Iseda Haroro Bona Mauri Dalana Hebou Pepana Edia Referens
MARCH 7-13
BAIBEL ENA HEREVA BADADIA | 1 SAMUELA 12-13
“Hekokoroku ese Hemarai Do ia Havaraia”
Hekokoroku ese Hemarai Do Ia Havaraia
17 Matamanai ita laloa neganai, reana do ita laloa Saulo ena kara ia maoro. Unai neganai, Dirava ena taunimanima idia itaia “dika bada herea be kahirakahira,” idia hekwarahi bada bona “gari dekenai idia heudeheude.” (1 Samuela 13:6, 7) Momokani, nega haida gau haida idia vara dainai kara ta ita karaia be namo. To laloaboio lasi, Iehova ese iseda kudouna ia duahia diba bona iseda kara ena badina korikorina ia itaia. (1 Samuela 16:7) Unai dainai, Saulo ena kara ma haida, Baibel ena sivarai ese ia gwauraia lasi gaudia, ia itaia. Hegeregere, reana Iehova ia itaia Saulo ena haheauka lasi karana ena badina be hekokoroku. Reana Saulo ia badu badina ia—Israela ibounai ena king—ese ia mai haraga lasi peroveta tauna burukana ia naria noho! Herevana, Saulo ia laloa Samuela ia mai haraga lasi dainai ia be mai ena maoro ia sibona ese kara ta do ia karaia bona ia abia oda ia negea diba. Dahaka ia vara? Samuela ese Saulo ena kara ia hanamoa lasi. Saulo ia gwau henia, ia gwau: “Oiemu basileia do ia noho daudau lasi. Lohiabada dekenai oi kamonai henia lasi dainai.” (1 Samuela 13:13, 14) Unai neganai danu, hekokoroku ese hemarai ia havaraia.
Iehova be Oiemu Kamonai Karana Ia Laloa Bada
8 King Saulo ena sivarai ese ia hahedinaraia kamonai karana be mai anina bada. Guna, ia be manau lohia tauna ta. To gabeai, hekokoroku bona lalohadai kereredia dainai abia hidi kereredia ia karaia. (1 Samuela 10:21, 22; 15:17) Nega ta Saulo be Pilistia taudia danu do idia tuari. Peroveta tauna Samuela ese Saulo ia hamaoroa ia do ia naria, bona ia mai neganai Iehova dekenai boubou gauna do ia gabua bona Saulo do ia hamaoroa dahaka do ia karaia. To, Samuela ia mai haraga lasi dainai, Israela taudia be idia giroa lao edia ruma dekenai. Saulo be unai ia itaia neganai, “ia ese gabua boubouna ia karaia.” Iehova be unai kara ia moalelaia lasi. Samuela ia ginidae neganai, King Saulo be iena kamonai lasi karana dainai ekskius herevadia ia gwauraia. Ia gwau Samuela ia mai haraga lasi bona ia laloa momo dainai, Iehova ena lalonamo ia abia totona boubou gauna ia gabua. King Saulo be boubou gauna ia laloa bada, to Samuela ena hereva badinaia karana ia laloa maragi. Samuela ese ia hamaoroa: “Oi be kara kavakava oi karaia vadaeni. Lohiabada, oiemu Dirava ena oda hereva, oi dekenai ia henia gauna, be oi kamonai henia lasi.” Saulo be Iehova ia kamonai lasi dainai iena lohia dagina ia haboioa.—1 Samuela 10:8; 13:5-13.
Hakaua Hereva Namodia
Iehova Ena Hakaua Dalana Do Oi Badinaia, A?
15 Israela taudia idia laloa idia abia hidi king ese idia do ia durua bada, badina idia ese unai king idia itaia diba, to Iehova be idia itaia lasi. To madi, edia matana ese ia koidia dainai, idia badinaia gauna be anina lasi gauna ai ia lao! Idia be Satani ese ia havaraia lalohadai koikoina idia badinaia. Unai king idauidau ese edia lalona ia veria kaivakuku idia tomadiho henia totona. Kaivakuku idia tomadiho henia taudia idia laloa au o nadi amo idia karaia diravana ese idia ia durua diba. To idia itaia diba lasi Diravana, Iehova, gau ibounai ia havaraia tauna be idia abidadama henia lasi. Aposetolo Paulo ena hereva bamona edia kaivakuku be “anina lasi.” (1 Kor. 8:4) Kaivakuku be gau ta idia itaia bona kamonai diba lasi, idia hereva diba lasi bona gau ta idia karaia diba lasi. Namo lasi ita laloa kaivakuku ta ita itaia bona dogoatao dainai, ita tomadiho henia be kerere lasi. Unai be kavakava lalohadaina. Badina kaivakuku idia tomadiho henia taudia be kaivakuku hegeregerena ai do idia lao.—Sal. 115:4-8.
