Iseda Haroro Bona Mauri Dalana Hebou Pepana Edia Referens
JUNE 3-9
BAIBEL ENA HEREVA BADADIA | GALATIA 4-6
“‘Gabeai Do Idia Vara Gaudia’ be mai Anina Bada Ita Dekenai”
(Galatia 4:24, 25) Unai gaudia be gabeai do idia vara gaudia idia laulaulaia, badina unai hahine rua ese kontraka rua idia laulaulaia. Idia ta be Sinai Ororona ai idia karaia, bona ia henunai idia noho taudia ibounai be igui hesiai taudia, bona unai kontraka ese Hagara ia laulaulaia. 25 Hagara ena anina be Sinai, ia be Arabia ai ia noho ororona ta. Bona ia be hari Ierusalema ia laulaulaia, badina ia bona ena natudia be igui hesiai lalonai idia noho.
it-1-E 1018 par. 2
Hagara
Aposetolo Paulo ena hereva hegeregerena, gabeai do idia vara gaudia ai, Hagara be Israela bese korikorina ia laulaulaia, idia be Sinai Ororona ai idia karaia Taravatu Kontrakana amo Iehova ena bese ai idia lao, bona unai taravatu henunai idia ibounai be “igui hesiai taudia.” To taunimanima edia kara dika dainai, Israela besena be idia hegeregere lasi unai kontraka idia badinaia totona. Israela taudia be unai taravatu henunai idia noho dainai, idia dekenai hamauria dalana ta be lasi, to idia gwauraia idia be kara dika taudia badina edia davana be mase; unai dainai idia be igui hesiai taudia. (Ioa 8:34; Ro 8:1-3) Paulo ena negai, unai Ierusalema be Hagara ia laulaulaia, badina Ierusalema be Israela ena siti badana, bona Israela orea korikorina ia laulaulaia, ia bona ena natudia be igui hesiai bamona idia noho. Horoa Keristani taudia, be “ataiai Ierusalema,” ena natudia, laulau dalanai unai be Dirava ena hahine. Unai Ierusalema be ura kwalimu hahinena Sara bamona, ia be nega ta igui hesiai bamona ia noho lasi. Isamaela ese Isako ia dagedage henia hegeregerena, “ataiai Ierusalema” ena natudia danu—Natuna ese ia ruhaia taudia—be Ierusalema ena igui natudia ese idia dagedage henia. To, Hagara bona ena natuna idia lulua karana ese Iehova be Israela bese korikorina ia lulua karana ia laulaulaia.—Ga 4:21-31; Ioa 8:31-40 danu itaia.
(Galatia 4:26, 27) To ataiai Ierusalema be ura kwalimu hahinena, bona ia be iseda sinana. 27 Toretore Helagadia ia gwau: “Natuna oi havaraia lasi gabani hahinena e, do oi moale. Mara ena hisihisi oi diba lasi hahinena e, mai moale danu do oi boiboi. Badina iena tau ese ia rakatania hahine ena natudia be momo herea, to headava hahine ena natudia be momo lasi.”
Basileia Oi Abidadama Henia
11 Aberahamo ena natudia korikori be Gwauhamata Tanona ai idia vareai neganai, unai be nega ginigunana Aberahamo kontrakana ia guguru. To, Baibel ia gwau unai kontraka be lauma dalanai do ia guguru danu. (Gal. 4:22-25) Aposetolo Paulo ese ia hahedinaraia, Aberahamo ena garana ena kahana ginigunana be Keriso, bona iharuana be 144,000 horoa Keristani taudia. (Gal. 3:16, 29; Apok. 5:9, 10; 14:1, 4) Garana ia havaraia hahinena be “ataiai Ierusalema”—Dirava ena guba oreana mai ena kamonai aneru danu. (Gal. 4:26, 31) Aberahamo kontrakana ena gwauhamata hegeregerena, hahine ena garana ese bese ibounai dekenai hahenamo do ia mailaia.
