Iseda Haroro Bona Mauri Dalana Hebou Pepana Edia Referens
NOVEMBER 4-10
BAIBEL ENA HEREVA BADADIA | 1 IOANE 1-5
“Tanobada Bona Ia Lalonai Idia Noho Gaudia Umui Lalokau Henia Lasi”
(1 Ioane 2:15, 16) Tanobada bona ia lalonai idia noho gaudia umui lalokau henia lasi. Bema ta be tanobada ia lalokau henia, Tamana ena lalokau be ia dekenai ia noho lasi. 16 Badina tanobada ena gaudia ibounai be inai, tauanina ena ura, matana ese idia ura henia gaudia bona ta ese ena kohu ia heagilaia karana, unai gaudia be Tamana amo idia mai lasi, to tanobada amo idia mai.
Iesu ese Ia Hahedinaraia Dalana Badinaia
13 Reana haida idia laloa tanobada gaudia haida be dika lasi. Ena be unai hereva be momokani, to tanobada bona ena lalona veria gaudia ese Iehova hesiai henia karana amo ita idia veria oho diba. Tanobada gauna ta be ita ia durua diba lasi, Dirava kahirakahira dekenai ita lao totona. Unai dainai, bema tanobada gaudia ita ura henia, ena be haida be idia dika lasi, to ita be dika ita davaria diba. (1 Timoteo 6:9, 10) Bona momokani, tanobada lalonai idia noho gaudia momo be dika bona ita idia hadikaia diba. Bema muvi eiava televisen dekenai dagedage, kohu bada haboua karana, eiava matabodaga gaudia ita raraia, unai gaudia dekenai do ita manada—bona ita idia dibagania diba. Bema ita bamoa taudia be sibona edia noho dalana idia hanamoa eiava bisinesi karaia daladia idia tahua momo taudia, ita danu be unai gaudia do ita laloa bada.—Mataio 6:24; 1 Korinto 15:33
(1 Ioane 2:17) Danu, tanobada bona ena ura be do ia ore, to Dirava ena ura ia karaia tauna be do ia noho hanaihanai.
Oi be Edena Bamona Do Oi Noho?
18 ‘Tanobada lalonai idia noho gaudia’ ita dadaraia totona, Ioane ena sisiba ita laloa be namo, ia gwau: “Tanobada bona ena ura be do ia ore, to Dirava ena ura ia karaia tauna be do ia noho hanaihanai.” (1 Ioa. 2:17) Toana be Satani ena tanobada be do ia noho hanaihanai, to ia be nega ta do ia ore. Unai anina be Satani ena tanobada ese ia henia gaudia be do idia noho hanaihanai lasi. Bema unai ita laloatao noho, unai ese ita do ia durua Satani ena hedibagani ita dadaraidia totona.
Hakaua Hereva Namodia Tahua
(1 Ioane 2:7, 8) Lalokau taudia e, umui dekenai lau torea gauna be taravatu matamatana lasi, to ia be taravatu gunana. Unai be guna umui abia gauna. Inai taravatu gunana be umui kamonai vadaeni herevana. 8 To umui dekenai taravatu matamatana lau torea inai, Iesu ese ia badinaia taravatuna unai, bona umui ese umui badinaia danu, unai dainai dibura be ia ore noho bona diari korikorina ia hedinarai vadaeni.
Iehova Ena Hadibaia Herevadia Ita Abidadama Henia Diba
14 Keristani Grik Toretoredia edia siri momo ese ita idia hagoadaia ta ta ita lalokau henia totona. Iesu ia gwau taravatu hereadaena iharuana be inai: “Namona be emu dekena tauna oi lalokau henia, oi sibona oi lalokau henia hegeregerena.” (Mat. 22:39) Unai hegeregerena, Iesu ena tadina Iamesi ia gwau lalokau be “taravatu badana.” (Iam. 2:8) Aposetolo Ioane ia gwau: “Lalokau taudia e, umui dekenai lau torea gauna be taravatu matamatana lasi, to ia be taravatu gunana. Unai be guna umui abia gauna.” (1 Ioa. 2:7, 8) Ioane ese ia herevalaia “taravatu gunana” be dahaka? Ia be ma haida lalokau henia taravatuna. Ia be taravatu “gunana,” badina Iesu ese lagani momo gunanai aposetolo taudia dekenai ia hadibaia vadaeni. Danu ia be taravatu “matamatana,” badina nega vaira ai aposetolo taudia be hahetoho do idia davaria, bona idia ese sibona ena ura dadaraia lalokauna do idia hahedinaraia. Ita moale badina Iehova ena orea ese ita ia durua, sibona ena ura dadaraia lalokauna do ita hahedinaraia, bona tanobada taudia edia mataganigani karana ita dadaraia.
