Iseda Haroro Bona Mauri Dalana Hebou Pepana Edia Referens
OCTOBER 7-13
BAIBEL ENA HEREVA BADADIA | IAMESI 3-5
“Dirava amo Ia Mai Aonegana Hahedinaraia”
(Iamesi 3:17) To atai amo ia mai aonegana ia abia tauna ena kara ginigunana be inai: Ia kara goeva. Danu ia be maino tauna, ia laloa maoromaoro, hereva ia badinaia haraga, ia be mai ena hebogahisi bada, bona huahua namodia ia hahedinaraia, taunimanima edia toana ia laloa lasi bona ia koikoi lasi.
‘Dirava amo Ia Mai Aonega’ be Emu Mauri Lalonai Oi Badinaia, A?
9 “Kara ginigunana be inai: Ia laloa goevagoeva.” Laloa goevagoeva ena anina be, lalohadai sibona ia goeva lasi to kara danu ia goeva. Baibel ese aonega be kudouna ida ia gwauraia, to Dirava amo ia mai aonega be lalohadai bona ura dikadia ese ia hamiroa kudouna lalonai ia vareai diba lasi. (Aonega Herevadia 2:10; Mataio 15:19, 20) To, bema iseda kudouna ia goeva—goevadae lasi taudia idia karaia diba hegeregerena—“kara dika do oi rakatania, kara namo do oi karaia.” (Salamo 37:27; Aonega Herevadia 3:7) Unai dainai aonega karadia ena lista ai, Baibel ese laloa goevagoeva ia gwauraia guna be maoro, ani? Oibe, badina bema lauma bona tauanina dalanai ita goeva lasi, edena bamona Dirava amo ia mai aonega ena kara haida ita hahedinaraia momokani diba?
10 Ia “maino.” Dirava amo ia mai aonega ese ita ia veria maino ita tahua totona, maino be Dirava ena lauma huahua ta. (Galatia 5:22) Ita hekwarahi Iehova ena taunimanima huanai ia noho “maino,” ‘varo bamona ita ia guia hebou’ gauna, ita hadikaia lasi. (Efeso 4:3) Danu, gau ta ese maino ia hadikaia neganai, ita hekwarahi maino ita havaraia lou totona. Dahaka dainai unai be mai anina bada? Baibel ia gwau: “Maino lalonai do umui noho. Bona lalokau bona maino ena Dirava ese umui danu do ia noho.” (2 Korinto 13:11) Unai dainai bema maino dekenai ita noho, maino Diravana be ita danu do ia noho. Iseda tadikaka ita kara henia dalana be mai anina bada Dirava ita tura henia karana dekenai. Edena bamona ita hamomokania diba ita be maino karaia taudia? Haheitalai ta mani ita laloa.
(Iamesi 3:17) To atai amo ia mai aonegana ia abia tauna ena kara ginigunana be inai: Ia kara goeva. Danu ia be maino tauna, ia laloa maoromaoro, hereva ia badinaia haraga, ia be mai ena hebogahisi bada, bona huahua namodia ia hahedinaraia, taunimanima edia toana ia laloa lasi bona ia koikoi lasi.
‘Dirava amo Ia Mai Aonega’ be Emu Mauri Lalonai Oi Badinaia, A?
12 ‘Laloa Maoromaoro.’ Ta ia laloa maoromaoro ena anina be dahaka? Diba bada taudia idia gwau, Iamesi 3:17 dekenai Greek gado herevana idia hahanaia “laloa maoromaoro,” idia hahanaia totona be auka. Gado hahanaia taudia ese hereva haida hegeregere “hebogahisi,” “haheauka,” bona “ma haida laloa bada” karadia idia gaukaralaia. Unai Greek herevana ena anina korikorina be “ma haida edia lalohadai oi abia dae.” Edena bamona ita hahedinaraia diba, aonega ese ia havaraia laloa maoromaoro karana be iseda mauri lalonai ita hahedinaraia noho?
‘Dirava amo Ia Mai Aonega’ be Emu Mauri Lalonai Oi Badinaia, A?
