Iseda Haroro Bona Mauri Dalana Hebou Pepana Edia Referens
MAY 6-12
BAIBEL ENA HEREVA BADADIA | 2 KORINTO 4–6
‘Ita Hesiku Lasi’
(2 Korinto 4:16) Unai dainai ai hesiku lasi, ena be aiemai tauanina be idia dika idia lao noho, to aiemai kudouna be dina ibounai goada matamata idia abia noho.
Ita Hesiku, to Iseda Goada Ia Ore Lasi
16 Lauma dalanai iseda goada karana ita naria namonamo be gau badana momokani. Bema ita be Iehova Dirava ita tura henia momokani, ena be tauanina dalanai ita hesiku, to ia tomadiho henia karana dekenai do ita hesiku lasi. Iehova ese “manoka bona hesiku taudia . . . ia hagoadaia noho, bona goada lasi taudia edia goada ia habadaia noho.” (Isaia 40:28, 29) Aposetolo Paulo be unai hereva ia mamia momokani, bona ia gwau: “Ai be hesiku diba lasi. Aiemai tauanina be idia bodaga lao noho, to aiemai lauma be dina ibounai idia matamata lao noho.”—2 Korinto 4:16.
17 Inai hereva, “dina ibounai” mani ita laloa. Ena anina be dina ta ta ai Iehova ese ita dekenai ia henia gau namodia ita gaukaralaia diba. Lagani 43 lalonai misinari gaukara ia karaia goadagoada taihu ta be nega haida lalonai tauanina dalanai ia hesiku bona ia lalomanoka. To iena goada ia ore lasi. Ia gwau: “Lau manadalaia gauna be, dina ibounai daba maragi lau noga bona gaukara ta lau do hamatamaia lasi neganai, Iehova lau guriguri henia bona iena Hereva lau duahia guna. Dina ta ta ai unai bamona lau karaia karana ese lau ia durua lau haheauka noho ema bona hari.” Oibe, bema “dina ibounai” Iehova ita guriguri henia bona iena kara hairaidia bona iena gwauhamata ita laloa dobu hanaihanai, ita diba momokani Iehova ese ita dekenai goada do ia henia.
(2 Korinto 4:17) Badina ena be ita abia hisihisi be nega sisina gauna bona ia metau lasi, to ita dekenai hairai hereadaena do ia mailaia, unai hairai be do ia noho hanaihanai.
it-1-E 724-725
Haheauka
Mai anina bada gauna be inai, iseda helaro, mauri goevadaena ai do ita mauri hanaihanai, ita laloaboio lasi be namo. Ena be ita idia dagedage henia taudia idia ura ita idia hamasea, to unai ese iseda abidadama unai helaro dekenai do ia hadikaia lasi. (Ro 5:4, 5; 1Te 1:3; Apo 2:10) Unai helaro namona do ia guguru karana ita laloa neganai, hari ita davaria hisihisi ibounai be do ita laloa bada lasi. (Ro 8:18-25) Do ita abia mauri hanaihanai be hari ita abia hisihisi idauidau ida ita hahegeregerea neganai, do ita diba idia be “nega sisina gauna bona ia metau lasi.” (2Ko 4:16-18) Bema ta ia laloa ia davaria hahetoho be nega sisina sibona bona ena Keristani helaro ia dogoatao auka, unai ese ia do ia durua ia daradoko lasi bona Iehova Dirava ia badinaia noho totona.
(2 Korinto 4:18) Unai dainai iseda matana dekenai ita itaia gaudia ita raraia noho lasi, to ita itaia lasi gaudia ita raraia noho. Badina ita itaia gaudia be idia noho daudau lasi, to ita itaia lasi gaudia be idia noho hanaihanai.
