Iehova Ena Lalokau Abia Dae

1. Dahaka dainai Iehova dekenai emu mauri oi gwauhamatalaia? (Laulau itaia danu.)

IEHOVA dekenai emu mauri oi gwauhamatalaia negana oi laloatao, a? Unai abia hidi oi karaia badina ia oi dibaia bona ia oi lalokau henia. Ia dekenai oi gwauhamata emu mauri lalonai iena ura do oi atoa guna bona ia do oi lalokau henia mai emu kudouna ibounai, mai emu mauri ibounai, mai emu lalona ibounai, bona mai emu goada ibounai ida. (Mar. 12:30) Unai negana amo emu lalokau ia dekenai be ia goada ia lao. Unai dainai bema tau ta be inai henanadai ia henia, dahaka do oi gwau: “Momokani oi be Iehova oi lalokau henia, a?” Do oi haere haraga, oi gwau: “Ia lau lalokau henia bada!”

2-3. Iehova ia ura dahaka ita abia dae, bona inai atikol ai dahaka do ita herevalaia? (Ieremia 31:3)

² To, bema tau ta be inai henanadai ia henia, “Oi abia dae Iehova ese oi ia lalokau henia, a?” Edena bamona do oi haere? Reana oi laloa oi be hegeregere lasi Iehova ena lalokau oi abia totona. Unai dainai oi daradara, a? Iena mauri lalonai hekwakwanai momo ia davaria taihu ta ia gwau: “Lau diba momokani Iehova lau lalokau henia. To nega momo lau daradaralaia gauna be bema Iehova ese lau ia lalokau henia.” Unai dainai dahaka ese oi do ia durua Iehova ena hemami oi dekenai oi diba namonamo totona?

³ Iehova ia ura oi abia dae ia ese oi ia lalokau henia. (Ieremia 31:3 duahia.) Iehova ia ura ia oi dibaia bona iena turana ai oi lao. Bona ia dekenai emu mauri oi gwauhamatalaia bona oi bapatiso neganai, ia ese oi dekenai harihari gauna namona ia henia. Unai be iena noho hanaihanai lalokauna. Unai ena anina be oi ia lalokau henia bada bona oi do ia rakatania lasi. Unai lalokau dainai Iehova ese iena kamonai hesiai taudia, oi danu, ia laloa bada. (Mal. 3:17) Aposetolo Paulo ese Iehova ena lalokau ia mamia hegeregerena, Iehova ia ura oi danu oi mamia. Paulo ia gwau: “Lau diba momokani, mase eiava mauri, eiava aneru, eiava gavamani, eiava hari idia noho gaudia, eiava gabeai do idia mai gaudia, eiava siahu gaudia, eiava ataiai gaudia, eiava dobu gaudia, eiava Dirava ese ia havaraia gaudia ma haida, unai gaudia ibounai ese ita be Dirava ena lalokau . . . amo, ita ia hapararaia diba lasi.” (Roma 8:38, 39) Inai atikol ai, ita abia dae Iehova ese ita ia lalokau henia bona unai ita abia dae totona do ita karaia gaudia do ita herevalaia.

IEHOVA ENA LALOKAU ITA ABIA DAE ENA BADINA

4. Edena dala ai Satani ena koikoi karadia ibounai ita dadaraia diba?

⁴ Iehova ena lalokau ita abia dae neganai, Satani ena “koikoi karadia ibounai” ita dadaraia diba. (Efe. 6:11) Satani ia ura dikadika ita ia koua Iehova ita hesiai henia lasi totona. Satani ena koikoi karana ta be ia ura hahedinaraia Iehova ese ita ia lalokau henia lasi. Namona be ita laloatao hanaihanai Satani be ita manoka negana ai ita ia tohoa. Hegeregere, guna ita karaia kerere dainai ita lalometau neganai, hari ita davaria hahetoho ita haheaukalaia noho lalonai, eiava iseda vaira nega totona ita daradara negadia ai. (Aon. 24:10) Satani be laiona bamona ia manoka animal ia tahua. Unai dainai ia ura ita lalomanoka eiava lalometau negadia ai, ita dekenai gau ta do ia karaia, Iehova ita hesiai henia lasi totona. To, bema Iehova ese ita ia lalokau henia lalohadaina ita hagoadaia, do ita hegeregere Satani ita “tuari henia” bona iena koikoi karadia ibounai ita dadaraia totona.—1 Pet. 5:8, 9; Iam. 4:7.

5. Dahaka dainai ita mamia diba Iehova ese ita ia lalokau henia bona laloa bada?

⁵ Iehova ena lalokau ita abia dae neganai, ia kahirakahira ita lao diba. Unai ita gwauraia ena badina mani ita laloa. Iehova ese ita ia karaia ma haida ita lalokau henia bona idia ese ita idia lalokau henia totona. Bema ta ese ita ia lalokau henia, unai ese ita do ia hagoadaia ia ita lalokau henia totona. Unai dainai ita mamia Iehova ese ita ia lalokau henia bona ita ia laloa bada neganai, ita ese ia ita lalokau henia bada. (1 Ioa. 4:19) Bona iseda lalokau ia dekenai ia bada neganai, ia ese ita do ia lalokau henia bada. Baibel ese ita ia hamaoroa: “Dirava kahirakahira umui lao, bona ia be umui kahirakahira do ia mai.” (Iam. 4:8) To, edena dala ai ita abia dae momokani diba Iehova ese ita ia lalokau henia?

