Iseda Haroro Bona Mauri Dalana Hebou Pepana Edia Referens
© 2024 Watch Tower Bible and Tract Society of Pennsylvania
MAY 6-12
BAIBEL ENA HEREVA BADADIA | SALAMO 36-37
“Kara Dika Taudia Dainai Oi Lalohisihisi Lasi”
Dirava Ena Basileia Ia Mai Neganai, Dahaka Do Ia Ore?
4 Kara dika taudia ese edena dala ai iseda mauri idia haidaua? Aposetolo Paulo ia gwau “dina gabediai nega aukadia do idia vara.” Ma ia gwau: “Kara dika taudia bona koikoi taudia ese edia kara dika do idia habadaia momokani.” (2 Tim. 3:1-5, 13) Unai peroveta herevadia be hari ia guguru, a? Ita momo be kara dika taudia amo hisihisi ita abia, hegeregere dagedage taudia, ma haida idia inai henia taudia, bona raskol taudia. Idia haida be idia karaia kara dikadia idia hunia lasi, bona ma haida be koikoi karadia idia karaia. Ena be ita haida dekenai unai ia vara lasi, to idia karaia karadia ese iseda mauri ia haidaua diba. Hegeregere, idia ese natudia, buruka taudia, bona goada lasi taudia dekenai idia karaia kara dikadia edia sivarai ita kamonai neganai, ita lalohisihisi bada. Unai kara dika taudia edia kara be dika momokani, animal eiava demoni edia kara bamona. (Iam. 3:15) To, ita moale badina Iehova ena Hereva ese ita dekenai helaro ia henia.
Iehova be Dika Gwauatao Taudia Ia Hanamoa
10 Badu noho karana ese dika ia havaraia. Badu karana be gau metauna ta bamona, bona Iehova ia ura unai kara ita dadaraia bona lalomaino ita abia. (Efeso 4:31, 32 duahia.) Ia ese ita ia noia ‘badu karana bona dagedage karana ita rakatania’ totona. (Sal. 37:8) Unai sisiba herevana ita badinaia be mai ena namo. Badu noho karana ese iseda tauanina bona laloa dalana ia hadikaia diba. (Aon. 14:30) Ita badu noho neganai, ita ia hahisia tauna ia hadikaia lasi to ita sibona ita hadikaia, unai be hegeregere poisini gauna ta ita inua bona ita ia hadikaia bamona. To, ma haida edia dika ita gwauatao neganai, ita dekenai namo ia havaraia. (Aon. 11:17) Oibe, lalomaino ita abia bona Iehova ita hesiai henia noho.
“Oiemu Moale be Lohiabada Dekena amo Do Oi Tahua”
20 Bena, “manau taudia ese noho gabuna tano do idia abia.” (Salamo 37:11a) To unai “manau taudia” be daidia? Oibe, “manau taudia” be Iehova idia naria noho, idia dekenai idia vara kara gageva ibounai do ia hamaoromaoroa totona. “Do idia helai namonamo, mai moale bona mai maino danu.” (Salamo 37:11b) Hari danu Keristani kongregesen momokanina ita bamoa neganai, lauma paradaisona lalonai maino ai ita noho diba.
Hakaua Hereva Namodia
it-2-E 445
Ororo
Marere lasi, noho hanaihanai, eiava ataiai momokani. Ororo idia herevalaia neganai, idia gwau idia marere lasi bona gabu tamona dekenai idia noho hanaihanai. (Isa 54:10; Hab 3:6; Sal 46:2 hahegeregerea.) Unai dainai, salamo torea tauna ia gwau Iehova ena kara maoromaoro be “ororo badadia” bamona, (Sal 36:6) reana unai hereva ena anina be Iehova ena kara maoromaoro be ia marere diba lasi. Eiava, ororo be ataiai momokani dainai, unai ese ia hahedinaraia Dirava ena kara maoromaoro be taunimanima edia ia hereaia. (Isa 55:8, 9 hahegeregerea.) Baibel ese Dirava ena badu ena disi namba 7 be tanobada ai do ia bubua ia herevalaia neganai, Apokalupo 16:20 ia gwau: “Ororo idia boio.” Unai ese ia hahedinaraia Dirava ena badu be tanobada ai ia bubua neganai ororo badadia be do idia gini lasi.—Ier 4:23-26 hahegeregerea.
MAY 13-19
BAIBEL ENA HEREVA BADADIA | SALAMO 38-39
Kerere Dainai Lalohisihisi Bada Karana Kokia
“Vairana Kahana Do Oi Itaia Noho”
12 Ioane Ginigunana 3:19, 20 duahia. Vaia nega ta ta ai, ita ibounai be iseda kerere dainai ita lalohisihisi. Hegeregere, haida be hereva momokani idia diba lasi neganai idia karaia gaudia dainai, idia lalohisihisi. Ma haida be idia bapatiso murinai idia karaia kerere dainai, idia lalohisihisi. (Roma 3:23) Momokani, ita ura kara maorodia ita karaia, to “ita ibounai be nega momo ita kerere.” (Iam. 3:2; Roma 7:21-23) Ena be eda kerere dainai ita lalohisihisi karana ita moalelaia lasi, to unai ese ita ia durua diba. Edena dala ai? Oibe, eda kerere dainai ita lalohisihisi karana ese ita do ia durua eda mauri ita haidaua, bona eda lalona ita hadaia unai kerere ita karaia lou lasi totona.—Heb. 12:12, 13.
