Iseda Haroro Bona Mauri Dalana Hebou Pepana Edia Referens
JULY 1-7
BAIBEL ENA HEREVA BADADIA | KOLOSE 1-4
“Mauri Gunana Oi Kokia, Bona Matamatana Oi Hahedokilaia”
(Kolose 3:5-9) Unai dainai emui tauanina ena kahadia idauidau umui hamasea, idia havaraia gaudia be inai, matabodaga karadia, kara mirodia, matabodaga urana, ura dikadia, bona mataganigani, unai be kaivakuku tomadiho henia karana. 6 Unai gaudia dainai Dirava ena badu be do ia mai. 7 Emui mauri dalana gunana ai umui danu be unai bamona gaudia umui karaia. 8 To hari namona be inai gaudia ibounai umui atoa siri, badu, badu dikadika, kara dikadia, hadikaia herevadia, bona emui uduna amo hereva mirodia umui gwauraia lasi. 9 Umui ta ta dekenai do umui koikoi lasi. Mauri gunana mai ena kara idauidau do umui kokia
Dirava Ena Lauma Abia, Tanobada Ena Dadaraia
12 Egu kara bona lalohadai be Dirava ena lauma o tanobada ena laloa dalana ese idia biagua? (Kolose 3:8-10, 13 duahia.) Tanobada ena laloa dalana ese ura dikadia ia havaraia. (Gal. 5:19-21) Hekwakwanai ita davaria neganai, iseda kara amo do ita diba ita be daika ese ia biagua. Hegeregere, reana iseda tadikaka o taihu ta ese ita ia hereva henia lasi, ena kara ese ita ia hahekwakwanaia o kerere ta ia karaia. Ma danu sibona eda ruma dekenai ita karaia gaudia amo do ita diba ita be Dirava ena lauma o tanobada ena laloa dalana ese ia biagua. Namona be sibona eda kara ita tahua namonamo: ‘Idia hanaia hua siks lalonai egu kara bona hereva amo Keriso lau tohotohoa, o egu kara gunadia lau badinaia noho?’
13 Dirava ena lauma ese ita ia durua diba ‘mauri gunana mai ena kara idauidau do ita kokia bona mauri matamata be dabua bamona do ita hahedokilaia.’ Unai ese ita do ia durua ma haida dekenai lalokau bona hebogahisi ita hahedinaraia totona. Danu, ena be badina maorona ta dainai ita badu, to namona be mai eda kudouna ibounai ida ma haida edia dika ita gwauatao. Bema ita laloa ta ese ita dekenai ia karaia karana be maoro lasi, namo lasi ia dekenai “hereva dika, laloa dika, bona samania koikoi hereva” ita gwauraia. To, ita hekwarahi ia dekenai kara namo bona hebogahisi ita hahedinaraia totona.—Efe. 4:31, 32, BH.
(Kolose 3:10-14) bona mauri matamata be dabua bamona do umui hahedokilaia, ia be diba maoromaoro amo ia vara bona ia matamata ia lao noho, ia havaraia Tauna ena toana hegeregerena. 11 Unai dainai Grik o Iuda tauna be lasi, eiava kopina utua o kopina utua lasi karana be lasi, danu idau tano tauna, Sitia tauna, igui hesiai tauna, eiava ura kwalimu tauna be lasi, to Keriso be gau ibounai bona ia be ibounai lalonai. 12 Umui be Dirava ena abia hidi taudia, helaga taudia bona Dirava ese umui ia lalokau henia dainai, inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka. 13 Bema ta be badina ta dainai ma ta dekenai ia maumau, ta ta emui kara do umui haheaukalaia noho bona mai kudouna ibounai ida do umui gwauatao heheni. Iehova ese mai kudouna ibounai ida umui ia gwauatao hegeregerena, namona be umui danu be unai bamona do umui karaia. 14 Bona unai gaudia sibona lasi, to lalokau be dabua bamona do umui hahedokilaia danu, badina ia be taunimanima ia hatamonaia gauna hereadaena.
Emu Kara Oi Haidaua Vadaeni, A?
18 Baibel ese iseda kara ia haidaua totona, hanaihanai Baibel ita duahia bona ena hereva ita dibaia sibona be hegeregere lasi. Taunimanima momo be Baibel idia duahia loulou bona iena hereva idia laloatao diba. Reana haroro gaukara ai unai bamona taudia haida oi davaria. Haida be edia lalona amo Baibel ena siri haida idia gwauraia diba. To, edia lalohadai bona mauri idia haidaua be auka. Dahaka dainai? Baibel ese ta ena kara ia haidaua totona, namona be Baibel ena hereva be ena kudouna lalonai ia atoa. Danu, namona be nega ita atoa Baibel amo ita dibaia gaudia ita laloa dobu totona. Namona be sibona ita nanadaia: ‘Lau abia dae inai be hereva momokani, a? Gau haida ese unai ia hamomokania, a? Lau dibaia gaudia be ma haida dekenai lau hadibaia sibona lasi, to egu mauri lalonai lau badinadia danu, a? Baibel lau duahia neganai, lau abia dae unai be hegeregere Iehova be lau ia hereva henia noho, a?’ Unai henanadai ita lalodia dobu neganai, ita do ia durua Iehova kahirakahira ita noho, bona eda lalokau ia dekenai do ia bada. Ita dibaia gaudia ese eda kudouna idia hamarerea neganai, unai ese ita do ia durua eda mauri lalonai gau haida ita haidaua, bona Dirava ita hamoalea diba.—Aon. 4:23; Luka 6:45.