MARCH 14-20
BAIBEL ENA HEREVA BADADIA | 1 SAMUELA 14-15
“Kamonai Karana ese Boubou Karana ia Hereaia”
Iehova be Oiemu Kamonai Karana Ia Laloa Bada
4 Iehova be Havaraia Tauna dainai, ita dekenai idia noho gaudia ibounai be iena. Unai dainai, ia dekenai gau ta ita henia diba, a? Oibe, Dirava dekenai mai anina bada gauna ta ita henia diba. Unai be dahaka? Haere be inai sisiba amo ita davaria diba: “Egu natuna e, do oi aonega, vadaeni do lau moale, bona unai dainai, bema tau ta ese lau ia gwauraia kerere neganai, lau ese iena hereva do lau halusia diba.” (Aonega Herevadia 27:11) Oibe, Dirava ita kamonai henia diba. Satani ia gwau taunimanima be hahetoho idia davaria neganai, Dirava do idia rakatania. To, herevana iseda mauri daladia be idauidau, bema Dirava ita kamonai henia, ita ta ta be Satani Diabolo ena hereva ita hakoikoia diba. Unai be hahenamo badana ta!
it-2 521 par. 2
Obedience
There is no substitute for obedience, no gaining of God’s favor without it. As Samuel told King Saul: “Does Jehovah have as much delight in burnt offerings and sacrifices as in obeying [form of sha·maʽʹ] the voice of Jehovah? Look! To obey [literally, to listen] is better than a sacrifice, to pay attention than the fat of rams.” (1Sa 15:22) To fail to obey is to reject the word of Jehovah, to demonstrate that one really does not believe, trust, or have faith in that word and its Source. Hence the one failing to obey is no different from the one practicing divination or using idols. (1Sa 15:23; compare Ro 6:16.) Verbal expressions of assent mean nothing if the required action does not follow; the lack of response proves a lack of belief or respect for the source of instructions. (Mt 21:28-32) Those satisfying themselves with only hearing and giving mental acceptance to God’s truth, but not doing what it calls for, are deceiving themselves with false reasoning and receive no blessing. (Jas 1:22-25) God’s Son made clear that even those doing things similar to those commanded, but evidently in a wrong way or with a wrong motive, would never gain entrance into the Kingdom but would be completely rejected.—Mt 7:15-23.
Hakaua Hereva Namodia
Iehova Ena Hebogahisi Karana Tohotohoa
10 To namo lasi ita laloa ita ese nega ibounai hebogahisi ita hahedinaraia be namo. Atai ita herevalaia Baibel sivaraidia ai Dirava ese hebogahisi ia hahedinaraia be maoro. To King Saulo be ia gwau-edeede, ena be ia laloa ia ese hebogahisi karana ia hahedinaraia. Ia ese Dirava ena taunimanima edia inai tauna, Agaga, ia hamauria, bona edia animal namodia ia alaia lasi. Unai dainai Iehova ese Saulo ia dadaraia, bona Israela ia lohiaia noho lasi. (1 Sam. 15:3, 9, 15) Momokani, Iehova be kara maoromaoro Diadi. Ia be taunimanima edia kudouna ia itaia, bona ia diba edena negai hebogahisi ia hahedinaraia be maoro. (Lal. 2:17; Ese. 5:11) Kahirakahira ia ese ia idia kamonai henia lasi taudia ibounai do ia hahemaoro henia. (2 Tes. 1:6-10) Unai nega ai ia ese kara dika taudia do ia hebogahisi henia lasi. To idia ibounai do ia hadikaia ore, unai amo ia ese kara maoromaoro taudia dekenai hebogahisi do ia hahedinaraia, bona idia do ia hamauria.