13 To, nega haida ita lalohisihisi bada diba. Hegeregere, ena be ita helalo-kerehai bona Iehova ese eda kara dika ia gwauatao vadaeni, to ita do lalohisihisi noho. Unai bamona lalohisihisi bada karana dainai ita manoka diba. (Sal. 31:10; 38:3, 4) Dahaka dainai? Mani taihu ta ena haheitalai ita laloa, ia be guna ia karaia kerere dainai ia lalohisihisi momo. Ia gwau: “Lau mamia Iehova ena hesiai gaukara lau karaia goadagoada be anina lasi, badina lau laloa lau do ia hamauria lasi.” Ita momo be reana unai bamona ita mamia. To namona be eda kerere dainai ita lalohisihisi bada karana ita dadaraia. Mani ita laloa, ena be Iehova be mai lalokau ida ita ia gwauatao vadaeni, to bema ita lalohisihisi bona ita manoka, Satani do ia moale bada herea!—2 Korinto 2:5-7, 11 hahegeregerea.
Edena Dala ai Iehova Ena Lalo-Namo Ita Abia Diba?
ISEDA mauri dinadia be momo lasi bona haraga herea idia hanaia. Salamo torea tauna ese mauri ena kwadogi ia laloa bona ia guriguri ia gwau: “Lohiabada e, egu mauri dinadia hida do noho? Edena negai do lau mase? Egu mauri ena dokona negana, be mani lau dekenai do oi hedinaraia. Lohiabada e, egu mauri dinadia, be kwadogi herea sibona oi ese oi karadia. Oiemu vairana dekenai, egu mauri dinadia be gau ta lasi bamona.” Davida ia laloa bada gauna be iena mauri lalonai ena hereva bona kara amo Iehova do ia hamoalea be namo. Dirava ia tabekau henia karana ia gwauraia, ia gwau: “Oi sibona dekenai do lau naria be namo.” (Salamo 39:4, 5, 7) Iehova ese iena guriguri ia kamonai. Momokani, ia ese Davida ena gaukara ia laloa bona iena gaukara hegeregerena davana ia henia.
Dina ena miniti ibounai ai ita bisi bona ia bisi bada bona gaukara momo maurina ese ita ia tarapua diba. Unai ese lalo-hekwarahi ia havaraia diba, bema gau momo idia noho ita karaia bona dibaia totona to nega be lasi. Iseda lalohadai—ita noholaia maurina be Dirava ese ia lalo-namo henia—be Davida ena hegeregerena, a? Iehova ese ita ta ta ia itaia bona ia tahua namonamo. Lagani 3,600 gunanai, Dirava ia gari henia tauna Iobu, ia gwau, Iehova ese iena kara ia itaia bona iena gaukara ibounai ia tahua. Iobu ia henanadai, ia gwau: “Dirava ese lau do ia kota henia neganai, ia dekenai edena bamona do lau hereva?” (Iobu 31:4-6, 14) Ita ese lauma gaudia ita atoa guna, Dirava ena taravatu ita badinaia, bona iseda nega ita gaukaralaia namonamo karana amo iena lalo-namo ita abia. Mani unai gaudia ita laloa namonamo be namo.
Iehova ida Emu Hetura Karana Oi Hanamoa Lou
Iehova guriguri henia hanaihanai. Emu Tamana ia laloparara emu kerere dainai oi lalohisihisilaia noho, bona oi guriguri henia be auka. (Roma 8:26) To, “guriguri [oi] hadokoa lasi,” bona Iehova oi hamaoroa iena hetura karana oi ura henia bada. (Roma 12:12) Andrei ia gwau “Lau karaia kerere dainai lau lalohisihisi bona hemarai noho. To nega ta ta ai Dirava lau guriguri henia murinai, egu hemami ia namo. Bona lalomaino lau abia.” Bema guriguri lalonai oi diba lasi dahaka do oi gwauraia, mani Salamo karoa 51 bona 65 dekenai King Davida ena helalo-kerehai guriguridia oi laloa.
Hakaua Hereva Namodia
Emu Kara amo Oi Hamomokania Haida ese Oi Idia Trast
16 Bema ita ura ma haida ese ita idia trast, sibona biagua karana ita hahedinaraia be namo. Ma haida ese ita dekenai hunia herevadia idia gwauraia neganai, sibona biagua karana ese ita ia durua hereva ta ita gwauraia lasi totona. (Aonega Herevadia 10:19 duahia.) Intanet eiava social media ita gaukaralaia neganai, sibona ita biagua totona be auka. Bema ita naria namonamo lasi, taunimanima momo dekenai hehuni gaudia ita hahedinaraia diba. Bona unai hunia gaudia be intanet ai ita atoa neganai, ma haida ese do idia gaukaralaia dalana eiava do ia havaraia dika ita koua diba lasi. Bema iseda inai taudia ese tadikaka taihu hahisia totona edia infomeisen idia ura diba, sibona biagua karana ese ita do ia durua hereva ta ita gwauraia lasi totona. Iseda gaukara idia koua o taravatua tanodia ai pulisi ese ita idia nanadaia neganai, unai ia vara diba. Unai bamona negadia bona nega ma haida ai, ‘iseda uduna be gau ta amo do ita koua’ ena hakaua herevana ita badinaia be namo. (Sal. 39:1) Namona be ita hahedinaraia iseda famili, turadia, tadikaka bona taihu, eiava ma haida ese ita idia trast diba. Bona unai ia vara totona, sibona biagua karana be mai anina bada.
MAY 20-26
BAIBEL ENA HEREVA BADADIA | SALAMO 40-41
Dahaka Dainai Haida Ita Durua?
Hariharibada Karana Idia Hahedinaraia Taudia be Idia Moale
16 Oibe, hariharibada karana idia hahedinaraia taudia be, idia henia gaudia dekenai davana idia laloa lasi. Iesu be unai ia laloa dainai, ia gwau: “Aria ta oi karaia neganai, ogogami taudia, diseibol taudia, aena dika, bona matakepulu taudia oi boiria, bona do oi moale, badina idia dekenai gau ta ia noho lasi emu kara ena davana do idia haloua totona.” (Luka 14:13, 14) Baibel ia gwau: “Hariharibada tauna be do idia hanamoa.” Bona ma ia gwau: “Ogogami taudia ia laloa tauna be namo.” (Aon. 22:9, NWT; Sal. 41:1) Unai dainai, henia karana ita hahedinaraia be namo, badina ma haida durua karana amo moale do ita abia.