(Galatia 4:28-31) Vadaeni tadikaka e, ita be gwauhamata ta dainai ita vara, Isako hegeregerena. 29 To, vaia taunimanima idia vara dalana amo ia vara natuna ese lauma helaga amo ia vara natuna ia dagedage henia, hari danu be unai bamona. 30 To, Toretore Helagadia be dahaka ia gwau? “Hesiai kekenina bona ena natuna do oi lulua, badina hesiai kekenina ena natuna be ura kwalimu hahinena ena natuna ida tamana ena kohu do ia abia lasi, lasi momokani.” 31 Unai dainai tadikaka e, ita be hesiai kekenina ena natudia lasi, to ita be ura kwalimu hahinena ena natudia.
Hakaua Hereva Namodia Tahua
(Galatia 4:6) Umui be Dirava ena natudia dainai, Dirava ese ena Natuna dekenai ia henia lauma helaga be iseda kudouna lalonai ia atoa, bona ia boiboi ia gwau: “Abba, Tamana e!”
w09-E 4/1 13
Inai Oi Diba, A?
Dahaka dainai Iesu be ena guriguri lalonai Iehova ia gwauraia, “Abba, eiava Tamana”?
Aramia gado ai inai hereva ʼab·ba,ʼʹ ena anina be “tamana” eiava “Tamana E.” Baibel lalonai, unai hereva be nega idauidau toi ai idia hedinarai, unai be guriguri ena kahana ta bona iseda guba Tamana, Iehova guriguri henia totona unai hereva idia gaukaralaia. Unai hereva ese dahaka mai anina bada gauna ia hahedinaraia?
Buka ta, The International Standard Bible Encyclopedia ia gwau: “Iesu ena nega ai, natudia ese edia tamadia idia gwauraia, ʼabbāʼ. Unai ese edia lalokau bona hemataurai karana ia hahedinaraia.” Unai be hereva namona bona natudia idia hereva matamaia neganai, unai be idia dibaia hereva ginigunana. Iesu ese ena Tamana ia hereva henia neganai, unai hereva ia gaukaralaia. Hegeregere, Getesemane umana ai, Iesu ia do mase lasi neganai, Iehova ia guriguri henia bona ia gwau, “Abba, Tamagu e.”—Mareko 14:36.
Unai referens ma ia gwau: “Grik bona Roma taudia edia negai, Iuda taudia edia buka lalonai, Dirava idia herevalaia neganai, “ʼAbbāʼ idia gaukaralaia momo lasi, badina idia laloa unai be hemataurai herevana lasi Dirava herevalaia totona. To, “Iesu . . . ese ena guriguri ai unai hereva ia gaukaralaia karana ese ena lalokau Dirava dekenai ia hahedinaraia.” Baibel siri rua ma haida ai inai hereva “Abba” be nega rua ia hedinarai—unai be aposetolo Paulo ese ia torea revarevadia ai—unai ese ia hahedinaraia Keristani ginigunadia be edia guriguri ai unai hereva idia gaukaralaia danu.—Roma 8:15; Galatia 4:6.
(Galatia 6:17) Vadaeni hari inai nega amo, namo lasi ta ese lau dekenai hekwakwanai ia henia, badina egu tauanina dekenai maka idia noho, unai ese idia hahedinaraia lau be Iesu ena igui hesiai tauna ta.
Inai Oi Diba, A?
Paulo ia gwau ena tauanina dekenai ‘maka idia noho, unai ese idia hahedinaraia ia be Iesu ena igui hesiai tauna ta,’ unai hereva ena anina be dahaka?—Galatia 6:17.
▪ Reana Paulo ena hereva idia kamonai taudia dekenai, unai hereva ena anina be idauidau. Hegeregere, idaunegai, auri siahuna idia gaukaralaia, tuari amo idia guia taudia, dubu ena kohu idia henaoa taudia, bona idia heau boio igui hesiai taudia edia kopina dekenai maka idia atoa totona. Taunimanima dekenai unai bamona maka idia atoa neganai, unai be hemarai gauna.
To, unai bamona maka haida be hemarai gauna lasi. Idaunegai, taunimanima momo ese unai bamona maka idia atoa, edia iduhu eiava tomadiho idia hahedinaraia totona. Hegeregere, buka ta ladana Theological Dictionary of the New Testament, ia gwau: “Suria taudia be edia imana eiava aiona dekenai maka idia atoa, unai amo edia dirava ladana, Hadad, bona, Atargatis, dekenai sibodia idia henia . . . Bona Dionysus idia tomadiho henia taudia dekenai tubutubu gauna ta ladana Ivy ena rau ena laulau idia atoa.”