MARCH 21-27
BAIBEL ENA HEREVA BADADIA | 1 SAMUELA 16-17
“Tuari be Iehova Ena”
wp16.4 11 par. 2-3
“Tuari be Lohiabada Ena”
Davida ese Saulo ena lalona hagoadaia totona laiona bona bea ia alaia ena sivarai ia gwauraia. Davida be ia hekokoroku, a? Lasi. Davida ia diba dahaka dainai laiona bona bea ia alaia diba. Ia gwau: “Lohiabada ese laiona bona bea dekena amo lau ia hamauria vadaeni. Lau diba momokani, Lohiabada ese inai Pilistia tauna danu, iena imana dekena amo lau do ia hamauria.” Unai dainai Saulo ia haere ia gwau: “Vadaeni, oi lao, bona Lohiabada ese oi dekenai do ia noho.”—1 Samuela 17:37.
Oi ura emu abidadama be Davida ena bamona, a? Laloatao, Davida be ena lalona dekenai ia abidadama kava lasi. Ia be mai ena abidadama badina ena Dirava ia diba bona ena mauri ai Dirava ese ia durua dainai. Ia diba Iehova be lalokau Gimaia Tauna bona gwauhamata Hagugurua Tauna. Bema ita ura unai bamona abidadama karana ita hahedinaraia, namona be hanaihanai Baibel ese ia herevalaia Diravana ita dibaia. Ita dibaia gaudia ita badinaia neganai, do ita itaia ita dekenai idia vara gau namodia ese iseda abidadama ia hagoadaia diba.—Heberu 11:1.
wp16.4 11 par. 8-9
“Tuari be Lohiabada Ena”
Ema bona hari Davida ena haere karana ese abidadama goadana ia hahedinaraia. Mani oi laloa unai matamata tauna be Goliata dekenai ia boiboi, ia gwau: “Oi be mai oiemu tuari kaia, bona mai oiemu io, bona mai oiemu auri labora io ta danu lau dekenai oi mai, to lau be Lohiabada Dirava ena ladana dainai oi dekenai lau raka mai inai. Ia be Israela tuari orea, oi ese oi boiboi dika henia taudia edia Dirava.” Davida ia diba taunimanima edia goada bona edia tuari gaudia be anina lasi. Goliata be Iehova Dirava ia matauraia lasi bona Iehova ese ena dika davana do ia henia. Davida ia hereva bamona “tuari be [Iehova] ena.”—1 Samuela 17:45-47.
Davida be Goliata ena bada bona ena tuari gaudia ia itaia. To unai gaudia dainai ia gari lasi. Ia be Saulo bona ena tuari taudia bamona lasi. Davida be Goliata ida sibona ia hahegeregerea lasi. To, ia ese Goliata be Iehova ia hahegeregerea. Ena be taunimanima haida amo Goliata ena lata be mita 2.9 bamona, to ia ese Atai Momokani Diravana ia hereaia lasi. Ia be taunimanima ibounai bamona, Iehova matanai ia be dimairi ta bamona—bona do ia hamasea!
wp16.4 12 par. 4
“Tuari be Lohiabada Ena”
Hari, Dirava ena hesiai taudia be tuari lalonai idia vareai lasi. Unai nega be ia ore vadaeni. (Mataio 26:52) To, namona be Davida ena abidadama karana ita tohotohoa. Ia hegeregerena, namona be ita abia dae momokani Dirava be ia mauri noho—ia sibona do ita hesiai henia bona gari henia. Nega haida ita mamia ita be hegeregere lasi eda hekwakwanai ita hanaia totona, to Iehova ena siahu ese ita davaria hekwakwanai ia hereaia. Davida bamona, bema Iehova be iseda Dirava ai ita halaoa bona ita abidadama henia, hahetoho bona hekwakwanai ta lasi ese ita do ia hagaria. Iehova ena siahu be gau ta ese ia hereaia diba lasi!
Hakaua Hereva Namodia
Samuela Ginigunana Bukana Ena Hereva Badadia
16:14—Dahaka “lauma dikana” ese Saulo ia hahisia? Saulo ena lalona ia hadikaia lauma dikana be ena lalona bona kudouna ai ia noho lalohadai dikana—kara dika karaia urana unai. Iehova ese ena lauma helaga ia kokia neganai, Saulo ia gimaia lou lasi bona unai lauma dikana ese Saulo ia biagua. Dirava ese lauma helaga ia kokia bona Saulo ese unai lauma dikana ia abia neganai, unai lauma dikana idia gwauraia “Lohiabada ese ia siaia gauna.”