14 “Kamonai haraga.” Greek herevana idia hahanaia “kamonai haraga” be Keristani Greek Revarevadia ena kahana ma haida lalonai do oi davaria lasi. Diba bada tauna ta ia gwau, unai hereva “be nega momo ami taudia idia matahakani henia neganai idia gaukaralaia.” Ia hahedinaraia lalohadaina be inai: “Ta ena lalohadai ia veria haraga” bona ia “kamonai.” To, Dirava ena aonega ese ena mauri ia biagua tauna be Baibel ena hereva ia kamonaia haraga. Ia be inai bamona tauna lasi: gau ta dekenai ena lalona ia hadaia bena gabeai, herevana, idia vara gaudia ese idia hahedinaraia ena lalohadai be kerere, to ia ura lasi ena lalona ia haidaua. To, Baibel ena hamomokania herevadia be ia dekenai idia hahedinaraia ena lalohadai be kerere neganai, ia haidaua haraga. Ma haida ese oi be unai bamona idia laloa, a?
“Mai Ena Hebogahisi, Bona Kara Namodia Ia Havaraia”
15 “Mai ena hebogahisi, bona kara namodia ia havaraia.” Dirava amo ia mai aonega ese ia havaraia mai anina bada karana ta be hebogahisi. Baibel ese “hebogahisi” be “kara namodia” ida ia gwauraia hebou. Unai be maoro, badina nega momo Baibel lalonai hebogahisi ena anina be ma haida laloa bada karana, unai hebogahisi karana ese kara namodia momo ia havaraia. Buka ta ese hebogahisi ena anina be inai bamona ia gwauraia, “tau ta ena noho dalana dikana dainai ma ta ese ia hebogahisi henia bona gau haida ia karaia toho ia durua totona.” Unai dainai, Dirava amo ia mai aonega be ia kara auka lasi, to ia be mai ena hebogahisi bona lalokau, bona ma haida edia hemami ia laloa. Edena bamona ita hahedinaraia diba ita be hebogahisi bada taudia?
(Iamesi 3:17) To atai amo ia mai aonegana ia abia tauna ena kara ginigunana be inai: Ia kara goeva. Danu ia be maino tauna, ia laloa maoromaoro, hereva ia badinaia haraga, ia be mai ena hebogahisi bada, bona huahua namodia ia hahedinaraia, taunimanima edia toana ia laloa lasi bona ia koikoi lasi.
‘Dirava amo Ia Mai Aonega’ be Emu Mauri Lalonai Oi Badinaia, A?
18 ‘Maka tamona amo taunimanima ibounai kara henia.’ Dirava amo ia mai aonega ese bese idaudia taudia lalo-dika henia kava karana bona bese abia isi karana ia dadaraia. Bema unai aonega ese ita ia hakaua, do ita hekwarahi iseda kudouna amo haida sibona kara namo henia lalohadaina do ita kokia. (Iamesi 2:9) Ma haida edia edukeisen, moni, eiava kongregesen lalonai maduna idia abia dainai, idia ita kara namo henia lasi; eiava iseda tadikaka ta ita laloa maragi lasi, herevana idia be ogogami momokani. Bema Iehova ese idia ia lalokau henia, namona be ita danu ese idia ita lalokau henia.
19 ‘Koikoi lasi.’ Greek gado herevana idia hahanaia “koikoi” ese “drama haheitalaia tauna” ia herevalaia. Idaunegai, Greek bona Roma drama gadara taudia be vaira koikoi ena toana idia atoa. Gabeai unai Greek gado herevana ena anina be, toana koikoi hahedinaraia tauna, eiava ma haida koia tauna idia gwauraia. Dirava amo ia mai aonega be ia koikoi lasi, unai ese ita ia durua iseda tadikaka ita kara namo henia bona ita ura henia momokani.
Hakaua Hereva Namodia Tahua
(Iamesi 4:5) Toretore Helagadia ia gwau: “Mama lalohadaina dainai, hanaihanai gau idauidau ura henia karana dekenai ita manada.” Umui laloa unai hereva be anina lasi, a?
Iamesi Bona Petero Bukadia Edia Revareva Edia Hereva Badadia
4:5—Iamesi be edena Buka Helaga ena hereva ia gwauraia? Iamesi be Baibel ena siri ta amo unai hereva ia torea hanai lasi. To, Iamesi be Dirava ena lauma amo unai hereva ia torea, bona ia ese Genese 6:5; 8:21; Aonega Herevadia 21:10; bona Galatia 5:17 ai idia noho hereva edia point badana ia hahedinaraia.
