madi, Israela taudia haida be edia ura dikadia idia badinaia, badina Dirava dekenai idia tabekau lasi.
Iharuana, “Dirava be ena hereva ia badinaia.” Dirava ese iena taunimanima ia kara henia dalana amo ia hahedinaraia, ia ese ia “idia lalokau henia, bona iena Taravatu idia badinaia taudia dekenai” iena noho hanaihanai lalokauna ia hahedinaraia. (Deu. 7:9) Danu, unai siri ese ia hahedinaraia Dirava be hanaihanai iena gwauhamata ia badinaia. (Ios. 23:14) Guna ia idia abidadama henia taudia edia sivarai ese idia hahedinaraia, ia idia lalokau henia bona kamonai henia taudia idia diba momokani hedibagani idia davaria neganai, Dirava be inai do ia karaia: (1) Ia ese dala do ia kehoa lasi edia goada ia hereaia hedibagani idia davaria totona, bona (2) idia totona “dala do ia kehoa.”
Hedibagani negadiai, edena dala ai Iehova ese ia dekenai idia tabekau taudia totona dala ia kehoa? Oibe, bema unai be iena ura, ia ese unai hedibagani ia kokia diba. To, Paulo ena hereva mani ita laloa, ia gwau: “Ia [Iehova] ese dala do ia kehoa, unai hedibagani umui haheaukalaia totona.” To, nega momo ia ese dala “do ia kehoa” unai amo hedibagani ita haheaukalaia diba. Mani Iehova ese ita totona ia kehoa dala haida ita itaia:
▪ “Iseda hisihisi ibounai lalonai ia ese ita dekenai lalogoada ia henia.” (2 Kor. 1:3, 4) Iehova ese iena Hereva, lauma helaga, bona igui hesiai tauna mai ena kamonai bona kara maoromaoro ese idia halasia pablikeisen idauidau amo iseda lalona, kudouna, bona hemami ia hanamoa diba.—Mat. 24:45; Ioa. 14:16; Roma 15:4.
▪ Iena lauma helaga amo ita ia hakaua diba. (Ioa. 14:26) Hedibagani idia vara neganai, lauma helaga ese ita do ia durua Baibel sivaraidia bona hakaua herevadia ita laloatao totona, bena aonega dalana ita badinaia.
▪ Ita durua totona iena aneru ia gaukaralaia diba.—Heb. 1:14.
▪ Iseda tadikaka bona taihu amo ita ia durua diba. Oibe, edia hereva bona kara ese ita ia “hagoadaia bada” diba.—Kol. 4:11.
Paulo ena hereva 1 Korinto 10:13 amo dahaka ita dibaia? Iehova be ita davaria hedibagani ibounai ia abia hidi lasi. To iseda mauri lalonai hedibagani idia vara neganai, inai hereva ita abia dae diba: Bema Iehova ita abidadama henia momokani, vadaeni taunimanima ese idia haheaukalaia diba lasi hedibagani ia koua diba; ia be nega ibounai dala do ia kehoa ita davaria hedibagani ita haheaukalaia totona. Unai be hagoadaia herevana, ani?
(1 Korinto 10:13) Umui davaria hedibagani be vaia taunimanima ibounai ese idia davaria hedibagani bamona. To Dirava be ena hereva ia badinaia, ia ese dala do ia kehoa lasi emui goada ia hereaia hedibagani umui davaria totona, to hedibagani idia vara neganai, ia ese dala do ia kehoa, unai hedibagani umui haheaukalaia totona.
(1 Korinto 10:13) Umui davaria hedibagani be vaia taunimanima ibounai ese idia davaria hedibagani bamona. To Dirava be ena hereva ia badinaia, ia ese dala do ia kehoa lasi emui goada ia hereaia hedibagani umui davaria totona, to hedibagani idia vara neganai, ia ese dala do ia kehoa, unai hedibagani umui haheaukalaia totona.
