Iseda Haroro Bona Mauri Dalana Hebou Pepana Edia Referens
DECEMBER 2-8
BAIBEL ENA HEREVA BADADIA | APOKALUPO 7-9
“Iehova ese Hutuma Bada Taudia Ia Hanamoa”
(Apokalupo 7:9) Unai murinai hutuma bada lau itaia, ta ese idia ia duahia diba lasi, idia be bese ibounai, iduhu ibounai, kopina bona gado idauidau amo, idia be terona vairanai bona Mamoe Natuna vairanai idia gini, dabua kurokuro idia hahedokilaia bona edia imana dekenai pama au rauraudia idia dogoatao.
it-1-E 997 par. 1
Hutuma Bada
Reana do ita henanadai: Bema “hutuma bada” be hahemauri do idia abia bona tanobada ai do idia noho, dahaka dainai siri ia gwau ‘idia be Dirava ena terona vairanai bona Mamoe Natuna vairanai idia gini’? (Apo 7:9) Baibel lalonai nega haida inai hereva “gini” idia gaukaralaia, tau ta ena vairanai taunimanima ma ta eiava orea ta ia abia dae eiava lalonamo henia karana idia herevalaia totona. (Sa 1:5; 5:5; Ao 22:29, AT; Lu 1:19) Hegeregere, Apokalupo karoa 6 ese ia hahedinaraia, “tanobada ena king taudia, bona dagi bada taudia, bona tuari biagudia, bona taga taudia, bona goada taudia, bona igui hesiai taudia ibounai bona ura kwalimu taudia ibounai” be “terona latanai ia helai Tauna ena vairana amo bona Mamoe Natuna ena badu amo” idia hunia, “badina edia badu dinana badana ia ginidae vadaeni, bona daika ia gini diba?” (Apo 6:15-17; Lu 21:36 hahegeregerea.) Anina be unai “hutuma bada” taudia be badu dinana ai idia roho mauri bona Dirava bona Mamoe Natuna edia vairanai idia “gini” taudia ia herevalaia, Dirava ese idia ia lalonamo henia.
(Apokalupo 7:14) Vadaeni maoromaoro ia dekenai lau gwau: “Lauegu lohiabada e, oi be oi diba.” Bona ia be lau dekenai ia gwau: “Inai taudia be hisihisi badana amo idia hanaia mai taudia, bona Mamoe Natuna ena rarana lalonai edia dabua idia huria bona idia hakurokuroa vadaeni.
it-2-E 1127 par. 4
Hisihisi
Ierusalema idia hadikaia, bona lagani 30 bamona murinai, aposetolo Ioane ese hutuma bada—bese ibounai bona iduhu ibounai taudia—ia herevalaia neganai, ta ese ia hamaoroa: “Inai taudia be hisihisi badana amo idia hanaia mai taudia.” (Apo 7:13, 14) Hutuma bada be unai ‘hisihisi badana idia hanaia’ karana ese ia hahedinaraia, idia be unai nega ai do idia roho mauri. Kara 7:9, 10 ese unai hereva ia hamomokania danu: “Dirava be [Iosepa] ida, bona ena hisihisi ibounai amo ia ruhaia.” Dirava ese Iosepa be ena hisihisi ibounai amo ia ruhaia karana ese ia hahedinaraia, ia davaria hisihisi ia haheaukalaia sibona lasi to unai hisihisi amo ia roho mauri.
(Apokalupo 7:15-17) Unai dainai idia be Dirava ena terona vairanai idia gini, bona ena dubu helaga lalonai dina bona hanuaboi iena hesiai gaukara helagana idia karaia. Bona terona latanai ia helai Tauna ese iena palai amo idia do ia koua. 16 Idia be do idia hitolo lou lasi bona do idia ranu mase lou lasi, bona dina ena siahu eiava siahu gauna ma ta ese idia do ia araia lasi, 17 badina Mamoe Natuna, terona badinai ia gini tauna ese idia do ia naria bona idia lohilohi mauri ranuna dekenai idia do ia hakaua lao. Bona Dirava ese edia matana amo mata ranu ibounai do ia dahua ore.”
it-1-E 996-997
Hutuma Bada
Daidia ia laulaulaia? Unai “hutuma bada” be Apokalupo karoa 7 bona siri ma haida ese idia herevalaia. Apokalupo 7:15-17 ia gwau, Dirava ese ‘iena palai amo idia do ia koua,’ bona “idia lohilohi mauri ranuna” dekenai idia do ia hakaua lao, Bona Dirava ese “edia matana amo mata ranu ibounai” do ia dahua ore. Bona Apokalupo 21:2-4 ese unai ia herevalaia danu: “Dirava ena palai rumana be taunimanima ida ia noho” ia ese ‘mata ranu ibounai be edia matana amo ia dahua oho’ bona “mase be do ia ore.” So unai peroveta herevana be ‘Ierusalema Matamatana ia diho mai’ gabuna, guba ia herevalaia lasi, to tanobada ai taunimanima dekenai do ia vara hahenamo ia herevalaia.
Hakaua Hereva Namodia Tahua
(Apokalupo 7:1) Unai murinai, aneru 4 lau itaia, tanobada ena kona 4 dekenai idia gini. Idia ese tanobada ena lai 4 idia dogoatao auka, lai be tanobada, eiava davara, eiava au ta dekenai ia toa lasi totona.
Dirava Ena Israel Taudia Idia Makaia
4 Unai aneru 4 ese aneru oreadia 4 idia laulaulaia. Iehova ese unai aneru oreadia ia gaukaralaia, ena panisi do idia koua ela bona nega korikori. Unai aneru ese unai lai, Dirava ena badu, idia ruhaia murinai, not kahana amo, saut kahana amo, ist kahana amo bona west kahana amo nega tamona do idia toa bona unai neganai gau momo do idia hadikaia ore. Unai nega be Iehova ese idaunegai Elam taudia ia hadikadia negana bamona, to ma ia habadaia. Unai neganai, ia ese lai 4 ia gaukaralaidia, Elam taudia ia luludia totona, bena ia hadikadia bona ia hamasedia. (Ieremia 49:36-38) Iehova ese lai-gubana ia gaukaralaia Amono besena ia hadikaia totona, to do ia mai lai-gubana badana ta be bada herea momokani bona gau momo herea do ia hadikaia. (Amosa 1:13-15) Iehova be ena badu dinana dekenai ena lohia siahuna ena maoro do ia hamomokania ela bona hanaihanai. Unai neganai, tanobada dekenai Satana ena orea ena kahana ta do ia gini diba lasi.—Salamo 83:15, 18; Isaia 29:5, 6.