DAHAKA ESE ITA IA DURUA DIBA IEHOVA ENA LALOKAU ITA ABIA DAE TOTONA?

6. Iehova ena lalokau ita abia dae totona, iseda guriguri ai dahaka ita gwauraia diba?

⁶ Iehova ena lalokau oi dekenai oi lalopararalaia totona oi guriguri noho. (Luka 18:1; Roma 12:12) Dina ta lalonai nega momo oi guriguri diba Iehova ese oi ia durua ena lalohadai oi dekenai oi lalopararalaia totona. Nega haida oi mamia oi hegeregere lasi Iehova ese oi ia lalokau henia totona. To laloatao, Iehova be iseda kudouna ia hereaia bona gau ibounai ia diba. (1 Ioa. 3:19, 20) Ia be oi ia diba namonamo; emu kara namodia ia diba ena be unai oi diba lasi. (1 Sam. 16:7; 2 Siv. 6:30) Unai dainai oi laloa gaudia ibounai be ia dekenai oi “gwauraia,” bona ia oi noia iena lalokau oi abia dae totona. (Sal. 62:8) Bena emu guriguri hegeregerena, do ita herevalaia hakaua herevadia oi badinaia.

7-8. Edena dala ai Salamo bukana ese ia hahedinaraia Iehova ese ita ia lalokau henia?

⁷ Iehova ena hereva ita abidadama henia. Iehova ese ena hesiai taudia be lauma helaga amo ia hakaua dainai Baibel idia torea. Unai dainai Iehova totona idia gwauraia gaudia ibounai be momokani. Salamo torea tauna Davida ese Iehova ia gwauraia dalana mani ita laloa: “Iehova be lalometau taudia kahirakahira ia noho. Ia ese lalomanoka taudia ia hamauria noho.” (Sal. 34:18; ftn.) Oi lalometau neganai, do oi mamia oi be sibona oi noho, bona do oi laloa ta ese oi ia durua diba lasi. To Iehova ia gwauhamata, unai bamona negadia ai oi kahirakahira do ia noho, badina ia itaia oi be ena heduru oi abia be namo. Davida ena ane ta lalonai, ia gwau: “Egu mata ranu be emu ranu pusena ai oi haboua.” (Sal. 56:8) Oi lalomanoka o hisihisi oi mamia neganai, Iehova be unai ia itaia. Ia ese oi ia laloa bada, oi davaria hekwakwanai ia laloa danu. Laulau dalanai ia ese emu mata ranu ia gogoa bona puse lalonai ia haboua, daudau gabuna ai ia lao tauna ese ena ranu puse lalonai ranu ia haboua bamona. Salamo 139:3 ia gwau: “[Iehova be] egu kara ibounai [ia] diba namonamo.” Iehova ese emu kara ibounai ia itaia, to emu kara namodia ia laloa bada. (Heb. 6:10) Dahaka dainai? Badina ia hamoalea totona oi karaia kara ibounai ia laloa bada.a

⁸ Unai bamona hagoadaia Baibel siridia amo Iehova be hegeregere ita ia hadibaia: “Lau ura oi diba oi lau lalokau henia bona oi lau laloa bada.” To ita diba vadaeni, Satani be ena koikoi herevadia amo ia gwau Iehova be ita ia lalokau henia lasi. Unai dainai nega haida do oi daradara, bema Iehova ese oi ia lalokau henia, sibona oi nanadaia, ‘Daika lau abidadama henia, “koikoi ena tamana” eiava “kara momokani Diravana”?’—Ioa. 8:44; Sal. 31:5.

9. Iehova idia lalokau henia taudia dekenai dahaka hagoadaia hereva ia henia? (Esodo 20:5, 6)

⁹ Iehova ese ia idia lalokau henia taudia ia laloa dalana oi laloa. Iehova ese Mose bona Israela taudia dekenai ia gwauraia hereva mani ita laloa. (Esodo 20:5, 6 duahia.) Iehova ia gwauhamata ia idia lalokau henia taudia dekenai iena noho hanaihanai lalokauna do ia hahedinaraia noho. Unai hereva ese ita ia hadibaia Dirava idia tomadiho henia taudia ese ia idia lalokau henia neganai, idia do ia lalokau henia. (Neh. 1:5) Unai dainai bema nega haida oi ura hamomokania Iehova ese oi ia lalokau henia, sibona oi nanadaia, ‘Iehova lau lalokau henia, a?’ Vadaeni, inai oi laloa: Bema Iehova oi lalokau henia bona oi gaukara goada ia oi hamoalea totona, namona be oi diba ia ese oi ia lalokau henia bada. (Dan. 9:4; 1 Kor. 8:3) Ita gwau diba bema ia oi lalokau henia karana oi daradaralaia lasi, dahaka dainai ia ese oi ia lalokau henia karana oi daradaralaia? Namona be oi diba momokani ia ese oi ia lalokau henia bona oi ia rakatania lasi.