Hakaua Hereva Namodia Tahua
(2 Korinto 4:7) To ai dekenai inai dava bada gauna be hodu lalonai ia noho. Bona ia hedinarai goevagoeva, ai abia siahuna, taunimanima edia siahu ia hereaia gauna be Dirava amo ia mai, ai amo lasi.
w12-E 2/1 28-29
“Iehova Ita Hamoalea”
David Splane, Hakaua Oreana ena memba ta, ese unai siri ena hereva badana ia hahedinaraia. (2 Korinto 4:7) Unai dava bada gauna be dahaka? Ia be diba eiava aonega? Tadikaka ia haere ia gwau: “Lasi, to aposetolo Paulo ese ia herevalaia dava bada gauna be ‘inai hesiai gaukara’ ai ‘hereva momokani ita gwauraia hedinarai.’” (2 Korinto 4:1, 2, 5) Tadikaka Splane ese stiuden taudia ia hadibaia, unai hua faiv lalonai idia stadi karana ese idia ia hegaegaelaia haroro gaukara ena spesel asainmen totona. Unai asainmen idia laloa bada be namo.
Tadikaka ese ia hahedinaraia unai “hodu” be iseda tauanina ia laulaulaia. Ia ese tano amo idia karaia hodu bona golo amo idia karaia hodu edia idau ia herevalaia. Golo amo idia karaia hodu be idia gaukaralaia momo lasi. To, tano amo idia karaia hodu be idia gaukaralaia momo. Bema dava bada gauna ta be golo amo idia karaia hodu lalonai ita atoa, reana unai hodu sibona do ita laloa, to ia lalonai ia noho dava bada gauna do ita laloa bada lasi. Tadikaka Splane ia gwau: “Namo lasi taunimanima ese umui stiuden taudia idia laloa bada. To, umui be misinari taudia dainai, taunimanima umui durua Iehova idia laloa bada totona. Umui be unai tano amo idia karaia hodu bamona.”
(2 Korinto 6:13) Unai dainai ai karaia bamona do umui karaia, umui be egu natudia bamona lau hereva henia, umui danu, emui lalokau umui habadaia.
Tadikaka Lalokau Henia Karana Habadaia Noho
7 Ita be edena bamona? Edena dala ai tadikaka lalokau henia karana o ‘iseda lalokau ita habadaia’ diba? Haida idia ura edia mauri lagani tamona taudia o hanua tamona taudia sibona idia bamoa. Eiava haida idia bamoa momo badina idia ida moale karadia idia karaia hebou. Bema ita be unai bamona, vadaeni ‘iseda lalokau ita habadaia’ o tadikaka taihu ma haida ita bamoa be namo. Ita sibona ita nanadaia: ‘Haroro gaukara o moale karadia dekenai, hanaihanai tadikaka o taihu tamona sibona lau bamoa badina ia sibona lau diba o manada, a? Kingdom Hall ai, nega ginigunana hebou idia mai taudia lau hereva henia momo lasi, badina lau laloa idia be egu turana ai do idia lao haraga lasi, a? Kongrigeisen dekenai, lau be buruka taudia bona matamata taudia lau hedavari henia, a?’
Baibel Duahiduahi
MAY 13-19
BAIBEL ENA HEREVA BADADIA | 2 KORINTO 7–10
Disasta Negadiai Iseda Tadikaka Ita Durudia
(2 Korinto 8:1-3) Tadikaka e, ai ura umui dekenai Dirava ese Makedonia kongrigeisen dekediai ia hahedinaraia hebogahisi hereadaena umui diba. 2 Idia be hahetoho badana ta dainai hisihisi idia davaria neganai, idia moale bada bona hariharibada idia hahedinaraia, ena be idia ogogami momokani. 3 Badina idia henia diba hegeregerena idia henia, oibe, lau gwau diba, idia henia gauna be idia dekenai ia noho gauna ia hereaia.