19 Bema hanaihanai Baibel ita duahia bona laloa dobu, unai ese ita do ia durua Paulo ese ia gwauraia gauna do ita karaia noho, ia gwau: “Mauri gunana mai ena kara idauidau do umui kokia bona mauri matamata be dabua bamona do umui hahedokilaia, ia be diba maoromaoro amo ia vara bona ia matamata ia lao noho.” (Kol. 3:9, 10) Oibe, Dirava ena Hereva ita lalopararalaia bona badinaia neganai, hahenamo momo do ita davaria noho. Bona Keristani kara namodia ita hahedinaraia neganai, unai ese Satani ena hedibagani idauidau amo ita do ia gimaia.
Hakaua Hereva Namodia Tahua
(Kolose 1:13, 14) Ia ese dibura ena siahu amo ita ia ruhaia bona ena lalokau Natuna ena basileia lalonai ita ia abia vareai. 14 Iena Natuna ese ia henia mauri davana amo ita ia ruhaia, anina be iseda kara dika ia gwauatao.
it-2-E 169 par. 3-5
Dirava Ena Basileia
“Ena lalokau Natuna ena Basileia.” Iesu be guba dekenai ia lao bona dina ten murinai, Pentekoste 33 C.E. ai ena hahediba taudia dekenai lauma helaga ia bubua neganai, idia abia dae Iesu be “Dirava ese ia abia isi ena idibana kahanai” ia helai. (Ka 1:8, 9; 2:1-4, 29-33) Unai dainai idia amo “kontraka matamatana” ia hamatamaia, bona idia be “bese helagana” matamatana, lauma Israela ai, idia lao.—He 12:22-24; 1Pe 2:9, 10; Ga 6:16.
Keriso be ena Tamana ena idibana kahanai ia helai bona kongrigeisen ena Kwarana ai ia lao. (Ef 5:23; He 1:3; Fp 2:9-11) Baibel ese ia hahedinaraia Pentekoste 33 C.E. amo, Iesu ese ena hahediba taudia totona lauma basileia ta ia haginia. Aposetolo Paulo be Kolose dekenai Keristani taudia ginigunadia ia tore henidia neganai, ia gwau Iesu Keriso be mai ena basileia vadaeni: “[Dirava] ese dibura ena siahu amo ita ia ruhaia bona ena lalokau Natuna ena basileia lalonai ita ia abia vareai.”—Kl 1:13; Ka 17:6, 7 hahegeregerea.
Pentekoste 33 C.E. amo Keriso ena basileia be Dirava ena lauma ena heduru amo horoa Keristani taudia ia lohiaia, idia be Dirava ena lauma natudia ai idia lao, bona idia gwauraia lauma Israela. (Ioa 3:3, 5, 6) Dirava ena lauma ese ia horoa Keristani taudia be guba ahuna idia abia neganai, idia be Keriso ena basileia henunai do idia noho lasi, to guba ai Keriso ida king ai do idia lao.—Apo 5:9, 10.
(Kolose 2:8) Umui naria namonamo, dika tau ta ese inai tanobada ena aonega bona anina lasi hereva koikoidia amo umui ia tarapua. Unai gaudia be taunimanima edia sene herevadia amo, bona idia be inai tanobada ena lalohadai badadia hegeregerena, to Keriso ena hadibaia herevadia hegeregerena lasi.
Galatia, Efeso, Filipi, Bona Kolose Bukadia Edia Hereva Badadia
2:8—Paulo ia gwau dahaka gaudia do ita dadaraia? Ita ia sisiba henia Satani ena tanobada gaudia ibounai—tanobada taudia ese idia abia dae lalohadai bona ura idauidau—ita dadaraia totona. (1 Ioa. 2:16) Unai gaudia haida be taunimanima ese idia abia dae lalohadai idauidau, kohu momo ura henia karana, bona tomadiho koikoi.
Baibel Duahiduahi
JULY 8-14
BAIBEL ENA HEREVA BADADIA | 1 TESALONIKA 1-5
“Do Umui Durua Heheni Bona Hagoadaia Heheni Noho”
(1 Tesalonika 5:11-13) Unai dainai do umui durua heheni bona hagoadaia heheni noho, hari umui karaia noho bamona. 12 Tadikaka e, umui ai noia umui huanai idia gaukara goada bona Lohiabada ena gaukara lalonai umui idia naria bona umui idia sisiba henia noho taudia, do umui matauraia. 13 Bona edia gaukara dainai, idia do umui lalokau henia bona do umui lalodia bada. Bona ta ta ida maino ai do umui noho hebou.