(1 Ioane 5:16, 17) Bema ta ia itaia iena tadikaka be mase ia havaraia lasi kara dikana ia karaia, vadaeni namona be ia totona do ia guriguri, bona Dirava ese ia dekenai mauri do ia henia, oibe, mase ia havaraia lasi kara dikana idia karaia taudia dekenai mauri do ia henia. To, mase ia havaraia kara dikana ia noho. Bona lau gwau lasi, ta ese unai bamona kara dika ia karaia tauna durua totona, do ia guriguri. 17 Idia maoro lasi karadia ibounai be kara dika, to kara dika ta ia noho, unai kara ese mase ia havaraia lasi.
it-1-E 862 par. 5
Dika Gwauatao Karana
Ma haida eiava kongrigeisen taudia totona guriguri amo Dirava ita noia edia dika ia gwauatao be maoro. Mose be Israela taudia totona unai bamona ia karaia, Iehova ia noia edia kara dika ia gwauatao totona bona Iehova ese ena guriguri ia kamonai henia. (Nu 14:19, 20) Danu, Solomona be dubu helaga ia hahelagaia neganai, Iehova ia noia bema ena taunimanima be edia dika amo idia helalo-kerehai, edia dika do ia gwauatao. (1Ki 8:30, 33-40, 46-52) Esera ese edia hanua dekenai idia giroa lou Iuda taudia edia kara dika be taunimanima edia vairanai ia gwauraia hedinarai. Mai kudouna ibounai ida ia guriguri bona ia karaia karana ese taunimanima ia hagoadaia kara ta idia karaia totona unai amo Iehova ese edia dika ia gwauatao. (Esr 9:13–10:4, 10-19, 44) Iamesi ese lauma dalanai idia gorere taudia ia hagoadaia kongrigeisen ena tau badadia idia boiria idia totona do idia guriguri, bona “bema ia be kara dikadia ia karaia, Dirava ese ena dika do ia gwauatao.” (Ia 5:13-16) To, “mase ia havaraia kara dikana” ia noho, unai be lauma helaga kara dika henia karana, ta be mai ura ida kara dika ia karaia neganai Iehova ese ena dika do ia gwauatao diba lasi. Keristani tauna be unai bamona kara dika idia karaia taudia totona do ia guriguri lasi.—1Io 5:16; Mt 12:31; He 10:26, 27; SIN, I; SPIRIT itaia.
Baibel Duahiduahi
NOVEMBER 11-17
BAIBEL ENA HEREVA BADADIA | 2 IOANE 1–IUDA
“Ita Gaukara Goada Hereva Momokani Lalonai Ita Noho”
(Iuda 3) Lauegu lalokau taudia e, ena be guna lau ura bada umui lau tore henia bona Dirava ese ita do ia hamauria dalana lau herevalaia, to lau laloa namona be umui lau hagoadaia, Dirava ese nega tamona sibona helaga taudia dekenai ia henia abidadama tamona unai, do umui dogoatao auka.
“Lohiabada Ena Siahu Dekena amo Do Umui Siahu”
Satani ena koikoi karadia ita diba, badina ia gaukaralaia dala badadia be Baibel ese ita dekenai ia hahedinaraia. (2 Korinto 2:11) Diabolo ese kara maoromaoro tauna Iobu ia tohoa totona, moni ena hekwakwanai, ena lalokau taudia edia mase, ruma bese taudia edia dagedage karana, gorere, bona ena tura koikoidia edia maumau karana ia gaukaralaia. Iobu ia lalo-metau bona ia laloa Dirava ese ia rakatania. (Iobu 10:1, 2) Ena be hari Satani ese unai hekwakwanai ibounai ia havaraia lasi, to Keristani taudia momo ese unai bamona hekwakwanai idia davaria bona Diabolo ese unai gaudia ia gaukaralaia diba ita ia hamanokaia totona.
