Iseda Haroro Bona Mauri Dalana Hebou Pepana Edia Referens
AUGUST 5-11
BAIBEL ENA HEREVA BADADIA | 2 TIMOTEO 1-4
“Dirava ese Ita Dekenai Ia Henia Lauma Helaga ese Gari Ia Havaraia Lasi”
(2 Timoteo 1:7) Dirava ese ita dekenai ia henia lauma helaga ese gari ia havaraia lasi, to siahu, lalokau, bona laloa maoromaoro karana ia havaraia.
Matamata Taudia E—Umui Goada Umui Lao
9 Paulo be Timoteo ia durua totona, ia gwau: “Dirava ese ita dekenai ia henia lauma helaga ese gari ia havaraia lasi, to siahu, lalokau bona laloa maoromaoro karana ia havaraia.” (2 Tim. 1:7, NW) Bema gau haida be emu ura hegeregerena idia vara lasi, to laloa maoromaoro karana ese oi ia durua unai oi hanaia totona. Idia laloa maoromaoro lasi matamata taudia haida be gari mamina idia hahedinaraia. Haida be idia lalometau neganai, idia mahuta momo eiava TV idia raraia momo, drag idia ania, idia inuinu kekero, idia pati momo, bona matabodaga karadia idia karaia. Baibel ese ita ia hagoadaia, “Dirava ese ia ura lasi karadia bona tanobada ena ura idauidau do ita dadaraia momokani bona inai nega oromana lalonai do ita noho mai laloa maoromaoro bona kara maoromaoro ida bona Dirava do ita badinaia noho.”—Tito 2:12, NW.
(2 Timoteo 1:8) Unai dainai iseda Lohiabada oi harorolaia karana oi hemarailaia lasi. Bona ia dainai dibura rumana ai lau noho be oi hemarailaia lasi. To Dirava ena siahu dekenai oi tabekau bona sivarai namona dainai hisihisi oi haheaukalaia.
‘Do Umui Goada Bona Umui Boga Auka!’
7 Paulo be Timoteo ia tore henia, ia gwau: “Dirava ese gari laumana ita dekenai ia henia lasi, to siahu. . . . Unai dainai, iseda Lohiabada ena sivarai do oi gwauraia hedinarai, do oi hemarai lasi.” (2 Timoteo 1:7, 8; Mareko 8:38) Unai hereva ita duahia dainai, ita sibona ita nanadaia diba: ‘Lauegu abidadama dainai lau hemarai, eiava lau gari lasi, a? Lauegu gaukara gabuna (eiava lau lao henia sikulina) dekenai idia noho taudia lau hadibaia lau be Iehova ena Witnes tauna ta, eiava hereva momokani lau hunia toho? Lau hemarai badina lau be ma haida amo lau idau, eiava lau moale badina egu hetura karana Iehova ida dainai idia amo lau idau?’ Bema ta be sivarai namona harorolaia karana dekenai eiava, taunimanima amo ia idau karana dekenai ia gari, namona be ia ese Iehova ena sisiba herevadia Iosua dekenai ia laloa: “Do oi goada bona do oi boga auka.” Namona be ita laloaboio lasi, iseda gaukara hebou taudia eiava iseda sikuli turadia edia lalohadai be gau badana lasi, to mai anina bada gauna be Iehova bona Iesu Keriso edia lalohadai.—Galatia 1:10.
Hakaua Hereva Namodia Tahua
(2 Timoteo 2:3, 4) Oi be Keriso Iesu ena tuari tauna namona dainai, hisihisi oi haheaukalaia be namo. 4 Tuari tauna be mauri ena bisinesi karadia idauidau lalonai do ia vareai lasi, badina ia ura tuari totona ena ladana ia atoa tauna ena lalonamo ia abia.