(Apokalupo 9:11) Idia be mai edia king, ia be guri dobu masemase ena aneru. Heberu ai iena ladana be Abadoni, to Grik ai iena ladana be Apoliona.
it-1-E 12
Abadoni
Abadoni, guri dobu masemase ena aneru be daika?
Apokalupo 9:11 ai inai hereva “Abadoni” idia gaukaralaia “guri dobu masemase ena aneru” ena ladana totona. Grik ai iena ladana be Apoliona, anina be “Hadikaia Ore Tauna.” Lagani 1900 lalonai, momo idia laloa inai peroveta herevana be siahu taudia hegeregere, Emperor Vespasian, Muhammad, bona Napoleon ia herevalaia bona idia gwau unai aneru be “Satani ese ia biagua.” To Apokalupo 20:1-3 ese ia hahedinaraia unai aneru be “guri dobu masemase ena ki” ia dogoatao, bona ia be guba ai Dirava ena gaukara ia karaia aneru, danu ia be “Satani ese ia biagua” lasi badina unai aneru ese Satani be guri dobu masemase lalonai do ia negea diho. The Interpreter’s Bible ese Apokalupo 9:11 ia herevalaia neganai, ia gwau: “Abadoni, be Dirava ena aneru, to Satani ena lasi, badina Dirava ena oda hegeregerena kara dika taudia ia hadikaia ore.”
Ita herevalaia Heberu toretoredia ese idia hamomokania ʼavad·dohnʹ be Sheol [mase gurina] bona mase ida ia hegeregere. Apokalupo 1:18 ai Keriso Iesu ia gwau: “Hari lau mauri bona do lau mauri noho ela bona hanaihanai. Bona mase bona Mase Gurina edia ki be lau dekenai idia noho.” Luka 8:31 ese Iesu ena siahu unai guri dobu masemase totona ia hahedinaraia. Ia be mai ena siahu Satani ia hadikaia ore totona, bona Heberu 2:14 ese unai ia hamomokania, ia gwau: “[Iesu] be rara bona hidio ai ia lao, vadaeni iena mase amo, mase ia havaraia diba tauna, Diabolo unai, ia haorea diba.” Apokalupo 19:11-16 ese ia hahedinaraia goevagoeva Iesu be Dirava ese ia abia hidi Hadikaia Ore Tauna eiava Davana Henia Tauna.—APOLLYON itaia.
Baibel Duahiduahi
DECEMBER 9-15
BAIBEL ENA HEREVA BADADIA | APOKALUPO 10-12
“‘Witnes Taudia Rua’ Idia Hamasea Bona Idia Mauri Lou”
(Apokalupo 11:3) Bona lau ese egu witnes taudia rua do lau siaia bona idia ese puse dabua do idia hahedokilaia bona dina 1,260 lalonai do idia peroveta.”
Duahia Taudia Edia Henanadai
Apokalupo karoa 11 ese ia herevalaia witnes taudia rua be daidia?
Apokalupo 11:3 be witnes taudia rua ia herevalaia bona ia gwau idia be dina 1,260 lalonai do idia peroveta. Unai siri ma ia gwau dagedage animal ese “idia do ia hadarerea bona do ia hamasedia.” To, “dina toi mai kahana” murinai, unai witnes taudia rua be do idia mauri lou, bona unai idia itaia taudia be do idia hoa.—Apok. 11:7, 11.
Unai witnes taudia rua be daidia? Unai sivarai ena hereva ma haida ese ita do ia durua idia ita diba namonamo totona. Gau ginigunana be, Apokalupo bukana ia hahedinaraia unai witnes taudia rua be “olive audia rua bona lamepa atoa gaudia rua ese idia laulaulaia.” (Apo. 11:4) Unai ita duahia neganai, Sekaraia ena peroveta herevana ai ia gwauraia lamepa atoa gaudia bona olive audia rua ita laloa. Unai olive audia rua be Iehova ese ia “horoa taudia rua,” Gavana Serubabele bona Hahelaga Tauna Badana Iosua idia laulaulaia. Idia be “tanobada ibounai ena Lohiabada badinai idia gini taudia.” (Sek. 4:1-3, 14, BHḡ) Gau iharuana be, unai witnes taudia rua be Mose bona Elia ese idia karaia hoa karadia idia karaia danu.—Apokalupo 11:5, 6 be Numera 16:1-7, 28-35 bona 1 King Taudia 17:1; 18:41-45 ida sekea.
Unai siri ese idia herevalaia gauna badana be dahaka? Unai sivarai ta ta be hahetoho negadia Dirava ena orea idia gunalaia horoa taudia idia herevalaia. Unai dainai, Apokalupo karoa 11 ia guguru negana be lagani 1914 ai, Dirava ena Basileia be guba ai ia lohia matamaia neganai. Unai negai, orea idia gunalaia horoa tadikaka be “puse dabua” idia hahedokilaia, bona lagani toi mai kahana lalonai idia haroro.
Unai puse dabua idia hahedokilaia horoa taudia be edia haroro negana ena dokona ai dibura ruma ai idia atodia. Unai be laulau dalanai idia hamasedia bamona. To, idia be dibura ruma ai idia noho daudau lasi, laulau dalanai unai be dina toi mai kahana. Dirava ena inai taudia idia moale bada, badina edia matanai, unai horoa taudia edia gaukara be ia ore bamona.—Apok. 11:8-10.
To, unai peroveta herevana hegeregerena, dina toi mai kahana idia ore murinai, unai witnes taudia rua be idia mauri lou. Unai horoa tadikaka be dibura ruma amo idia ruhaia. To unai sibona lasi, Iehova idia badinaia noho taudia be edia Lohiabada Iesu Keriso amo Dirava ese gaukara badana ta ia henidia. Lagani 1919 ai, Dirava ese idia bona ma haida ia abia hidi “igui hesiai tauna mai ena kamonai bona mai ena kara maoromaoro” ai idia lao, bona inai nega dokona ai, Dirava ena taunimanima dekenai Iena hakaua herevadia do idia halasia.—Mat. 24:45-47; Apok. 11:11, 12.