9 Lauma dalanai dika idia havaraia gaudia be hari inai nega dokona lalonai idia bada idia lao. Ita noholaia tanobadana lalonai, taunimanima momo ese kohu idia tahua goadagoada to lauma gaudia idia tahua lasi. Niusi halasia oreadia ese nega momo idia hahedinaraia, mahuta hebou karana be moale havaraia gauna, to lalohisihisi gauna lasi. Bona taunimanima momo be “lebulebu karadia idauidau . . . idia ura henia bada, to Dirava . . . idia ura henia maragi.” (2 Timoteo 3:1-5) Unai bamona lalohadai ese lauma dalanai ita ia hamorua diba, to bema ‘iseda abidadama lalonai ita gini’ goada, do ita moru lasi.—Iuda 3.
Hakaua Hereva Namodia Tahua
(Iuda 4) Badina tatau haida be umui huanai idia vareai. Gunaguna Toretore Helagadia lalonai idia peroveta, Dirava ese unai tatau do ia hahemaoro henidia. Idia be Dirava idia badinaia lasi, reana idia laloa, Dirava be mai ena hebogahisi hereadaena dainai, gwau-edeede hemarai karadia idia karaia, unai amo iseda Biaguna bona Lohiabada tamona, Iesu Keriso, idia abidadama henia lasi.
(Iuda 12) Tadikaka dekenai lalokau hahedinaraia totona aria umui karaia neganai, idia danu idia mai, idia be ranu henunai idia noho nadi bamona, idia gari lasi, to idia be sibodia idia ubua mamoe naria taudia bamona, idia be medu ia mailaia lasi ori bamona, lai ese ia odaia lao bona odaia mai, idia be edia nega korikori ai huahua idia atoa lasi audia bamona, bona nega rua idia mase bona idia ragaia vadaeni.
it-2-E 279
Lalokau Hahedinaraia Aria
Baibel ese unai lalokau aria ia herevalaia lasi eiava ia hahedinaraia lasi nega hida unai aria idia karaia. (Iuda 12) Iesu eiava ena aposetolo taudia ese hahegani idia henia lasi unai aria idia karaia totona, bona unai ese ia hahedinaraia taravatu ta ia noho lasi hanaihanai unai aria idia karaia totona. Haida idia gwau nega haida mai edia kohu momo Keristani taudia ese aria idia karaia neganai, edia ogogami abidadama tamona taudia idia boiria. Hegeregere, tama o sina lasi natudia, vabu taudia, taga taudia bona ogogami taudia, idia ibounai ese unai aria badana idia moalelaia.
it-2-E 816
Nadi
Greek gado herevana ma ta be, spi·lasʹ, ena anina be ranu henunai ia noho nadi eiava rif ta. Iuda ese unai hereva ia gaukaralaia Keristani kongrigeisen ai lalohadai kererena ida idia vareai taudia ia herevalaia totona. Ranu lalonai idia hunia nadi ese sisima ia hadikaia diba hegeregerena, unai tatau ese kongrigeisen ai haida idia hakaua kerere diba. Iuda ese unai bamona taudia ia herevalaia neganai, ia gwau: “Tadikaka dekenai lalokau hahedinaraia totona aria umui karaia neganai, idia danu idia mai, idia be ranu henunai idia noho nadi bamona.”—Iuda 12.
(Iuda 14, 15) Oibe, Adamu murinai ia vara tauna namba 7, Enoka, ese idia ia perovetalaia danu, ia gwau: “Iehova be ena aneru helagadia tausen momo danu ia mai, 15 taunimanima ibounai hahemaoro henia totona, bona Dirava idia matauraia lasi taudia ia kota henia totona, idia ese idia karaia kara dika ibounai dainai, bona kara dika taudia ese ia dekenai idia gwauraia hereva dika rohorohodia ibounai dainai.”