Hakaua Hereva Namodia Tahua
(1 Korinto 10:8) Bona matabodaga karadia do ita karaia noho lasi, idia haida ese matabodaga karadia idia karaia bamona, bona dina tamona ai idia 23,000 idia mase.
w04-E 4/1 29
Duahia Taudia Edia Henanadai
Dahaka dainai inai siri 1 Korinto 10:8 ia gwau, Israela taudia ibounai 23,000 be matabodaga karadia idia karaia dainai idia mase, to Numera 25:9 be ia gwau taunimanima 24,000 idia mase?
Badina haida dainai, inai siri rua ai ia herevalaia namba be idia idau. Reana ita gwau diba unai namba korikoirina be 23, 000 bona 24, 000 edia huanai, unai dainai unai namba rua amo ta idia torea diba.
Mani ena badina ma ta ita laloa. Aposetolo Paulo be Korinto Keristani taudia ia durua totona, Sitima hanua ai Israela taudia dekenai ia vara gauna ia herevalaia, unai hanua be matabodaga karadia amo ia honu. Ia gwau: “Bona matabodaga karadia do ita karaia noho lasi, idia haida ese matabodaga karadia idia karaia bamona, bona dina tamona ai idia 23,000 idia mase.” Paulo ia gwau, Iehova ese matabodaga karadia idia karaia taudia ibounai 23,000 ia hamasea.—1 Korinto 10:8.
To, Numera karoa 25, ese ia hahedinaraia “Israela taudia be Bala-peoro idia tomadiho henia, bona Iehova be idia dekenai ia badu momokani.” Bena, Iehova ese Mose ia hagania “taunimanima edia gunalaia taudia ibounai” do ia alaia mase. Bena Mose ese hahemaoro taudia dekenai oda ia henia unai hahegani do idia badinaia totona. Dokonai, Israela tauna ta ese Midiana hahinena ta be kamepa lalonai ia hakaua vareai neganai, Pineha be karaga haraga idia ruasoi ia hamasea, unai neganai “gorere ia ore.” Unai sivarai ena dokona ai, ia gwau: “Unai gorere amo idia mase taudia ibounai be 24,000.”—Numera 25:1-9, NWT.
Numera bukana ai idia torea namba be Iehova ese ia hamasea taudia bona hahemaoro taudia ese “taunimanima edia gunalaia taudia ibounai” idia hamasea edia namba. Reana unai negai, hahemaoro taudia ese gunalaia taudia tausen bamona idia hamasea dainai, unai namba ia daekau 24,000. Ena be unai gunalaia taudia be matabodaga karadia idia karaia, moale karadia ai idia vareai, eiava gwaumaoro idia henia, idia danu be idia kara dika badina “Bala-peoro idia tomadiho henia.”
Lagani 700 bamona murinai, Iehova be peroveta tauna Hosea amo, Israela taudia totona inai bamona ia hereva: “Idia be Peoro ena Bala dekenai idia lao. Idia be anina lasi diravana dekenai sibona idia henia, Bona idia be gau dika rohorohona ai idia lao, idia lalokau henia gauna bamona.” (Hosea 9:10, NWT) Unai bamona idia karaia taudia ibounai be Dirava amo hahemaoro aukana idia abia. Unai dainai, Mose ese Israela taudia ia hamaoroa, ia gwau: “Iehova emui Dirava ese Bala-peoro dekenai ia karaia karana be emui matana amo umui itaia. Iehova emui Dirava ese umui emui huana amo Bala-peoro murinai idia raka taudia ibounai ia hamasedia.”—Deuteronomi 4:3, NWT.
(1 Korinto 11:5, 6) To bema hahine ta ese ena kwarana ia koua lasi bona ia guriguri eiava peroveta herevadia ia gwauraia, ia ese ena kwarana ia hahemaraia, badina ia be idia hakeberea hahinena bamona. 6 Bema hahine ta ese ena kwarana ia koua lasi, namona be ena huina ia utua, to bema ena huina ia utua eiava hakeberea be hemarai gauna, ena kwarana ia koua be namo.
(1 Korinto 11:10) Unai dainai hahine ese ena kwarana ia koua be namo, unai be toa ta bamona, ia hahedinaraia ia be ena tau henunai ia noho, bona aneru ese unai idia itaia.