‘Umui Huanai Idia Gaukara Goada Taudia Do Umui Matauraia’
12 Kongrigeisen “idia naria” ena anina be, hadibaia gaukara sibona idia karaia lasi. Unai hereva tamona be 1 Timoteo 3:4 dekenai idia gaukaralaia danu. Paulo ia gwau, elda tauna be “dala maorona ai iena ruma bese ia naria, bona iena natudia be mai laloa namonamo ida iena henunai idia noho.” Inai siri ai idia gaukaralaia herevana “naria” ese ia hahedinaraia, elda tauna be ena natudia ia hadibadia sibona lasi, to ena ruma bese ia gunalaia bona ena ‘natudia be iena henunai idia noho.’ Oibe, elda taudia be kongrigeisen idia gunalaia, bona tadikaka taihu idia durudia Iehova ena henunai idia noho totona.—1 Tim. 3:5.
‘Umui Huanai Idia Gaukara Goada Taudia Do Umui Matauraia’
19 Bema harihari gauna ta oi abia, dahaka do oi karaia? Emu laloa bada karana oi hahedinaraia totona, unai do oi gaukaralaia, a? Iehova ese oi totona Keriso ena amo “taunimanima be harihari gaudia bamona” ia henia. Unai harihari gaudia oi laloa bada dalana ta be, elda taudia ese idia henia tok oi kamonai namonamo bona idia gwauraia point namodia oi badinaia toho. Danu, hebou gabudiai haere oi henia, unai amo oi hahedinaraia idia oi laloa bada. Elda taudia ese idia gunalaia gaukarana, haroro gaukara unai, oi durua. Bema elda ta ena sisiba amo namo oi abia, ia dekenai unai oi herevalaia be namo, ani? Bona danu, namona be oi hahedinaraia elda taudia edia ruma bese oi laloa bada, ani? Laloatao, elda tauna be kongrigeisen totona ia gaukara goada dainai, ena ruma bese ida do ia noho hebou negana ia hamaragia.
(1 Tesalonika 5:14) To tadikaka e, umui ai hagoadaia gwau-edeede taudia do umui sisiba henia, lalometau taudia do umui hagoadaia, manoka taudia do umui durua bona taunimanima ibounai dekenai do umui haheauka.
“Lalokau be . . . mai Momokani ida Iseda Kara amo Ita Hahedinaraia”
13 Manoka taudia durua. Baibel ese ita ia hagania, ‘manoka taudia do ita durua bona taunimanima ibounai dekenai do ita haheauka.’ Unai hahegani ese iseda lalokau karana ia tohoa diba. (1 Tes. 5:14) Ena be idia manoka taudia momo be gabeai idia goada, to ma haida be mai haheauka ida ita durua noho be namo. Idia ida hahegoada Baibel siridia ita kikilaia diba, ita boiridia ita ida idia haroro totona, eiava nega ita atoa edia lalohekwarahi ita kamonai totona. Ma danu, namo lasi ita laloa tadikaka o taihu ta be ia “goada” o ia “manoka,” to namona be ita laloatao ita ibounai be mai iseda namo bona manoka gaudia. Aposetolo Paulo danu be sibona ena manoka gaudia ia gwauraia. (2 Kor. 12:9, 10) Oibe, ita ibounai be iseda Keristani tadikaka taihu amo heduru ita abia diba.
Iesu Ena Manau Bona Hebogahisi Karana Tohotohoa
16 Iseda hebogahisi herevadia. Hebogahisi mai lalokauna ese ita ia doria, “lalometau taudia do [ita] hagoadaia.” (1 Tes. 5:14) Dahaka hagoadaia hereva ita gwauraia diba? Idia hagoadaia totona, ita hamaoroa diba idia ita laloa bada. Idia ita hanamodia bona ita durudia unai amo idia diba idia be mai edia kara namo bona gau momo idia karaia diba. Idia ita hadibaia Iehova ese idia ia veria mai iena Natuna dekenai, unai dainai Iehova ena matanai idia be mai anina bada. (Ioa. 6:44) Idia ita hadibaia Iehova be “lalohisihisi taudia” o “edia lalona ia ore taudia” ia laloa bada. (Sal. 34:18) Iseda hebogahisi herevadia ese lalometau taudia idia hagoadaia diba.—Aon. 16:24.
Hakaua Hereva Namodia Tahua
(1 Tesalonika 4:3-6) “Badina Dirava ena ura be inai, namona be umui helaga, bona matabodaga karadia umui dadaraia. 4 Bona umui ta ta ese helaga bona hemataurai dalanai, sibona emui tauanina biagua dalana umui diba be namo, 5 to mai mataganigani ida matabodaga karadia umui ura henia lasi, Dirava idia diba lasi besedia idia karaia bamona. 6 Bona unai bamona karadia dekenai, namo lasi umui ta ese ena tadikaka ia hahisia eiava ena maoro ia kokia, badina unai kara dika ibounai dainai Iehova ese hahemaoro do ia karaia. Guna umui dekenai unai gaudia ai hadibaia bona ai gwauraia hedinarai goevagoeva.”