wp17.1 12 par. 1
“Dirava ese Ia Lalonamo Henia”
Enoka ena peroveta herevana be dahaka? Baibel ia gwau: “Iehova be ena aneru helagadia tausen momo danu ia mai, taunimanima ibounai hahemaoro henia totona, bona Dirava idia matauraia lasi taudia ia kota henia totona, idia ese idia karaia kara dika ibounai dainai, bona kara dika taudia ese ia dekenai idia gwauraia hereva dika rohorohodia ibounai dainai.” (Iuda 14, 15) Oi dibaia gauna ginigunana be, Enoka be idaunega ai idia vara gaudia ia itaia bona hari ia herevalaia dalana ai ia hereva, hegeregere Dirava be peroveta herevadia hegeregerena ia kara vadaeni. Peroveta herevadia momo be unai dala tamona idia badinaia. Point be inai: Unai peroveta herevana be do ia guguru gauna ta ia herevalaia, bona reana Baibel ai ia noho dalana be hegeregere ia guguru vadaeni!—Isaia 46:10.
wp17.1 12 par. 3
“Dirava ese Ia Lalonamo Henia”
Enoka ena abidadama karana ese ita ia hagoadaia ita ta ta sibona dekenai inai henanadai ita henia, Dirava ese inai tanobada ia itaia dalana be ita itaia danu eiava lasi? Enoka ese unai hahemaoro herevana ia gwauraia neganai, unai be hari iseda nega danu ia herevalaia; Enoka ena nega danu be iseda nega bamona. Enoka ena sisiba hegeregerena, Iehova ese Noa ena nega ai abata badana ia mailaia bona kara dika tanobada ia hadikaia ore. To, unai nega ai ia vara dika ese ia hahedinaraia vaira nega ai dika bada do ia vara danu. (Mataio 24:38, 39; 2 Petero 2:4-6) Hari, Dirava be ena aneru helagadia danu ia noho hegaegae inai kara dika tanobadana dekenai kota maoromaoro idia mailaia totona. Namona be ita ta ta ese Enoka ena sisiba herevana ita laloa bada bona ma haida dekenai ita harorolaia danu. Reana iseda famili bona turadia be ita do idia dadaraia. Nega haida do ita mamia ita be sibona ita noho bamona. To, Iehova be Enoka ia rakatania lasi; unai hegeregere, hari danu Dirava be ena abidadama hesiai taudia do ia rakatania lasi!
Baibel Duahiduahi
NOVEMBER 18-24
BAIBEL ENA HEREVA BADADIA | APOKALUPO 1-3
“Oiemu Kara . . . Lau Diba”
(Apokalupo 1:20) Lauegu imana idibana dekenai oi itaia hisiu 7 bona golo lamepa atoa gaudia 7 edia hunia hereva helagana be inai: Hisiu 7 edia anina be kongrigeisen 7 edia aneru, bona lamepa atoa gaudia 7 edia anina be kongrigeisen 7.
Oi be Edena Bamona Lalohadai Oi Hahedinaraia?
8 Unai bamona lalohadai kererena ita dadaraia totona, namona be ita laloatao Iesu ena “imana idibana ai hisiu 7 idia noho.” Unai “hisiu” be kongrigeisen lalonai idia noho elda taudia ibounai ia laulaulaia, bona Iesu ese ena ura hegeregerena ai ia gaukaralaidia diba. (Apok. 1:16, 20) Iesu be Keristani kongrigeisen ena Kwarana dainai, elda ibounai huanai dahaka ia vara be ia diba. “Iena matana be lahi ena hururuhururu bamona” bona gau ibounai ia itaia. Unai dainai, bema elda ta ia kerere, Iesu ese dala do ia karaia, unai amo nega korikorina bona dala maorona ai sisiba ia abia. (Apok. 1:14) To Iesu be unai ia do karaia lasi neganai, ena “imana idibana ai” idia noho hisiu, elda taudia unai, ita matauraia be namo. Paulo ia gwau: “Umui idia hakaua taudia do umui kamonai henia, bona idia henunai do umui noho, badina idia ese umui idia naria noho, gabeai Dirava ena vairanai edia gaukara ena anina do idia gwauraia hedinarai. Idia henunai umui noho neganai, mai moale ida edia gaukara do idia karaia, bona do idia lalohisihisi lasi, badina bema mai lalohisihisi ida idia karaia, namo ta do umui davaria lasi.”—Heb. 13:17.