“Mai Moale Danu Ia Henia Tauna be Dirava ese Ia Lalokau Henia”
Guna, Paulo be Makedonia taudia edia sivarai ia kikilaia Korinto taudia dekenai, idia ese unai heduru gaukarana idia durua bada. Paulo ia gwau: “Hisihisi bada idia davaria gaudia ese edia haheauka idia tohoa, to edia moale be ia bada herea noho. Momokani edia ogogami be ia bada, to edia durua idia henia bada herea.” Makedonia taudia do ia doria be anina lasi. Paulo ia gwau “idia sibona edia ura dainai, ai dekenai idia noinoi, edia moni haida do ai abia lao, Dirava ena taudia Iudea dekenai durua totona.” Makedonia taudia be mai moale ida edia moni idia henia ita hoalaia badina ita diba “edia ogogami be ia bada” danu.—2 Korinto 8:2-4.
kr-E 209 par. 1
Durua Gaukarana
Lagani 46 C.E. bamona ai, Iudea ai hitolo bada ia vara. Unuseniai idia noho Keriso ena Iuda hahediba taudia be idia hegeregere lasi uiti idia hoia totona, badina ena davana be bada herea. Idia hitolo bada herea bona aniani be lasi dainai idia mase diba. To, kahirakahira Iehova ese idia do ia gimaia dalana do idia itaia, guna Keriso ena hahediba taudia haida ese unai bamona hoa karana ta idia itaia lasi. Dahaka do ia vara?
(2 Korinto 8:4) Bona idia be sibona edia ura dainai ai idia noia loulou, edia harihari gauna do idia henia bona helaga taudia do idia durua.
kr-E 209-210 par. 4-6
Durua Gaukarana
4 Paulo ese Korinto tadikaka dekenai revareva iharuana ia torea neganai, ia gwau Keristani taudia edia hesiai gaukara ena kahana be rua. Ena be Paulo ia torea revareva be horoa Keristani taudia totona, to iena hereva be hari Keriso ena “mamoe ma haida” ia herevalaia danu. (Ioane 10:16) Hesiai gaukara ena kahana ginigunana be “maino ena hesiai gaukara,” unai be, iseda haroro bona hadibaia gaukarana. (2 Kor. 5:18-20; 1 Tim. 2:3-6) Unai hesiai gaukara ena kahana ma ta be, iseda abidadama tamona taudia ita durua karana. To, Paulo ia herevalaia gauna be ma haida “durua” o hesiai henia gaukarana. (2 Kor. 8:4) Inai hereva rua, “maino ena hesiai gaukara” bona ma haida “hesiai henia” ai, inai hereva “hesiai” idia gaukaralaia bona ia be Greek herevana, di·a·ko·niʹa amo idia abia. Dahaka dainai unai be mai anina bada?
5 Paulo ese unai gaukara rua totona unai Greek hereva tamona ia gaukaralaia unai amo ia hahedinaraia, ma haida dekenai heduru henia gaukarana be Keristani kongrigeisen ai idia karaia hesiai gaukara ma haida ida, idia karaia hebou be namo. Matamanai ia hereva bamona, ia gwau: “Hesiai gaukara be idauidau, to Lohiabada be tamona sibona. Bona gaukara be idauidau, . . . To [edia] gaukara ibounai be unai lauma helaga tamona sibona ese ia karaia.” (1 Kor. 12:4-6, 11) Unai dainai, Paulo ese kongrigeisen ena hesiai gaukara idauidau be “hesiai gaukara helagana” ida ia hakapua. (Roma 12:1, 6-8) Unai dainai iena nega ia gaukaralaia “helaga taudia [ia] hesiai henia totona”!—Roma 15:25, 26.