Duahia Taudia Edia Henanadai
Bema taihu ta be tadikaka ta ese ia bamoa Baibel stadi idia karaia totona, taihu ese ena kwarana ia koua be maoro, a?
▪ March 1, 2003 Gima Kohorona ena kahana ladana, “Duahia Taudia Edia Henanadai” ia gwau, bema taihu ta be tadikaka ta ese ia bamoa Baibel stadi idia karaia totona, namona be taihu ese ena kwarana ia koua, herevana unai tadikaka be ia bapatiso o lasi. Tadikaka be unai hakaua dalana idia lalohadailaia murinai, idia laloa gau haida idia haidaua be namo.
Bema taihu be bapatiso tadikaka ta ese ia bamoa Baibel stadi idia karaia totona, taihu ese ena kwarana ia koua be maoro. Unai amo ia be Iehova ese Keristani kongrigeisen lalonai ia atoa kwara dagina ia matauraia, badina ia be tadikaka edia maduna ta ia huaia. (1 Kor. 11:5, 6, 10) To dala ma ta be, ia ese tadikaka ia noia stadi ia naria, bema unai tadikaka be hegeregere unai ia karaia totona.
Bema taihu be bapatiso lasi tadikaka ta ese ia bamoa Baibel stadi idia karaia totona bona ia be taihu ena adavana lasi. Taihu ese ena kwarana ia koua lasi be maoro. To, nega haida taihu haida be edia lalomamina ese idia doria edia kwarana idia koua totona.
Baibel Duahiduahi
APRIL 22-28
BAIBEL ENA HEREVA BADADIA | 1 KORINTO 14-16
“Dirava be Gau Ibounai Edia Kwarana ai Do Ia Lao”
(1 Korinto 15:24, 25) Bena dokonai, ia ese ena Dirava bona Tamana dekenai basileia do ia henia hanai, bona unai neganai gavamani ibounai, lohia taudia ibounai, bona siahu taudia ibounai be ia ese ia haorea vadaeni. 25 Badina ia be do ia king ela bona Dirava ese ena inai taudia ibounai be ena aena henunai ia atoa.
“Mase Danu Do Ia Haorea”
10 “Dokona” be Keriso ena Lagani 1,000 Lohia Negana ena dokona, Iesu ese ena Dirava bona Tamana dekenai mai ena manau bona abidadama ida Basileia ia henia lou negana. (Apokalupo 20:4) Dirava ena palani, “ia karaia gaudia ibounai, guba dekenai bona tanobada dekenai, be Keriso” lalonai ia haboua karana, be do ia guguru vadaeni. (Efeso 1:9, 10) To, unai ia do vara lasi neganai, Keriso ese Dirava ena ura idia dadaraia “gunalaia taudia ibounai, lohia taudia ibounai, bona siahu taudia ibounai” do ia hadikaia ore. Unai be Aramagedono ai ia vara hadikaia karana sibona lasi. (Apokalupo 16:16; 19:11-21) Paulo ia gwau: “Keriso ese gau ibounai do ia biagua, ela bona Dirava ese ia dekenai idia tuari taudia ibounai iena aena henunai do ia atodia. Ia dekenai idia tuari taudia ibounai ia ese ia haorea murinai, Dirava ese mase danu do ia haorea.” (1 Korinto 15:25, 26) Oibe, ia ese Adamu amo ita abia kara dika ibounai bona mase do ia haorea vaitani. Unai nega ai, Dirava ese “mase guria gabu” amo taunimanima ibounai ia hamauria lou vadaeni.—Ioane 5:28.