Hari inai negai, Baibel ena hereva idia tahua taudia momo idia laloa, Paulo be nega idauidau ai ena misinari gaukara lalonai ia davaria dagedage karadia amo ia abia bero ia herevalaia. (2 Korinto 11:23-27) To, reana Paulo be maka korikorina ia herevalaia lasi, ena hereva ena anina be ena mauri dalana amo ia hahedinaraia ia be Keristani tauna ta.
Baibel Duahiduahi
JUNE 10-16
BAIBEL ENA HEREVA BADADIA | EFESO 1-3
“Iehova Ena Gaukara Haheaua Dalana”
(Efeso 1:8, 9) Dirava ese ita dekenai unai hebogahisi hereadaena ia henia badabada, aonega ibounai bona laloparara danu ia henia, 9 bona ia ese iena ura ena hunia hereva helagana be ita dekenai ia hahedinaraia. Unai hunia herevana be ena ura hegeregerena bona unai be ia lalohadailaia vadaeni gauna.
it-2-E 837 par. 4
Hunia Hereva Helagana
Mesia Basileiana. Paulo ena toretore lalonai, ia ese Keriso ena hunia hereva helagana ia hahedinaraia. Efeso 1:9-11 ai, ia ese Dirava ena ura ena “hunia hereva helagana” ia hahedinaraia karana ia herevalaia, bona ia gwau: “Unai hunia herevana be ena ura hegeregerena bona unai be ia lalohadailaia vadaeni gauna. “Unai hunia herevana ena anina be inai, ia ese ia abia hidi nega korikorina ai gaukara haheaua dalana ia haginia, unai amo Keriso lalonai gau ibounai ia haboua lou, unai be guba gaudia bona tanobada gaudia. Oibe, ia lalonai gau ibounai ia haboua, “bona ai be ia ida ai hakapua, bona Dirava ese ai ia abia hidi, ai dekenai ia gwauhamatalaia gauna ai abia totona. Ia ese ai ia abia hidi guna, unai be ia lalohadailaia dalana hegeregerena. Bona gau ibounai be ena ura hegeregerena ia karaia.” Inai “hunia hereva helagana” be gavamani ta, Dirava ena Mesia Basileiana. Paulo ia herevalaia “guba gaudia,” be gabeai Keriso ida guba Basileiana ai do idia lohia taudia. Bona “tanobada gaudia” be tanobada ai do idia noho taudia. Iesu be ena hahediba taudia dekenai hunia hereva helagana, bona Basileia ia herevalaia neganai, idia dekenai ia gwau: “Dirava ese umui ia durua iena Basileia ena hunia hereva helagana umui lalopararalaia totona.”—Mr 4:11.
(Efeso 1:10) Unai hunia herevana ena anina be inai, ia ese ia abia hidi nega korikorina ai gaukara haheaua dalana ia haginia, unai amo Keriso lalonai gau ibounai ia haboua lou, unai be guba gaudia bona tanobada gaudia. Oibe, ia lalonai gau ibounai ia haboua,
Iehova ese Iena Bese Ia Haboua
3 Mose ese Israela taudia ia hamaoroa: “Iehova be eda Dirava, Iehova mo sibona.” (Deu. 6:4, BHğ) Iehova ese gau ibounai be iena ura hegeregerena ia karaia. Iena abia hidi negana ai, guba taudia bona tanobada taudia ia hegaegaelaia bese tamona ai idia lao totona. Unai hegaegae karana ia gwauraia, “gaukara haheaua dalana.” (Efeso 1:8-10 duahia.) Dirava ena gaukara haheaua dalana ena kahana be rua. Ginigunana be inai: Dirava ese horoa taudia ia hegaegaelaia guba ai idia noho totona—unuseniai idia be Iesu Keriso henunai do idia gaukara. Pentekoste 33 C.E. ai unai ia matamaia. Unai negai, Iehova ese Keriso ida guba ai do idia lohia taudia ia horoa bona haboua matamaia. (Kara 2:1-4) Keriso ena mauri davalaia boubouna dainai, Dirava ese horoa taudia ia gwauraia kara maoromaoro taudia, bona mauri idia abia diba. Horoa taudia idia diba idia be “Dirava ena natudia” ai idia lao.—Roma 3:23, 24; 5:1; 8:15-17.