6 Paulo ese Korinto taudia ia durua unai amo do idia itaia, ma haida durua karana be edia hesiai gaukara bona Iehova tomadiho henia karana ena kahana ta. Mani unai hereva ia gwauraia ena badina ita laloa: Keristani taudia ese heduru idia henia badina “Keriso ena sivarai namona [idia] badinaia.” (2 Kor. 9:13) Danu, Keristani taudia ese mai ura ida Keriso ena hahediba herevadia idia badinaia dainai, edia abidadama tamona taudia idia durua. Paulo ia gwau, edia tadikaka taihu dekenai idia hahedinaraia kara namodia be “Dirava ese [idia] dekenai hebogahisi hereadaena” ia hahedinaraia karana hegeregerena. (2 Kor. 9:14; 1 Pet. 4:10) Danu, December 1, 1975 ena Gima Kohorona ese iseda tadikaka taihu durua karana ia herevalaia neganai, ia gwau: “Namona be ita daradara lasi badina Iehova bona iena Natuna, Iesu Keriso dekenai unai bamona hesiai gaukara be mai anina bada.” Oibe, ma haida durua gaukarana be hesiai gaukara helagana ena kahana ta.—Roma 12:1, 7; 2 Kor. 8:7; Heb. 13:16.
(2 Korinto 9:7) Namona be ta ta ese edia kudouna ai idia laloa vadaeni gauna hegeregerena do idia henia. Namo lasi mai lalohisihisi ida eiava ta ese ia doria dainai idia henia, badina mai moale ida ia henia tauna be Dirava ese ia lalokau henia.
kr-E 196 par. 10
Basileia Gaukaradia Durua Dalana
10 Ginigunana be, kontribusen ita henia badina Iehova ita lalokau henia bona ita ura “ia idia hamoalea gaudia” ita karaia noho. (1 Ioa. 3:22) Mai kudouna ibounai ida ia henia tauna be Iehova ese ia lalonamo henia. Mani aposetolo Paulo ese Keristani tauna ena henia karana ia herevalaia dalana ita laloa. (2 Korinto 9:7 duahia.) Keristani momokanina be henia karana dekenai ia daradara lasi bona ta ese ia doria lasi. To, ia henia badina ia ese ena “kudouna ai [ia] laloa vadaeni gauna hegeregerena” ia henia. Unai ena anina be, do ia henia gauna bona do ia hagugurua dalana be ia lalohadailaia vadaeni. Iehova ese unai bamona tauna ia laloa bada, badina “mai moale ida ia henia tauna be Dirava ese ia lalokau henia.” Baibel ma ta ia gwau: “Dirava be mai ura ida idia henia taudia ia lalokau henidia.”
Hakaua Hereva Namodia Tahua
(2 Korinto 9:15) Dirava ena davana lasi harihari gauna dainai ia ita tanikiu henia, inai harihari gauna be hereadae.
“Dirava Ena Davana Lasi Harihari Gauna” Laloa Bada
2 Paulo ia diba Keriso ena boubou amo Dirava ena gwauhamata ibounai do idia guguru. (2 Korinto 1:20 duahia.) Anina be, Dirava ena “davana lasi harihari gauna” be Iesu ena boubou gauna bona Iehova ese ita dekenai ia hahedinaraia hahenamo ibounai. Oibe, unai harihari gauna be hereadae. Unai dainai, unai harihari gauna be edena bamona ita laloa be namo? Edena dala ai unai harihari gauna ese ita do ia durua, unai amo Wednesday, March 23, 2016 ai do ita karaia Memorial hebouna totona ita hegaegae diba?
(2 Korinto 10:17) “To ia heagi tauna be Iehova ia heagilaia be namo.”
g99-E 7/8 20-21
Ita Heagi be Maoro A?
Keristani Grik toretoredia lalonai, inai hereva kau·khaʹo·mai, idia hahanaia neganai ena anina be, “hekokoroku eiava heagi,” bona unai hereva idia gaukaralaia lalohadai namona bona dikana hahedinaraia totona. Hegeregere, Paulo ia gwau, ita “moale be namo badina Dirava ena hairai” do ita abia. Paulo ma ia gwau: “Ia heagi tauna be Iehova ia heagilaia be namo.” (Roma 5:2; 2 Korinto 10:17) Unai ena anina be Iehova be iseda Dirava bamona ita heagilaia be namo, bona unai hemami dainai ena ladana namona bona ena kara namona do ita hanamoa.