Apokalupo 11:1, 2 ena hereva be lauma dubu helagana ai do ia vara hahetohoa karana ta ida ia hegeregere. Malaki karoa 3 ese lauma dubu helagana idia sekea bona hagoevaia negana ta ia herevalaia danu. (Mal. 3:1-4) Unai sekea bona hagoevaia gaukarana ena daudau be edena bamona? Ia be lagani 1914 amo ia matamaia ela bona lagani 1919 ena matamana kahana. Unai nega ena daudau be Apokalupo karoa 11 ese ia herevalaia dina 1,260 (hua 42) eiava dina toi ma kahana.
Ita moale badina Iehova ese unai hagoevaia gaukara ia karaia, unai amo orea ta ia hagoevaia mai edia ura bada ida kara namodia idia karaia totona. (Tito 2:14) Danu, ita ese unai abidadama horoa taudia ita laloa bada, badina hahetoho neganai idia ese orea idia gunalaia. Unai amo idia hamomokania, laulau dalanai idia be unai witnes taudia rua.
(Apokalupo 11:7) Bona edia haroro gaukarana idia haorea neganai, guri dobu masemase amo ia daekau dagedage animal ese idia do ia tuari henia, idia do ia hadarerea bona do ia hamasedia.
(Apokalupo 11:11) Bona dina toi mai kahana idia ore murinai, Dirava ena mauri siahuna be idia lalonai ia vareai bona idia gini, bona unai idia itaia taudia idia gari bada.
Hakaua Hereva Namodia Tahua
(Apokalupo 10:9, 10) Bona unai aneru dekenai lau lao, bona ia lau hamaoroa lau dekenai unai lokua toretore maragina do ia henia. Bona lau dekenai ia gwau: “Oi abia bona oi ania, bona unai ese emu bogana do ia hahisia, to emu uduna ai ena mamina be do ia namo, hani bamona.” 10 Vadaeni lau ese aneru ena imana amo lokua toretore maragina lau abia, bona lau ania ore, bona egu uduna ai ena mamina be ia namo, hani bamona, to lau ania ore neganai, egu bogana ia hisihisi.
it-2-E 880-881
Lokua Toretore
Dahaka ia laulaulaia? Baibel lalonai, “lokua toretore” idia gaukaralaia gau haida idia laulaulaia totona. Hegeregere, Esekiela bona Sekaraia be matahanai lalonai “lokua toretore” ta idia itaia, bona ena kahana rua be mai ena toretore. Nega momo toretore taudia be lokua toretore ena kahana tamona sibona idia gaukaralaia, to kahana rua ai idia toretore karana ese hahemaoro herevana ena goada ia hahedinaraia. (Ese 2:9–3:3; Sek 5:1-4) Apokalupo bukana ena matahanai ta ai, terona latanai ia helai Tauna ena imana idibana ai be lokua toretore ta ia noho, bona koua gaudia 7 amo idia koua momokani, ela bona Dirava ena Mamoe ese do ia kehoa. (Apo 5:1, 12; 6:1, 12-14) Gabeai, unai matahanai lalonai aneru ta ese Ioane dekenai lokua toretore ta ia henia bona ia hamaoroa do ia ania. Ena uduna dekenai ena mamina ia namo, to ena bogana ia hahisia. Danu, unai lokua toretore be ia kehoa dainai, ena hereva ia lalopararalaia diba. Ioane dekenai unai lokua toretore lalonai idia noho hereva edia “mamina be ia namo,” to do ia perovetalaia gaudia be idia idita. (Apo 10:1-11) Esekiela dekenai unai ia vara danu, ia abia lokua toretore lalonai be “lalohisihisi ena boiboi bona mase ena taitai sivarai idia torea.”—Ese 2:10.
(Apokalupo 12:1-5) Vadaeni toa badana ta be guba dekenai ia hedinarai, hahine ta ese dina be dabua bamona ia hahedokilaia, hua be iena aena henunai ia noho, bona hisiu 12 be korona ta bamona, iena kwarana ai idia noho, 2 bona unai hahine be ia rogorogo. Bona do ia mara dainai ia boiboi bona hisihisi bada ia mamia. 3 Bona toa badana ma ta be guba dekenai ia hedinarai, unai be huala badana ta, kakakaka gauna, iena kwarana be 7, bona iena doana be 10, bona iena kwaradia latanai be korona 7, 4 bona iena iuna ese hisiu orea toi amo orea ta ia veria bona tanobada dekenai ia negea diho. Bona huala be ia mara gwauraia hahinena vairanai ia gini noho, unai hahine ia mara neganai, ia ese ena natuna do ia ania ore totona. 5 Bona hahine ese natuna ta, oibe, mero ta ia havaraia, ia ese auri itotohi amo bese ibounai do ia lohiaia. Bona unai natuna be Dirava bona ena terona dekenai idia abia lao haraga.
it-2-E 187 par. 7-9
Mara Ena Hisihisi
Apokalupo bukana ai aposetolo Ioane ena matahanai ai ia itaia guba ai hahine ta be do “ia mara dainai ia boiboi bona hisihisi bada ia mamia.” Bona “natuna ta, oibe, mero ta ia havaraia, ia ese auri itotohi amo bese ibounai do ia lohiaia.” Ena be huala ia hekwarahi unai natuna ia ania totona, to “unai natuna be Dirava bona ena terona dekenai idia abia lao haraga.” (Apo 12:1, 2, 4-6) Dirava ese unai natuna ia abia haraga karana ese ia hahedinaraia, unai natuna ia lalonamo henia bona ena natuna ai ia halaoa. Idaunegai danu, natu maragina ta ia vara neganai, ena tamana dekenai idia abia lao do ia abia dae totona. (BIRTH itaia.) Unai “hahine” be laulau dalanai Dirava ena adavana, “ataiai Ierusalema” ia laulaulaia, ia be Keriso bona ena tadikakadia edia “sinana.”—Ga 4:26; He 2:11, 12, 17.
Momokani guba ai Dirava ena “hahine” be do ia goevadae, bona ia mara neganai hisihisi do ia mamia lasi. Unai dainai laulau dalanai mara ena hisihisi ese ia hahedinaraia “hahine” ia laloparara kahirakahira do ia mara dainai ia naria noho.—Apo 12:2.
Inai natuna “mero” be daika? Ia ese “auri itotohi amo bese ibounai do ia lohiaia.” Salamo 2:6-9 ese ia hahedinaraia unai be Dirava ena Mesia King ia perovetalaia. To Iesu be tanobada ai ia vara, ia mase, bona ia toreisi lou murinai, Ioane ese unai matahanai ia itaia. Unai dainai laulau dalanai unai matahanai be Mesia Basileiana ia vara dalana ia herevalaia, unai Basileia be Dirava ena natuna Iesu Keriso ese do ia lohiaia, ia be mase amo Iehova ese ia hatorea isi lou bona “Dirava ena idibana kahanai ia helai vadaeni, unai nega amo ia naria noho ela bona Dirava ese ena inai taudia be iena aena atoa gauna ai do ia halaoa.”—He 10:12, 13; Sa 110:1; Apo 12:10.
