Maino Davaria Dalana, Tuari Bona Dagedage Negadiai
Guna soldia gaukara ia karaia tauna ladana Gary ia gwau, “Baibel lau do stadilaia lasi neganai, inai tanobada ai hahisia karadia bona kara gageva momo idia vara ena badina lau diba lasi. To hari lau dekenai lalomaino ia noho. Lau diba Iehova Dirava ese inai tanobada be gabu namona ai do ia halaoa.”
Gary ia abia hemami be ma haida ese idia mamia danu. Mani Baibel ese idia ia durua dalana ita itaia.
BAIBEL IA GWAU: “Iehova e, oi be namo bona oi noho hegaegae dika gwauatao totona.”—Salamo 86:5.
BAIBEL ESE IA DURUA DALANA: Wilmar, Colombia ai, ia gwau: “Unai Baibel siri ese lau ia hadibaia Iehova ena hebogahisi karana be bada. Lau diba ia be mai ura ida, guna tuari ai lau karaia kara dika ibounai do ia gwauatao.”
BAIBEL IA GWAU: “Lau ese guba matamata bona tanobada matamata do lau havaraia. Bona gau gunadia do umui laloa lou lasi, eiava do umui laloaboio momokani.”—Isaia 65:17.
BAIBEL ESE IA DURUA DALANA: Zafirah, United States ai, ia gwau: “Lau ese guna tuari ai idia vara dika lau lalodia lou bona lau lalometau. To unai Baibel siri ese lau ia hadibaia, unai bamona gaudia laloa noho karana be daudau lasi Iehova ese do ia haorea. Egu lalohadai eiava kudouna ai unai gaudia do idia noho lasi, do idia boio momokani. Unai be namo herea!”
BAIBEL IA GWAU: “Iena lohia negana lalonai kara maoromaoro do ia bada, bona maino do ia bada herea ela bona hua do ia hedinarai lou lasi.”—Salamo 72:7.
BAIBEL ESE IA DURUA DALANA: Oleksandra, Ukraine ai, ia gwau: “Nega momo unai siri ena hereva lau laloa. Daudau lasi tuari dainai idia vara dika idauidau do idia ore bona iseda lalokau taudia edia seifti totona do ita laloa momo lou lasi.”
BAIBEL IA GWAU: “Emui mase taudia do idia mauri. . . . Kahu lalonai umui noho taudia e, do umui toreisi bona mai moale ida do umui boiboi.”—Isaia 26:19.
BAIBEL ESE IA DURUA DALANA: Marie, Rwanda ai, ia gwau: “Egu famili be Tutsi taudia. Bona egu famili idia inai henia iduhu ese ibounai idia hamasea. To unai Baibel siri ese lau ia hadibaia egu famili do lau itaia lou. Idia toreisi lou neganai, lau ura edia moale ena gado regena lau kamonai!”
BAIBEL IA GWAU: “Nega daudau lasi murinai, kara dika taudia do idia noho lasi . . . To manau taudia ese tanobada do idia abia, bona do idia moale bada, badina gabu ibounai dekenai maino do ia noho.”—Salamo 37:10, 11.
BAIBEL ESE IA DURUA DALANA: Daler, Tajikistan ai, ia gwau: “Ena be tuari idia ore, to kara gageva bona kara dikadia idia karaia taudia idia do noho. Unai Baibel siri ese lau dekenai goada ia henia. Iehova be gau ibounai ia itaia noho bona egu noho dalana ia lalopararalaia. Ia gwauhamata unai hisihisi idauidau be daudau lasi do idia ore bona do ita laloaboio.”
Inai magasin ai edia sivarai idia herevalaia taudia danu be Iehova ena Witnes taudia milioni momo ida Baibel ena heduru amo lalomaino idia davaria. Idia be tano, kopina, bese, iduhu idauidau bona ta ta inai henia karana dadaraia dalana idia dibaia. (Efeso 4:31, 32) Iehova ena Witnes taudia be politik karadia amo idia gini siri bona dagedage karadia lalonai idia vareai lasi.—Ioane 18:36.
Danu tanobada hegegemadai ai, Iehova ena Witnes taudia be famili ta bamona, idia be mai lalokau ida ta ta idia durua. (Ioane 13:35) Hegeregere matamanai ita herevalaia taihu Oleksandra be tuari dainai ena sista ida tano ma ta dekenai ia lao. Ia gwau: “Unai tano ena boda ai raka hanaia neganai, Witnes taudia ai itaia bona idia ese ai idia welkam henia. Edia heduru dainai unai tano ai refiuji bamona ai noho dalana ai dibaia.”
Oi ai invait Iehova ena Witnes taudia edia hebou dekenai oi mai totona. Unuseniai ai ida Baibel amo maino ena sivarai oi kamonai, bona unai oi badinaia dalana do oi dibaia. Hebou gabuna oi davaria totona, eiava Iehova ena Witnes ta ida Mauri Moalelaia Hanaihanai! bukana amo davana lasi Baibel stadi kosi karaia totona jw.org dekenai oi lao.