(Iamesi 4:11, 12) Tadikaka e, ta ta do umui gwauraia dika lasi. Tadikaka ta ia gwauraia dika eiava ia hahemaoro henia tauna ese taravatu ia gwauraia dika bona taravatu ia hahemaoro henia. Vadaeni bema taravatu oi hahemaoro henia, oi be taravatu badinaia tauna lasi, to hahemaoro tauna. 12 Taravatu henia tauna bona hahemaoro tauna be tamona, ia ese taunimanima ia hamauria bona ia hadikaia ore diba. To oi be daika, bona emu dekena tauna oi hahemaoro henia?
Abidadama Dainai Ita Haheauka Noho Bona Ita Guriguri Loulou
8 Tadikaka ta oi gwauraia dika be kara dikana. (Iamesi 4:11, 12) To haida be edia Keristani tadikaka idia maumauraia, reana idia laloa edia kara sibona be maoro eiava ma haida hadihoa amo sibodia do idia abia isi. (Salamo 50:20; Aonega Herevadia 3:29) Greek herevana idia hahanaia “gwauraia kerere” ia hahedinaraia ta ese ta ia inai henia bona reana ena kerere ia habadaia eiava ia samania koikoi. Unai be tadikaka hahemaoro henia bona gwauraia dika karana. Edena dala ai unai kara be ‘Taravatu gwauraia kerere bona Taravatu gwauraia dika’ karana? Taravatu hadibaia taudia bona Farisea taudia be ‘Dirava ena taravatu idia negea’ bona edia taravatu amo taunimanima idia hahemaoro henia. (Mareko 7:1-13) Danu, bema tadikaka ta ita gwauraia dika, to unai tadikaka be Iehova ese do ia gwauraia dika lasi, ita be Iehova ena ‘taravatu ita gwauraia dika’ bona mai kara dika ida ita hahedinaraia ita laloa unai taravatu be hegeregere lasi, ani? Bona badina ta lasi dainai iseda tadikaka ita maumauraia neganai, lalokau taravatuna ita hagugurua lasi.—Roma 13:8-10.
Baibel Duahiduahi
OCTOBER 14-20
BAIBEL ENA HEREVA BADADIA | 1 PETERO 1-2
“Do Umui Helaga”
(1 Petero 1:14, 15) Umui be kamonai natudia, unai dainai guna Dirava umui diba lasi neganai umui badinaia ura idauidau umui dadaraia, 15 to umui ia boiria Helaga Tauna hegeregerena, emui kara ibounai lalonai do umui helaga,
Mauri Davalaia Boubouna ‘Harihari Gauna Hereadaena’ Tamana Amo
5 Edena dala ai do ita hahedinaraia ita be Iehova ena ladana ita ura henia? Iseda kara amo. Oibe, Iehova ia ura do ita helaga. (1 Petero 1:15, 16 duahia.) Anina be Iehova sibona do ita tomadiho henia bona mai kudouna ibounai ida ia do ita kamonai henia. Ena be ita idia dagedage henia, to namona be ita hekwarahi iena hakaua herevadia bona taravatu goevadaedia ita badinaia totona. Kara maoromaoro ita karaia neganai, iseda diari ita hahedinaraia bona unai amo Iehova ena ladana ita hanamoa. (Mat. 5:14-16) Ita be helaga taudia dainai, iseda mauri dalana amo do ita hamomokania Iehova ena taravatu be namo bona maoromaoro bona Satani ena samania herevadia be koikoi. Kerere ita karaia neganai, namona be ita helalo-kerehai bona Iehova ena ladana idia hadikaia karadia ita dadaraia.—Sal. 79:9.
(1 Petero 1:16) badina Toretore Helagadia ia gwau: “Do umui helaga, badina lau be lau helaga.”
Moale Karadia Maorodia Abia Hidi Dalana
6 Paulo ese Roma Keristani taudia ia sisiba henia: “Emui mauri [“tauanina ena,” NW] kahana ta umui henia lasi kara dika dekenai, dika do ia karaia totona.” Danu Paulo ese idia ia hamaoroa: “Tauanina ena kara umui hamasea.” (Roma 6:12-14; 8:13) Iena revareva matamanai “tauanina ena kara” ena haheitalai haida ia gwauraia. Kara dika taudia ia herevalaia neganai, ia gwau: “Edia uduna be, taunimanima hadikaia bona hereva dagedage dekenai idia honu. Taunimanima alaia totona, edia aena idia heau haraga.” “Dirava dekenai gari henia kara idia laloa lasi.” (Roma 3:13-18) Keristani tauna be ena tauanina do ia hamiroa bema ena “tauanina ena kahana ta” ia gaukaralaia unai bamona kara dikadia ia karaia totona. Hegeregere, hari bema Keristani tauna ta be mai ena ura ida matabodaga laulaudia o ponografi eiava dagedage muvi ia raraia momo, ia be “[ena matana] ia henia kara dika dekenai” bona iena tauanina ibounai ia hamiroa noho. Tomadiho dalanai ia henia boubou gauna be ia helaga lasi bona Dirava ese do ia abia dae lasi. (Deuteronomi 15:21; 1 Petero 1:14-16; 2 Petero 3:11) Keristani tauna ese moale karadia dikadia ia abia hidi dainai ena hetura karana Iehova ida ia hadikaia diba!