Baibel Duahiduahi
DECEMBER 16-22
BAIBEL ENA HEREVA BADADIA | APOKALUPO 13-16
“Dagedage Animal Dekenai Ita Gari Lasi”
(Apokalupo 13:1, 2) Bona huala be davara ena kone dekenai ia gini noho. Bona lau itaia dagedage animal ta be davara amo ia daekau, iena doana be 10, iena kwarana be 7, bona iena doana ta ta dekenai be korona 10 idia noho, to iena kwarana ta ta dekenai be Dirava hadikaia ladadia idia noho. 2 Lau itaia dagedage animal ena toana be lepadi bamona, to iena aena be bea ena aena bamona, bona iena uduna be laiona ena uduna bamona. Bona huala ese ena goada, ena terona, bona siahu bada be unai animal dekenai ia henia.
Iehova be “Hunia Gaudia Hedinaraia Diravana”
6 Lagani 96 C.E. bamona ai, Iesu ese aposetolo Ioane dekenai matahanai haida ia henia. (Apok. 1:1) Matahanai ta lalonai, Ioane ese huala ta ia itaia, davara ena kone dekenai ia gini; unai huala be Diabolo. (Apokalupo 13:1, 2 duahia.) Danu, ia itaia dagedage animal idauna ta be davara amo ia daekau. Iena kwarana be 7 bona Diabolo amo siahu bada ia abia. Gabeai, Ioane ese dagedage animal kakakakana mai ena kwarana 7 ia itaia. Unai be Apokalupo 13:1 ese ia herevalaia dagedage animal. Aneru ta ese Ioane ia hamaoroa animal kakakakana ena kwarana 7 be, “king 7” o gavamani 7 idia laulaulaia. (Apok. 13:14, 15; 17:3, 9, 10) Ioane ese Apokalupo bukana ia torea neganai, king 5 be idia moru vadaeni, ta be ia lohia noho bona “ma ta be ia do ginidae lasi.” Unai basileia badadia be daidia? Inai stadi ai, Apokalupo karoa 13 ese ia herevalaia dagedage animal ena kwarana ta ta do ita herevalaia. Danu, Daniela bukana amo unai basileia ta ta edia sivarai ma haida do ita itaia. Ena be unai basileia haida idia noho lasi, to lagani handred gunanai, Daniela ese ia perovetalaidia vadaeni.
(Apokalupo 13:11) Bona dagedage animal ma ta lau itaia, ia be tanobada amo ia daekau, bona iena doana be rua, mamoe natuna ena doana bamona, to huala badana ta bamona ia hereva matamaia.
(Apokalupo 13:15) Bona ia ese maoro ia abia, dagedage animal ginigunana ena laulau dekenai laga do ia henia, unai amo ia hereva diba bona oda ia henia iena laulau idia ura lasi tomadiho henia taudia ibounai ia hamasea totona.
Dagedage Gaudia Rua Tuari Henidia
26 Unai dagedage gauna be dahaka? Ia be Anglo-America Basileia Badana—dagedage gauna ginigunana ena kwarana namba 7 unai, to ia be gaukara idauna ta ia karaia! Matahanai lalonai unai kwarana be dagedage gauna ta bamona ia hedinarai. Unai dainai ena kara tanobada dekenai ita itaia namonamo diba. Unai doana rua dagedage gauna lalonai politikol gavamanidia rua idia noho. Edia lohia siahuna be tamona lasi, to idia gaukara hebou. Iena doana rua be “mamoe ena natuna ena doana toana bamona.” Anina be ia kara hegeregere ia be manau bona dagedage lasi gauna, bona ia gwau tanobada taudia iboudiai ese ena gavamani dalana aonegana idia abia dae be namo. To ena hereva be “huala badana ena gadona bamona,” anina be taunimanima ia doridia, bona ia hagaridia, bona ia dagedage henidia ena gavamani dalana idia abia dae lasi neganai. Ia ura lasi taunimanima be Dirava ena Basileia henunai do idia mai bona Dirava ena Mamoe Natuna ena siahu henunai do idia noho. Lasi, to taunimanima ia hagoadaia, Satana, huala badana, ena ura do idia karaia totona. Taunimanima ia veria, bese idauidau do idia parara, bona do idia inai heheni totona. Unai dala amo, idia ese dagedage gauna ginigunana idia tomadiho henia.
Dagedage Gaudia Rua Tuari Henidia
30 Tanobada dekenai idia vara gaudia ese idia hahedinaraia unai laulau be orea ta. Britain bona United States ese unai orea idia haginia, idia hagoadaia, bona idia durua. Guna, ena ladana be League of Nations. Gabeai, Apokalupo karoa 17 lalonai, unai laulau do ia hedinarai lou, to ena toana be idau, ia be dagedage gauna kakakakana ta bamona do ia hedinarai, mai sibona ena siahu. Unai bese ibounai amo ia mai oreana ia “hereva.” Mai ena heagi ida ia gwau ia sibona ese maino bona noho namona be taunimanima dekenai do ia henia diba. To momokani ia ese dala ia kehoa ena memba besedia idia heai heheni totona. Ia gwau, bema gavamani ta eiava bese ta ese ena siahu ia abia dae lasi, reana unai bese do idia dadaraia diba. Anina be, ena be unai bese ia mauri noho, to ia be mase gauna bamona. League of Nations ese ena hereva idia badinaia lasi besedia do ia luludia. Hisihisi bada herea ia matamaia neganai, unai laulau ena “doana” do idia dagedage bada.—Apokalupo 7:14; 17:8, 16.
31 Tanobada Ibounai Tuarina Iharuana ena nega amo, dagedage gauna ena laulau—hari ia be United Nations oreana ia hedinarai unai—ese taunimanima haida ia hamasedia vadaeni. Hegeregere, lagani 1950 ai United Nations tuari oreana be North Korea bona South Korea edia tuari lalonai ia vareai. Haida idia gwau, United Nations tuari oreadia, mai South Korea tuari oreadia danu, ese North Korea bona China taudia 1,420,000 idia aladia mase. Unai hegeregerena, lagani 1960 amo ia lao lagani 1964, United Nations tuari oreadia be Congo (Kinshasa) tanona ai idia tuari. Danu, tanobada ena gunalaia taudia, pope Paul Namba 6 bona John Paul Iharuana danu, idia gwau dagedage gauna ena laulau sibona ese maino ia havaraia diba. Idia gwau, bema taunimanima ese unai laulau idia hesiai henia lasi, idia ese sibodia do idia hamasea ore. Unai dala amo, laulau dalanai unai laulau idia badinaia lasi bona idia tomadiho henia lasi taudia iboudiai idia aladia mase.—Deuteronomi 5:8, 9.