4 Dirava ena gaukara haheaua dalana ena kahana iharuana be inai: Dirava ese tanobada Paradaisona ai do idia noho taudia ia hegaegaelaia. Idia ese Mesia Basileiana, Keriso bona horoa taudia edia lohia dalana idia abia dae. Aramagedono amo do idia roho mauri “hutuma bada” taudia, be Paradaiso ai do idia noho taudia ginigunadia. (Apok. 7:9, 13-17; 21:1-5) Bena, Keriso ena Lagani 1,000 Lohia Negana lalonai, mase taudia bilioni momo do idia toreisi lou, bona tanobada ai hutuma bada taudia ida do idia noho. (Apok. 20:12, 13) Mani oi laloa, herevana taunimanima idauidau do idia toreisi lou, to lalotamona ai do ita noho! Hutuma bada bona toreisi lou taudia be Efeso 1:10 ese ia gwauraia “tanobada gaudia” idia laulaulaia. Idia be lagani 1,000 ena dokonai hahetoho do idia abia. Dirava idia badinaia taudia ibounai be “Dirava ena natudia” ai do idia lao, bona tanobada ai do idia noho.—Roma 8:21; Apok. 20:7, 8.
Hakaua Hereva Namodia Tahua
(Efeso 3:13) Unai dainai umui lau noia umui totona lau davaria hisihisi dainai umui hesiku lasi, badina lau davaria hisihisi ese umui dekenai hanamoa do ia henia.
Gau ta ese Oi Ia Koua Lasi Hairai Oi Abia Totona
15 Edena dala ai ma haida ita durua diba, Dirava ena hairai idia abia totona? Dala namona ta be, iseda haheauka karana amo. Paulo be Efeso kongrigeisen dekenai ia gwau: “Umui lau noia umui totona lau davaria hisihisi dainai umui hesiku lasi, badina lau davaria hisihisi ese umui dekenai hanamoa do ia henia.” (Efe. 3:13) Dahaka dainai Paulo ia gwau, ia davaria hisihisi ese Efeso taudia dekenai hanamoa do ia henia? Ena be Paulo be hekwakwanai idauidau ia davaria, to ena tadikaka ia hesiai henidia. Unai amo ia hahedinaraia Keristani tauna dekenai Dirava hesiai henia karana be mai anina bada. Bema Paulo ia lalomanoka, reana iena tadikaka do idia laloa edia hetura karana Iehova ida, edia haroro gaukara, bona edia helaro be anina lasi. Paulo ena haheauka dainai, tadikaka idia itaia, Keriso ena hahediba tauna ai idia lao be mai anina bada.
(Efeso 3:19) Bona Keriso ena lalokau do umui diba, unai lalokau ese diba ia hereaia, unai amo Dirava amo idia mai kara ibounai amo do umui honu.
“Keriso Ena Lalokau Do Umui Diba”
21 Greek herevana idia hahanaia “diba” ena anina be “gau ta oi karaia dalana amo, diba oi abia.” Iesu ese ia hahedinaraia lalokauna—sibona eda namo ita tahua lasi to ma haida ita durua, mai hebogahisi ida edia dabu gaudia ita henia, iseda kudouna amo idia ita gwauatao—unai ita karaia neganai, Iesu ena lalohadai ita lalopararalaia momokani diba. Unai dala amo ‘Keriso ena lalokau ita diba, unai lalokau ese diba ia hereaia.’ Bona namona be ita laloaboio lasi, Keriso bamona ai ita lao neganai, Iesu ese ia tohotohoa namo herea tauna, iseda lalokau Diravana, Iehova, kahirakahira do ita lao.