(1 Korinto 15:26) Bona mase, iseda inai tauna ginigabena unai, be do ia ore momokani.
kr-E 237 par. 21
Dirava be Ena Basileia amo Ena Ura Tanobada ai Do Ia Hagugurua
21 To, mase dekenai dahaka do ia vara? Unai be iseda “inai tauna ginigabena,” bona kahirakahira taunimanima dekenai ia be siahu lasi. (1 Kor. 15:26) To Iehova ese mase ia haorea diba, a? Isaia be ena peroveta herevana ai ia gwau: “Siahu Ibounai Lohiabadana, Iehova, ese mase do ia haorea momokani, bona taunimanima ibounai edia vairana amo mata ranu do ia dahua.” (Isa. 25:8, NWT) Emu lalona ena matana ai unai nega oi piksaia diba, a? Fineral be lasi, gara gabuna be lasi, lalohisihisi bona taitai do idia ore vaitani! Iehova be ena gwauhamata hegeregerena mase taudia ia hatorea isi lou neganai, taunimanima ibounai be do idia moale bada! (Isaia 26:19 duahia.) Mase ese ia havaraia hisihisi be do idia ore.
(1 Korinto 15:27, 28) Badina Dirava ese “gau ibounai be Keriso ena aena henunai ia atoa.” To inai hereva, ‘Dirava ese gau ibounai Keriso henunai ia atoa’ ese ia hahedinaraia lasi Dirava be Keriso henunai ia noho, lasi, to Dirava ese gau ibounai be Keriso henunai ia atoa. 28 To Dirava ese gau ibounai be iena Natuna henunai do ia atoa murinai, unai Natuna ese ia sibona do ia atoa gau ibounai be ia henunai ia atoa Tauna henunai, vadaeni Dirava be gau ibounai edia kwarana ai do ia lao.
Maino—Lagani 1,000 Lalonai ela Bona Hanaihanai!
17 Baibel ese lagani 1,000 dokonai do ita abia maurina ia herevalaia neganai, ia gwau, “Dirava be gau ibounai edia kwarana ai do ia lao.” Unai ena anina be dahaka? Mani oi laloa, guna Eden umana ai Adamu bona Heva be Iehova ena maino ruma besena lalonai idia noho. Iehova, Guba bona Tanobada edia Lohia Badana, be ia havaraia gaudia ibounai ia lohiaia. Idia be Iehova ida idia herevahereva, ia idia tomadiho henia bona ia ese ia hanamodia. Unai nega ai, Iehova be “gau ibounai edia kwarana.”
Hakaua Hereva Namodia Tahua
(1 Korinto 14:34, 35) namona be kongrigeisen lalonai hahine idia hereva lasi, badina ia maoro lasi idia hereva totona, to Taravatu ia hereva bamona, namona be tatau henunai idia noho. 35 Bema idia ura gau ta idia dibaia, namona be ruma ai edia adavadia idia nanadaia, badina kongrigeisen lalonai hahine idia hereva be hemarai gauna.
w12 10/1 9, maua
Aposetolo Paulo be Hahine Ia Taravatua Do Idia Hereva Lasi, A?
Aposetolo Paulo ia gwau: “Namona be kongrigeisen lalonai hahine idia hereva lasi.” (1 Korinto 14:34) Iena hereva anina be dahaka? Ia laloa hahine edia aonega be bada lasi, a? Lasi. To ia be hahine edia hadibaia karana ia herevalaia. (2 Timoteo 1:5; Tito 2:3-5) Paulo ese Korinto taudia ia tore henia neganai, ia ese hahine, gado idauidau ai idia hereva taudia, bona peroveta taudia ta ta ia sisiba henidia, ta ia hereva neganai namona be idia “hereva lasi.” (1 Korinto 14:26-30, 33) Keristani hahine haida be diba matamata idia abia bona idia moale bada dainai, hereva henia tauna ena hereva idia utua bona henanadai momo idia henia, unai be vaia unai negai idia noho taudia edia kastom. Unai ia vara lasi totona, Paulo be hahine ia hagoadaia “namona be ruma ai edia adavadia idia nanadaia.”—1 Korinto 14:35.
(1 Korinto 15:53) Ia bodaga diba gauna be ia bodaga diba lasi gauna ai do ia lao. Bona ia mase diba gauna be mase diba lasi gauna ai do ia lao.