(Apokalupo 2:1, 2) Efeso kongrigeisen ena aneru dekenai inai hereva do oi torea: Iena imana idibana ai hisiu 7 ia dogoatao bona golo lamepa atoa gaudia 7 huanai ia raka tauna ese ia gwauraia herevadia be inai, 2 ‘Oiemu kara, emu hekwarahi bona emu haheauka lau diba. Lau diba oi ese kara dika taudia oi ura henia lasi momokani. Bona haida idia gwau idia be aposetolo taudia, to idia be aposetolo taudia lasi, oi ese edia kara oi tahua bona oi davaria idia be koikoi taudia.
Ita Roho Mauri Totona Iehova be Ita Ia Gimaia
11 Apokalupo karoa 2 bona 3 ai ia noho matahanai ese ia hahedinaraia, King Iesu Keriso be Asia Minor dekenai idia noho kongrigeisen seven lalonai idia vara gaudia ia itaia. Unai sibona lasi, to idia vara hekwakwanai bona taunimanima haida edia ladana ia gwauraia danu. Bona ia ese unai kongrigeisen ia hanamodia bona idia ta ta dekenai sisiba ia henia. Unai matahanai ena anina be dahaka? Unai kongrigeisen seven be lagani 1914 murinai idia noho horoa taudia idia laulaulaia. Ena be horoa taudia sibona dekenai unai sisiba ia henia, to hari idia noho kongrigeisen ibounai dekenai unai sisiba be mai anina bada. Unai dainai, ita gwau diba Iehova be ena Natuna ia gaukaralaia ena taunimanima ia hakaua totona. Edena dala ai Iehova ena hakaua dalana ita abia dae?
Iehova Ena Orea ida Ita Raka Noho
20 Iehova ena orea, ia heau noho oreana, ida ita raka noho ena anina be Dirava ese Iesu Keriso dekenai ia henia dagi, “ekalesia ena kwarana,” ita abia dae. (Efeso 5:22, 23) Namona be Isaia 55:4 (NW) ena hereva ita laloa danu, ita ia hamaoroa: ‘Lau, Iehova ese ia lau abia hidi, bona gunalaia tauna, bona bese idauidau edia lohia lau halaoa. Bona ia dekena amo, egu siahu badana bese idauidau dekenai lau hedinaraia.’ Iesu be gunalaia karana ia diba namonamo. Danu, iena mamoe bona edia kara ia diba. Momokani, ia ese Asia Minor ena kongrigeisen 7 ia itaia neganai, nega ima ia gwau: “Oiemu kara lau diba.” (Apokalupo 2:2, 19; 3:1, 8, 15) Iesu be iseda dabu gaudia ia diba, iena Tamana Iehova bamona. Iesu ese guriguri dalana ia do gwauraia lasi neganai, ia gwau: ‘Tamana guba dekenai ia noho, do umui noinoi henia lasi neganai, umui ura gaudia ia diba vadaeni.’—Mataio 6:8-13.
Hakaua Hereva Namodia Tahua
(Apokalupo 1:7) Ia be ori lalonai do ia mai, bona matana ibounai ese ia do idia itaia, bona ia idia gwadaia taudia danu ese do idia itaia. Bona ia dainai tanobada ena iduhu ibounai ese mai taitai ida edia kemena do idia botaia. Oibe, unai do ia vara momokani, Amen.
kr-E 226 par. 10
Dirava Ena Basileia ese Ena Inai Taudia Do Ia Kokia
10 Hahemaoro herevana. Dirava ena Basileia ena inai taudia ibounai be do ia vara gauna do idia itaia, unai ese edia hisihisi do ia habadaia. Iesu ia gwau: “Do idia itaia taunimanima ena Natuna be mai ena siahu bona hairai bada ida ori lalonai do ia mai.” (Mareko 13:26) Iesu be mai ena siahu ida ia mai karana ese do ia hahedinaraia ia be hahemaoro karaia totona ia mai. Nega dokona ena peroveta herevana ena kahana ma ta ai, Iesu ese hahemaoro negana ai do idia vara gaudia ma haida ia herevalaia. Unai be mamoe bona nanigosi ena parabole ai do ita davaria. (Mataio 25:31-33, 46 duahia) Dirava ena Basileia idia badinaia taudia be “mamoe” bamona do ia hahemaoro henia bona idia ese edia “kwarana [do idia] abia isi,” badina idia diba edia “hahemauri be kahirakahira.” (Luka 21:28) To, Basileia idia inai henia taudia be “nanigosi” bamona do ia hahemaoro henia bona idia be “mai taitai danu edia kemena do idia botaia,” badina idia diba do idia “mase ela bona hanaihanai.”—Mat. 24:30; Apok. 1:7.