17 Paulo ese Iesu ena hereva, “henia kara ena moale be bada, to abia kara ena moale be maragi” ia gwauraia neganai, ia be kohu haria karana sibona ia herevalaia lasi to haida dekenai hagoadaia herevadia bona manoka taudia durua karana ia herevalaia danu. (Kara 20:31-35) Paulo ena hereva bona kara amo ita ia hadibaia iseda nega, goada, heduru, bona lalokau ita henia haida ita durua totona.
18 Danu taunimanima edia noho dalana idia stadilaia taudia idia davaria, henia karana ese taunimanima ia hamoalea. Atikol ta ia gwau, “taunimanima be kara namona ta idia karaia murinai idia moale bada.” Danu, tahua gaukara idia karaia taudia idia gwau, ma haida durua karana be mai anina bada edia mauri lalonai “henia karana ena badina bona anina idia lalopararalaia totona, badina unai ese taunimanima edia ura gaudia ia hagugurua.” Unai dainai diba bada taudia idia gwau, taunimanima be edia helt bona moale idia habadaia totona, komiuniti dekenai volantia gaukara idia karaia. Oibe, unai be hoa gauna lasi badina unai bamona taudia ese Havaraia Tauna, Iehova ena Hereva idia abia dae.—2 Tim. 3:16, 17.
Iehova ese Oi Do Ia Durua
7 Bema ita gorere, Dirava ese ita do ia hagoadaia bona durua, guna iena hesiai taudia dekenai ia karaia bamona. King Davida ia gwau: “Ogogami taudia ia laloa tauna be namo. Lohiabada ese ia do ia durua, bema hisihisi ia davaria neganai. Lohiabada ese unai tau do ia gimaia, bona iena mauri do ia naria.” (Sal. 41:1, 2) To namo lasi ita laloa Davida ena hereva ena anina be unai nega ai, ogogami taudia ia laloa tauna be do ia noho hanaihanai. Lasi, to iena hereva ena anina be Dirava ese ogogami taudia ia laloa tauna do ia durua. Edena dala ai? Davida ia gwau: “Unai tau, ogogami taudia ia laloa tauna, ia gorere neganai, be Lohiabada ese do ia durua. Lohiabada ese unai tau ena gorere, be do ia hanamoa lou momokani.” (Sal. 41:3) Iehova ia diba iena hesiai taudia be hisihisi idauidau idia davaria, bona idia ia laloaboio lasi. Ia ese idia dekenai goada bona aonega do ia henia. Danu, Iehova ese ita ia karaia neganai, iseda tauanina be sibona ia hanamoa dalanai ia karaia.
Iehova Ena Hebogahisi Karana Tohotohoa
17 Momokani, hebogahisi ita hahedinaraia neganai, namo do ita davaria, to namo lasi unai badina sibona dainai hebogahisi ita hahedinaraia. To unai ita karaia ena badina badana be ita ura Iehova Dirava—lalokau bona hebogahisi ena Badina—ita tohotohoa bona matauraia. (Aon. 14:31) Ita dekenai ia be haheitalai hereadaena. Unai dainai namona be ita hekwarahi iena kara ita tohotohoa totona. Oibe, bema hebogahisi ita hahedinaraia, iseda tadikaka huanai lalokau do ia noho bona iseda dekena taudia ita tura henia diba.—Gal. 6:10; 1 Ioa. 4:16.
Hakaua Hereva Namodia
it-2-E 16
Iehova
Baibel ena hereva ibounai ese Iehova ena lohia siahuna abia isi karana ia herevalaia, bona unai ese ia hahedinaraia Iehova Dirava ena ura badana be: ia sibona ena ladana do ia hahelagaia. Unai hahelagaia karana amo, Dirava ese ena ladana idia hadikaia koikoi herevadia do ia hamaoromaoroa. Unai sibona lasi to, aneru bona taunimanima ese iena ladana do idia matauraia. Unai amo, mai ura ida Iehova ena lohia siahuna idia abia dae, idia matauraia bona ia idia lalokau henia dainai, idia ura do idia hesiai henia bona mai moale ida iena ura idia karaia. Salamo 40:5-10 ai Davida ese ia gwauraia gurigurina ese unai lalohadai ia hahedinaraia bona Iehova ena ladana ia hahelagaia. (Heb 10:5-10 dekenai aposetolo tauna ia gwau unai salamo ena kahana haida be Keriso Iesu dekenai idia guguru.)
MAY 27–JUNE 2
BAIBEL ENA HEREVA BADADIA | SALAMO 42-44
Iehova amo Ita Abia Diba Badinaia
Salamo Bukana Ena Kahana Iharuana Ena Hereva Badadia
42:4, 5, 11; 43:3-5. Bema hekwakwanai ta ia vara dainai nega sisina lalonai Keristani kongrigeisen ita bamoa lasi, guna ita moalelaia hebou karadia ita laloa neganai, unai ese ita do ia durua. Reana, unai ita laloa neganai ita lalohisihisi sisina, to namona be ita laloatao, Dirava be iseda roho mauri gabuna bona ita ia hamauria totona, Ia ita naria be gau badana.
Baibel Stadi Karana—Hanamoa Bona Moalelaia Dalana
1 GURIGURI: Dala ginigunana be guriguri. (Sal. 42:8) Dahaka dainai? Baibel stadilaia karana be iseda tomadiho ena kahana ta. Unai dainai, namona be Iehova ita noia lauma helaga do ia henia bona iseda lalona do ia kehoa ita stadilaia gaudia ita lalopararalaia totona. (Luka 11:13) Misinari taihu ta, Barbara ia gwau: “Lau ura Baibel lau duahia o egu stadi lau karaia neganai, lau guriguri guna. Unai murinai, lau mamia Iehova be lau ida ia noho bona lau karaia gauna ia moalelaia.” Unai dainai, sibona eda stadi ita do karaia lasi neganai, ita guriguri guna be gau badana.