Hakaua Hereva Namodia Tahua
(1 Petero 1:10-12) Peroveta taudia ese do umui abia hebogahisi hereadaena idia perovetalaia, idia ese unai hahemauri ena anina idia henanadailaia bona idia tahua namonamo. 11 Lauma helaga ese idia ia hadibaia vadaeni Keriso be dahaka hisihisi do ia davaria bona unai murinai dahaka hairai gaudia do idia vara. Bona peroveta taudia ese unai gaudia idia tahua noho, idia be edena negai bona edena bamona do idia vara. 12 Dirava ese idia dekenai ia hahedinaraia, unai gaudia be idia totona lasi, to idia be hesiai taudia bamona umui dekenai unai gaudia idia henia. Bona Dirava ese guba amo ia siaia lauma helaga amo, sivarai namona idia gwauraia taudia ese hari umui dekenai unai gaudia idia gwauraia. Aneru be idia ura dikadika unai gaudia idia lalopararalaia.
Iamesi Bona Petero Bukadia Edia Revareva Edia Hereva Badadia
1:10-12. Aneru be idia ura dikadika Dirava ena hereva momokani ena dobu gaudia idia diba, unai gaudia be idaunegai Dirava ena peroveta taudia ese horoa Keristani kongrigeisen totona idia torea. To, unai gaudia be idia hunia ela bona Keristani kongrigeisen ia hamatamaia neganai, Iehova ese ia hahedinaraia. (Efe. 3:10) Aneru edia haheitalai bamona, namona be ita gaukara goada ‘Dirava ena dobu gaudia’ ita diba totona.—1 Kor. 2:10.
(1 Petero 2:25) Badina umui be mamoe bamona, dala maorona amo umui raka siri, to hari umui be mamoe naria tauna dekenai umui giroa lou, ia be emui mauri ia naria tauna.
it-2-E 565 par. 3
Naria Tauna
Naria Tauna Badana. Petero ginigunana 2:25 ese Isaia 53:6 ena hereva ia hahedinaraia ia gwau: “mamoe bamona, dala maorona amo umui raka siri,” bona Petero ma ia gwau: “to hari umui be mamoe naria tauna dekenai umui giroa lou, ia be emui mauri ia naria tauna.” Unai siri rua ese Iehova Dirava ia herevalaia, badina Paulo ese ia tore henia taudia be Keriso Iesu amo idia raka siri lasi, to ia amo Iehova Dirava dekenai idia giroa lou, Ia be ena taunimanima edia Naria Tauna Badana. (Sa 23:1; 80:1; Ier 23:3; Ese 34:12) Danu Iehova be iseda naria tauna bona iseda lalona ia tahua. (Sa 17:3) Inai hereva tahua eiava Greek gado herevana (Gr.,e·pi·sko·peʹ) idia hahanaia neganai ena anina be hahemaoro karana, unai be aposetolo taudia edia negai Ierusalema ai ia vara gauna hegeregerena, badina ia ‘idia sekea’ negana ia diba lasi [Gr.,e·pi·sko·pesʹ]. (Lu 19:44) Eiava Dirava idia hanamoa taudia be “sekea gaukara [Gr.,e·pi·sko·pesʹ]” totona ia mai neganai namo idia davaria diba.—1Pe 2:12.
Baibel Duahiduahi
OCTOBER 21-27
BAIBEL ENA HEREVA BADADIA | 1 PETERO 3-5
“Gau Ibounai edia Dokona be Ia Mai Kahirakahira”
(1 Petero 4:7) Gau ibounai edia dokona be ia mai kahirakahira. Unai dainai do umui laloa maoromaoro bona do umui guriguri noho.