“Idia ese Mamoe Ena Natuna Murinai Idia Raka” Noho
6 Iehova ese hesiai tauna ia abidadama henia karana oi lalopararalaia totona, namona be unai orea dekenai ia gwauhamatalaia herevadia oi laloa. Aposetolo Paulo ia gwau: “Kibi do idia hiriria, vadaeni mase taudia do idia toreisi lou, bona do idia mase lou diba lasi. Bona ita ibounai Dirava ese do ia senisia, do ita idau. Badina be do ia bodaga diba gauna ese bodaga diba lasi gauna bamona do ia halaoa. Bona do ia mase diba gauna ese mase diba lasi gauna do ia halaoa.” (1 Kor. 15:52, 53) Keriso ena murinai idia raka horoa taudia be mai edia abidadama ida Dirava idia hesiai henia ela bona idia mase. To idia toreisi lou, lauma taudia ai idia lao bona idia mauri hanaihanai. Ma danu, edia lauma tauanina be ia bodaga diba lasi. Apokalupo 4:4 ia gwau, unai toreisi lou taudia be terona dekenai idia helai bona edia kwarana ai be golo kwara gaudia idia noho. Horoa Keristani taudia be lohia dagi do idia abia. To unai sibona lasi.
Baibel Duahiduahi
APRIL 29–MAY 5
BAIBEL ENA HEREVA BADADIA | 2 KORINTO 1-3
“Iehova—‘Lalogoada Ia Henia Diravana’”
(2 Korinto 1:3) Iseda Lohiabada Iesu Keriso ena Dirava bona Tamana do ita hanamoa. Ia be hebogahisi Tamana bona lalogoada ibounai ia henia Diravana.
“Taitai Taudia ida Umui Taitai”
4 Iseda hebogahisi Tamana ena lalokau taudia danu be idia mase vadaeni, hegeregere Aberahamo, Isako, Iakobo, Mose, bona King Davida. (Num. 12:6-8; Mat. 22:31, 32; Kara 13:22) Baibel ese ia hahedinaraia Iehova be ia ura dikadika mase taudia ia hatorea isi lou, bona ia be unai nega ia naria noho. (Iobu 14:14, 15, NWT) Idia toreisi lou taudia be do idia moale bona edia tauanina be do ia goada. Mani oi laloa, Dirava ena lalokau Natuna—“Dirava be [ia] dekenai ia moale” tauna unai—be hisihisi bada ia mamia ela bona ia mase. (Aon. 8:22, 30) Iehova ese unai nega ai ia mamia hisihisina be ta ese ia gwauraia diba lasi.—Ioa. 5:20; 10:17.
(2 Korinto 1:4) Iseda hisihisi ibounai lalonai ia ese ita dekenai lalogoada ia henia noho, vadaeni Dirava amo ita abia lalogoada amo hisihisi idauidau idia abia taudia ma haida ita hagoadaia diba.
“Taitai Taudia ida Umui Taitai”
14 Momokani, nega haida do ita diba lasi dahaka hereva do ita gwauraia ia lalohisihisi tauna dekenai. To Baibel ia gwau, “aonega tauna ena hereva ese, taunimanima idia hamauria diba.” (Aon. 12:18) Momo be inai buklet, Oiemu Lalokau Tauna ta Ia Mase Neganai, idia gaukaralaia ma ta idia hagoadaia totona. To nega momo ita karaia diba gauna be “idia taitai taudia ida [ita] taitai.” (Roma 12:15) Gaby, ena adavana ia mase, ia gwau: “Nega haida lau tai sibona, unai dala amo egu hemami lau hahedinaraia diba. Unai dainai egu turadia be lau ida idia tai neganai, goada lau abia. Unai nega ai lau mamia haida danu be lau mamia hisihisina idia mamia.”
Hakaua Hereva Namodia Tahua
(2 Korinto 1:22, NWT) Ia ese ita dekenai iena maka ia atoa danu, bona (toana) lauma helaga ia henia, unai be iseda kudouna ai ia noho. Unai amo ia hamomokania, do idia mai hahenamo be ita dekenai do ia henia.
Duahia Taudia Edia Henanadai
Horoa Keristani taudia ese Dirava amo dahaka “toana” bona “maka” idia abia?—2 Kor. 1:21, 22, NWT.