(Apokalupo 2:7) Mai ena taiana tauna ese lauma helaga ena hereva kongrigeisen dekediai ia kamonai be namo. Ia kwalimu tauna dekenai maoro do lau henia, mauri auna ena huahua ia ania totona. Unai au be Dirava ena paradaiso lalonai ia noho.’
Apokalupo Bukana Ena Hereva Badadia—I
2:7—Inai hereva “Dirava ena paradaiso” be dahaka? Inai siri ese horoa Keristani taudia ia herevalaia dainai, reana unai paradaiso be guba ai, Dirava ena noho gabuna. Abidadama horoa Keristani taudia be “mauri auna ena huahua do idia ania.” Anina be idia be mase diba lasi maurina do idia abia.—1 Kor. 15:53.
Baibel Duahiduahi
NOVEMBER 25–DECEMBER 1
BAIBEL ENA HEREVA BADADIA | APOKALUPO 4-6
“Hosi Guia Taudia Foa Edia Heau”
(Apokalupo 6:2) Vadaeni lau itaia, hosi kurokurona ta, bona ia latanai ia helai tauna be mai ena peva bona Dirava ese ia dekenai korona ta ia henia. Vadaeni ia lao bona ena inai taudia ia hadarerea, bena ia kwalimu.
wp17.3 4 par. 3
Hosi Guia Taudia Foa Idia be Daidia?
Daika be hosi kurokuro ia guia tauna? Unai tauna ita diba dalana be Apokalupo bukana ese ia hahedinaraia, ia gwau unai tauna be “Dirava ena Hereva.” (Apokalupo 19:11-13) Unai dagi ladana be Iesu Keriso ia herevalaia, badina ia be Dirava ena hereva gwauraia tauna. (Ioane 1:1, 14) Danu, ia idia gwauraia “King ibounai edia king, bona lohia ibounai edia Lohia” bona ia be “Abidadama bona Momokani.” (Apokalupo 19:16) Ia hedinarai goevagoeva, ia be mai ena siahu tuari pavapavana ai ia lao totona, ia ese ena siahu be dala dikana ai ia gaukaralaia lasi. To unai ese henanadai haida ia havaraia.
wp17.3 4 par. 5
Hosi Guia Taudia Foa Idia be Daidia?
Unai hosi guia taudia be edena negai idia heau matamaia? Hosi guia tauna ginigunana, Iesu unai, be king ai ia lao neganai, ia heau matamaia. (Apokalupo 6:2) Iesu be guba dekenai edena negai ia King matamaia? Ia mase murinai ia be guba dekenai ia daekau, to unai negai ia be king ai ia lao lasi. Baibel ese ia hahedinaraia, ia be ia naria. (Heberu 10:12, 13) Iesu ese ena murinai idia raka taudia dekenai unai naria negana ia doko ena toana bona do ia lohia matamaia ena toana ia gwauraia. Ia gwau ia lohia matamaia neganai, tanobada ai idia vara gaudia be do idia dika momokani. Hegeregere tuari, aniani be do idia bada lasi, bona daihanai gorere do idia vara. (Mataio 24:3, 7; Luka 21:10, 11) Tanobada Tuarina Ginigunana be lagani 1914 ai ia vara bena unai murinai, unai nega ia matamaia, Baibel ese unai hekwakwanai momo negana ia gwauraia, ‘dina gabedia.’—2 Timoteo 3:1-5.
(Apokalupo 6:4-6) Bona hosi ma ta ia mai, ia be kakakaka, bona ia latanai ia helai tauna ese siahu ia abia, tanobada amo maino ia kokia totona, vadaeni taunimanima do idia ala-ala heheni. Bona ia ese tuari kaia badana ta ia abia. 5 Bona Mamoe Natuna ese koua gauna ihatoina ia kokia neganai, mauri gauna ihatoina lau kamonai, ia gwau: “Mai!” Vadaeni lau itaia, hosi koremana ta, bona ia latanai ia helai tauna ena imana ai sikele ta ia dogoatao. 6 Bona gado ta lau kamonai, toana be mauri gaudia 4 edia huana amo ia mai, ia gwau: “Witi kilogram ta ena davana be denario ta bona bali kilogram toi ena davana be denario ta bona olive oela bona wain do oi gaukaralaia namonamo.”
wp17.3 5 par. 2
Hosi Guia Taudia Foa Idia be Daidia?