it-1-E 863-864
Matabodaga Karadia
Matabodaga karana be kara dikana, bona unai ia karaia tauna be Kongrigeisen amo idia atoa siri (disfellowship) diba. (1Ko 5:9-13; Heb 12:15, 16) Aposetolo Paulo ese ia hahedinaraia, matabodaga karana ia karaia noho Keristani tauna be sibona ena tauanina dekenai ia kara dika, badina ena tauanina ia gaukaralaia kara dikadia ia karaia totona. Unai tauna be ena hetura karana Dirava ida ia hadikaia, Dirava ena kongrigeisen ia hamiroa, bona sibona dekenai dala ia kehoa daihanai gorere dikadia ia abia totona. (1Ko 6:18, 19) Unai tauna ese Keristani tadikaka taihu edia maoro ia hadikaia (1Te 4:3-7) hegeregere, (1) kongrigeisen lalonai kara mirodia bona hemarai karadia ia abia vareai noho (Heb 12:15, 16), (2) Dirava vairanai ia miro bona bema ia singul neganai unai kara ia karaia bena ia headava, ia adavaia tau o hahine ena maoro ia hadikaia, (3) ena famili edia ladana namona ia hadikaia, bona (4) unai matabodaga tauna ese ena tama sina, adavana, eiava ia maoheni mero o kekeni dekenai ia kara dika. Unai tauna be taunimanima edia taravatu matabodaga karana dekenai ia dadaraia lasi, to Dirava, ia do ia panisia tauna, ia dadaraia.—1Te 4:8.
(1 Tesalonika 4:15-17) Iehova ena hereva hegeregerena umui ai hamaoroa, Lohiabada ena noho negana ai, ita huanai idia mauri noho taudia ese mase lalonai idia mahuta vadaeni taudia, do idia gunalaia lasi. 16 Badina Lohiabada be mai boiboi bada ida guba amo do ia diho, aneru badana ena gadona ida, bona Dirava ena kibi regena ida. Vadaeni Keriso ida idia hakapua taudia, idia mase vadaeni taudia unai, be do idia toreisi guna. 17 Unai murinai, ita do mauri noho taudia be idia ida ori lalonai do ita daekau lao ataiai bona Lohiabada ida do ita hedavari, vadaeni ia ida do ita noho ela bona hanaihanai.
“Emui Hahemauri be Kahirakahira”!
14 Magoga tauna Goga ese Dirava ena taunimanima ia tuari henia neganai, dahaka do ia vara? Mataio bona Mareko ese unai sivarai idia torea: “[Taunimanima ena natuna] ese aneru do ia siaia, bona idia ese not, saut, ist, bona west amo Dirava ena abia hidi taudia do idia haboua, tanobada ena kahana ta amo ela bona guba ena kahana ta dekenai.” (Mar. 13:27; Mat. 24:31) Unai be horoa taudia haboua karana ia herevalaia lasi; eiava horoa taudia ese edia maka ginigabena idia abia karana ia herevalaia lasi. (Mat. 13:37, 38) Hisihisi badana ia do matamaia lasi neganai, horoa taudia ese edia maka ginigabena idia abia. (Apok. 7:1-4) Vadaeni, Iesu be dahaka haboua gaukarana ia herevalaia? Unai ena anina be tanobada ai idia do noho horoa taudia ese edia guba ahuna do idia abia. (1 Tes. 4:15-17; Apok. 14:1) Magoga tauna Goga ese Dirava ena taunimanima idia hahisia lalonai unai do ia vara. (Ese. 38:11) Iesu ena hereva do ia guguru: “Unai nega ai, kara maoromaoro taudia be edia Tamana ena Basileia lalonai dina bamona do idia diaridiari.”—Mat. 13:43.
15 Kerisendom oreadia idia laloa Keristani taudia be tanobada tauanina ai guba dekenai do idia daekau. Danu idia gwau Iesu be tanobada lohiaia totona ia mai neganai, ia do idia itaia. To Baibel ia gwau, “Taunimanima ena Natuna ena toa be guba ai do ia hedinarai” bona Iesu be “guba ena ori latanai do ia mai.” Anina be taunimanima ena Natuna ia mai neganai ta ese do ia itaia lasi. (Mat. 24:30) Danu Baibel ia gwau: “Hidio bona rara ese Dirava ena Basileia do idia abia diba lasi.” Unai dainai guba dekenai do idia daekau taudia be “do idia idau, kibi dokona idia hiriria neganai, unai do ia vara haraga, ia be matana hakapua bona kehoa haraga bamona.” (1 Korinto 15:50-53 duahia.) Tanobada ai idia noho abidadama horoa taudia be do idia haboua haraga.
Baibel Duahiduahi
JULY 15-21
BAIBEL ENA HEREVA BADADIA | 2 TESALONIKA 1-3
“Taravatu Utua Tauna Ia Hedinarai”
(2 Tesalonika 2:6-8) Vadaeni taravatu utua tauna ia koua gauna be hari umui diba, ia be ena nega korikorina ai do ia hedinarai. 7 Momokani, unai taravatu utua karana be hunia gauna, ia be ia gaukara matamaia vadaeni. To unai bamona do ia gaukara hehuni noho ela bona ena dala ia koua tauna ia lao. 8 Unai neganai unai tau dika rohorohona be do ia hedinarai. Bona Lohiabada Iesu ese ena uduna amo ia mai siahuna amo unai tauna do ia haorea bona iena noho ia hedinarai negana ai, unai tauna do ia hadikaia ore.