Taga Korikoridia Tahua
13 Timoteo be abidadama tauna ta. Paulo ese Timoteo ia gwauraia “Keriso Iesu ena tuari tauna namona” murinai, ia dekenai ia gwau: “Tuari tauna be mauri ena bisinesi karadia idauidau lalonai do ia vareai lasi, badina ia ura tuari totona ena ladana ia atoa tauna ena lalonamo ia abia.” (2 Tim. 2:3, 4) Hari inai negai, Iesu ena murinai idia raka taudia bona ful-taim hesiai taudia milioni ta, be edia noho dalana hegeregerena Paulo ena sisiba idia badinaia. Idia ese inai tanobada ena matana veria gaudia idia dadaraia, bona inai hakaua hereva idia laloatao: “Moni ia abiatorehai tauna ese, heniatorehai tauna ena hesiai gaukara ia karaia noho.” (Aon. 22:7) Satani ia ura iseda nega bona goada ibounai be bisinesi karadia lalonai ita haorea. Ita karaia abia hidi haida dainai, ita abitorehai monina be lagani momo lalonai ita henitorehai diba. Reana unai moni ita abia badina ita ura ruma badana ta ita hoia, sikuli badana dekenai ita lao, dava bada motuka ita hoia, eiava headava namo hereana ita karaia. To bema kohu momo ita tahua lasi, eiava ita abitorehai momo lasi, Dirava ena igui hesiai gaukara ita karaia diba, bona inai tanobada ena bisinesi oreadia edia igui hesiai gaukara do ita karaia lasi, unai amo ita hahedinaraia ita be mai aonega ida ita kara.—1 Tim. 6:10.
(2 Timoteo 2:23) Ma danu, kavakava bona anina lasi hepapahuahu oi dadaraidia, badina oi diba unai ese heai idia havaraia.
Iehova Ena Taunimanima ese “Kara Dika Idia Dadaraia”
10 Hari, kongrigeisen lalodiai aposteit karadia idia vara momo lasi. To, herevana daika ese hahediba hereva koikoidia ia herevalaia, namona be ita dadaraia. Aonega karana be Intanet o dala ma ta ai aposteit taudia ida do ita hepapahuahu lasi. Ena be reana ita ura unai aposteit tauna ita durua, to bema ita hereva henia, ita be hari ita stadilaia Baibel ena sisiba ita utua. To, ita be Iehova ena taunimanima dainai, namona be aposteit karana ita dadaraia vaitani.
Baibel Duahiduahi
AUGUST 12-18
BAIBEL ENA HEREVA BADADIA | TITO 1–FILEMONA
“Tau Badadia Do Oi Abia Hidi”
(Tito 1:5-9) Kerete dekenai oi lau rakatania unai amo kerere gaudia do oi hamaoromaoroa bona taoni ta ta ai tau badadia do oi abia hidi, oi dekenai lau hadibaia hegeregerena. 6 Inai bamona tauna do oi abia hidi, ia be haida ese idia samania tauna lasi, ia be hahine tamona ena adavana, iena natudia be abidadama idia hahedinaraia bona ta ese idia ia gwauraia lasi idia be mauri dikana idia badinaia eiava idia gwau-edeede. 7 Naria tauna be Dirava ese ia abia hidi ena gaukara ia naria dainai, namona be ia be haida ese idia samania tauna lasi, sibona ena ura ia badinaia lasi, ia badu haraga lasi, ia be kekero tauna lasi, ia be heatu tauna lasi, bona mai mataganigani ida koikoi dalanai sibona ia durua toho lasi, 8 to ia be heabidae tauna, kara namodia ia ura henia bada, ia laloa maoromaoro, ia kara maoromaoro, Dirava ia abidadama henia bona sibona ena ura ia biagua, 9 ena hadibaia karana lalonai hereva momokani ia dogoatao auka, vadaeni hereva momokani amo haida do ia hagoadaia bona hereva momokani idia gorea taudia do ia sisiba henia.