MARCH 28–APRIL 3
BAIBEL ENA HEREVA BADADIA | 1 SAMUELA 18-19
“Hahenamo Oi Abia Neganai Oi Manau”
Emu Mauri Ia Idau Ia Lao Lalonai, Dirava Ena Lauma Dekenai Oi Tabekau
4 Gabeai unai mamoe naria merona be ena bese taudia ese idia diba momo tauna ta ai do ia lao. King hesiai henia bona ia dekenai miusiki gadaralaia totona ia idia boiria. Ia ese tuari tauna Goliata, Israela ena manada tuari taudia danu ese idia gari henia tauna badana, ia hamasea. Tuari taudia edia biaguna ai idia halaoa neganai, Davida ese Pilistia taudia ia halusia. Taunimanima ese ia idia lalokau henia. Ia hanamoa anedia idia karaia. Guna, King Saulo ia durua tauna ta ese mero matamata Davida be “gita gadaralaia diba momo” tauna sibona ia gwauraia lasi, to danu, ia gwau ia “be goada tauna, bona tuari diba tauna. Iena hereva be namo, bona iena toana danu be namo.”—1 Samuela 16:18; 17:23, 24, 45-51; 18:5-7.
Taunimanima Edia Kara Ena Idau Itaia
6 Taunimanima haida idia hekokoroku, badina idia be hairai, edia sivarai be bada, miusiki idia diba momo, edia tauanina be goada, eiava edia dagi be bada. Davida be unai bamona tauna ta, to ena mauri ibounai lalonai ia manau. Goliata ia alaia mase bona ia dekenai King Saulo ena natuna kekeni idia henia murinai, Davida ia gwau: “Lau be daika, bona lauegu varavara taudia be daika, bona unai dainai lau be king ena ravana do lau lao?” (1 Sam. 18:18) Dahaka dainai Davida ia manau? Badina ia diba Dirava be “iena kwarana ia atoa diho” o ia manau dainai, ia karaia karana ia karaia bona unai hahenamo ia abia. (Sal. 113:5-8) Davida ia diba ia karaia gau namodia ibounai be Iehova amo.—1 Korinto 4:7 sekea.
7 Davida hegeregerena, Iehova ena taunimanima be idia hekwarahi manau idia hahedinaraia totona. Ita moale badina Iehova, guba bona tanobada edia Lohiabada, be manau Diravana. (Sal. 18:35) Namona be inai sisiba ita badinaia: “Inai bamona kara be dabua bamona do umui hahedokilaia, hebogahisi mai lalokauna, hariharibada, lalomanau, manau, bona boga-auka.” (Kol. 3:12) Danu, ita diba “lalokau be ia mama lasi, ia heagi lasi, bona ia hekokoroku lasi.” (1 Kor. 13:4) Ita manau neganai, taunimanima be Iehova dekenai ita veria mai diba. Hahine ese edia kara amo edia adavadia idia durua diba abidadama taudia ai idia lao totona, unai hegeregerena, Dirava ena taunimanima edia manau karana dainai, ma haida be abidadama taudia ai idia lao diba.—1 Pet. 3:1.
Hakaua Hereva Namodia
it-2-E 695-696
Peroveta Tauna
Ena be peroveta taudia be Iehova ena lauma helaga ese ia abia hidi, to unai ese ia hahedinaraia lasi idia be nega ibounai lauma helaga ena hakaua henunai idia hereva. To, Dirava ena ‘lauma helaga idia mamia’ negadia sibona ai peroveta herevadia idia gwauraia. (Ese 11:4, 5; Mi 3:8) Lauma helaga ese idia ia hakaua dainai, peroveta herevadia idia gwauraia diba. (1Sa 10:10; Ier 20:9; Am 3:8) Idia be hoa karadia sibona idia karaia lasi, to edia hereva bona kara ese mai anina bada gaudia ia hahedinaraia danu. Bona unai ese “peroveta taudia bamona idia kara” taudia ia herevalaia. (1Sa 10:6-11; 19:20-24; Ier 29:24-32; inai siri Ka 2:4, 12-17; 6:15; 7:55 hahegeregerea.) Peroveta taudia be mai ura ida edia gaukara idia karaia dainai nega haida edia kara be do ia idau, ma haida do idia laloa idia kava, peroveta tauna ta ese Iehu be king totona ia abia hidi neganai tuari biagudia be unai bamona idia laloa. To, tuari biagudia idia laloparara ia be peroveta tauna neganai ia gwauraia herevana idia abia dae. (2Ki 9:1-13; inai siri Ka 26:24, 25 hahegeregerea.) Saulo be Davida ia tahua noho neganai, lauma helaga ena siahu amo ‘peroveta tauna bamona ia kara’ bona “dabua lasi ida ia hekure, unai dina ibounai bona hanuaboi ibounai” bena Davida be unai negai ia heau boio. (1Sa 19:18–20:1) Unai ese ia hahedinaraia lasi peroveta taudia be hanaihanai kopina kavakava idia lao, badina Baibel be unai bamona ia hereva lasi. Baibel ese peroveta tauna be nega idaudia rua ai kopina kavakava ia lao ena sivarai ia gwauraia, peroveta herevana ena anina ia haheitalaia totona. (Isa 20:2-4; Mi 1:8-11) Saulo be kopina kavakava ia noho—reana unai amo do ia diba ia be taunimanima sibona, iena king dagi amo idia kokia, eiava Iehova ena lohia dalana ia dadaraia dainai—Baibel ese ena badina ia gwauraia lasi.