Baibel Duahiduahi
JUNE 17-23
BAIBEL ENA HEREVA BADADIA | EFESO 4-6
“Dirava ese Ia Henia Tuari Dabua Ibounai Do Umui Hahedokilaia”
(Efeso 6:11-13) Dirava ese ia henia tuari dabua ibounai do umui hahedokilaia, unai amo Diabolo ena koikoi karadia ibounai dekenai umui gini goada diba. 12 Badina ita be taunimanima ida ita heatu lasi, to gavamani, siahu taudia, bona inai tanobada diburana ena lohia taudia, bona guba ai idia noho lauma dikadia ida ita heatu noho. 13 Unai dainai Dirava ese ia henia tuari dabua ibounai do umui hahedokilaia, unai amo nega dikana ai do umui gini goada. Bona gau ibounai umui karaia guguru murinai, do umui gini goada.
Matamata Taudia E, Diabolo Ena Koikoi Karadia amo Umui Gini Goada
APOSETOLO PAULO ese iseda Keristani maurina be soldia ida ia hahegeregerea. Oibe, ita be lauma tuarina ai ita tuari, to tuari korikorina lasi. To, iseda inai taudia be idia mauri noho. Satani bona ena demoni be tuari daladia idia diba momo. Unai dainai matamanai do ita laloa, ita kwalimu diba lasi. Bona reana Keristani matamata taudia be hegeregere lasi idia kwalimu totona. To lauma dikadia amo idia kwalimu diba, a? Oibe, matamata taudia idia kwalimu diba, bona hari idia kwalimu noho! Dahaka dainai? Badina idia ese “Lohiabada amo . . . . siahu do [idia] abia noho.” To Dirava ena siahu sibona amo lasi to ma gau haida idia karaia danu. Idia be tuari dabuadia idia hahedokilaia. Bona idia treinini namonamo tuari taudia bamona, “Dirava ese ia henia tuari dabua ibounai . . . [idia] hahedokilaia.”—Efeso 6:10-12 duahia.
(Efeso 6:14, 15) Unai dainai do umui gini goada, bona emui gabana dekenai hereva momokani ena beleta do umui kwatua, bona emui kemena dekenai kara maoromaoro ena auri dabua do umui hahedokilaia. 15 Bona maino ena sivarai namona harorolaia totona do umui hegaegae, unai be tamaka bamona emui aena dekenai do umui atoa.
Matamata Taudia E, Diabolo Ena Koikoi Karadia amo Umui Gini Goada
4 Unai hegeregerena, Dirava ena Hereva amo ita dibaia hereva momokanidia ese hadibaia hereva koikoidia amo iseda abidadama ia gimaia. (Ioa. 8:31, 32; 1 Ioa. 4:1) Bona iseda ura hereva momokani dekenai ia bada neganai, do ia auka lasi iseda “kemena ena auri dabua” ita huaia totona, unai be, Dirava ena kara maoromaoro taravatudia ita badinaia karana. (Sal. 111:7, 8; 1 Ioa. 5:3) Danu, bema Dirava ena Hereva amo ita dibaia hereva momokanidia ita lalopararalaia namonamo, mai gari lasi ida do ita gini goada bona hereva momokani idia inai henia taudia amo hereva momokani ita gimaia diba.—1 Pet. 3:15.
7 Unai kemena ena auri dabua ena haheitalai ese laulau dalanai Iehova ena kara maoromaoro taravatudia be iseda kudouna ia gimaia karana ia herevalaia namonamo! (Aon. 4:23) Soldia ta be ena kemena ena auri dabua do ia haidaua lasi auri manokana amo idia karaia dabua totona, unai hegeregerena, Iehova ena taravatu maorodia be iseda laloa dalana hegeregerena ita haidaua diba lasi. Sibona ita karaia abia hidi ese ita do ia gimaia lasi. (Aon. 3:5, 6) Unai dainai, nega ibounai Iehova ese ia henia ‘auri dabuadia’ ita sekea loulou, unai amo iseda kudouna ia gimaia namonamo diba.
10 Roma soldia be tuari idia lao totona, tamaka idia karaia be namo. To laulau dalanai Keristani taudia ese idia karaia tamaka be idia ia durua maino sivaraina idia harorolaia totona. (Isa. 52:7; Roma 10:15) To, dala ia kehoa neganai mai gari lasi ida ita haroro be namo. Roberto, ena mauri lagani be 20, ia gwau: “Egu klas turadia haroro henidia totona lau gari. Reana lau hemarai dainai. Unai lau laloa lou neganai, lau hemarai be anina lasi. Hari lau moale egu turadia lau haroro henidia diba.”