“Do Umui Guriguri Noho”
GUNA hanuaboi ai ia gaukara tauna ta, ia gwau: “Daba kahanai oi noga noho be mai ena hekwarahi.” Hanuaboi ibounai idia noga noho taudia ese iena hereva do idia abia dae danu. Hari iseda nega be unai bamona danu. Ita be Satani ena tanobada dikana ena dibura momokani negana ai ita noho, unai dainai ita noga noho be gau badana. (Roma 13:12) Bema inai nega dokona lalonai ita mahuta, dika bada do ita davaria! Unai dainai, gau badana be do ita “laloa maoromaoro” bona “guriguri noho.”—1 Pet. 4:7.
(1 Petero 4:8) Gau badana be do umui lalokau heheni momokani, badina lalokau ese kara dika momo ia koua.
Lauma Dalanai Oiemu Manoka Gaudia Oi Itaia Bona Oi Hamaoromaoroa Daladia
Danu, namona be aposetolo Petero ese mai lalokau ida ia henia hahegani ita laloatao, ia gwau: “To gau ibounai edia dokona be ia kahirakahira vadaeni. Unai dainai, umui laloa maoromaoro noho, bona guriguri umui goadalaia noho. Gau hereadaena be inai: Umui ura heheni mai emui lalona ibounai ida, badina be lalokau ese kara dika momo ia koudia.” (1 Petero 4:7, 8, NW) Goevadae lasi karadia—ma haida edia bona sibona eda—be iseda kudouna bona lalona ai idia vareai haraga diba bona ita idia hahekwakwanaia. Satani ia diba namonamo unai be taunimanima edia manoka ta. Ia gaukaralaia lalohadaina ta be hapararaia bona hamorua. Unai dainai, gau badana be lalokau goadana amo unai bamona goevadae lasi karadia ita koua haraga bona ‘Satani ena dala do ita kehoa lasi.’—Efeso 4:25-27.
(1 Petero 4:9) Namona be ta ta dekenai heabidae karana umui hahedinaraia, bona umui maumau lasi.
Mai Moale Ida Heabidae Karana Hahedinaraia!
2 Petero ese ena tadikaka ia hagoadadia, ia gwau: “Namona be ta ta dekenai heabidae karana umui hahedinaraia.” (1 Pet. 4:9) Inai hereva “heabidae karana” Greek gado ai ena anina korikori be “ura henia, eiava idau taudia dekenai hebogahisi karana hahedinaraia.” To, Petero ese ena Keristani tadikaka bona taihu ia hagoadadia “ta ta dekenai” heabidae karana idia hahedinaraia, idia diba vadaeni taudia bona idia ida idia hebamo taudia. Edena dala ai heabidae karana ese idia ia durua diba?
3 Unai ese idia ia hatamonaia diba. Mani oi dekenai ia vara ekspiriens oi laloa. Ta ese oi ia boiria ena ruma dekenai oi lao negana oi laloatao, a? Unai nega ai umui moale hebou karana oi do laloa noho, ani? Bona emu kongrigeisen taudia haida ida umui moale hebou neganai, emu hetura karana ia goada, ani? Dala idauidau ai eda tadikaka taihu dekenai heabidae karana ita hahedinaraia neganai, idia do ita diba namonamo. Petero ena negai idia noho Keristani taudia be nega aukadia ai idia noho dainai, edia hetura karana ia goada be namo. Hari inai “dina gabedia ai” Keristani taudia korikoridia ese unai idia karaia danu be namo.—2 Tim. 3:1.
Hakaua Hereva Namodia Tahua
(1 Petero 3:19, 20) Bena ia lao bona dibura ruma ai idia noho lauma dekenai ia haroro. 20 Noa ena negai unai lauma be idia kamonai lasi, to Dirava be mai haheauka ida ia naria. Unai nega ai Noa be lagatoi ia karaia, bona ia lalonai idia be momo lasi, to taunimanima 8 sibona be abata amo idia roho mauri.
Duahia Taudia Edia Henanadai
Baibel ia gwau Iesu “ia lao bona dibura ruma ai idia noho lauma dekenai ia haroro.” (1 Pet. 3:19) Unai ena anina be dahaka?