Duahia Taudia Edia Henanadai
Ena be Baibel ese unai negai elda bona hesiai taudia idia abia hidi dalana ena sivarai ibounai ia herevalaia lasi, to idia karaia dalana ita itaia diba. Baibel ia gwau Paulo bona Banaba be edia misinari laolao ginigunana amo edia hanua dekenai idia giroa lou neganai, “kongrigeisen ta ta ai, tau badadia [o elda taudia] idia abia hidi. Bena Paulo bona Banaba idia anivaga bona idia guriguri, unai amo unai taudia be Iehova dekenai idia henia, idia abidadama henia tauna unai.” (Kara 14:23) Lagani haida murinai, Paulo ese ena misinari gaukarana ai ia bamoa tauna Tito ia tore henia, ia gwau: “Kerete dekenai oi lau rakatania unai amo kerere gaudia do oi hamaoromaoroa bona taoni ta ta ai tau badadia [o elda taudia] do oi abia hidi, oi dekenai lau hadibaia hegeregerena.” (Tito 1:5) Timoteo, gabu momo dekenai aposetolo Paulo ida ia loaloa tauna be unai bamona gwaumaoro ia abia danu. (1 Tim. 5:22) Unai ese ia hahedinaraia, guna loaloa naria taudia ese elda bona hesiai taudia idia abia hidi, to aposetolo taudia bona Ierusalema ai idia noho tatau badadia ese unai idia karaia lasi.
Unai dala hegeregerena, Iehova ena Witnes taudia edia Hakaua Oreana ese elda bona hesiai taudia abia hidi dalana idia haidaua. September 1, 2014 amo, elda bona hesiai taudia abia hidi dalana be inai: Sekit naria taudia ta ta ese edia sekit lalonai elda oreana ese idia gwauraia hidi tadikaka edia kara idia tahua namonamo. Kongrigeisen ia vadivadi henia neganai, bema mai dalana unai tadikaka ida do ia haroro hebou. Unai murinai sekit tauna be elda oreana ida ia herevahereva bona ena sekit lalonai elda bona hesiai taudia matamatadia ia abia hidi. Unai amo, idia be aposetolo edia negai idia badinaia dalana idia tohotohoa.
Daidia ese unai abia hidi gaukarana ena kahana ta ta idia naria? Momokani, “igui hesiai tauna mai ena kamonai bona mai ena kara maoromaoro” ena maduna badana be biaguna ena hesiai taudia do ia ubua. (Mat. 24:45-47) Unai idia karaia totona, lauma helaga ena heduru amo idia ese Baibel idia tahua namonamo, bona hakaua herevadia idia halasia tanobada hegegemadai kongrigeisen idia gaukara namonamo totona. Danu, igui hesiai tauna ese sekit naria taudia bona Brens Komiti taudia ia abia hidi. Bona brens ofesi ta ta ese igui hesiai tauna amo idia mai hakaua herevadia badinaia dalana be elda oreadia dekenai ia hadibaia. Elda oreadia edia maduna be Baibel ena taravatu hegeregerena idia gwauraia hidi tadikaka edia kara do idia tahua namonamo. Sekit naria taudia edia maduna be elda oreadia ese idia gwauraia hidi tadikaka edia kara ibounai do idia tahua namonamo bona idia gurigurilaia. Unai murinai abia hidi idia karaia diba.
Hakaua Hereva Namodia Tahua
(Tito 1:12) Peroveta tauna ta, ia be edia hanua tauna, ia gwau: “Kerete taudia be hanaihanai idia koikoi, idia be dagedage uda animal bamona, idia lahedo bona idia aniani momo.”
w89-E 5/15 31 par. 5
Duahia Taudia Edia Henanadai
Paulo be Kerete taudia ia gwauraia dika eiava inai henidia lasi. Unai be momokani, badina Kerete ai Dirava ese ia lalonamo henia Keristani taudia namodia idia noho bona Iena lauma helaga amo idia ia horoa. (Kara 2:5, 11, 33) Keristani taudia momo dainai “taoni ta ta ai” kongrigeisen momo idia haginia. Ena be unai Keristani taudia be goevadae lasi, to ita gwau diba idia be koikoi, lahedo, bona aniani momo taudia lasi; badina bema unai bamona idia karaia Iehova ena lalonamo do idia abia lasi. (Filipi 3:18, 19; Apokalupo 21:8) Bona hari inai negai bese momo bamona, Kerete dekenai kudou-maoro taudia idia noho, bona idia danu be idia vara kara dikadia dainai idia lalohisihisi bona idia noho hegaegae sivarai namona idia kamonai totona.—Esekiela 9:4; Kara 13:48 hahegeregerea.