(Efeso 6:16, 17) Bona noho daladia idauidau ai, abidadama ena kesi badana do umui abia, bona ia amo Dika Tauna ena peva ibounai mai ena lahi do umui habodoa diba. 17 Danu, hahemauri ena kwara gauna bona lauma helaga ena tuari kaia, Dirava ena hereva unai, do umui abia.
Matamata Taudia E, Diabolo Ena Koikoi Karadia amo Umui Gini Goada
13 Satani ese “peva ibounai mai ena lahi” ia negea, idia haida be Iehova dekenai ia gwauraia koikoi herevadia. Hegeregere, Ia be oi ia laloa bada lasi bona ta ese oi ia lalokau henia lasi. Aida, ena mauri lagani be 19, ia lalohekwarahi badina ia mamia ta ese ia ia laloa bada lasi. Ia gwau, “Nega momo lau mamia Iehova be lau kahirakahira ia noho lasi bona ia ura lasi egu Turana ai ia lao.” Edena dala ai unai hemami ia hanaia? Aida, ia gwau: “Hebou lao henia karana be egu abidadama ia hagoadaia dala badana ta. Hebou dekenai lau helai sibona bona haere lau henia lasi, badina lau laloa ta be do ia ura lasi egu haere ia kamonai. To, hari, hebou ibounai totona lau hegaegae bona lau hekwarahi nega rua o toi lau haere totona. Ia auka, to lau haere murinai lau moale. Danu tadikaka bona taihu be lau idia hagoadaia. Hebou amo lau giroa neganai lau diba Iehova be lau ia lalokau henia.”
16 Kwara gauna ese soldia ena harana ia gimaia hegeregerena, iseda “hahemauri helarona” ese eda lalohadai ia gimaia. (1 Tes. 5:8; Aon. 3:21) Abidadama ese ita ia durua Dirava ena gwauhamata ita laloa noho bona hekwakwanai idauidau ita laloa namonamo totona. (Sal. 27:1, 14; Kara 24:15) To bema ita ura iseda “kwara gauna” ese ita ia gimaia noho, namona be kwarana dekenai ita atoa, iseda imana dekenai ita dogoatao lasi.
20 Paulo ese Dirava ena Hereva, Iehova ese ita dekenai ia henia gauna, be kaia ta ida ia hahegeregerea. To ita gaukaralaia namonamo dalana ita dibaia be namo, unai amo iseda abidadama ita gimaia o iseda lalohadai ita hamaoromaoroa diba. (2 Kor. 10:4, 5; 2 Tim. 2:15) Edena dala ai Dirava ena hereva gaukaralaia daladia oi hanamoa diba? Sebastian, ena mauri lagani be 21, ia gwau: “Egu Baibel duahiduahi lalonai lau be karoa ta ta amo siri tamona lau torea diho. Lau ura henia siridia edia lista ta lau karaia. Unai dala amo, lau mamia Iehova ena lalohadai lau dibaia noho.” Matamanai ita herevalaia merona, Daniel, ia gwau: Egu Baibel duahiduahi lalonai, lau ese haroro gaukara ai lau davaria taudia do ia durua diba siridia lau abia hidi. Lau davaria taunimanima do idia kamonai namonamo bema idia itaia oi be Baibel oi laloa bada bona oi gaukara goada noho idia oi durua totona.
Hakaua Hereva Namodia Tahua
(Efeso 4:30) Danu, Dirava ena lauma helaga umui hahisia lasi. Dirava ese unai lauma helaga amo dina ta totona umui ia makaia, unai dina ai mauri davana amo umui do ia ruhaia.