(Apokalupo 13:16, 17) Vadaeni dagedage gauna iharuana ese taunimanima ibounai, ladana maragi bona ladana bada taudia, taga taudia bona ogogami taudia, ura kwalimu taudia bona igui hesiai taudia, ia oda henia edia imana idibana eiava edia baguna ai maka do idia atoa. 17 Vadaeni tau ta be gau ta ia hoia eiava ia hoihoilaia diba lasi, to maka ia abia tauna sibona, unai maka be dagedage animal ena ladana eiava ena ladana ena namba.
Apokalupo Bukana Ena Hereva Badadia—II
13:16, 17. Ena be dina ta ta ai ita karaia gaudia, hegeregere gau ta ita hoia eiava ita hoihoilaia neganai hekwakwanai ita davaria, to namo lasi unai dagedage gauna ese iseda mauri ia biagua. ‘Maka be eda imana o eda baguna dekenai do idia atoa’ anina be dagedage gauna ese iseda kara o lalohadai ia biagua.
Hakaua Hereva Namodia Tahua
(Apokalupo 16:13, 14) Bona lau itaia, lauma edia hereva mirodia toi, edia toana be paroparo bamona, idia be huala badana ena uduna amo, dagedage animal ena uduna amo, bona peroveta koikoi tauna ena uduna amo idia raka-lasi. 14 Unai hereva be demoni edia hereva bona hoa karadia idia karaia, bona idia be tanobada ibounai edia king taudia dekenai idia lao, vadaeni unai king ibounai idia haboua, Siahu Ibounai Diravana ena dina badana ena tuari totona.
Apokalupo Bukana Ena Hereva Badadia—II
16:13-16. “Lauma edia amo idia mai hereva mirodia” be laloani herevadia Satani ese ia siaia tanobada ena “king” taudia ia veridia totona. Unai dala amo idia be Dirava ena badu disi seven edia hereva idia kamonai lasi to Satani ena kahana dekenai idia gini goada bona Iehova idia gwau-edeede henia.—Mat. 24:42, 44.
(Apokalupo 16:21) Bona medu badana, aisi nadi bamona idia diho. Unai nadi ta ta edia metau be kilogram 20 bamona, idia be guba amo taunimanima latanai idia moru. Vadaeni unai dika badana dainai, taunimanima ese Dirava ena ladana idia hadikaia, badina unai dika be bada herea momokani.
“Emui Hahemauri be Kahirakahira”!
9 Unai nega ai “Basileia ena sivarai namona” do idia harorolaia lasi. Unai nega be ia ore vadaeni. To, “Dokona” be kahirakahira do ia ginidae! (Mat. 24:14) Unai dainai Dirava ena taunimanima be hahemaoro sivaraina ta do idia harorolaia goadagoada. Satani ena tanobada be kahirakahira do ia ore ena hadibaia herevana do idia gwauraia. Baibel ese unai hahemaoro herevana be inai bamona ia gwauraia: “Medu badana, aisi nadi bamona idia diho. Unai nadi ta ta edia metau be kilogram 20 bamona, idia be guba amo taunimanima latanai idia moru. Vadaeni unai dika badana dainai, taunimanima ese Dirava ena ladana idia hadikaia, badina unai dika be bada herea momokani.”—Apok. 16:21.
Baibel Duahiduahi
DECEMBER 23-29
BAIBEL ENA HEREVA BADADIA | APOKALUPO 17-19
“Dirava Ena Tuari ese Tuari Ibounai Do Ia Haorea”
(Apokalupo 19:11) Vadaeni lau itaia guba ia kehoa, bona hosi kurokurona ta ia hedinarai. Bona unai hosi latanai ia helai tauna ena ladana be Abidadama bona Momokani, bona ia be kara maoromaoro dalanai ia hahemaoro bona ia tuari.
(Apokalupo 19:14-16) Danu, guba ena tuari oreadia be hosi kurokurodia amo ia murinai idia lao, bona idia ese dabua namo hereadia idia hahedokilaia, unai dabua be idia kurokuro bona idia goeva. 15 Bona iena uduna amo tuari kaia latana mai matana ia raka-lasi, unai tuari kaia amo tanobada besedia do ia tuari henia, bona ia ese auri itotohi amo idia do ia lohiaia. Danu, ia ese vain huahua moia gabuna do ia moia, unai be Siahu Ibounai Diravana ena badu siahuna. 16 Iena dabua ai, unai be iena mamuna kahanai, ladana ta ia noho, inai ladana be, King ibounai edia king, bona lohia ibounai edia Lohia.
Aramagedono—Dirava ese Unai Tuari amo Tuari Ia Haorea
Kara dika taudia idia lohia neganai, kara maoromaoro taudia be maino bona noho namo do idia davaria lasi. (Aonega Herevadia 29:2; Hadibaia Tauna 8:9) Momokani, kara gageva bona kara dika ita haorea diba lasi, bema unai idia karaia taudia be idia do noho. Unai dainai, kara maoromaoro bona maino idia noho hanaihanai totona, Dirava ese kara dika taudia do ia hadikaia ore be namo. Solomona ia gwau: “Kara dika taudia ese, kara namo taudia idia hisihisi henidia noho, to unai idia henia noho hisihisi be Dirava ese, unai kara dika taudia dekenai ma do ia henidia.”—Aonega Herevadia 21:18.