Unai hosi guia tauna be tuari ia laulaulaia. Ia ese bese haida sibona amo maino ia kokia lasi, to tanobada ibounai amo maino ia kokia. Lagani 1914 ai, nega ginigunana histori lalonai, tanobada ibounai tuarina ia vara. Ia murinai be tanobada ibounai tuari iharuana ia vara, bona unai ese tuari ginigunana ena dika ia hanaia momokani. Haida idia gwau, lagani 1914 amo ema bona hari, tuari amo idia mase taudia ibounai be hegeregere 100 milioni mai kahana bamona! Ma danu, taunimanima momo herea be bero badadia idia davaria bona unai ese ia hamanokadia.
wp17.3 5 par. 4-5
Hosi Guia Taudia Foa Idia be Daidia?
“Vadaeni lau itaia, hosi koremana ta, bona ia latanai ia helai tauna ena imana ai sikele ta ia dogoatao. Bona gado ta lau kamonai, toana be mauri gaudia 4 edia huana amo ia mai, ia gwau: ‘Witi kilogram ta ena davana be denario ta bona bali kilogram toi ena davana be denario ta bona olive oela bona wain do oi gaukaralaia namonamo.’”—Apokalupo 6:5, 6.
Unai hosi guia tauna be hitolo bada ia laulaulaia. Unai siri ese aniani ia maragi momokani ia herevalaia, witi kilogram ta ena davana be denario ta, Keristani ginigunadia edia nega ai denario ta be dina ta ena gaukara davana! (Mataio 20:2) Unai koini tamona ese bali kilogram toi ia hoia diba, witi ese bali ia hereaia. Bali kilogram toi eiava witi kilogram tamona ia hegeregere lasi ruma bese badana ia ubua totona, ani? Unai dainai namona be taunimanima ese edia aniani bona moni idia gaukaralaia namonamo, idaunegai olive oela bona wain be sisina sisina idia gaukaralaia hegeregerena.
(Apokalupo 6:8) Vadaeni lau itaia, hosi laboralabora ta, ia latanai ia helai tauna ena ladana be Mase. Bona Mase Gurina be ena murina momokani ia lao. Bona siahu idia abia tanobada ena kahana 4 amo kahana ta do idia biagua, bona do idia ala-ala tuari kaia latana ta amo, hitolo bada amo, gorere dikana amo, bona tanobada ena dagedage animal amo.
wp17.3 5 par. 8-10
Hosi Guia Taudia Foa Idia be Daidia?
Hosi guia tauna namba foa ese mase ia laulaulaia, mase be gorere dikadia bona badina ma haida dainai ia vara. Lagani 1914 murinai, udu kuru gorerena (Spanish flu) ese taunimanima milioni momo herea ia hamasea. Toana be taunimanima 500 milioni be unai gorere idia abia, anina be idia mauri taudia ibounai amo taunimanima toi toi amo ta ta ese unai gorere idia abia!
To unai udu kuru gorerena be hamatamaia sibona. Diba bada taudia idia gwau, lagani 1900 lalonai, smallpox gorerena ese taunimanima milioni momo herea ia hamasea. Ema bona hari, taunimanima milioni momo edia mauri be AIDS, TB, bona malaria gorerena ese ia hakwadogia, ena be medikol dalanai tahua gaukara bada herea idia karaia.
Herevana tuari, hitolo bada, eiava gorere ia vara, to idia ibounai ese gau tamona idia havaraia, mase unai. Taunimanima momo herea be gara gabunai idia lao, gara ese taunimanima dekenai helaro ia henia lasi.
Hakaua Hereva Namodia Tahua
(Apokalupo 4:4) Terona 24 ese unai terona idia hagegea, bona lau itaia, unai terona latadiai be tau badadia 24 idia helai, idia be dabua kurokuro idia hahedokilaia, bona edia kwarana dekenai be golo korona idia noho.