(Filemona 15, 16) Reana unai badina dainai ia ese nega sisina oi ia rakatania, unai amo ia do oi abia lou bona oi ida hanaihanai do ia noho. 16 Hari ia be igui hesiai tauna ta sibona lasi, to igui hesiai tauna ia hereaia. Ia be iseda lalokau tadikaka, bona ia lau lalokau henia. To oi ese ia do oi lalokau henia bada, igui hesiai tauna ta bona Keristani tadikaka ta bamona.
Tito, Filemona, Bona Heberu Bukadia Edia Hereva Badadia
15, 16—Dahaka dainai Paulo be Filemona ia hamaoroa lasi Onesimo ia ruhaia totona? Paulo ia ura ‘Dirava ena Basileia ia harorolaia bona Lohiabada Iesu Keriso ena sivarai ia hadibaia.’ Unai dainai, ia ura lasi ma haida edia hepapahuahu—igui hesiai taudia edia hepapahuahu unai—lalonai ia vareai.—Kara 28:31.
Baibel Duahiduahi
AUGUST 19-25
BAIBEL ENA HEREVA BADADIA | HEBERU 1-3
“Kara Maoromaoro Ura Henia, Bona Taravatu Utua Karana Inai Henia”
(Heberu 1:8) To Natuna ia herevalaia neganai, ia gwau: “Dirava be oiemu terona ela bona hanaihanai, bona oiemu basileia ena kepata be kara maoromaoro ena kepata.
Keriso Hanamoa Ia be King Hereadaena!
8 Iehova ese lagani 1914 ai Iesu be ena Mesia Basileiana ena King ai ia halaoa. Ena ‘basileia ena kepata be kara maoromaoro ena kepata,’ unai dainai ita diba Iesu ena lohia dalana be maoromaoro bona taunimanima be maka tamona ai do ia kara henidia. Iesu ia lohia be maoro, badina ‘Dirava be iena terona.’ Unai ena anina be Iehova ese Iesu be King ai ia halaoa. Ma danu, Iesu ena terona be do ia noho “ela bona hanaihanai.” Ita moale badina, Iesu, Iehova ese ia abia hidi King goadana henunai, Iehova ita hesiai henia noho.
(Heberu 1:9) Oi ese kara maoromaoro oi ura henia, bona taravatu utua karana oi inai henia. Unai dainai Dirava, oiemu Dirava, ese moale dehorona amo oi ia horoa bona king ma haida oi hereaia.”
Keriso Hanamoa Ia be King Hereadaena!
7 Salamo 45:6, 7 duahia. Iesu be kara maoromaoro ia ura henia bona ena Tamana ena ladana idia hadikaia gaudia ia inai henia dainai, Iehova ese Mesia Basileiana ena King ai ia halaoa. Dirava ese Iesu be ‘moale dehorona amo ia horoa,’ bona unai ese “king ma haida,” hegeregere Davida ena bese amo idia vara Iuda king idauidau ia hereaia. Edena dala ai? Gau ginigunana be, Iehova sibona ese Iesu ia horoa. Iharuana be, Iehova ese King bona Hahelaga Tauna Badana ai ia halaoa. (Sal. 2:2; Heb. 5:5, 6) Ihatoina be, Iehova ese Iesu be dehoro amo lasi, to lauma helaga amo ia horoa. Ginigabena be, Iesu be tanobada ai lasi, to guba amo ia lohia.
Hakaua Hereva Namodia Tahua
(Heberu 1:3) Unai Natuna ese Dirava ena hairai ia hahedinaraia, bona ia be Iena toana hegeregerena. Iena hereva mai siahuna amo gau ibounai ia haheaua noho. Ia ese iseda kara dika amo ita ia hagoevaia murinai, ia be atai gabudia edia King Hereadaena ena idibana kahanai ia helai.
it-1-E 1185 par. 1
Toana
Iesu be hanaihanai Tamana ena kara ia hahedinaraia, a?