Dirava be Diadi Tauna dainai, ita diba momokani Ia be mai maoromaoro ida kara dika taudia do ia hahemaoro henidia. Aberahamo ia henanadai: “Tanobada ibounai ena kota biaguna be kara maoromaoro do ia karaia lasi, a?” Iehova ena haere amo, Aberahamo ia diba, Iehova be nega ibounai ia maoro sibona! (Genese 18:25) Unai sibona lasi, to Baibel ia gwau Iehova be kara dika taudia ia hamasea karana ia moalelaia lasi, to bema idia helalo-kerehai lasi, vadaeni do ia haoredia momokani.—Esekiela 18:32; 2 Petero 3:9.
it-1-E 1146 par. 1
Hosi
Aposetolo Ioane ena matahanai lalonai, ia itaia hosi kurokurona ai ia helai tauna be Iesu Keriso ia laulaulaia, bona ena tuari oreana danu be hosi kurokurodia ai idia helai bena ia murinai idia heau lao. Ioane ese ia itaia matahanai be kara maoromaoro bona hahemaoro goeva ena tuari ia hahedinaraia, unai tuari ai Keriso ese ena Tamana, Iehova Dirava ena inai taudia ibounai do ia tuari henia. (Apo 19:11, 14) Ita herevalaia vadaeni bamona Keriso be king gaukara do ia karaia, bona ia murinai idia heau hosi guia taudia—hisihisi idauidau idia laulaulaia—do ia haorea.—Apo 6:2-8.
(Apokalupo 19:19, 20) Bona lau itaia, dagedage animal bona tanobada ena king taudia mai edia tuari oreadia idia haboua, unai hosi latanai ia helai tauna bona ena tuari oreana idia tuari henia totona. 20 Bona idia ese dagedage animal bona peroveta koikoi tauna idia dogoatao, unai peroveta koikoi tauna be dagedage animal vairanai toa idauidau ia karaia, unai amo dagedage animal ena maka idia abia bona ena laulau idia tomadiho henia taudia ia hakaudia kerere. Vadaeni dagedage animal bona peroveta koikoi tauna idia do mauri noho lalonai, idia ruaosi be lahi gohuna lalonai idia negea diho, unai lahi be salipa amo ia araia noho.
Tuari Pavapavana be Aramagedono Dekenai Ia Kwalimu
24 Mai ena kwarana 7 bona doana 10 dagedage gauna, davara dekena amo ia daekau gauna, ese Satana ena politikol oreana ia laulaulaia. Ia mai peroveta koikoi tauna, tanobada basileiana namba 7, idia moru. (Apokalupo 13:1, 11-13; 16:13) Idia do “mauri noho” neganai, eiava mai edia lalo-tamona ida Dirava ena orea taudia tanobada dekenai idia do koua toho neganai, idia be “lahi gohuna” dekenai idia negedia. Unai be lahi gabuna korikorina ta, a? Lasi, dagedage gauna bona peroveta koikoi tauna be animal korikoridia lasi dainai ita diba unai lahi be laulau ta, iena anina be mase ela bona hanaihanai, toreisi lou lasi gabuna. Gabeai, Mase bona mase taudia edia gabu, bona Diabolo danu be unai lahi dekenai do idia negea diho. (Apokalupo 20:10, 14) Ia be hel ena lahi, kara dika taudia araia ela bona hanaihanai gabuna lasi; Iehova ese unai bamona gabu ia lalohadailaia lasi, bona ia ura henia lasi momokani.—Ieremia 19:5; 32:35; 1 Ioane 4:8, 16.
(Apokalupo 19:21) To hosi kurokurona latanai ia helai tauna ese iena uduna amo ia raka-lasi tuari kaia amo, taunimanima oredia ia aladia mase. Bona manu ibounai ese edia tauanina idia ania bona idia bogakunu.
Tuari Pavapavana be Aramagedono Dekenai Ia Kwalimu
25 Unai hegeregerena, ma taunimanima iboudiai danu, idia be gavamani lalonai idia noho lasi to idia be inai tanobada lalonai idia noho bona edia kara dika idia rakatania lasi taudia be “hosi kurokurona dekenai ia guia tauna ese iena uduna dekenai tuari kaia dekena amo . . . [idia] ia alaia mase.” Iesu do ia gwau idia mase be namo. Siri ia gwau lasi unai taudia be lahi gohuna dekenai do idia lao; unai dainai ita gwau diba do idia toreisi lou, a? Baibel ia gwau lasi Iehova ena Hahemaoro Tauna ese ia hamasedia taudia do idia toreisi lou. Iesu ia gwau, “mamoe” lasi taudia iboudiai be “lahi do ia bodo lasi lalonai” do idia lao, unai gabu be “Satani danu mai ena aneru danu edia,” anina be “davana ia dika hanaihanai gabuna dekenai do idia lao.” (Mataio 25:33, 41, 46) Unai be “Kota Badana Dinanai . . . Dirava idia negea taudia be do idia boio” neganai do ia vara.—2 Petero 3:7; Nahumu 1:2, 7-9; Malaki 4:1.
Hakaua Hereva Namodia Tahua
(Apokalupo 17:8) Oi itaia vadaeni dagedage animal be guna ia noho, to hari ia noho lasi, to kahirakahira guri dobu masemase amo do ia daekau, bona do idia hadikaia ore. Bona tanobada ai idia noho taudia idia itaia, dagedage animal be guna ia noho, to hari ia noho lasi, bona gabeai do ia hedinarai neganai, do idia hoa bona idia moale, oibe, taunimanima be tanobada ai idia vara negana amo, unai taudia edia ladadia be mauri bukana lalonai idia torea lasi.
Hehuni Gauna Badana ta Ena Anina Ia Hedinarai
5 ‘Inai dagedage gauna . . . gunaguna ia noho.’ Oibe, January 10, 1920 amo, ia be League of Nations oreana bamona ia noho. Bese idauidau 63 be nega idauidau ai unai orea lalonai idia vareai. To, gabeai, Japan, Germany, bona Italy ese League oreana idia rakatania, bona guna idia gwauraia Soviet Union be League amo idia kokia. September 1939 ai, Germany ena Nazi dagedage lohiana ese Tanobada Ibounai Tuarina Iharuana ia hamatamaia. League of Nations oreana ese maino be tanobada dekenai ia havaraia diba lasi dainai, ia be guri dobu masemase gabuna lalonai ia moru; gaukara ta ia karaia lasi. Lagani 1942 ia do mai lasi neganai, League oreana ena siahu ia ore. Unai mai anina negana ai, nega korikori ai, Iehova be ena orea taudia dekenai unai matahanai ena anina ibounai ia hahedinaraia! Iehova ese unai bamona ia karaia lasi unai nega ia do mai lasi neganai, bona unai nega ia mai murinai danu ia karaia lasi, to nega korikori ai ia karaia Tanobada Matamatana Tiokratik Hebouhebouna ai, N. H. Knorr be unai peroveta ena hereva hegeregerena ia gwau: “Inai dagedage gauna . . . harihari ia noho lasi.” Bena inai henanadai ia henia: “League oreana be guri lalonai do ia noho, a?” Haere ia henia neganai, Apokalupo 17:8 ena hereva ia gwauraia lou bona ia gwau: “Inai tanobada ena bese badadia edia orea do ia toreisi lou.” Unai bamona ia vara—Iehova ena peroveta Herevana ia hamomokania unai!