▪ Toana: Buka ta ia gwau, 2 Korinto 1:22, 21 (NWT) ai, inai Grik herevana idia hahanaia “toana ta” be “taravatu henunai bona bisinesi ai idia gaukaralaia danu,” anina be gau ta oi abia totona moni sisina sisina atoa karana ia herevalaia. Unai amo do oi hahedinaraia kohu be oiemu. To horoa taudia dekenai, davana ibounai, o edia ahuna, be 2 Korinto 5:1-5 ese inai bamona ia gwauraia, idia be ia bodaga diba lasi tauanina do idia abia. Oibe, do idia abia ahuna be mase diba lasi maurina.—1 Kor. 15:48-54.
Hari inai nega ena Greek gado ai, maoheni ena rini idia herevalaia totona, unai bamona hereva ta idia gaukaralaia. Laulau dalanai Keriso ena adavana ai do idia lao taudia dekenai unai be haheitalai namona.—2 Kor. 11:2; Apok. 21:2, 9.
▪ Maka: Guna, ta ese maka ta be ena saini hegeregerena ia gaukaralaia, unai amo ia hahedinaraia ia be kohu ta ena biaguna. To horoa taudia be lauma helaga amo “maka” ta idia abia, unai ese ia hahedinaraia idia be Dirava ena. (Efe. 1:13, 14) To unai maka be do ia noho hanaihanai lasi, ia be do ia noho ela bona unai tauna ia do mase lasi o hisihisi badana ia do vara lasi negana.—Efe. 4:30; Apok. 7:2-4.
(2 Korinto 2:14-16) To Dirava ita tanikiu henia badina hanaihanai ia ese ita be Keriso ida kwalimu raka lalonai ia gunalaia, bona iena diba be bonana namona bamona, bona iseda gaukara amo unai bonana be gabu ibounai dekenai ia lao! 15 Dirava ena vairanai ita be Keriso ena sivarai namona ena bonana namona, bona unai bonana be mauri ena dala ai idia raka taudia bona mase ena dala ai idia raka taudia dekenai ia lao. 16 Do idia mase taudia dekenai unai bonana ese mase ia havaraia, to hahemauri do idia abia taudia dekenai unai bonana ese mauri ia havaraia. Bona daika be unai gaudia totona ia hegeregere momokani?
w10-E 8/1 23
Inai Oi Diba, A?
Paulo be “kwalimu raka” ia herevalaia neganai, dahaka ia laloa?
▪ Paulo ia gwau: “Dirava . . . ese ita be Keriso ida kwalimu raka lalonai ia gunalaia, bona iena diba be bonana namona bamona, bona iseda gaukara amo unai bonana be gabu ibounai dekenai ia lao! Dirava ena vairanai ita be Keriso ena sivarai namona ena bonana namona, bona unai bonana be mauri ena dala ai idia raka taudia bona mase ena dala ai idia raka taudia dekenai ia lao. Do idia mase taudia dekenai unai bonana ese mase ia havaraia, to hahemauri do idia abia taudia dekenai unai bonana ese mauri ia havaraia.”—2 Korinto 2:14-16.
Paulo be Roma ai ami jeneral ese ena inai taudia ia halusia bona idia karaia kwalimu raka ia herevalaia. Unai bamona negadiai, idia halusia hanuadia amo idia abia kohu bona tuari ai idia dogoatao taudia be hutuma vairanai idia hahedinaraia bona boromakau be boubou gabuna dekenai idia abia lao, bona ia kwalimu ami jeneral bona ena tuari oreana be taunimanima ese idia hanamoa. Unai kwalimu raka ena dokonai, boromakau ibounai idia bouboulaia bona idia dogoatao taudia momo be idia hamasea.
Inai laulau herevana “Keriso ena . . . bonana namona” be haida dekenai mauri bona mase ia laulaulaia. The International Standard Bible Encyclopedia ese ia hahedinaraia reana unai laulau herevana be “Roma taudia edia kwalimu raka ai bonana namo muramura idia gabua karana amo idia abia. Idia gabua bonana namona muramura be kwalimu taudia totona, to idia dogoatao taudia ese idia bonaia neganai, idia diba dokonai do idia mase.”
Baibel Duahiduahi