“Emui Imadia Do Umui Ha-Aukaia, Do Umui Manoka Lasi”
11 Iseda Keristani heboudia, sekit hebouhebou, rijinol hebouhebou, bona tiokratik sikuli ai, Iehova amo ita abia dibana ese ita ia hagoadaia. Unai hahediba dalana ese ita ia durua tahua gaudia ita atoa bona iseda Keristani maduna ita hagugurudia totona. (Sal. 119:32) Oi ura unai hahediba dalana amo goada oi abia, a?
12 Iehova ese Israela taudia ia durua dainai, Amaleka bona Etiopia taudia idia halusia, bona Nehemia bona ena tatau ia hagoadaia dainai, magu idia haginia lou. Unai hegeregerena, Dirava ese ita do ia hagoadaia dagedage bona lalometau negadiai ita gini goada totona, unai amo iseda haroro gaukara ita karaia noho diba. (1 Pet. 5:10) Iehova be hoa dalanai ita do ia durua lasi. To, dina ta ta ai Baibel ita duahia, wiki ena hebou totona ita hegaegae bona hebou ita lao henidia, sibona iseda stadi bona ruma bese tomadihona amo iseda lalona bona kudouna ita hagoadaia, bona guriguri amo Iehova dekenai ita tabekau. Namo lasi anina lasi gaudia dainai, Dirava ena heduru bona hagoadaia daladia ita laloa maragi. Bema oi mamia emu imana be idia manoka idia lao noho, Dirava ena heduru oi noia. Bona ia ese iena lauma helaga amo ‘emui ura do ia hagoadaia, ia ura henia gaudia ibounai oi karaia totona.’ (Fili. 2:13) To, edena dala ai ma haida edia imana oi hagoadaia diba?
Hakaua Hereva Namodia
it-1-E 1242
Jackal (Uda Sisia)
Baibel siri ese jackal (uda sisia) be laulau dalanai idia herevalaia momo. Iobu ena lalohisihisi negana ai ia gwau, ia be jackal “edia tadikaka” ai ia lao. (Iobu 30:29) Salamo torea tauna ese Dirava ena taunimanima be tuari dekenai idia lusi ena sivarai ia gwauraia neganai, ia gwau: “Uda sisia idia noho gabuna ai, oi ese ai oi hadikaia.” (Sal 44:19) Unai bamona ia hereva badina unai tuari gabuna ai jackal idia haboua mase taudia edia tauanina idia ania totona. (Sal 68:23 hahegeregerea) Lagani 607 B.C.E ai, Babulonia ese Ierusalema ia hagegea bona hitolo bada ia vara dainai, sina momo be edia natudia idia dagedage henidia. Unai dainai, Ieremia ia gwau jackal ese ena natudia ia naria namonamo, to Iehova ena “taunimanima” be edia natudia idia kara dika henia.—Lal. 4:3, 10.
JUNE 3-9
BAIBEL ENA HEREVA BADADIA | SALAMO 45-47
King Ta Ena Headava Anena
Mamoe Natuna Ena Headava Dainai Ita Moale!
8 Salamo 45:13, 14a duahia. Headava matamata kekeni be “mai hairaina” ida headava totona ia lao. Apokalupo 21:2 ese headava matamata kekeni be taoni ta, Ierusalema Matamatana unai, ida ia hahegeregerea. Unai taoni be “Dirava ena hairai” ia abia bona “ia be ia diaridiari, dava bada nadina bamona, iasipa nadina ena diaridiari bamona, bona ia be galasi bamona.” (Apok. 21:10, 11) Apokalupo bukana ese Ierusalema Matamatana ena hairai ia herevalaia namo herea. (Apok. 21:18-21) Unai dainai, salamo torea tauna ia gwau, unai headava matamata kekeni be mai “hairaina”! Oibe, guba dekenai king ena headava be unai bamona.
9 Headava matamata kekeni be ena adavana, Mesia King dekenai idia hakaua lao. Ia be “helaga bona goeva,” badina King ese “Dirava ena hereva ena ranu amo ia hagoevaia.” (Efe. 5:26, 27) Unai kekeni be headava totona dabua maorodia ia hahedokilaia be namo. Oibe, “iena dabua be golo varo dekena amo idia hatua” bona “king ena vairana dekenai idia hakaua vareai.” Mamoe Natuna ia adavaia totona, “ia ese maoro ia abia dabua namo hereana ta ia hahedokilaia totona. Unai dabua be ia diaridiari bona ia goeva. Unai dabua namo hereana ese helaga taudia edia kara maoromaoro ia laulaulaia.”—Apok. 19:8.
Apokalupo Bukana Ena Anina Emu Vaira Nega Totona
10 Unai dagedage karana dainai Iehova be dahaka do ia karaia? Ita ia hamaoroa, ia gwau: “Egu badu do ia toreisi.” (Ese. 38:18, 21-23) Apokalupo karoa 19 ese do ia vara gauna ia herevalaia. Iehova ese ena Natuna do ia siaia Iena taunimanima ia gimaia bona edia inai taudia ia halusia totona. Unai tuari ai, “guba ena tuari oreadia,” abidadama aneru bona 144,000 taudia unai, be Iesu do idia bamoa. (Apok. 17:14; 19:11-15) Unai tuari ai dahaka do ia vara? Iehova idia inai henia taudia ibounai bona orea idauidau do idia hadikaia ore!—Apokalupo 19:19-21 duahia.
11 Dirava ena inai taudia idia hadikaia ore neganai, idia roho mauri abidadama taudia edia hemami mani oi laloa! Unai nega ai, moale bada do ia vara! Ena be Babulonia Badana ia ore dainai guba dekenai moale bada do ia vara, to gau ma ta dainai do idia moale bada danu. (Apok. 19:1-3) Apokalupo bukana ese ia herevalaia mai anina bada gauna ta do ia vara, unai be “Mamoe Natuna ena headava.”—Apok. 19:6-9.