Guri Dobu Masemase Dekena amo Ia Daekau
6 Momokani, dagedage gauna kakakakana be guri dobu masemase gabuna dekena amo ia daekau. June 26, 1945 ai, San Francisco, U.S.A. dekenai, bese 50 idia vouti United Nations ena Taravatu Pepana idia abia dae totona. Unai orea ena gwauhamata ta be “bese iboudiai lalonai maino bona noho namona do ia havaraia.” Gau momo dekenai UN oreana be League oreana hegeregerena. The World Book Encyclopedia bukana ia gwau: “Dala haida amo, UN be League of Nations, Tanobada Ibounai Tuarina Ginigunana murinai idia haginia gauna, hegeregerena . . . League oreana idia haginia besedia momo ese UN oreana idia haginia. League oreana hegeregerena, UN idia haginia ena badina be bese badadia bogaraginai maino do ia havaraia totona. UN oreana ena kahana badadia be League oreana ena kahana badadia hegeregerena.” Unai dainai, UN be ia daekau lou dagedage gauna kakakakana. Bona UN lalonai idia noho besedia iboudiai edia namba, 190, ese League oreana lalonai idia noho besedia edia namba, 63 ia hanaia; danu, UN ena maduna ese League ena maduna ia hanaia.
(Apokalupo 17:16, 17) Bona oi itaia vadaeni doana 10 bona dagedage animal ese ariara hahine do idia inai henia bona ena gau ibounai do idia kokia bona kopina kavakava do idia rakatania. Vadaeni iena tauanina do idia ania, bona lahi dekenai do idia gabua ore. 17 Badina Dirava ese iena palani be edia kudouna dekenai ia atoa, iena ura idia hagugurua totona, oibe, edia lalohadai tamona idia hagugurua totona, idia ese dagedage animal dekenai edia basileia do idia henia. Unai bamona do idia karaia ela bona Dirava ena hereva ibounai idia guguru.
Iehova ese “Kahirakahira Do Idia Vara Gaudia” Ia Hahedinaraia
17 Tomadiho koikoi oreadia edia siahu be metairametaira do ia ore lasi. Ariara hahinena be mai ena siahu ida king momo do ia biagua, bona ena ura do idia karaia noho. To, kahirakahira “Dirava ese iena palani be edia kudouna dekenai [do] ia atoa, iena ura idia hagugurua totona.” (Apokalupo 17:16, 17 duahia.) Anina be Iehova ese tanobada gavamanidia, anina be United Nations unai, do ia gaukaralaia tomadiho koikoi oreadia idia haorea totona. Ariara hahinena be unai gavamani do ia biagudia lou lasi, bona ena dava bada kohudia do ia haboioa. Lagani 20 o 30 gunanai, momo idia laloa taunimanima be tomadiho do idia matauraia bona do ia goada noho. To hari, unai ia idau. Oibe, ariara hahinena ena siahu be metairametaira do ia ore lasi, to karaharaga gavamani ese do idia haorea.—Apok. 18:7, 8, 15-19.
Baibel Duahiduahi
DECEMBER 30–JANUARY 5
BAIBEL ENA HEREVA BADADIA | APOKALUPO 20-22
“Lau ese Gau Ibounai Lau Hamatamataia Noho”
(Apokalupo 21:1) Bona guba matamata bona tanobada matamata lau itaia. Guba gunana bona tanobada gunana be idia boio vadaeni, bona davara danu be ia boio.
Guba Matamatana Bona Tanobada Matamatana
2 Ioane ena nega ia do ginidae lasi lagani handred momo gunanai, Iehova be Isaia dekenai ia gwau: “Badina lau ese guba matamatana bona tanobada matamatana lau karaia noho; gau gunadia do idia laloatao lasi bona edia kudouna dekenai do idia vara lou lasi.” (Isaia 65:17; 66:22) Babulono dekenai idia guidia lagani 70 murinai, Iuda taudia be lagani 537 B.C.E. ai, Ierusalem dekenai idia giroa lou neganai, unai peroveta herevana be nega ginigunanai ia guguru. Unai neganai, idia be “tanobada matamatana” ena bese goevana bamona, gavamani matamatana bona “guba matamatana” ena henunai. To, aposetolo Petero ese unai peroveta herevana ena anina ma ta ia hahedinaraia, ia gwau: “To Dirava ese ia gwauhamata vadaeni guba matamata bona tanobada matamata do ia havaraia. Inai totona do ita naria noho. Unai gabu dekenai be kara maoromaoro sibona do ia noho.” (2 Petero 3:13) Ioane ia hahedinaraia Lohiabada ena dina lalonai unai peroveta hereva ena anina do ia vara momokani. Satana ena tanobada ena oreadia, mai edia gavamani Satana bona iena demoni henunai, “guba gunana bona tanobada gunana,” do idia ore. Ia hurehure momo ‘davarana,’ kara dika bona gwau-edeede taudia unai, do idia ore. Edia gabu ai do idia gini gaudia be “guba matamatana bona tanobada matamatana”—anina be tanobada besena matamatana gavamani matamatana, Dirava ena Basileia, henunai.—Apokalupo 20:11 itaia.
(Apokalupo 21:3, 4) Vadaeni gado badana ta lau kamonai, terona amo ia mai, ia gwau: “Dirava ena palai rumana be taunimanima ida ia noho, bona ia be idia ida do ia noho, bona idia be ena taunimanima ai do idia lao. Bona Dirava be idia ida do ia noho. 4 Bona ia ese mata ranu ibounai be edia matana amo do ia dahua oho, bona mase be do ia ore, bona lalohisihisi, taitai, bona hisihisi danu be do idia ore. Gau gunadia be idia ore vadaeni.”
w13-E 12/1 11 par. 2-4
“Lau ese Gau Ibounai Lau Hamatamataia Noho”
“[Dirava] ese mata ranu ibounai be edia matana amo do ia dahua oho.” (Apokalupo 21:4) Dirava ese edena mata ranu do ia dahua oho? Moale ena mata ranu ia herevalaia lasi. To Dirava ena gwauhamata ese ia herevalaia mata ranu be hisihisi bona lalohisihisi dainai taunimanima edia mata ranu ia diho karana ia herevalaia. Dirava ese mata ranu ibounai do ia dahua oho sibona lasi, to ia ese mata ranu idia hadihoa karadia—hisihisi bona lalohisihisi—do ia haorea momokani.