it-1-E 972-973
Dirava Badinaia Karana
Iehova ena “hunia hereva helagana” ia inai henia hunia karana ta be, “taravatu utua karana.” Keristani momokani taudia idia daradara badina aposetolo Paulo ena negai unai “taravatu utua tauna” be ia do hedinarai lasi. Ena be gabeai unai “tauna” do ia hedinarai, to taunimanima momo be unai tauna do idia diba lasi, badina hunia dalanai kara dikadia do ia karaia bona do ia koikoi dirava badinaia karadia ia hahedinaraia. Unai be aposteit karana. Paulo ia gwau, ena negai unai “taravatu utua karana” be Keristani kongrigeisen lalonai ia gaukara matamaia, badina haida idia hakaua kerere taravatu idia utua totona, bena aposteit karana ia matamaia. To Iesu Keriso ia giroa mai neganai, ia ese unai kara ibounai do ia haorea. Inai aposteit, Satani ese ia gaukaralaia “tauna” be taunimanima ese idia gwauraia “dirava bamona” eiava “taunimanima ese idia tomadiho henia gaudia amo” sibona do ia abia isi (Gr., seʹba·sma). Satani ese unai aposteit karadia ia gaukaralaia taunimanima momo ia koia totona, bona ena dala idia badinaia taudia be dika bada do idia davaria. “Taravatu utua tauna” ena kara dikadia be do idia hunia, badina mai koikoi ida dirava badinaia karana do ia hahedinaraia.—2Te 2:3-12; Mt 7:15, 21-23 hahegeregerea.
(2 Tesalonika 2:9-12) To Satani ena gaukara dalana hegeregerena unai tau dika rohorohona ia noho, ia ese siahu karadia, hoa bona toa kara koikoidia, 10 bona kara maoromaoro lasi daladia ibounai ia gaukaralaia, do idia mase ore taudia ia koia totona. Unai be edia panisi, badina hahemauri abia totona, hereva momokani dekenai edia lalokau idia hahedinaraia lasi. 11 Unai dainai Dirava ese dala ia koua lasi unai lalohadai kererena be idia dekenai ia lao totona, unai amo hereva koikoina idia abia dae. 12 Vadaeni idia ibounai ese hahemaoro do idia abia, badina hereva momokani idia abia dae lasi, to maoro lasi karadia idia moalelaia.
it-2-E 245 par. 7
Koikoi Karana
Bema ta be koikoi hereva ia ura abia dae, Iehova Dirava ese “dala ia koua lasi unai lalohadai kererena” be unai tauna dekenai ia lao totona, “unai amo hereva koikoina idia abia dae,” to Iesu Keriso ena sivarai namona idia kamonai lasi. (2Te 2:9-12) Unai hakaua herevana be lagani handred gunanai King Ahaba dekenai ia vara gauna ia hahedinaraia. Peroveta koikoi taudia ese Ahaba idia hamaoroa Ramoto Gileada taudia ia tuari henia neganai do ia kwalimu, to Iehova ena peroveta tauna Mikaia be ia gwau, dika bada do ia davaria. Mikaia ia itaia matahanai ai, Iehova ese aneru ta ia gaukaralaia “koikoi laumana” ta bamona ia lao bona Ahaba ena peroveta taudia ia koia. Anina be, unai aneru ese ena siahu ia gaukaralaia unai peroveta taudia ese hereva momokani do idia gwauraia lasi, to sibona edia ura herevadia bona Ahaba ia ura kamonai hereva do idia gwauraia. To, Ahaba ia ura edia koikoi herevadia ia kamonai dainai, dokonai ena mauri ia haboioa.—1Ki 22:1-38; 2Si 18.
Hakaua Hereva Namodia Tahua
(2 Tesalonika 1:7, 8) To Lohiabada Iesu bona ena siahu bada anerudia be lahi hururuhururu ida guba amo idia hedinarai neganai, umui hisihisi noho taudia be ai ida Dirava ese laga-ani do ia henia. 8 Unai nega ai, Dirava idia diba lasi taudia dekenai, bona iseda Lohiabada Iesu ena sivarai namona idia kamonai henia lasi taudia dekenai, dika davana do ia henia.
it-1-E 834 par. 5
Lahi
Petero ia gwau, “hari idia noho guba bona tanobada be lahi ese ia araia totona idia naria noho.” Inai karoa ena siri bona siri ma haida amo, ia hahedinaraia unai be lahi korikorina ia herevalaia lasi, to unai be hadikaia ore karana ia laulaulaia. Noa ena negai ia vara abata ese guba bona tanobada korikori ia hadikaia lasi, to Dirava idia badinaia lasi taudia sibona ia hadikaia, unai dainai Iesu bona ena siahu bada anerudia be lahi hururuhururu ida idia mai neganai, Dirava idia badinaia lasi taudia bona inai nega oromana ai idia noho gau dikadia danu do idia hadikaia ore.—2Pe 3:5-7, 10-13; 2Te 1:6-10; Is 66:15 hahegeregerea, 16, 22, 24.