12 Unai headava be edena negai do ia vara? Aramagedono tuarina ia do matamaia lasi neganai, 144,000 taudia ibounai be guba dekenai idia noho vadaeni. To, unai be Mamoe Natuna ena headava negana lasi. (Apokalupo 21:1, 2 duahia.) Aramagedono tuarina ia vara bona Dirava ena inai taudia ibounai do idia kokia murinai, Mamoe Natuna ena headava do idia karaia.—Sal. 45:3, 4, 13-17.
it-2-E 1169
Tuari
Inai tuari ena dokona ai, lagani tausen lalonai taunimanima be maino ai do idia noho. Salamo bukana ia gwau “[Iehova] ese tanobada ibounai lalonai tuari ia haorea. Ia ese peva ia hamakohia bona io ia hakwaidua, Ia ese tuari kariota be lahi dekenai ia gabudia.” Unai peroveta herevana be nega ginigunana ia guguru Israela tanona ai, Dirava ese edia inai taudia edia tuari kohudia ia hadikaia neganai maino ia havaraia. Keriso ese Aramgedono tuari idia gunalaia taudia do ia halusidia murinai, tanobada ai taunimanima be maino ai do idia noho bona moale hanaihanai. (Sal 46:8-10) Mauri hanaihanai do idia abia taudia be “edia tuari kaia be tano geia gaudia ai do idia halaoa, edia io be au rigidia utua kaia ai do idia halaoa,” bona “tuari do idia dibaia lou lasi.” “For the mouth of Jehovah of armies has spoken.”—Isa 2:4; Mika 4:3, 4.
Hakaua Hereva Namodia
Dirava Ena Basileia Ia Mai Neganai, Dahaka Do Ia Ore?
9 Idia kara gageva oreadia edia gabu be dahaka ese do ia abia? Aramagedono murinai, tanobada ai orea ta do ia noho, a? Baibel ia gwau: “Iena gwauhamata hegeregerena, ita ese guba matamata bona tanobada matamata ita naria noho, bona unuseniai kara maoromaoro sibona do ia noho.” (2 Pet. 3:13) Guba bona tanobada gunana, idia kara gageva gavamani oreadia bona idia biagua taudia unai, be do idia ore. Edia gabu be dahaka ese do ia abia? Inai hereva “guba matamata bona tanobada matamata” be gavamani matamata bona ia ese do ia lohiaia taudia ia herevalaia. Unai Basileia be Iesu Keriso ese do ia lohiaia bona ia ese Iehova Dirava ena kara do ia hahedinaraia goevagoeva, gau ibounai ia karaia namonamo Diravana unai. (1 Kor. 14:33) Unai dainai “tanobada matamata” ai gau ibounai be do idia heau namonamo. Tatau namodia ese gaukara ibounai do idia naria. (Sal. 45:16) Idia be Keriso bona ia ida do idia lohia 144,000 taudia ese do idia hakaua. Mani oi laloa, unai nega ai idia kara gageva oreadia be do idia noho lasi, to orea tamona sibona do ia noho, bona ta ese do ia hadikaia lasi!
JUNE 10-16
BAIBEL ENA HEREVA BADADIA | SALAMO 48-50
Tama Sina e—Iehova Ena Orea Dekenai Emui Ruma Bese Ena Abidadama Umui Hagoadaia
Tomadiho Momokani ese Emu Moale Do Ia Habadaia
11 Iehova ena hereva ita stadilaia bona iseda natudia dekenai ia ita herevalaia karana be Iehova tomadiho henia karana ta. Sabati dinana ai, Israela taudia idia gaukara lasi bona unai dina idia gaukaralaia Iehova ida edia hetura karana idia hagoadaia totona. (Eso. 31:16, 17) Bona idia huanai abidadama taudia ese edia natudia dekenai Iehova bona ena kara namodia idia hadibaia. Hari, namona be nega ita atoa Dirava ena Hereva ita duahia bona stadilaia totona. Unai be Iehova ita tomadiho henia karana ta, bona unai ese ita ia durua Iehova kahirakahira ita lao totona. (Sal. 73:28) Danu tama sina be natudia ida ruma bese tomadiho idia karaia hebou neganai, unai ese natudia do ia durua iseda lalokau guba Tamana ida edia hetura karana idia hagoadaia.—Salamo 48:13 duahia.
Ita Moale Ena Badina
“Dirava ena taudia e, Siona ena kahana ibounai do umui raka lao, bona iena kohoro ibounai do umui duahia. Siona ena magu do umui itaia, bona iena ruma aukadia do umui itaia loaloa. Vadaeni Siona ena namo, be gabeai idia vara uru taudia do umui hamaoroa.” (Sal. 48:12, 13) Salamo torea tauna ese Israela taudia ia hamaoroa Ierusalema do idia vadivadi henia. Oibe, Israela ruma besedia be lagani ta ta ai aria totona Ierusalema dekenai idia lao neganai, dubu helaga ena hairai idia itaia bona idia moalelaia bada. Idia itaia gaudia be “gabeai idia vara uru taudia” dekenai idia gwauraia.
Sieba tano ena kwini oi laloa, matamanai ia ese Solomona ena lohia dalana bona ena aonega ena sivarai ia hamomokania lasi. To, dahaka ese ena lalona ia haidaua? Ia gwau: “Unai sivarai lau hamomokania lasi ia mai bona hari lau mai, lau sibona egu matana dekenai lau itaia.” (2 Siv. 9:6) Oibe, ‘sibona eda matana dekenai ita itaia’ gaudia ese eda lalona ia hamarerea diba.