Dirava ena Natuna ginigunana, idia gwauraia Iesu, be ena Tamana ena toana ia abia. (2Ko 4:4) Dirava ese ena Natuna dekenai ia gwau, “Taunimanima ita karaia . . . iseda toana . . . hegeregerena,” unai dainai Natuna be ena Tamana, Havaraia Tauna unai, ena laulau hegeregerena badina Dirava ese Natuna ia karaia. (Ge 1:26; Ioa 1:1-3; Kl 1:15, 16) Iesu be goevadae tauna bamona tanobada dekenai ia noho neganai, Tamana ena kara ia hahedinaraia goevagoeva, unai dainai ia gwau diba, “Lau ia itaia tauna be Tamana danu ia itaia vadaeni.” (Ioa 14:9; 5:17, 19, 30, 36; 8:28, 38, 42) To, Iesu be mase amo ita toreisi lou bona mase diba lasi maurina ia abia neganai, Tamana ena toana ia hahedinaraia momokani, badina ena Tamana, Iehova Dirava, ese ia dekenai “siahu ia henia, gau ibounai guba ai bona tanobada ai [ia] naria totona.” (1Pe 3:18; Mt 28:18) Dirava ese Iesu be “dagi hereadaena ia henia” dainai, Dirava ena Natuna ese Tamana ena hairai do ia hahedinaraia, guna guba ia rakatania bona tanobada ia mai negana ia hereaia. (Fp 2:9; He 2:9) Hari Iesu be ‘[Dirava] ena toana hegeregerena.’—He 1:2-4.
(Heberu 1:7) Danu, Dirava ese iena aneru be inai bamona ia herevalaidia, ia gwau: “Bona ia ese iena aneru be lauma taudia ai ia halaodia, bona iena hesiai taudia be lahi hururu ai ia halaodia.”
(Heberu 1:14) Aneru ibounai be lauma taudia bona hesiai gaukara helagana idia karaia. Dirava ese idia ia siaia do ia hamauria taudia idia hesiai henia totona.
Kariota Bona Korona ese Ita Ia Gimaia
10 Sekaraia ena nega bamona, tuari oreadia edia Iehova ese aneru ia do gaukaralaia noho ena taunimanima ia gimaia bona hagoadaia totona. (Mal. 3:6; Heb. 1:7, 14) Lagani 1919 amo Iehova ena taunimanima be laulau dalanai Babulonia Badana ena igui idia rakatania neganai, tomadiho momokani be ia tubu daekau noho, herevana dagedage idia davaria. (Apok. 18:4) Oibe, aneru be ita idia gimaia dainai, namo lasi ita laloa Iehova ena orea be tomadiho koikoi ese do ia guia lou. (Sal. 34:7) To namona be ita abia dae momokani, tanobada ibounai dekenai Dirava ena hesiai taudia be do idia hutuma idia lao. Momokani, Sekaraia ena matahanai ita laloa neganai, namo lasi unai ororo rua edia hegima karana ita daradaralaia.
11 Kahirakahira Satani ena tanobada ena politikol orea ibounai be do idia haboua bona do idia ura Dirava ena taunimanima idia hadikaia. (Ese. 38:2, 10-12; Dan. 11:40, 44, 45; Apok. 19:19) Esekiela ia peroveta ia gwau, unai orea ibounai be tanobada ibounai do idia koua, ori bamona. Bona hosi amo do idia mai, Dirava ena taunimanima idia tuari henia totona. (Ese. 38:15, 16) Idia dainai do ita gari, a? Lasi! Badina Iehova ena aneru ese ita do idia durua. Unai hisihisi badana negana lalonai, tuari oreadia edia Iehova ena aneru be do idia haboua Dirava ena taunimanima idia gimaia bona Iena lohia siahuna idia dadaraia taudia idia hadikaia ore totona. (2 Tes. 1:7, 8) Unai be dina idauna! To, daika ese Iehova ena guba anerudia do ia gunalaia?