(Apokalupo 4:6) Unai terona vairanai galasi bamona davara ta ia noho bona ia diaridiari. Bona mauri gaudia 4 be terona badinai idia gini hegege, edia vairana bona murina kahana be matana amo idia honu.
Iehova Ena Guba Terona Ena Hairai
8 Ioane ia diba idaunegai haida idia abidia hidi, hahelaga gaukara be tomadiho kalagana lalonai do idia karaia totona. Unai dainai inai gau ia itaia neganai, reana ia hoa: “Helai gabudia ibounai 24 ese unai helai gabuna badana idia hagegea, bona badana [elda] taudia 24 be unai helai gabudia latanai idia helai. Dabua kurokuro idia karaia bena edia kwaradia latanai be edia dagi toana, golo kwara gaudia, idia noho.” (Apokalupo 4:4) Oibe, hahelaga taudia edia gabudia ai, elda taudia 24 idia noho, terona latanai idia helai bona pavapava edia kwara gaudia idia karaia. Unai elda taudia be daidia? Idia be Keristani kongrigeisen ena horoa taudia; idia toreisi lou vadaeni, bona Iehova be idia dekenai ia gwauhamatalaia guba dagina idia abia vadaeni. Edena bamona unai ita diba?
Iehova Ena Guba Terona Ena Hairai
19 Unai mauri gaudia ese dahaka idia laulaulaia? Peroveta tauna ma ta, Esekiel, ena matahanai ese ita ia durua, unai henanadai do ita haerelaia totona. Esekiel ese Iehova ia itaia, guba kariota latanai ia helai. Kariota kahirakahira dekenai mauri gaudia idia noho. Edia toana be Ioane ese ia itaia gaudia edia toana bamona. (Esekiela 1:5-11, 22-28) Gabeai, Esekiel ese unai kariota terona bona mauri gaudia ia itaia lou neganai, ia gwau unai mauri gaudia be kerubi. (Esekiela 10:9-15) Ioane ese ia itaia mauri gaudia 4 ese Dirava ena kerubi momo idia laulaulaia—idia be dagi badana mauridia Iehova ena lauma oreana lalonai. Ioane ia itaia unai kerubi be Iehova kahirakahira dekenai idia noho neganai, ia hoa lasi, badina idaunegai tomadiho kalagana lalonai golo kerubi rua be gwauhamata maua helagana ena koua gauna latanai idia atoa, bona unai maua ena koua gauna ese Iehova ena terona ia laulaulaia. Unai kerubi rua edia huana amo, Iehova ena gadona ese hahegani be Israel besena ia henia.—Esodo 25:22; Salamo 80:1.
(Apokalupo 5:5) To unai tau badadia ta be lau dekenai ia gwau: “Oi tai lasi. Iuda iduhuna ena Laiona, ia be Davida ena bese amo, ia kwalimu vadaeni, bona ia hegeregere inai lokua toretore ena koua gaudia 7 ia kokia bona lokua toretore ia kehoa.”
cf-E 36 par. 5-6
“Iuda Iduhuna Ena Laiona”
5 Nega momo laiona be gari lasi karana ia laulaulaia. Nega ta oi be laiona badana ta oi itaia, a? Bema oibe, reana unai dagedage gauna be magu amo idia koua dainai, unai ese oi ia gimaia. To reana oi itaia neganai do oi gari. Unai laiona badana ena vairana oi itaia noho lalonai oi ia raraia auka, reana do oi laloa inai laiona be gau ta dekenai ia gari diba lasi. Baibel ese laiona ia gwauraia, “uda gaudia edia huanai ia sibona be [goada bada], bona goada gauna ta dekena amo do ia heau lasi.” (Aonega Herevadia 30:30) Keriso ena gari lasi karana be unai bamona.
6 Mani Iesu ese laiona ena gari lasi karana ia hahedinaraia daladia toi ita herevalaia: hereva momokani ia gimaia, hahemaoro goeva ia badinaia, bona dagedage ia haheaukalaia. Danu, do ita itaia ita ibounai—herevana ita gari eiava lasi—be Iesu ena gari lasi karana ita tohotohoa diba.
Baibel Duahiduahi