Edena dala ai emui natudia oi durua diba Iehova ena orea ena gaukara namodia be ‘sibona edia matana dekenai idia itaia’ totona? Bema emui noho gabunai Iehova ena Witnes taudia edia brens opesi ta ia noho, namona be umui vadivadi henia. Hegeregere, Mandy bona Bethany edia noho gabuna ena daudau Betele amo be kilomita 1,500 bamona. To, idia maragi negana amo edia tama sina be hanaihanai palani idia karaia Betele idia vadivadi totona. Idia gwau: “Betele ai do itaia lasi neganai, ai laloa ia be buruka taudia bona gaukara idia laloa bada taudia sibona idia noho. To, matamata taudia ai itaia bona idia be Iehova ena gaukara idia moalelaia! Betele ai vadivadi neganai, ai laloparara Iehova ena orea be orea maragina lasi, to ia be orea badana ta. Betele ai vadivadi negadia ta ta ai, ai ia hagoadaia Iehova kahirakahira ai lao bona ia ai hesiai henia totona.” Mandy bona Bethany be Dirava ena orea ena gaukara dalana idia diba dainai, painia gaukara idia hamatamaia bona nega haida Betele dekenai volantia gaukara idia karaia.
Basileia Ena Sitisen Bamona Umui Kara!
5 Histori oi stadilaia. Gavamani haida idia ura edia sitisen ai idia ura lao taudia ese edia gavamani ena histori idia diba be namo. Ita ura Dirava ena Basileia ena sitisen ai ita lao dainai, namona be unai Basileia ena histori do ita diba namonamo. Idaunegai Israela besena ai, Kora ena natuna memerodia edia haheitalai ita tohotohoa be namo. Idia be Ierusalema bona dubu helaga idia ura henia bada dainai, ena histori idia herevalaia momo. Unai bamona idia karaia badina Ierusalema be Iehova, “King Badana ena hanua.” Ierusalema ena dubu helaga ai taunimanima be Iehova idia tomadiho henia bona ena Taravatu idia dibaia. Iehova, Ierusalema ena King, be ia lalonamo henia bona ia lalokau henia taudia sibona ia lohiaia. (Salamo 48:1, 2, 9, 12, 13 duahia.) Hari, tanobada ai Dirava danu be mai ena orea ta. Kora ena natuna memerodia hegeregerena, namona be ita danu ese Iehova ena orea ena histori ita stadilaia bona ma haida ita hadibaia. Iehova ena orea ena histori bona Ia ese idia ia durua dalana ita dibaia neganai, unai ese eda abidadama Dirava ena Basileia dekenai ia hagoadaia. Danu, ita ia hagoadaia mai ura bada ida Basileia ena sivarai ita harorolaia totona.—Ier. 9:24; Luka 4:43.
Hakaua Hereva Namodia
it-2-E 805
Taga
Israela besena be taga besena, bona aniani bona inua gaudia idia moalelaia (1Ki 4:20; Had 5:18, 19), bona idia taga dainai ogogami ena hekwakwanai idia davaria lasi. (Ao10:15; Had 7:12) Ena be Iehova ia ura Israela taudia be idia gaukara goada dainai idia davaria mauri namona idia moalelaia (Ao 6:6-11; 20:13; 24:33, 34 hahegeregere), to ia hadibadia namo lasi edia taga idia abidadama henia matamaia bona Ia, edia taga ia henia tauna, idia laloaboio. (De 8:7-17; Sal 49:6-9; Ao 11:4; 18:10, 11; Ier 9:23, 24) Dirava ese ia hadibadia moni bona kohu be idia noho daudau lasi gaudia (Ao 23:4, 5), unai gaudia amo Dirava dekenai ta ena mauri idia hoia lou diba lasi (Sal 49:6, 7), bona mase tauna ia durua diba lasi (Sal 49:16, 17; Had 5:15). Danu ia hadibadia bema taga idia laloa bada, koikoi karadia do idia karaia bona Iehova ese do ia lalonamo henidia lasi. (Ao 28:20; Ier 5:26-28; 17:9-11.) Danu idia ia hagoadaia, namona be edia ‘dava bada kohudia amo Iehova idia hanamoa.’—Ao 3:9.
JUNE 17-23
BAIBEL ENA HEREVA BADADIA | SALAMO 51-53
Kerere Badadia Oi Dadaraia Totona Oi Karaia Diba Gaudia
Edena Dala ai Emu Kudouna Oi Gimaia Diba?
4 Aonega Herevadia 4:23 ai, inai hereva “kudouna” idia gaukaralaia ta ena “lalona” eiava ta ena kara o lalohadai idia herevalaia totona. (Salamo 51:6 duahia.) Nega haida, “kudouna” be iseda lalohadai, hemami, gau ta ita karaia ena badina, bona iseda ura ia herevalaia. Unai ese ia hahedinaraia, ta ena lalona ia herevalaia, to ia be iseda kara bona hereva amo ia hedinarai sibona lasi.
5 Mani inai oi laloa. Iseda tauanina ena goada ese ia hahedinaraia ita gorere eiava lasi. Dala ginigunana be, iseda helt ia namo totona, iseda aniani ita abia hidi namonamo bona ita eksasais hanaihanai be namo. Unai hegeregerena, iseda kudouna ia goeva totona, namona be hanaihanai Baibel bona Baibel pablikeisen ita duahia bona iseda mauri ai ita hahedinaraia ita be Iehova ita abidadama henia. Bona namona be ita dibaia gaudia ita badinaia bona ma haida dekenai iseda abidadama ita gwauraia hedinarai. (Roma 10:8-10; Iam. 2:26) Dala iharuana be, nega haida ita laloa iseda tauanina ena toana be ia namo, to iseda tauanina lalonai ia noho gorere be ita diba lasi. Unai hegeregerena, herevana hanaihanai iseda tomadiho karadia ita karaia, bona do ita laloa iseda abidadama be ia goada, to iseda kudouna ai ura dikadia idia vara diba. (1 Kor. 10:12; Iam. 1:14, 15) Namona be ita laloatao Satani be ia ura iseda lalohadai ia hadikaia. Edena dala idauidau ai unai ia karaia diba? Bona edena dala ai sibona ita gimaia diba?