APRIL 4-10
BAIBEL ENA HEREVA BADADIA | 1 SAMUELA 20-22
“Tura Namona Ta ai Oi Lao Dalana”
Dokona Ia Do Vara Lasi Lalonai, Ma Haida Ida Hetura Karana Hagoadaia
18 Hari, iseda tadikaka taihu be hekwakwanai idauidau idia davaria. Hegeregere, momo be disasta eiava taunimanima ese idia havaraia hisihisi idauidau idia davaria noho. Iseda tadikaka taihu dekenai unai ia vara neganai, ita haida ese iseda ruma dekenai idia ita abia dae diba. Eiava ma haida be reana moni dalanai heduru ita henia diba. To, ita ibounai ese Iehova ita noia diba iseda tadikaka taihu ia durua totona. Bema ita itaia iseda tadikaka eiava taihu ta be ia lalomanoka, reana ita diba lasi dahaka do ita gwauraia eiava dahaka do ita karaia. To, ita ibounai ese heduru ita henia diba. Hegeregere, nega ita atoa iseda turana ita vadivadi henia totona. Danu, idia hereva neganai ita kamonai namonamo, bona hagoadaia Baibel siri ta ita herevalaia diba. (Isa. 50:4) Mai anina bada gauna be, emu turadia be heduru idia ura neganai, oi be idia ida oi noho.—Aonega Herevadia 17:17 duahia.
Iehova Ena Dala Dekenai Ita Raka
7 Dirava ia ura ita, Iena turana be iseda hereva ita hamomokania. (Aon. 17:17) King Saulo ena natuna Ionatana be Davida ena turana. Ionatana ia kamonai Davida be Goliata ia alaia neganai, “Ionatana ese Davida ia lalokau henia, ia sibona ia lalokau henia hegeregere.” (1 Sam. 18:1, 3) Nega ta, Ionatana be Davida ia hadibaia Saulo be ia ura Davida ia alaia mase. Davida ia heau neganai, Ionatana be Davida ida idia hedavari bona gwauhamata ta idia karaia. Ena be Ionatana ese Davida ia herevalaia dainai kahirakahira Saulo ese ia hamasea, to Ionatana be Davida ida ia hedavari bona idia hetura lou. (1 Sam. 20:24-41) Edia hedavari ginigabena ai, Ionatana ese Davida ia hagoadaia “Dirava” ia abidadama henia noho totona.—1 Sam. 23:16-18.
Lalokau Lasi Tanobadana ai Hetura Karana Hagoadaia Dalana
11 Nega ibounai emu turana oi durua. Solomona ia gwau: “Tau ta ena turana ese ia lalokau henia noho, nega ibounai, bona nega dika ia vara neganai, oiemu tadikakana ese iena lalokau ia hedinaraia noho.” (Aon. 17:17) Solomona ese unai hereva ia torea neganai, reana ia be ena tamana Davida bona Ionatana huanai ia noho hetura karana ia laloa. (1 Sam. 18:1) King Saulo ia ura ena natuna Ionatana be Israela ena lohia dagina do ia abia. To, Ionatana ia diba Iehova ese Davida ia abia hidi king ai do ia lao totona. Saulo be Davida dekenai ia mama, to Ionatana be unai bamona ia karaia lasi. Israela taudia be Davida ena ladana idia abia isi neganai Ionatana ia mama lasi, bona Saulo ese Davida ena ladana ia hadikaia neganai, Ionatana be unai hereva ia abia dae lasi. (1 Sam. 20:24-34) Ita be Ionatana bamona, a? Eda turana be hahenamo ta ia abia neganai, ia dainai ita moale, a? Lalometau o hisihisi ia davaria neganai, ita hagoadaia bona durua, a? Haida ese eda turana idia udu maurilaia neganai, unai ita abia dae haraga, a? O Ionatana hegeregerena, iseda turana ita durua?