(2 Tesalonika 2:2) emui laloa namonamo karana umui haboioa haraga lasi. Bona namo lasi peroveta herevana ta, o umui dekenai idia gwauraia herevana ta, o toana be ai ese ai siaia revareva ta dainai umui lalohekwarahi, bena umui laloa Iehova ena dina ia ginidae vadaeni.
it-1-E 1206 par. 4
Peroveta Hereva
“Peroveta Herevadia”—Momokani Bona Koikoi. Aposetolo taudia edia revareva ai, inai Grik herevana pneuʹma (lauma) idia gaukaralaia. Hegeregere, 2 Tesalonika 2:2 ai, aposetolo Paulo ese Tesalonika tadikaka bona taihu ia hadibaia, ia gwau: “Emui laloa namonamo karana umui haboioa haraga lasi. Bona namo lasi peroveta herevana ta [eiava, lauma], o umui dekenai idia gwauraia herevana ta, o toana be ai ese ai siaia revareva ta dainai umui lalohekwarahi, bena umui laloa Iehova ena dina ia ginidae vadaeni.” Paulo be inai hereva pneuʹma (lauma) ia gaukaralaia neganai, ia be “idia gwauraia herevana ta” o “revareva” amo ma haida hereva henia karana ia herevalaia. Unai dainai buka ta, Lange’s Commentary on the Holy Scriptures (rau 126) ese inai siri ia herevalaia neganai, ia gwau: “Aposetolo tauna be peroveta hereva, vaira nega ai do idia vara koikoi herevadia, bona peroveta tauna ta ena hereva, ia herevalaia.” (Translated and edited by P. Schaff, 1976) Buka ta ladana, Vincent’s Word Studies in the New Testament, ia gwau: “Lauma amo. Keristani taudia edia hebou ai ta ta idia gwau, edia peroveta hereva be Dirava amo ia mai.” (1957, Vol. IV, p. 63) To, inai hereva pneuʹma be Baibel haida ai idia hahanaia “lauma,” bona ma haida ai “Lauma ena sivarai” (The Bible—An American Translation), “vaira nega idia perovetalaia” (The Jerusalem Bible), “Dirava amo ia mai hereva” (D’Ostervald; Segond [French]), bona “peroveta herevadia” (NW) idia gaukaralaia.
Baibel Duahiduahi
JULY 22-28
BAIBEL ENA HEREVA BADADIA | 1 TIMOTEO 1-3
“Oi Gaukara Goada Maduna Namona Oi Abia Totona”
(1 Timoteo 3:1) Inai hereva be momokani: Bema ta ia ura naria tauna ena maduna ia abia, ia be gaukara namona ia ura henia unai.
Emu Hesiai Gaukara Do Oi Habadaia, A?
3 Timoteo Ginigunana 3:1 duahia. Inai Grik herevana idia hahanaia “ura” ena anina be oi gaukara goada gau ta oi abia totona. Aposetolo Paulo be unai hereva ia gaukaralaia neganai, ia ura hahedinaraia bema ita ura iseda hesiai gaukara ita habadaia, ita gaukara goada be namo. Mani oi laloa, tadikaka ta be kongrigeisen ai ia karaia diba gaukara haida ia laloa noho. Reana hari ia be hesiai tauna lasi, to ia diba Keristani kara namodia ia hahedinaraia be namo. Matamanai, do ia gaukara goada hesiai tauna ai ia lao totona. Gabeai, reana elda maduna ia abia diba. Kongrigeisen ai unai maduna ta ta ia huaia totona, ia gaukara goada be namo.
(1 Timoteo 3:13) Badina dala maorona ai edia hesiai gaukara idia karaia tatau be ladana namona idia abia noho, vadaeni mai gari lasi ida edia abidadama Keriso Iesu dekenai idia herevalaia.
km-E 9/78 4 par. 7
“Ladana Namona Idia Abia Noho” Taudia
7 Unai dainai Paulo ia gwau, unai bamona taudia be “ladana namona idia abia noho.” To unai be dubu lalonai dagi bada abia karana ia herevalaia lasi. To “dala maorona ai edia hesiai gaukara idia karaia” hesiai taudia be Iehova bona Iesu ese idia henia hahenamo ta, bona kongrigeisen taudia ibounai ese idia durua bona matauraia. Danu, “mai gari lasi ida edia abidadama Keriso Iesu dekenai idia herevalaia.” Mai momokani ida edia maduna idia huaia neganai, ma haida ese edia hesiai gaukara namona idia laloa bada; edia abidadama ia goada bona mai gari lasi ida edia abidadama idia gwauraia hedinarai diba.
Hakaua Hereva Namodia Tahua
(1 Timoteo 1:4) bona sivarai koikoidia do idia kamonai lasi bona sene taudia edia ladadia edia lista do idia tahua lasi. Unai gaudia ese idia do ia durua lasi, to henanadai sibona idia havaraia bona Dirava ena amo gau ta ia henia lasi abidadama hagoadaia totona.
it-1-E 914-915
Bese Ena Lista
Bese ena lista stadilaia bona herevalaia karana be anina lasi, bona Paulo ese Timoteo ia tore henia neganai, unai ia hahedinaraia. Unai neganai, ta ese ena bese ena lista ia tahua bona torea be anina lasi, badina Keristani kongrigeisen lalonai Dirava be Iuda bona Idau Bese taudia edia idau ia laloa lasi. (Ga 3:28) Danu, bese ena lista ese idia hahedinaraia vadaeni Keriso be Davida ena bese amo ia vara. Danu, Paulo ia gwau, daudau lasi murinai Ierusalema bona Iuda taudia edia rekodi ibounai be do idia hadikaia. Dirava ese unai gaudia ia gimaia lasi. Unai dainai, Paulo ia laloa momo gauna be ia ura lasi Timoteo bona kongrigeisen taudia be sibona edia bese dibaia totona tahua gaukara ai edia nega idia haorea kava, badina unai ese Keristani taudia edia abidadama do ia durua lasi. Baibel ai ia noho bese ena lista ese ia hamomokania Keriso be Mesia, bona Keristani taudia dekenai unai bese ena lista dibaia karana be mai anina bada. Baibel ai idia noho bese edia lista ma haida ese Keriso ena bese ena lista idia hamomokania, unai amo ia hahedinaraia goevagoeva unai sivarai be idaunegai ia vara momokani.