Baibel Duahiduahi
MAY 20-26
BAIBEL ENA HEREVA BADADIA | 2 KORINTO 11–13
“Paulo Ena Hekwakwanai be Ginigini Ta Bamona Ena Tauanina Ia Gwadaia”
(2 Korinto 12:7) Lohiabada amo lau abia hadibaia herevadia momo dainai, namo lasi ta ese lau ia laloa bada. Unai dainai, lau hekokoroku lasi totona, gau ta ese lau ia hahekwarahia noho, hegeregere ginigini ta ese egu tauanina ia gwadaia bamona, ia be Satani ena gaukara tauna bamona lau ia hahisia noho, vadaeni do lau hekokoroku lasi.
Ita Manoka Neganai, Dirava Ena Goada Ita Abia
Kamonai hesiai tauna ta, aposetolo Paulo, be nega toi Iehova ia noia “ginigini ta”—nega momo ia hisihisilaia hekwakwanai ta—ia kokia totona. Reana unai hisihisi dainai, Paulo be ia lalometau, herevana Iehova ena hesiai gaukara ia karaia. Paulo ia gwau: “Inai ginigini ia henia be lauegu kopina do ia gwadaia totona.” To, Iehova ia haere: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Iehova be unai ginigini ia kokia lasi. Unai dainai, ena be Paulo ese unai hekwakwanai ia hisihisilaia, to ia gwau: “Lau manoka neganai, unai be Dirava ena goada lau abia.” (2 Kor. 12:7-10) Paulo ena hereva ena anina be dahaka?
(2 Korinto 12:8, 9) Unai dainai nega toi Lohiabada lau noia unai ginigini ia kokia totona. 9 To lau dekenai ia gwau: “Oi dekenai lau hahedinaraia hebogahisi hereadaena be ia hegeregere momokani. Badina oi manoka neganai, egu siahu be oi amo ia hedinarai goevagoeva.” Unai dainai, mai moale ida egu manoka gaudia do lau heagilaia, unai amo Keriso ena siahu be palai ta bamona lau do ia koua.
Iehova ese Lauma Helaga be Idia Noinoi Taudia Dekenai Ia Henidia
17 Dirava ese Paulo ena guriguri ia haerelaia, ia gwau: “Lauegu hariharibada be oi dekenai ia hegeregere momokani vadaeni. Badina be lauegu siahu be manokamanoka tauna lalonai ia hedinarai momokani.” Paulo ia gwau: “Unai dainai, lauegu manoka do lau heagilaia mai moale danu, vadaeni Keriso ena siahu lau dekenai do ia noho [“vadaeni Keriso ena siahu be palai ruma ta bamona egu ataiai ia noho,” NW].” (2 Korinto 12:9; Salamo 147:5) Momokani, Keriso ese Dirava ena siahu amo Paulo ia gimaia—unai siahu be palai ruma bamona Paulo ia koua. Hari inai negai, Iehova ese eda guriguri be unai bamona ia haerelaia. Ia ese ena hesiai taudia ia gimaia, bona idia be palai ruma ta henunai idia noho bamona.