Kara Goeva Ita Badinaia Diba
5 Iehova dekenai eda abidadama ita hahedinaraia totona, mai anina bada gauna be lalohadai dikadia dadaraia karana ita gurigurilaia be namo. Guriguri amo Iehova kahirakahira ita lao, ia be ita kahirakahira do ia mai. Ita dekenai ena lauma helaga ia henia, unai amo ita ia hagoadaia lalohadai dikadia ita dadaraia bona kara goeva ita badinaia totona. Unai dainai, Dirava ita hamoalea totona ia dekenai iseda ura gaudia ita gwauraia hedinarai. (Sal. 19:14) Mai manau ida Dirava ita noia iseda lalona ia tahua totona, bema eda lalona dekenai “dika ta”—ura o lalohadai dikana ta—ia noho. (Sal. 139:23, 24) Hedibagani negadiai Dirava ita badinaia totona, hanaihanai Dirava ita noia ena heduru totona, a?—Mat. 6:13.
6 Reana eda famili maurina eiava eda kara gunadia dainai, nega haida do ita ura Iehova ia inai henia karadia ita karaia. To, Iehova ese ita ia durua diba eda kara ita haidaua totona, unai amo ena ura hegeregerena ia do ita hesiai henia. King Davida be unai ia diba. Davida be Bataseba ida ia heudahanai murinai, Iehova ia noia, ia gwau: “Lauegu kudouna lalonai laloa goevagoeva do oi havaraia, bona lauma matamatana bona maoromaorona, be egu lalona dekenai do oi atoa.” (Sal. 51:10, 12) Ita be goevadae lasi taudia dainai, kara dika urana ita abia diba, to bema ita ura momokani Iehova ita badinaia ia ese ita do ia durua. Ena be ura dikadia be eda lalona ai idia noho bona iseda lalohadai goevadia ia hadikaia diba, to Iehova ese ita ia durua diba ena taravatu be eda mauri lalonai ita badinaia. Dirava ese hahetoho idauidau amo ita ia gimaia diba.—Sal. 119:133.
Hakaua Hereva Namodia
it-1-E 644
Doega
Ia be Edoma tauna, King Saulo ena hesiai tauna, mamoe naria taudia edia biaguna. Unai be maduna badana. (1Sa 21:7; 22:9) Ia be Iehova ia tomadiho henia. Ia be gwauhamata ta dainai, ia goeva lasi, eiava reana lepera gorere dainai Nobu dekenai Iehova vairanai idia dogoatao. Ia itaia Hahelaga Tauna Badana Ahimeleka ese paraoa bona Goliata ena tuari kaia be Davida dekenai ia henia. Gabeai, Saulo ese ena hesiai taudia ia herevadia bona ia gwau idia ura ia idia hamasea neganai, Doega ese Nobu ai ia itaia gauna ia gwauraia hedinarai. Saulo ese Nobu ena hahelaga tauna badana bona hahelaga taudia ma haida ia boiridia bona Ahimeleka ia nanadaia murinai, Saulo ese gadi taudia ia oda henidia hahelaga taudia ibounai do idia hamasea. Idia ura lasi neganai, Saulo ese Doega ia oda henia, bona Doega ese hahelaga taudia 85 ia alaia mase. Unai kara dikana ia karaia murinai, Nobu hanua ibounai ia hadikaia ore, matamata bona buruka taudia bona edia animal ibounai danu ia hamasedia.—1Sa 22:6-20.
Salamo 52 ena supaskripsen hegeregerena, Davida ese Doega totona inai hereva ia torea: “Emu malana be reisa mai matana bamona, dika ia palanilaia bona ia koikoi. Dika oi ura henia bada, to namo oi ura henia lasi, oi koikoi momo, to hereva momokani oi gwauraia lasi. Koikoi momo malana e, oi be hadikaia herevadia ibounai oi ura henia bada!”—Sal 52:2-4.
JUNE 24-30
BAIBEL ENA HEREVA BADADIA | SALAMO 54-56
Dirava be Oi Ida
Umui Aonega—Dirava Umui Gari Henia!
10 Nega ta Davida be Pilistia hanua ta ladana Gata dekenai ia lao, King Akisi dekenai heduru ia tahua totona. Gata be Goliata ena hanua. (1 Samuela 21:10-15) To, King ena hesiai taudia idia gwau Davida be Pilistia taudia edia inai tauna. Davida be unai nega dikana ai dahaka ia karaia? Iehova dekenai iena hekwakwanai ia gurigurilaia. (Salamo 56:1-4, 11-13) Ena be Davida ia heau mauri totona, ia ese kavakava tauna ena kara ia tohotohoa, to ia diba unai be Iehova ese ia hamauria. Davida be mai ena lalona ibounai ida Iehova dekenai ia tabekau bona ia abidadama henia dainai, ia hahedinaraia Davida be Dirava ia gari henia tauna momokani.—Salamo 34:4-6, 9-11.
11 Davida hegeregerena, iseda hekwakwanai ita haheaukalaia totona, Dirava ita gari henia bona iena gwauhamata ita abidadama henidia be namo. Davida ia gwau: “Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.” (Salamo 37:5) To, namo lasi iseda hekwakwanai be Iehova ena imana dekenai ita atoa sibona bena ita be gau ta ita karaia lasi. Davida be heduru totona Iehova ia guriguri henia sibona lasi, to kara ta ia karaia danu. Davida ia diba ia sibona ena goada amo ia kwalimu diba lasi. To, ia be Iehova ese ia henia goada bona diba ia gaukaralaia, ia davaria hekwakwanai ia hanaia totona. Ita ese unai ita laloatao danu be gau badana. Namona be iseda diba bona goada ibounai ita gaukaralaia guna, bena Iehova ena heduru ita tahua. Momokani, nega haida dala ta be lasi dainai, Iehova sibona dekenai do ita tabekau. Unai ese ia hahedinaraia ita be Dirava ita gari henia. Davida ena Hereva amo goada ita abia diba, ia gwau: “Lohiabada idia gari henia taudia, be Lohiabada ese idia dekenai, iena hunia gaudia ia hadibaia noho.”—Salamo 25:14.