(1 Timoteo 1:17) Vadaeni noho hanaihanai King, ia be ia mase diba lasi, ita itaia diba lasi, ia sibona be Dirava, ia dekenai hemataurai bona hairai ia noho ela bona hanaihanai. Amen.
cl 12 par. 15
“Momokani, Inai be Iseda Dirava”
15 Iehova sibona ese ia abia dagi ladana ma ta be, “Noho Hanaihanai King.” (1 Timoteo 1:17) Unai ena anina be dahaka? Iseda lalona be ia hegeregere lasi unai ita lalo-pararalaia totona, to Iehova be idaunegai momokani amo ia noho daudau vadaeni bona vaira negai danu do ia noho hanaihanai. Salamo 90:2 ia gwau: “Oi be nega ibounai, hanaihanai, Dirava oi noho, idaunegai bona gabeai danu.” Unai dainai Iehova be mai ena matamana lasi; ia be hanaihanai ia noho Diravana. Ia be dagi ladana ma ta ia abia danu, “Idaunegai Tauna”—tanobada eiava guba dekenai tau ta eiava gau ta ia do vara lasi neganai, ia be idaunegai momokani ia noho vadaeni! (Daniela 7:9, 13, 22, NW) Dirava be Siahu Ibounai Lohiabadana ena dagi ia abia, be daika ese ia henanadailaia diba?
Baibel Duahiduahi
JULY 29–AUGUST 4
BAIBEL ENA HEREVA BADADIA | 1 TIMOTEO 4–6
“Dirava Badinaia Karana ese Kohu Momo Tahua Karana Ia Hereaia”
(1 Timoteo 6:6-8) Oibe, Dirava badinaia karana lalonai gau momo do ita abia, bema ita abia dae ita dekenai idia noho gaudia be hegeregere. 7 Badina ita be tanobada dekenai gau ta ita abia mai lasi, bona gau ta danu do ita abia lao lasi. 8 Unai dainai, bema ita be mai iseda aniani, dabua bona noho gabuna, unai be hegeregere.
Tauanina Dalanai Ita Hegeregere Karana Dibaia Dalana
Paulo be tauanina dalanai ia hegeregere dainai moale bona namo bada ia davaria. Tauanina dalanai ita hegeregere karana ena anina be dahaka? Ita gwau diba, ena anina be ita dekenai idia noho gaudia be idia hegeregere. Unai kara dainai, Paulo ese hesiai gaukara lalonai ia bamoa tauna Timoteo ia hamaoroa, ia gwau: “To momokani, Dirava ia badinaia tauna ese kohu momokani do ia davaria. Oibe, ia davaria, badina . . . iena lalona be namo. Badina be gau ta tanobada dekenai ita abia mai lasi, bona gau ta danu do ita abia lao lasi. Unai dainai bema ita be mai iseda aniani bona dabua neganai, moni dekenai ita laloa momo lasi be namo.”—1 Timoteo 6:6-8.
Mani oi itaia, Paulo ese lalona ia namo karana be Dirava badinaia karana ida ia gwauraia hebou. Ia diba moale korikori be Dirava badinaia karana amo—anina be Dirava hesiai henia gaukarana ita atoa guna—bona kohu eiava taga amo ia mai lasi. Ia dekenai idia noho “aniani bona dabua” ese ia idia durua Dirava ia badinaia noho diba totona. Paulo be Iehova dekenai ia tabekau dainai tauanina dalanai ia hegeregere, herevana ena noho dalana be edena bamona.
(1 Timoteo 6:9) To idia ura idia taga taudia be hedibagani do idia davaria, tarapu lalonai do idia moru, ura dikadia do idia abia bona kavakava karadia do idia karaia, unai dala ai do idia ore momokani.
g-E 6/07 6 par. 2
Taga Ura Henia Karana Ena Dika
Vaia taunimanima momo be taga tahua karana dainai idia mase lasi. To taga maurina tahua karana dainai, edia mauri lalonai gau momo idia reaia diba. Danu, moni o moni gaukara ena lalohekwarahi dainai, mauri lalonai hekwakwanai idauidau do idia davaria, hegeregere do idia mahuta namonamo lasi, kwarana do ia hisihisi bada, eiava tauanina lalonai toto (ulcer) do ia vara, bona unai ese ta ena mauri ia hakwadogia diba. Bona herevana ta be unai ia lalopararalaia murinai senisi haida ia ura karaia, to reana ia vara dika ia hanamoa diba lasi. Hegeregere, reana ena adavana ese do ia abidadama henia lasi, ena natudia be gau momo dainai do idia lalohekwarahi, bona ena helt do ia dika. Reana hekwakwanai haida do ia hanamoa diba, to do ia hekwarahi bada ma haida ia hanamoa totona. Unai bamona taudia be “hisihisi momo amo idia sibodia idia gwadaia.”—1 Timoteo 6:10.