18 Momokani, palai ruma be medu ena diho eiava lai ena toa ia hadokoa diba lasi, to dala haida ai ia ese tau ta ia koua eiava gimaia diba. Unai hegeregerena, “Keriso ena siahu” be ita davaria hisihisi o hekwakwanai ia hadokoa diba lasi. To, unai siahu ese ita—Iehova ita tomadiho henia taudia—ia gimaia diba, inai tanobada ena tohoa gaudia bona tanobada ia biagua tauna, Satani, ese ita ia hamorua lasi totona. (Apokalupo 7:9, 15, 16) Unai dainai, herevana oi abia hisihisina oi “kokia” diba lasi, to oi diba Iehova be emu hekwarahi ia diba bona emu “taitai” ia kamonai. (Isaia 30:19; 2 Korinto 1:3, 4) Paulo ia gwau: “Dirava be ia momokani. Ia ese umui do ia naria, emui goada ia hanaia dibagani ese umui do ia pidia garina. Bona dibagani ia mai neganai, emui dala ta do ia kehoa. Vadaeni inai dala dekena amo unai dibagani dekena amo do umui kwalimu diba.”—1 Korinto 10:13; Filipi 4:6, 7.
(2 Korinto 12:10) Vadaeni Keriso dainai, ena be lau manoka, lau idia hadikaia, lau dabu, bona dagedage bona metau lau davaria, to lau moale. Badina lau manoka neganai, goada bada lau abia.
“Manoka Bona Hesiku Taudia be Lohiabada ese Ia Hagoadaia Noho”
8 Isaia 40:30 duahia. Ena be iseda diba be bada, to ita sibona eda goada amo gau momo ita hagugurua diba lasi. Unai ita diba be namo. Ena be aposetolo Paulo be gau momo ia karaia diba, to ia ura karaia gaudia ibounai ia hagugurua diba lasi. Dirava dekenai ena lalohekwarahi ia gwauraia neganai, Iehova be ia dekenai ia gwau: “Oi manoka neganai, egu siahu be oi amo ia hedinarai goevagoeva.” Paulo be unai hereva ia lalopararalaia dainai, ia gwau: “Lau manoka neganai, goada bada lau abia.” (2 Kor. 12:7-10) Ena hereva ena anina be dahaka?
9 Paulo ia diba ia sibona ena goada amo gau momo ia hagugurua diba lasi, to siahu bada tauna ta ena heduru amo unai ia karaia diba. Dirava ena lauma helaga be Paulo dekenai siahu ia henia. Unai sibona lasi, to lauma helaga ese Paulo ia hasiahua dainai, sibona ena goada amo ia karaia diba lasi gaudia ia karaia diba. Ita dekenai unai ia vara diba danu. Iehova be ita dekenai lauma helaga ia henia neganai, do ita goada!
Hakaua Hereva Namodia Tahua
(2 Korinto 12:2-4) Keriso ida ia hakapua tauna ta lau diba. Lagani 14 gunanai, Lohiabada ese ia be guba ihatoina dekenai ia abia lao. Lau diba lasi bema unai be tauanina korikorina ai eiava lasi, to Dirava ia diba. 3 Oibe, unai tauna lau diba. Lohiabada ese ia be paradaiso dekenai ia abia lao. Lau diba lasi tauanina korikorina ai eiava lasi, to Dirava ia diba. 4 Oibe, unai tauna lau diba, Lohiabada ese paradaiso dekenai ia abia lao bona taunimanima ese idia gwauraia diba lasi herevadia ia kamonai, tau ta be maoro lasi unai hereva ia gwauraia totona.
Duahia Taudia Edia Henanadai
Korinto Iharuana 12:2 ese ia gwauraia “guba ihatoina” be “guba matamata,” Iesu Keriso bona 144,000 ese do idia lohiaia Mesia Basileiana ia herevalaia.—2 Pet. 3:13.
Ia be “guba ihatoina” badina unai Basileia ena lohia dalana be atai momokani bona hereadae.
Paulo ena matahanai ai ia herevalaia “paradaiso” be (1) tanobada paradaisona, gabeai do ia vara gauna, (2) hari Iehova ena taunimanima ese idia moalelaia maino be unai nega ese do ia hereaia bona (3) “Dirava ena paradaiso,” guba ai do ia noho gauna ena hahenamo be tanobada matamata ai do ia vara danu.