Baibel Duahiduahi
AUGUST 26–SEPTEMBER 1
BAIBEL ENA HEREVA BADADIA | HEBERU 4-6
“Ita Gaukara Goada Dirava Ena Laga-Ani Lalonai Ita Vareai”
(Heberu 4:1) Vadaeni iena laga-ani lalonai do ita vareai gwauhamatana be ia do noho dainai, namona be ita naria namonamo, dika umui ta be ia hegeregere lasi unai laga-ani lalonai ia vareai totona.
(Heberu 4:4) Badina Toretore Helagadia ena kahana ta ai, ia ese dina namba 7 be inai bamona ia gwauraia: “Bona dina namba 7 ai Dirava be ena gaukara ibounai amo ia laga-ani,”
Dirava Ena Laga-ani be Dahaka?
3 Badina rua dainai ita diba Iesu ena nega bona Keristani ginigunadia edia nega be do dina namba 7. Badina ta be Iesu ese ena inai taudia dekenai ia gwauraia herevadia amo unai ita dibaia. Iesu idia badu henia badina Sabati dinana ai gorere taudia ia hanamoa. Idia laloa unai ia karaia be kerere, badina Mose ena Taravatu ia gwau, Sabati dinana ai gau ta do idia karaia lasi. To Iesu ia gwau: “Lauegu Tamana be ia gaukara noho ema bona hari, bona lau danu lau gaukara noho.” (Ioa. 5:16, 17) Ena hereva ena anina be dahaka? Anina be: “Lau bona egu Tamana emai gaukara be hegeregere. Egu Tamana be lagani tausen momo ia gaukara, bona ia do gaukara noho, unai dainai lau be Sabati dinana ai lau gaukara noho.” Unai ese ia hahedinaraia, Iesu ena nega be do dina namba 7, unai be Dirava ena laga-ani dinana, badina unai dina ia do ore lasi.
4 Dina namba 7 ia do ore lasi ena badina ma ta be, Paulo ese Heberu taudia dekenai ia torea revarevana lalonai ia noho. Paulo be Genese 2:2 ena hereva ia do gwauraia lasi neganai, ia gwau: “Ita, abidadama ita hahedinaraia taudia be unai laga-ani lalonai ita vareai.” (Heb. 4:3, 4, 6, 9) Unai ese ia hahedinaraia Paulo ena nega be do dina namba 7. Vadaeni, dina namba 7 be edena nega ai do ia ore?
5 Unai henanadai ita haerelaia totona, Iehova ese dina namba 7 ia abia hidi ena badina ita laloatao be namo. Genese 2:3 ia gwau: “Dirava ese dina namba 7 ia hanamoa, bona dina helaga ia halaoa.” Iehova ese unai dina be dina helagana ai ia halaoa badina ia ura tanobada ai ia karaia gaudia do ia hagugurua. Bona ia ura ia idia badinaia taudia ese tanobada do idia noholaia bona naria. (Gen. 1:28) Unai ia hagugurua totona, Iehova Dirava bona Iesu Keriso, “Sabati ena Lohiabada,” be idia “gaukara noho ema bona hari.” (Mat. 12:8) Unai amo ita diba, Dirava ena laga-ani dinana be do ia ore lasi ela bona ena ura ibounai ia hagugurua. Unai be Keriso ena lohia lagani 1,000 ena dokonai do ia ore.
(Heberu 4:6) Unai dainai, sivarai namona idia kamonai guna taudia be unai laga-ani lalonai idia vareai lasi, badina idia gwau-edeede. To dala ia do kehoa noho, haida idia vareai totona.
Dirava Ena Laga-ani be Dahaka?