(1 Timoteo 6:10) Moni ura henia bada karana be dika idauidau ibounai edia ramuna, bona unai idia ura henia bada dainai, haida ese abidadama idia rakatania bona hisihisi momo amo idia sibodia idia gwadaia.
g-E 11/08 6 par. 4-6
Mauri Lalonai Oi Kwalimu Diba Daladia Siks
Inai atikol ena kahana ginigunana ai ita itaia bamona, taunimanima momo idia laloa moni momo idia abia neganai, unai ese idia do ia durua mauri lalonai idia kwalimu totona, to unai be momokani lasi. Idia lalohisihisi sibona lasi, to hisihisi momo idia davaria. Hegeregere, kohu o moni idia tahua goadagoada dainai, edia hetura karana ruma bese bona turadia ida idia laloa bada lasi. Haida be gaukara momo eiava gau momo idia lalohekwarahilaia dainai, idia mahuta namonamo lasi. Hadibaia Tauna 5:12 ia gwau: “Gaukara tauna ena bogana do ia kunu, o do ia hitolo, to iena mahuta be do ia namo. To kohu momo tauna ena gau momo dainai ia laloa hekwarahi, bona ia mahuta namonamo lasi.”
Bema moni ese ita ia biagua, hekwakwanai momo do ita davaria bona ita ia koia diba. Iesu Keriso ese “taga ena koikoi siahuna” ia herevalaia. (Mareko 4:19) Ita gwau diba, taunimanima idia laloa taga ese moale ia havaraia, to unai be koikoi. Badinai unai ese moni ura henia karana sibona ia habadaia. Hadibaia Tauna 5:10 ia gwau: “Moni ia ura henia noho tauna ese moni do ia abia, to unai moni ena bada be hegeregere lasi ia dekenai.”
Ita gwau diba, moni ia ura henia tauna ese sibona ia hadikaia diba. Hegeregere, do ia lalohisihisi, badu, eiava taravatu utua karadia do ia karaia. (Aonega Herevadia 28:20) To moale ia havaraia karadia be inai, henia karana, dika gwauatao karana, goeva karadia, lalokau, bona Dirava tura henia karana.
Hakaua Hereva Namodia Tahua
(1 Timoteo 4:2) badina koikoi taudia ese hereva koikoidia idia gwauraia, idia edia lalomamina be auri siahuna amo idia gabua bamona.
Emu Lalomamina Ia Goeva Noho Dalana
17 Aposetolo Petero ia gwau: “Namona be lalomamina namona umui dogoatao noho.” (1 Petero 3:16, NW) Iehova Dirava vairanai lalomamina goevana be hahenamo hereadaena. Ia be hari inai negai idia noho taudia momo edia lalomamina bamona lasi. Paulo ia gwau “idia edia lalomamina be auri siahuna amo idia gabua bamona.” (1 Timoteo 4:2, NW) Auri siahuna ese iseda tauanina ia gabua bona ia haberoa neganai, iseda varovaro idia mase bona hisihisi ita mamia lasi. Taunimanima momo edia lalomamina be unai bamona, unai dainai dahaka be maoro eiava kerere ia hahedinaraia lasi. Unai bamona tauna be kerere ia karaia neganai, do ia lalohisihisi lasi bona do ia hemarai lasi. Hari inai negai taunimanima momo be edia lalomamina ena hakaua dalana idia badinaia lasi.
(1 Timoteo 4:13) Namona be oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho ela bona lau mai.
it-2-E 714 par. 1-2
Taunimanima Vairanai Duahiduahi Karana
Keristani Kongrigeisen lalonai. Aposetolo edia negai, taunimanima haida sibona be mai edia lokua toretore Helagadia, unai dainai taunimanima vairanai duahiduahi karana be mai anina bada. Aposetolo Paulo be Keristani taudia ia hagania iena revareva be kongrigeisen hebouna lalonai do idia duahia, unai murinai dala do idia karaia kongrigeisen ma haida dekenai idia siaia, bona kongrigeisen ma ta dekenai ia siaia revareva danu do idia duahia. (Kl 4:16; 1Te 5:27) Paulo ese Keristani matamata tauna Timoteo ia sisiba henia, ia gwau: “Oi gaukara goada taunimanima vairanai oi duahiduahi noho, sisiba oi henia noho, bona oi hadibaia noho.”—1Ti 4:13.
Ta be taunimanima vairanai ia duahiduahi neganai, namona be hereva ibounai ia duahia namonamo. (Hab 2:2) Taunimanima vairanai duahiduahi karana be ma haida hadibaia karana, unai dainai ia duahiduahi tauna ese idia torea hereva bona unai hereva ia torea tauna ena lalohadai ia lalopararalaia be namo, unai amo kamonai taudia dekenai lalohadai maorona do ia hahedinaraia. Apokalupo 1:3 ena hereva hegeregerena, unai peroveta herevana idia duahia badabada bona idia kamonai taudia be do idia moale.
Baibel Duahiduahi