(2 Korinto 13:12) Ta ta do umui hanamoa mai kisi helagana ida.
it-2-E 177
Kisi
“Kisi Helagana.” Keristani ginigunadia edia negai “kisi helagana,” (Ro 16:16; 1Ko 16:20; 2Ko 13:12; 1Te 5:26) eiava “lalokau kisi” (1Pe 5:14), be reana tadikaka ese tadikaka ma ta, o taihu ese taihu ma ta dekenai idia hahedinaraia karana ta. Keristani ginigunadia ese idia karaia karana be idaunegai Heberu taudia edia hanamoa karana bamona, hegeregere ta idia hedavari henia neganai, idia kisi henia. Ena be Baibel ese unai ia herevalaia momo lasi, to “kisi helagana” eiava “lalokau kisi” ese Keristani kongrigeisen lalonai lalokau bona lalotamona karana ia hahedinaraia.—Ioa 13:34, 35.
Baibel Duahiduahi
MAY 27–JUNE 2
BAIBEL ENA HEREVA BADADIA | GALATIA 1–3
“Ia Lau Sisiba Henia”
(Galatia 2:11-13) To Kepa be Antioka dekenai ia mai neganai, ia lau sisiba henia, badina ia karaia karana be maoro lasi. 12 Iamesi ena bamodia haida idia do mai lasi neganai, Kepa be vaia idau bese taudia ida ia aniani hebou, to idia ginidae neganai, ia ese unai kara ia hadokoa bona ia bamodia lasi, badina kopina utua taudia dekenai ia gari. 13 Vadaeni Iuda taudia oredia be Kepa ena kara koikoi lalonai idia vareai bona Banaba danu be unai kara lalonai ia vareai.
Iehova Ena Hahemaoro Dalana Do Oi Tohotohoa, A?
16 Galatia 2:11-14 duahia. Petero be taunimanima ia gari henia dainai unai tarapu lalonai ia moru. (Aon. 29:25) Ena be matamanai Petero be Iehova ena lalohadai Idau Bese taudia dekenai ia lalopararalaia, to Ierusalema dekenai idia noho Iuda Keristani taudia dekenai ia gari. Lagani 49 C.E. ai, Ierusalema dekenai idia karaia hebouna ai aposetolo Paulo ia noho danu, unai dainai Antioka ai ia ese Petero ia hereva henia bona ena hekokoroku karana ia hahedinaraia. (Kara 15:12) Petero ena kara kerere dainai Idau Bese Keristani taudia be dahaka do idia karaia? Iena kara ese idia do ia hahekwakwanaia, a? Petero ena kerere dainai, iena hahenamo do ia haboioa, a?
(Galatia 2:14) To lau itaia idia be sivarai namona ena hereva momokani idia badinaia lasi neganai, idia ibounai vairanai Kepa dekenai lau gwau: “Bema oi be Iuda tauna bona idau bese taudia bamona oi noho, to Iuda taudia bamona lasi, edena bamona idau bese taudia oi doridia diba Iuda taudia bamona idia noho totona?”
Iehova Idia Ura Henia Taudia be, “Gau Ta ese Do Ia Hamorudia Diba Lasi”
12 Petero be taunimanima ia gari henia. Ia be Iesu bona Iehova ia badinaia, to nega haida taunimanima ia gari henidia dainai kerere ia karaia. Hegeregere, ia ese nega toi Iesu ia gorea. (Luka 22:54-62) Nega ma ta ai, Petero ese Iuda Keristani taudia ia kara namo henidia, to Idau Bese Keristani taudia ia laloa maragi. Petero ena lalohadai be ia maoro lasi, bona reana kongrigeisen taudia haida ia hakaudia kerere danu. Unai dainai, Paulo ese ia sisiba auka henia. (Gal. 2:11-14) Petero be Paulo ena sisiba ia dadaraia bona mauri ena heau helulu ia rakatania, a? Lasi. Ia ese Paulo ena sisiba ia laloa namonamo, ena kara ia haidaua, bona heau helulu lalonai ia heau lou.