▪ Aposetolo Petero ia gwau: “Noa ena negai unai lauma be idia kamonai lasi, to Dirava be mai haheauka ida ia naria.” (1 Pet. 3:20) Unai ese ia hahedinaraia, Petero ese ia herevalaidia lauma be Satani idia bamoa aneru. Iuda ia gwau aneru haida be “edia gaukara korikorina idia dogoatao lasi, to edia gabu maorona idia rakatania, bona Dirava ese auri seini amo idia ia guia bona dibura masemase lalonai do idia noho ela bona hahemaoro dina badana.”—Iuda 6.
Edena dala ai Noa ena negai idia noho aneru be Dirava idia badinaia lasi? Abata be do lasi neganai, unai lauma dikadia be taunimanima edia tauanina idia abia—Dirava ese idia be unai bamona ia karaia lasi. (Gen. 6:2, 4) Danu, unai aneru be matabodaga karadia idia karaia, badina hahine danu idia mahuta hebou. To, Dirava ese aneru ia karaia neganai, unai ura be edia lalonai ia atoa lasi. (Gen. 5:2) Unai gwau-edeede aneru dikadia be Dirava ese ena nega korikori ai do ia haoredia. To hari, Iuda ia hereva bamona, idia be “dibura masemase” lalonai idia noho, anina be Dirava ese idia ia dadaraia vaitani.
Edena nega ai bona edena dala ai Iesu ese “dibura ruma ai idia noho lauma” ia haroro henidia? Petero ia gwau, Iesu be “lauma tauanina ai ia toreisi lou” murinai unai ia karaia. (1 Pet. 3:18, 19) Unai ese ia hahedinaraia, Iesu ese unai lauma dikadia ia “haroro” henidia guna, bena Petero ese ena revareva ginigunana ia torea. Toana be Iesu ia toreisi lou murinai, unai lauma dikadia dekenai Dirava ese idia do ia panisia karana ia harorolaia. Ia be helaro ta ia gwauraia lasi, to hahemaoro herevana ia harorolaia. (Iona 1:1, 2) Iesu be Dirava ia abidadama henia bona ia badinaia ela bona ia mase, bena ia toreisi lou dainai, Diabolo be hegeregere lasi Iesu ia hadikaia orea totona. Ita gwau diba, Iesu be mai ena maoro unai haroro herevana ia gwauraia totona.—Ioa. 14:30; 16:8-11.
Vaira nega ai, Iesu ese Satani bona ena aneru do ia guia bona guri dobu masemase lalonai do ia negedia. (Luka 8:30, 31; Apok. 20:1-3) To, Iesu ese idia ia do guia lasi neganai, unai gwau-edeede lauma dikadia be dibura masemase gabunai idia noho. Gabeai, Iesu ese idia do ia haorea momokani.—Apok. 20:7-10.
(1 Petero 4:6) Oibe, unai badina dainai sivarai namona be mase taudia dekenai idia harorolaia danu, unai dainai herevana taunimanima ese edia lalohadai hegeregerena idia hahemaoro henidia, to Dirava ena matanai idia be iena lauma ese ia hakaua hegeregerena idia mauri diba.
Iamesi Bona Petero Bukadia Edia Revareva Edia Hereva Badadia
4:6, BHğ—“Mase taudia” dekenai “Sivarai Namona idia harorolaia.” Unai mase taudia be daidia? Idia be guna ‘edia kara dika bona kerere dainai idia mase,’ eiava sivarai namona idia diba lasi bona Iehova idia tura henia lasi dainai idia be idia mase bamona. (Efe. 2:1) To, sivarai namona idia abia dae murinai, “mauri idia davaria” bona Iehova idia tura henia diba.
Baibel Duahiduahi
OCTOBER 28–NOVEMBER 3
BAIBEL ENA HEREVA BADADIA | 2 PETERO 1-3
Iehova Ena Dina Ia mai Negana Umui Laloa Noho
(2 Petero 3:9, 10) Iehova be ena gwauhamata hagugurua totona ia metairametaira lasi, haida idia laloa bamona, to umui dekenai ia haheauka, badina ia ura lasi tau ta ia mase, to ia ura taunimanima ibounai idia helalo-kerehai. 10 Iehova ena dina be henaohenao tauna bamona do ia mai, unai nega ai guba be mai rege bada ida do ia ore haraga, to guba bona tanobada gaudia be do idia siahu momokani bona do idia veve, bona tanobada bona ia lalonai idia noho gaudia be lahi ese do ia araia ore.