6 Dirava ese ena ura Adamu bona Heva dekenai ia gwauraia, to idia gwau-edeede. Adamu bona Heva sibona lasi, to taunimanima milioni momo idia gwau-edeede danu. Hegeregere, Israela taudia danu be Iehova idia gwau-edeede henia lou lou. Bona Paulo ese ena negai idia noho Keristani taudia ia hadibaia bema Dirava idia badinaia lasi, Israela taudia edia kara idia tohotohoa unai. Ia gwau: “Unai dainai namona be ita gaukara goada unai laga-ani lalonai ita vareai, unai amo ita ta ese edia gwau-edeede karana do ia tohotohoa lasi.” (Heb. 4:11) Paulo ese ia hahedinaraia gwau-edeede taudia be Dirava ena laga-ani lalonai do idia vareai lasi. Ita dekenai unai ena anina be dahaka? Bema Dirava ena ura ita badinaia lasi, Dirava ena laga-ani lalonai ita vareai diba, a? Unai henanadai edia haere ita diba be mai anina bada, bona inai stadi ai unai do ita herevalaia. To Israela taudia edia kara ita herevalaia guna, bona Dirava ena laga-ani lalonai idia vareai lasi ena badina do ita herevalaia danu.
(Heberu 4:9-11) Unai dainai Dirava ena taunimanima totona sabati ena laga-ani ia do noho. 10 Badina Dirava ena laga-ani lalonai ia vareai tauna be ena gaukara amo ia laga-ani danu, Dirava be sibona ena gaukara amo ia laga-ani hegeregerena. 11 Unai dainai namona be ita gaukara goada unai laga-ani lalonai ita vareai, unai amo ita ta ese edia gwau-edeede karana do ia tohotohoa lasi.
Dirava Ena Laga-ani be Dahaka?
16 Hari, ita diba Keristani taudia be hahemauri idia abia totona Mose ena Taravatu idia badinaia be anina lasi. Paulo be Efeso taudia ia hamaoroa: “Momokani, unai hebogahisi hereadaena dainai, umui be abidadama amo hahemauri umui abia, bona unai be umui emui hekwarahi dainai lasi. To inai be Dirava ena harihari gauna. Oibe, unai hahemauri be emui gaukara dainai umui abia lasi.” (Efe. 2:8, 9) Vadaeni hari, Keristani taudia be edena dala ai Dirava ena laga-ani lalonai idia vareai diba? Laloatao: Iehova ese ena laga-ani dinana ia abia hidi, unai amo ena ura tanobada bona kara maoromaoro taudia totona ia hagugurua diba. Iehova ese ena ura bona do ita karaia gaudia be ena orea amo ita ia hadibaia. Iehova ena laga-ani lalonai ita vareai diba, bema ena hereva ita kamonai bona ena orea ida ita gaukara hebou.
17 Bema igui hesiai tauna mai ena kamonai bona kara maoromaoro ita kamonai henia lasi, bona sibona eda lalohadai ita badinaia, ita be Iehova ena ura ita dadaraia unai. Bema Iehova ena ura ita dadaraia, iena turana ai do ita lao diba lasi. Stadi gabena ai, kamonai karana ita hahedinaraia daladia do ita herevalaia. Bona ita karaia abia hidi ese do idia hahedinaraia ita be Dirava ena laga-ani lalonai ita vareai eiava lasi.
Hakaua Hereva Namodia Tahua
(Heberu 4:12) Badina Dirava ena hereva be ia mauri noho, bona ia be mai ena siahu bona mai ena matana rua tuari kaia ia hereaia momokani. Bona tau ta ia gwadaia neganai, ena lalona momokani ai ia vareai bona unai tauna ena lalona bona iena kara toana ia hapararaia, bona unai tau ena joini bona turia ena lalona momokani dekenai ia vareai bona ena kudouna ai idia noho lalohadai bona ura ibounai ia tahua diba.
Duahia Taudia Edia Henanadai
Heberu 4:12 ese ia gwauraia “Dirava ena hereva” be dahaka?