Hakaua Hereva Namodia Tahua
(Galatia 2:20) Lau be Keriso ida au dekenai idia kokoa kau. Vadaeni lau mauri noho lasi, to Keriso be ia mauri noho bona lau ida ia hakapua. Momokani, hari lau noholaia maurina be Dirava ena Natuna lau abidadama henia dainai lau mauri, ia ese lau ia lalokau henia bona lau totona ia sibona ia henia.
Ena be “Hisihisi Idauidau” Oi Davaria, to Dirava Oi Badinaia Noho
20 Hunia dalanai ita davaria hahetoho be edena bamona? Hegeregere, edena dala ai lalomanoka ita hanaia diba? Ita do ia durua bada dalana ta be Iesu ena boubou gauna do ita laloa dobu. Aposetolo Paulo be unai bamona ia karaia. Nega haida ia mamia ia be dika tauna. To, ia diba Keriso be goevadae taudia totona ia mase lasi, to kara dika taudia totona ia mase. Bona Paulo be unai kara dika tauna ta. Ia gwau: “Hari lau noholaia maurina be Dirava ena Natuna lau abidadama henia dainai lau mauri, ia ese lau ia lalokau henia bona lau totona ia sibona ia henia.” (Gal. 2:20) Oibe, Paulo ese Iesu ena mauri davalaia boubouna ia abia dae, bona ia diba Iesu be ia totona ia mase.
21 Oi danu be namo oi davaria diba, bema oi abia dae Iesu ena mauri davalaia boubouna be Iehova ese oi totona ia henia harihari gauna ta. To, namo lasi oi laloa oiemu lalomanoka karana be do ia ore haraga. Ita haida be reana lalomanoka karana do ita haheaukalaia ela bona tanobada matamatana. To laloatao: Idia haheauka taudia ese ahuna namona do idia abia. Ita be kahirakahira Dirava ena Basileia henunai maino do ia vara bona abidadama taudia do idia goevadae lou negana ita naria noho. Unai dainai, ena be hisihisi idauidau ita davaria, to eda lalona do ita hadaia Dirava ena Basileia lalonai ita vareai totona.
(Galatia 3:1) Umui kavakava Galatia taudia e, ena be umui dekenai Iesu Keriso be au dekenai idia kokoa kau karana idia gwauraia hedinarai goevagoeva, to daika ese umui ia koia?
it-1-E 880
Revareva Ta Galatia Taudia Totona
Paulo ese inai hereva, “umui kavakava Galatia taudia e,” ia gwauraia neganai, ia be Galatia ena not kahana ai idia noho Gallic stock taudia ia herevalaia lasi. (Ga 3:1) To, Paulo be kongrigeisen lalonai haida ia sisiba henia badina idia laloa bema Mose ena Taravatu idia badinaia noho, kara maoromaoro taudia ai idia lao diba, bona kontraka matamata ai Dirava ese ‘abidadama dainai idia do ia gwauraia maoromaoro’ karana idia dadaraia. (2:15–3:14; 4:9, 10) Paulo ese ia tore henia taudia “Galatia ai idia noho kongrigeisen ibounai” (1:2) be Iuda bona Iuda lasi taudia, kopina idia utua Iuda tomadihona idia abia dae taudia bona Idau bese taudia, bona idia haida be Celt taudia. (Ka 13:14, 43; 16:1; Ga 5:2) Unai dainai, ena revareva ai idia ibounai ia gwauraia Galatia Keristani taudia, badina idia noho gabuna ena ladana be Galatia. Paulo be Roma provinsi ena saut kahana ai idia noho taudia ia tore henidia badina idia ia diba namonamo, to not kahana ai idia noho taudia dekenai lasi, badina unai gabu taudia ia diba lasi bona ia vadivadi henidia lasi.
Baibel Duahiduahi