Iehova be Kota Maoromaoro Do Ia Karaia
11 Iesu ia gwau Iehova be kota maoromaoro do ia henia “haraga”; unai ena anina be dahaka? Baibel ia gwau, ena be Iehova ia “haheauka,” to ia be nega korikori ai kota maoromaoro do ia karaia. (Luka 18:7, 8, NW; 2 Petero 3:9, 10) Noa ena negai, Abata ia ginidae neganai, kara dika taudia idia ore haraga. Danu Lota ena negai, lahi be guba amo ia diho neganai, kara dika taudia idia mase ore. Iesu ia gwau: “Taunimanima ena Natuna do ia hedinarai dina dekenai danu, unai bamona kara do ia vara.” (Luka 17:27-30) Unai ena anina be, kara dika taudia dekenai “karaharaga hisihisi dika momokani bona mase do ia ginidae.” (1 Tesalonika 5:2, 3) Oibe, namona be ita abia dae momokani Iehova ese Satani ena tanobada do ia kota henia dinana be do ia ginidae haraga.
(2 Petero 3:11, 12) Unai gaudia ibounai be inai dala ai do idia veve ore dainai, namona be emui kara idia helaga bona Dirava badinaia karadia umui hahedinaraia. 12 Bona Iehova ena dina ia mai negana umui naria bona umui laloa noho. Unai nega ai guba be lahi ese do ia araia ore, bona guba bona tanobada gaudia be do idia siahu momokani bona do idia veve!
Iehova Ena Dina Badana be Kahirakahira
18 Unai dainai, aposetolo Petero ese ita ia hadibaia herevana be inai: “[Iehova] ena Dina do umui naria noho, bona do ia ginidae haraga totona do umui gaukara goada noho.” Edena dala ai unai ita karaia diba? Dala ta be, “iseda kara ibounai do idia helaga be namo, bona Dirava do ita badinaia namonamo.” (2 Petero 3:11, 12) Unai bamona ita karaia neganai, unai ese ita do ia durua Iehova ena dina ita naria noho totona. Momokani, ita ese Iehova ena dina do ia ginidae negana ita haharagaia diba lasi. To, Iehova ena dina ita naria noho lalonai, toana be nega do ia heau haraga bema Dirava ena hesiai gaukara ita karaia goadagoada.—1 Korinto 15:58.
Hakaua Hereva Namodia Tahua
(2 Petero 1:19) Vadaeni, unai ese emai abidadama peroveta herevadia dekenai ia hagoadaia momokani. Umui ese unai peroveta herevadia umui badinaia namonamo, ia be lamepa bamona emui kudouna ena dibura gabuna ia hadiaria, ela bona daba ia rere bona daba hisiuna ia hedinarai.
Iamesi Bona Petero Bukadia Edia Revareva Edia Hereva Badadia
1:19—“Daba ena hisiu bada” be daika? Edena negai ia toreisi, bona edena bamona ita diba unai ia vara? Iesu Keriso be Dirava ena Basileia ena King ai ia lao murinai, ia be unai “daba ena hisiu bada.” (Apok. 22:16) Lagani 1914 ai, Iesu be Mesia King ai ia lao neganai, unai be dina matamata ta ia matamaia. Iesu ena toana ia idau matahanaina ese ia hahedinaraia vaira nega ai ia be Basileia ena hairai do ia abia, unai ese Dirava ena peroveta herevana do ia hamomokania. Unai peroveta herevana ita kamonai namonamo neganai, do ita diba Daba ena Hisiu Bada be hari ia diari noho.
(2 Petero 2:4) Dirava ese idia kara dika aneru ia panisidia bona Tataros dekenai ia negedia. Bona ia ese dibura masemase gurina dekenai ia atodia, unuseniai do idia noho ela bona hahemaoro negana.
w08-E 11/15 22 par. 3
Iamesi Bona Petero Bukadia Edia Revareva Edia Hereva Badadia
2:4—“Tataros” ena anina be dahaka, bona edena nega ai gwau-edeede anerudia be unuseniai idia negea? Tataros be gabu korikorina ta lasi; ia be dibura bamona gabuna ta bona lauma taudia sibona be unai gabu dekena idia atoa, to taunimanima lasi. Dirava ese edia lalona ia hadiburaia bona ena ura idia diba lasi. Tataros ai idia noho lauma taudia be helaro lasi. Noa ena negai Dirava ese gwau-edeede anerudia be Tataros dekenai ia negedia, bona unuseniai do idia noho ela bona Dirava ese idia ia hadikaia ore.
Baibel Duahiduahi