▪ Badina siri haida ese idia hahedinaraia aposetolo Paulo be Dirava ena ura ia herevalaia, unai ura be Baibel lalonai ia noho
Nega momo iseda buka bona magasin be Baibel ese taunimanima edia mauri ia haidaua dalana idia herevalaia neganai, Heberu 4:12 idia gaukaralaia, bona unai be maoro. To, mani Heberu 4:12 ena hereva ita laloa dobu. Unai karoa ai, Paulo ese Heberu Keristani taudia ia hagoadaia Dirava ena ura idia badinaia totona. Bona unai be toretore helagadia ai ia noho. Danu, Paulo ese Aigupito amo idia roho mauri Israela taudia ia herevalaia. Idia be gwauhamata tanona do idia vareai, ia be “tano namo herea,” bona unuseniai laga-ani korikorina do idia abia.—Eso. 3:8; Deu. 12:9, 10.
Unai be Dirava ena ura. To, gabeai Israela taudia ese edia kudouna idia ha-aukaia bona Dirava idia abidadama henia lasi, unai dainai idia momo be unai laga-ani lalonai idia vareai lasi. (Num. 14:30; Ios. 14:6-10) To Paulo ia gwau, Dirava ena “laga-ani lalonai do ita vareai gwauhamatana be ia do noho.” (Heb. 3:16-19; 4:1) Unai “gwauhamatana” be Dirava ena ura. Heberu Keristani taudia bamona, ita danu ese unai gwauhamata ita duahia bona badinaia diba. Unai gwauhamata be Toretore Helagadia lalonai ia noho, unai hamomokania totona, Paulo ese Genese 2:2 bona Salamo 95:11 ena kahana haida ia gwauraia.
Momokani, ita moale badina Dirava ena “laga-ani lalonai do ita vareai gwauhamatana be ia do noho.” Ita abia dae, Baibel ese ia gwauraia helarona, Dirava ena laga-ani lalonai vareai karana unai, be do ia vara momokani, unai dainai ita be kara haida ita karaia vadaeni. Ita ese Mose ena Taravatu ita badinaia eiava gaukara ma haida amo Iehova ena lalonamo ita abia be gau badana lasi. To, namona be mai abidadama ida Dirava ena ura ita badinaia. Ma danu, ataiai ita hereva bamona, tanobada hegegemadai taunimanima tausen momo be Baibel idia stadilaia matamaia bona Dirava ena ura idia dibaia. Idia momo ese edia mauri dalana idia haidaua, abidadama taudia ai idia lao, bona bapatiso idia abia. Unai amo ia hahedinaraia “Dirava ena hereva be ia mauri noho, bona ia be mai ena siahu.” Oibe, Dirava ena ura, Baibel ese ia gwauraia gauna, ese iseda mauri ia haidaua vadaeni, bona iseda mauri ai iena siahu do ia hahedinaraia noho.
(Heberu 6:17, 18) Unai hegeregerena, Dirava ese iena gwauhamata ahuna do idia abia taudia dekenai, iena haidaua diba lasi urana ia hahedinaraia goevagoeva. Ia ese gwauhamata metauna amo unai ura ia hamomokania. 18 Vadaeni, unai gaudia rua be idia idau diba lasi bona idia hahedinaraia Dirava be ia koikoi diba lasi. Unai dainai heau mauri gabuna dekenai ita heau taudia be goada bada ita abia diba, unai amo iseda vairanai ia noho helarona ita dogoatao auka.
Dirava Oi Badinaia Bona Ena Gwauhamata amo Namo Oi Davaria
7 Dahaka dainai Dirava ia gwau, Aberahamo dekenai ia karaia gwauhamata do ia hagugurudia? Badina ia ura Keriso ida do idia lohia taudia, “garana” ena kahana iharuana taudia unai, ia durua bona edia abidadama ia hagoadaia. (Heberu 6:13-18, BH duahia; Gal. 3:29) Aposetolo Paulo ia gwau, Iehova be “hereva helagana ma ta, metau bada gauna, ia gwauraia, helaga bada gauna. Vadaeni, inai Dirava ena hereva gaudia rua idia noho, gwauhamata bona hereva helagana, bona idia senisi diba lasi. Ita diba unai hereva ruaosi idia noho, bona ita diba Dirava ia koikoi diba lasi. . . . unai dainai, iseda abidadama do ita dogoatao noho, badina be ita diba ita naria noho davana namona, mauri hanaihanai, be do ita abia momokani.”
Baibel Duahiduahi