“Mase be do ia ore.” (Apokalupo 21:4) Mase dainai taunimanima momo idia taitai, ani? To Iehova ese ia idia kamonai henia taudia ibounai be mase ena igui amo do ia ruhaia. Edena dala ai? Adamu amo ita abia kara dika ese ia havaraia mase do ia haorea. (Roma 5:12) Iehova ese Iesu ena mauri davalaia boubouna amo ia idia kamonai henia taudia be goevadae taudia ai do ia halaoa. Bena, iseda inai tauna ginigabena, mase, be do ia “ore momokani.” (1 Korinto 15:26) Dirava ena palani hegeregerena ia idia abidadama henia taudia ibounai be do idia mauri hanaihanai bona gorere lasi.
“Hisihisi danu be do idia ore.” (Apokalupo 21:4) Edena bamona hisihisi be Dirava ese do ia haorea? Kara dika dainai taunimanima milioni momo ese edia lalona, hemami, bona tauanina ai idia mamia hisihisi idauidau be do idia ore.
(Apokalupo 21:5) Bona terona latanai ia helai Tauna ia gwau: “Lau ese gau ibounai lau hamatamataia noho.” Danu, ia gwau: “Inai hereva oi torea, badina idia be taunimanima ese idia abia dae diba bona idia be momokani.”
Iehova, Hereva Momokani Diravana
14 Iehova ese ena Hereva amo ita ia hamaoroa gaudia ita laloa bada be namo. Ia sibona totona ia gwauraia herevadia idia momokani, bona ia hereva gauna be do ia karaia. Badina momo dainai Dirava ita abidadama henia diba. Iehova ia gwau ia ese “ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia” neganai, iena hereva ita abia dae diba. (2 Tesalonika 1:8) Iehova ia gwau kara maoromaoro idia badinaia taudia ia lalokau henia, abidadama taudia dekenai mauri hanaihanai do ia henia, bona hisihisi, taitai bona mase do ia haorea neganai, unai ibounai ita abidadama henia diba. Iehova ia hahedinaraia unai gwauhamata hereva dokona ita abidadama henia diba, badina aposetolo Ioane dekenai ia gwauraia herevadia dainai, ia gwau: “Inai hereva do oi torea, badina ia be maoromaoro bona momokani.”—Apokalupo 21:4, 5; Aonega Herevadia 15:9; Ioane 3:36.
Hakaua Hereva Namodia Tahua
(Apokalupo 20:5) (To mase taudia oredia idia mauri lou lasi ela bona lagani 1,000 idia ore.) Unai be toreisi lou ginigunana.
it-2-E 249 par. 2
Mauri
Dirava ese Adamu ia hagania bema ena hereva ia kamonai, do ia mase lasi. (Ge 2:17) Unai dainai taunimanima edia inai tauna, mase, ia ore momokani neganai, Dirava idia kamonai henia taudia be edia tauanina lalonai kara dika ta ia noho lasi dainai do idia mase lasi, to do idia mauri hanaihanai. (1Ko 15:26) Apokalupo bukana ese ia hahedinaraia Keriso ena lohia lagani 1,000 ena dokonai, mase do ia ore momokani. Danu ia gwau, Keriso ida king bona hahelaga do gaukara idia karaia taudia be “idia mauri lou, bona lagani 1,000 lalonai Keriso ida idia lohia.” “To mase taudia oredia,” idia mauri lou lasi “ela bona lagani 1,000 idia ore,” be lagani 1,000 ena dokonai ai idia mauri taudia ia herevalaia, to unai nega ai Satani be dibura amo idia do ruhaia lasi taunimanima ia tohoa totona. Lagani 1,000 idia ore murinai, tanobada ai taunimanima be do idia goevadae, guna Adamu bona Heva idia do kara dika lasi negana bamona. Unai nega ai mauri goevadaena do idia moalelaia. Satani be guri dobu masemase amo idia ruhaia bona nega sisina lalonai taunimanima ia tohoa murinai, unai hahetoho idia hanaia taudia be mauri hanaihanai do idia abia.—Apo 20:4-10.
(Apokalupo 20:14, 15) Bona ia ese mase bona Mase Gurina be lahi gohuna lalonai ia negedia diho. Unai lahi gohuna ena anina be mase iharuana. 15 Danu, mauri bukana lalonai edia ladana idia torea lasi taudia be lahi gohuna lalonai ia negedia diho.
it-2-E 189-190
Lahi Gohuna
Inai hereva be Apokalupo bukana ai ia noho, bona ia be laulau herevana sibona. Baibel ese unai hereva ena anina bona dahaka ia laulaulaia ia hahedinaraia, ia gwau: “Unai lahi gohuna ena anina be mase iharuana.”—Apo 20:14; 21:8.
Apokalupo bukana ena siri ma haida ai lahi gohuna ese ia laulaulaia gaudia idia hahedinaraia. Baibel ia gwau, mase be lahi gohuna lalonai idia negea diho. (Apo 19:20; 20:14) Mase be ita gabua diba lasi. Danu, Diabolo, ita itaia diba lasi lauma aneruna, be lahi gohuna lalonai idia negea diho. Ia be lauma dainai, lahi momokanina ese ia hahisia diba lasi.—Apo 20:10; Eso 3:2 bona Gu 13:20 hahegeregerea.
Lahi gohuna be “mase iharuana” ia laulaulaia bona Apokalupo 20:14 ia gwau “mase bona Mase Gurina” be lahi gohuna lalonai idia negedia diho, unai dainai ita gwau diba unai lahi gohuna be Adamu dainai ita abia mase ia laulaulaia lasi (Ro 5:12), eiava Mase Gurina (Sheol) ia laulaulaia lasi. To unai lahi gohuna be mase idauna, ta do ia toreisi lou lasi karana ia laulaulaia, badina Baibel ia gwau lasi “gohu” ese ia lalonai idia mase taudia do ia henia daekau, Adamu dainai ita abia mase bona Mase Gurina (Sheol) bamona lasi. (Apo 20:13) Unai dainai, “mauri bukana” ai edia ladana ia noho lasi taudia—idia helalo-kerehai lasi bona Dirava ena lohia siahuna idia dadaraia taudia unai—be lahi gohuna lalonai do idia negea vareai, anina be do idia ore vaitani, eiava mase iharuana do idia abia.—Apo 20:15
Baibel Duahiduahi