Hakaua Hereva Namodia
Samuela Ginigunana Bukana Ena Hereva Badadia
21:12, 13. Iehova ia ura iseda lalona bona diba ita gaukaralaia iseda mauri lalonai hekwakwanai aukadia ita hanaia totona. Ita dekenai ena lauma ese ia havaraia Hereva ia henia, unai ese aonega bona diba ia henia. (Aonega Herevadia 1:4) Idia abia hidi Keristani elda amo heduru ita abia danu.
APRIL 18-24
BAIBEL ENA HEREVA BADADIA | 1 SAMUELA 23-24
“Mai Haheauka Ida Iehova Oi Naria”
Emu Mauri Ia Idau Ia Lao Lalonai, Dirava Ena Lauma Dekenai Oi Tabekau
8 Davida ia ura lasi Saulo ia hadikaia. Ia ese abidadama bona haheauka ia hahedinaraia bona gau ibounai be Iehova ena imana dekenai ia rakatania. King be kohua ia rakatania murinai, Davida be ia dekenai ia boiboi, ia gwau: “Lohiabada ese ita ruaosi do ia kota henia, do ia gwau daika ia kerere. Lohiabada ese oi do ia hadikaia, lau oi hadikaia kerere dainai, to lau ese oi do lau hadikaia lasi.” (1 Samuela 24:12) Ena be Davida ia diba Saulo ia kerere, to davana ia henia lasi; bona Saulo ia gwauraia dika lasi bona ia dekenai ia hereva dika lasi. Nega ma haida ai, Davida ese davana henia karana ia karaia lasi. To, Iehova dekenai ia tabekau, unai do Ia hamaoromaoroa totona.—1 Samuela 25:32-34; 26:10, 11.
Namona be Haheauka ese Ena Gaukara Ia Hagugurua
15 Iamesi ia gwau: “Namona be haheauka ese ena gaukara ia hagugurua.” Haheauka ese edena “gaukara” do ia hagugurua? Ita ia durua, unai amo ‘gau ibounai do ita karaia namonamo, gau ta dekenai do ita dabu lasi.’ (Iam. 1:4) Nega momo hahetoho ese iseda manoka gaudia ia hahedinaraia. Unai dainai bema ita haheauka, iseda Keristani kara namodia ia hagoadaia diba. Hegeregere, do ita boga-auka, moale, bona hebogahisi do ita hahedinaraia.
16 Haheauka karana ese ita ia durua Keristani tauna namona ai ita lao totona, unai dainai namo lasi Baibel ena hakaua herevadia ita utua, badina ita ura hahetoho ta ita hanaia. Hegeregere, edena dala ai lalohadai dikadia do oi koua? Namo lasi unai tarapu lalonai oi moru, to mai guriguri ida unai ura dikana oi dadaraia. Unai dala amo sibona oi biagua diba. Emu famili lalonai ta ese oi ia dagedage henia noho, a? Oi gini goada bona mai kudouna ibounai ida Iehova oi tomadiho henia. Unai amo emu abidadama Iehova dekenai do ia goada. Laloatao: Dirava ena lalonamo ita abia totona, ita haheauka be namo.—Roma 5:3-5; Iam. 1:12.
Hakaua Hereva Namodia
Namo Lasi Gau ta ese Oi Ia Koua Bena Davana Oi Abia Lasi
11 Bema ita hekwarahi lalokau bona hebogahisi ita hahedinaraia totona, do ita mama lasi. Baibel ia gwau: “Lalokau be ia boga-auka, bona ia hebogahisi. Lalokau be ia mama lasi.” (1 Kor. 13:4) Ita mama lasi totona, namona be Dirava ena lalohadai ita abia dae, bona iseda tadikaka taihu ita lalodia hegeregere ita be tauanina tamona. Bona ita hebogahisi henidia. Baibel ia gwau: “Bema tauanina ena kahana ta be hairai ia abia, ma kahana ibounai be ia ida idia moale.” (1 Kor. 12:16-18, 26) Unai dainai, haida ese hahenamo idia abia neganai, ita mama henidia lasi, to idia ida ita moale hebou. King Saulo ena natuna Ionatana mani oi laloa. Dirava ese Davida ia abia hidi King ai do ia lao neganai, Ionatana be ia mama lasi. To, Davida ia hagoadaia. (1 Sam. 23:16-18) Ionatana hegeregerena, hebogahisi bona lalokau do ita hahedinaraia, a?