Gau ta ese Ita be “Dirava Ena Lalokau . . . amo Ia Kokia Diba Lasi”
9 Iehova ese iseda haheauka karana danu ia laloa bada. (Mataio 24:13) Laloaboio lasi, Satani ia ura Iehova oi dadaraia. Dina ta ta ai Iehova oi badinaia neganai, Iehova oi durua Satani ena samani hereva koikoina ia haerelaia totona. (Aonega Herevadia 27:11) Nega haida haheauka oi hahedinaraia be auka. Gorere, moni lasi, lalohisihisi bona hekwakwanai ma haida dainai, dina ta ta be hahetoho ta. Oi naria noho gauna ia vara lasi neganai, inai danu be lalo-manoka ia havaraia diba. (Aonega Herevadia 13:12) Unai bamona negadia lalonai ita haheauka neganai, Iehova ese unai ia laloa bada. Unai dainai King Davida ese Iehova ia noia ena matana ranudia be “kavabu” ta lalonai ia udaia, bona mai lalo-goada ida ma ia gwau: “Oiemu buka lalonai idia torea vadaeni, ani?” (Salamo 56:8) Oibe, Iehova ita badinaia noho lalonai, ita haheaukalaia hisihisi bona taitai ibounai ia itaia bona ia laloatao. Idia danu be mai anina bada ena matana dekenai.
Iehova Ena Lalokau Dainai Gari Karana Ita Hanaia Diba
16 Satani ia diba iseda mauri ita laloa bada. Bona ia gwau mauri ita gimaia totona iseda hetura karana Iehova ida ita dadaraia diba. (Iobu 2:4, 5) Satani ena hereva be kerere! Ia be “mase ia havaraia tauna” dainai, mase gari henia karana ia gaukaralaia Iehova ita rakatania totona. (Heb. 2:14, 15) Nega haida, Satani ena taunimanima ese Iehova idia tomadiho henia taudia idia hagaria, edia abidadama idia rakatania totona. Eiava nega haida, gorere badana ta dainai ita ura medikol heduru ita abia haraga, bona Satani ese unai ia gaukaralaia iseda hetura karana Dirava ida ia hadikaia totona. Doketa eiava Witnes lasi famili be ita idia doria rara ita abia totona, unai amo Dirava ena taravatu ita utua diba. Eiava ta ese iseda lalona ia veria heduru dala ma ta ita tahua totona, ena be unai ese Baibel ena hakaua herevadia ia utua.
17 Ena be ita ura lasi mase, eiava do ita mase, to ita diba Iehova ese ita do ia lalokau henia noho. (Roma 8:37-39 duahia.) Iehova ena turadia idia mase neganai, idia ia laloatao noho, toana be idia mauri noho bamona. (Luka 20:37, 38) Ia ura dikadika idia ia hamauria lou. (Iobu 14:15) Iehova ese dava bada gauna ta ia henia, unai amo ‘mauri hanaihanai do ita abia.’ (Ioa. 3:16) Ita diba Iehova ese ita ia lalokau henia bona laloa bada. Unai dainai, ita gorere eiava kahirakahira ita mase neganai, Iehova ena heduru, aonega, bona goada dekenai ita tabekau. Valérie bona ena adavana be unai bamona idia karaia.—Sal. 41:3.
Hakaua Hereva Namodia
it-1-E 857-858
Vaira Negai Do Idia Vara Gaudia Idia Diba Karana
Iuda Iskariote ena koikoi karana ese peroveta herevana ia hagugurua bona ia hahedinaraia Iehova bona Iesu be vaira negai do idia vara gaudia idia diba. (Sal 41:9; 55:12, 13; 109:8; Ka 1:16-20) To, namo lasi ita gwau Dirava ese Iuda ia makaia unai kara ia karaia totona. Peroveta herevadia haida idia hahedinaria Iesu ena turana namona ta ese ena mase dalana do ia karaia, to unai do ia karaia tauna ena ladana ia gwauraia lasi. Oibe, Baibel ena hakaua herevadia dainai, ita abia dae Dirava ese Iuda ia abia hidi lasi unai kara dika ia karaia totona. Aposetolo tauna ese inai hakaua herevana ia gwauraia: “Namo lasi ta oi abia hidi haraga maduna ta ia huaia totona, bona ma haida edia kara dika oi durua lasi, to oi kara goeva noho be namo.” (1Ti 5:22; 3:6 hahegeregerea.) Iesu ia lalohekwarahi badina ia ura mai laloa maoromaoro ida aposetolo taudia 12 do ia abia hidi namonamo, unai dainai hanuaboi ta ibounai lalonai ena Tamana dekenai unai ia gurigurilaia guna. (Lu 6:12-16) Bema Dirava ese Iuda ia makaia Iesu ena mase dalana do ia karaia, vadaeni unai be Dirava ena hakaua dalana ida ia hegeregere lasi, badina unai ese do ia hahedinaraia ia be Iuda ena kara dika ia durua.
Vadaeni, toana be Iesu ese Iuda ia abia hidi aposetolo tauna neganai, Iuda ena kudouna ai koikoi karana ta ia noho lasi. To, Iuda ena “lalonai poisini ramuna ia tubu” bona ena lalona ia hadikaia, unai amo Diabolo ena hakaua dalana ia abia dae, bena ia henaonao bona Iesu ena mase dalana ia karaia. (Heb. 12:14, 15; Ioa. 13:2; Kara 1:24, 25; Iam. 1:14, 15; IUDA No. 4 itaia.) Unai lalohadai dikana ia goada ia lao neganai, Iesu sibona ese Iuda ena kudouna ai unai ia itaia, bona iena mase dalana do ia karaia karana ia perovetalaia.—Ioa 13:10, 11.