it-1-E 1128 par. 3
Helaga
Lauma Helaga. Iehova ena gaukara siahuna, eiava ena lauma helaga, be ia sibona ese ia biagua bona hanaihanai ena ura ia hagugurua. Ia be goeva, helaga, bona Dirava ese gau namodia totona ia gaukaralaia. Unai dainai idia gwauraia “lauma helaga” bona “lauma helaga ena siahu.” (Sa 51:11; Lu 11:13; Ro 1:4; Ef 1:13) Tau ta dekenai ia gaukara lauma helaga ena siahu be helaga karadia eiava goeva karadia ia havaraia. Unai dainai bema ta be kara mirodia ia karaia noho, ia ese unai lauma ia dadaraia eiava ia “hahisia” noho. (Ef 4:30) Unai lauma helaga be Dirava ena helaga karadia ia hahedinaraia dainai, ia ita ‘hahisia’ diba. Kara dikadia badinaia karana ese “lauma helaga ena lahi [ia] habodoa” diba. (1Te 5:19) Bema ta be unai bamona kara dika ia badinaia noho, Dirava ena lauma helaga ia hahisia diba, bona unai ia karaia dainai Dirava be ena inai tauna ai do ia lao. (Is 63:10) Lauma helaga ia hahisia tauna be ena kara amo ia hahedinaraia ia be lauma helaga ia gwauraia dika, bona unai bamona kara dika be Iesu Keriso ese do ia gwauatao lasi, hari bona nega vaira ai.—Mt 12:31, 32; Mr 3:28-30; SPIRIT itaia.
(Efeso 5:5) Bona inai umui diba, oibe umui diba momokani, matabodaga tauna o kara mirodia ia karaia tauna o mataganigani tauna, anina be kaivakuku ia tomadiho henia tauna, be ahuna lasi Keriso bona Dirava edia basileia lalonai.
it-1-E 1006 par. 2
Mataganigani
Ta Ena Kara amo Ia Hedinarai Diba. Mataganigani karana be kara amo ia hedinarai, bona unai ese ta ena ura kererena bona dikana ia hahedinaraia. Baibel torea tauna Iamesi ese ita ia hadibaia ura kererena, ia rogorogo bamona neganai, kara dika do ia havaraia. (Ia 1:14, 15) Mataganigani tauna be ena kara amo unai do ia hahedinaraia. Aposetolo Paulo ia gwau, mataganigani tauna, ena anina be kaivakuku ia tomadiho henia tauna. (Ef 5:5) Mataganigani karana ia ura henia bada dainai, unai be iena dirava ai ia halaoa, bona Havaraia Tauna ia hesiai bona tomadiho henia lasi.—Ro 1:24, 25.
Baibel Duahiduahi
JUNE 24-30
BAIBEL ENA HEREVA BADADIA | FILIPI 1-4
“Namo Lasi Gau Ta Umui Lalohekwarahilaia”
(Filipi 4:6) Namo lasi gau ta umui lalohekwarahilaia, to gau ibounai lalonai do umui guriguri bona noinoi goadagoada, bona mai tanikiu ida Dirava dekenai emui noinoi herevadia do umui gwauraia hedinarai.
“Dirava Ena Maino, Laloparara Ibounai Ia Hereaia Gauna”
10 Dahaka ese ita ia durua diba, unai amo do ita lalohekwarahi lasi bona “Dirava ena maino” do ita mamia? Paulo ese Filipi tadikakadia dekenai ia gwauraia herevadia ese idia hahedinaraia, lalohekwarahi hamaragia dalana tamona be guriguri karana. Unai dainai ita lalohekwarahi neganai, namona be ita guriguri. (1 Petero 5:6, 7 duahia.) Iehova ita guriguri henia neganai, namona be ita abia dae momokani ia be ita ia laloa bada. Bona ita abia hahenamo ibounai dainai, ia ita “tanikiu” henia be namo. Laloaboio lasi, Iehova “ese ita noia eiava lalohadailaia gaudia sibona lasi, to unai gaudia idia hereaia gaudia ia henia diba.”—Efe. 3:20.
(Filipi 4:7) Bona Dirava ena maino, laloparara ibounai ia hereaia gauna, ese emui kudouna bona lalona do ia gimaia, Keriso Iesu amo.