APRIL 25–MAY 1
BAIBEL ENA HEREVA BADADIA | 1 SAMUELA 25-26
“Oi be Karaharaga Tauna, A?”
ia-E 78 10-12
Mai Aonega Ida Ia Kara
10 Idia gaukara goada tuari taudia ese mamoe bona mamoe naria taudia be edena bamona idia kara henia? Tuari taudia be edia ura hegeregerena mamoe idia alaia bona ania diba, to unai bamona idia karaia lasi. To idia be magu ta bamona Nabala ena mamoe bona ena hesiai taudia idia gimaia. (1 Samuela 25:15, 16 duahia.) Mamoe bona mamoe naria taudia be dika momo idia davaria. Dagedage taudia be momo, bona Israela ena saut kahana ena boda be kahirakahira dainai, gabu ma haida amo idia mai ala-ala bona henaohenao taudia ese idia hahisidia momo.
11 Reana taunimanima lasi gabuna ai unai tatau ubua totona be gaukara badana. Unai dainai, Davida be nega ta Nabala amo heduru noia totona tatau ten ia siaia. Davida be mai aonega ida nega maorona ia abia hidi. Unai be mamoe huina utua bona taunimanima dekenai harihari bada karana idia hahedinaraia bona aria badana idia karaia negana ai. Danu, Davida be ena hereva ia abia hidi namonamo bona mai hemataurai ida ia kara. Bona sibona ia gwauraia “emu natuna Davida,” reana Nabala ena mauri lagani be bada dainai mai hemataurai ia hereva. Nabala be edena bamona ia haere?—1Sa 25:5-8.
12 Nabala ia badu dikadika! Mero matamata ese Abigaila dekenai ia sivarai hegeregerena, “ia ese idia ia gwau henia.” Nabala be iena paraoa, ranu bona vamu dainai ia maumau. Ia ese Davida ia hamaoroa ia be anina lasi bona gari dainai ia heau hesiai tauna. Nabala ena laloa be Saulo ena hegeregerena, Davida ia inai henia. Idia ta be Iehova ena laloa dalana idia abia lasi. Dirava be Davida ia lalokau henia bona gwau-edeede hesiai tauna bamona ita itaia lasi, to vaira negai Israela ena king ai do lao tauna bamona ia itaia.—1 Sam. 25:10, 11, 14.
ia-E 80 par. 18
Mai Aonega Ida Ia Kara
18 Abigaila sibona ese unai metau ia huaia bona Davida ia noia ena tau ena dika ia gwauatao totona. Ia gwau ena tau be ena ladana hegeregerena ia kara, ia be kavakava tauna, bona namo lasi Davida be ena dika davana henia totona ena ladana ia hadikaia. Abigaila ia abia dae Davida be Iehova ese ia siaia bona ‘Iehova ena tuari ia karaia.’ Danu ia diba Iehova ia gwauhamata Davida be king ai do ia lao, badina ia gwau: “Iehova ese . . . oi be Israela ena lohia ai do ia halaoa.” Bona Davida ia hamaoroa dahaka dainai rara do ia bubua kava, unai ese ena “lalomamina do ia hadikaia.’ (1 Samuela 25:31 duahia.) Unai hereva ese Davida ena lalona ia hamarerea!
Hakaua Hereva Namodia
ia-E 80 par. 16
Mai Aonega Ida Ia Kara
16 Abigaila be ena adavana ena kwara dagina ia matauraia lasi, a? Lasi. Laloatao, Nabala be Iehova ese ia horoa tauna ia kara namo henia lasi, bona ena kara dainai ena ruma bese lalonai momo edia mauri idia haboioa diba. Bema Abigaila be kara ta ia karaia lasi, ena adavana ena dika davana do ia abia. Unai dainai, Dirava ia kamonai henia be namo to ena tau lasi.