“Dirava Ena Maino, Laloparara Ibounai Ia Hereaia Gauna”
7 Filipi tadikaka ese Paulo ena revareva idia duahia neganai, ia dekenai ia vara gauna bona Iehova ese Paulo ia durua dalana idia laloa. Unai revareva amo Paulo ia ura idia dekenai dahaka ia hadibaia? Idia ia hadibaia do idia lalohekwarahi lasi. To do idia guriguri bona Dirava ena maino do idia abia. Mani oi laloa, “Dirava ena maino” ese “laloparara ibounai ia hereaia.” To, unai ena anina be dahaka? Paulo ena hereva ena anina be “Dirava ena maino” ese gau ibounai ia hereaia momokani. Nega haida iseda hekwakwanai ita hamaoromaoroa daladia ita diba lasi, to Iehova be unai ia diba, bona ita laloa lasi gauna ia karaia diba.—2 Petero 2:9 duahia.
“Dirava Ena Maino, Laloparara Ibounai Ia Hereaia Gauna”
16 “Dirava ena maino, laloparara ibounai ia hereaia gauna” ita abia neganai, dahaka namo do ia vara? Baibel ia gwau, ‘iseda kudouna bona lalona do ia gimaia, Keriso Iesu amo.’ (Fili. 4:7) Inai hereva “gimaia” be nega momo ami taudia ese idia gaukaralaia. Ia be ami orea ta ese siti ta ia gimaia karana ia herevalaia. Unai bamona ami orea ta ese Filipi siti ia gimaia. Unai dainai hanuaboi ai, Filipi taudia be mai gari lasi ida idia mahuta, badina idia diba gadi taudia ese siti ena geiti idia gimaia. Unai hegeregerena, bema “Dirava ena maino” ita abia, do ita lalohekwarahi lasi. Ita diba Iehova be ita ia laloa bada bona ia ura ita moale. (1 Pet. 5:10) Unai ita diba dainai, lalohisihisi o lalomanoka gaudia ese ita do idia hametaua lasi.
Hakaua Hereva Namodia Tahua
(Filipi 2:17) Ena be lau sibona lau henia, idia bubua wain boubouna hegeregerena, to unai be taunimanima durua gaukarana, bona emui abidadama dainai unai bamona umui karaia, bona egu lalona ia namo bona umui ibounai ida lau moale hebou.
it-2-E 528 par. 5
Boubou Gaudia
Idia bubua wain boubouna. Israela taudia be Gwauhamata Tanona ai idia vareai neganai, wain boubouna be boubou gaudia ma haida ida idia henia. (Nu 15:2, 5, 8-10) Nega momo wain (“kekero muramura”) idia gaukaralaia bona pata helagana latanai idia bubua. (Nu 28:7, 14; Eso 30:9 hahegeregerea; Nu 15:10) Aposetolo Paulo be Filipi ai idia noho Keristani taudia ia tore henidia: “Ena be lau sibona lau henia, idia bubua wain boubouna hegeregerena, to unai be taunimanima durua gaukarana, bona emui abidadama dainai unai bamona umui karaia, bona egu lalona ia namo.” Paulo ese idia bubua wain boubouna ena laulau herevana ia gaukaralaia, Keristani taudia totona mai ura ida sibona ia henia karana ia hahedinaraia totona. (Fp 2:17) Paulo ena mase dinana ia kahirakahira lalonai, Timoteo ia tore henia: “Lau be idia bubua vadaeni wain boubouna hegeregerena, bona egu ruhaia negana be kahirakahira.”—2Ti 4:6.
(Filipi 3:11) Vadaeni do lau itaia bema lau hegeregere mase amo toreisi lou ginigunana do lau abia.
“Toreisi Lou Ginigunana,” Hari Ia Vara Noho!
5 Gabeai, “Dirava ena Israela” ena horoa taudia be guba dekenai Lohiabada Iesu Keriso do idia hedavari henia, bona ‘ia danu do idia noho hebou ela bona hanaihanai.’ (Galatia 6:16; 1 Tesalonika 4:17) Baibel ese unai ia gwauraia “toreisi lou ginigunana.” (Apokalupo 20:6) Unai toreisi lou ginigunana ia ore murinai, taunimanima milioni momo herea be do idia toreisi lou bona tanobada Paradaisona dekenai mauri hanaihanai do idia abia. Unai dainai, herevana iseda helaro be guba eiava tanobada ai, namona be “toreisi lou ginigunana” ita laloa. Ia be edena bamona toreisi louna? Edena negai do ia vara?
Baibel Duahiduahi