10-11. Iehova ia ura edena dala ai oi ese mauri davalaia boubouna do oi laloa? (Galatia 2:20)

¹⁰ Mauri davalaia boubouna oi laloa dobu. Iesu Keriso ena mauri davalaia boubouna be Iehova ena harihari gauna hereadaena taunimanima totona. (Ioa. 3:16) To unai harihari gauna be oi totona, a? Oibe! Mani aposetolo Paulo ena sivarai ita laloa. Laloatao, ia be Keristani tauna ai ia do lao lasi neganai, kara dika badadia haida ia karaia bona sibona ena manoka gaudia ia haheaukalaia. (Roma 7:24, 25; 1 Tim. 1:12-14) To, ia abia dae Iehova ese ia henia mauri davalaia boubouna ena harihari gauna be ia totona. (Galatia 2:20 duahia.) Laloatao, Iehova ese ena lauma helaga amo Paulo ia hakaua unai hereva ia torea totona. Bona Baibel ai idia noho hereva ibounai be ita hadibaia totona. (Roma 15:4) Paulo ena hereva ese ia hahedinaraia, Iehova ia ura mauri davalaia boubouna be oi totona ia henia harihari gauna bamona oi laloa. Mauri davalaia boubouna be unai bamona oi laloa neganai, unai ese oi do ia hagoadaia bona do oi abia dae Iehova ese oi ia lalokau henia.

¹¹ Iehova ita tanikiu henia badina tanobada dekenai Iesu ia siaia mai bona ita totona ia mase. To, Iesu be tanobada dekenai ia mai ena badina ma ta be taunimanima dekenai Dirava ena hereva momokani do ia gwauraia. (Ioa. 18:37) Unai ese ia hahedinaraia Iehova ese ena natudia ia lalokau henia bada.

IEHOVA ENA LALOKAU ITA ABIA DAE TOTONA IESU ESE ITA IA DURUA DALANA

12. Dahaka dainai Iesu ese Iehova ia gwauraia dalana ita abia dae diba?

¹² Iesu be tanobada ai ia noho neganai, mai ura ida Iehova ia gwauraia hedinarai. (Luka 10:22) Iesu ese Iehova totona ia gwauraia hereva ibounai ita abia dae diba. Dahaka dainai? Badina Iesu be tanobada dekenai ia do mai lasi neganai, ena Tamana ida guba dekenai ia noho nega daudau. (Kol. 1:15) Iesu ia diba ena Tamana ese ia lalokau henia bada, bona ia itaia danu ena Tamana ese guba ai ia kamonai henia anerudia bona tanobada ai ia idia badinaia taudia ibounai ia lalokau henia bada. Edena dala ai Iesu ese ma haida ia durua Dirava ena lalokau idia abia dae totona?

13. Iesu ia ura edena dala ai Iehova ita laloa?

¹³ Iesu ia ura do ita diba Iehova ese ita ia lalokau henia bada. Evanelia bukadia lalonai, Iesu ese nega 160 bamona Iehova ia gwauraia “Tamana.” Bona ena murinai idia raka taudia ia hereva henia neganai, ia ese inai hereva “emu Tamana” eiava “emui guba Tamana” ia gaukaralaia. (Mat. 5:16; 6:26) Iesu be tanobada dekenai ia do mai lasi neganai, Iehova ena abidadama hesiai taudia ese Dirava ena dagi ladana idauidau idia gwauraia, hegeregere ‘Siahu Ibounai Diravana,’ ‘Ataiai Momokani Diravana,’ bona ‘Havaraia Tauna Badana,’ to Iesu be nega momo inai hereva ‘Tamana’ ia gaukaralaia. Unai amo ia hahedinaraia Dirava idia hesiai henia taudia ia lalokau henia. Unai ese ia hahedinaraia Iesu ia ura ita diba Iehova be lalokau Tamana bona ena natudia ia lalokau henia bada. Mani Iesu ese inai hereva “Tamana” ia gaukaralaia negadia rua do ita laloa.

14. Iesu be edena dala ai ia hahedinaraia Tamana ena matana ai ita be dava bada gauna bamona? (Mataio 10:29-31) (Laulau itaia danu.)

¹⁴ Ginigunana be Iesu ena hereva Mataio 10:29-31 dekenai do ita laloa. (Duahia.) Manu maragidia be Iehova do idia lalokau henia lasi o tomadiho henia lasi. To, iseda Tamana ese manu maragina ta be tano ai ia moru neganai ia diba. Bema Iehova ese unai manu maragina ia laloa bada, ita diba momokani ia ese ita ta ta ia laloa bada, badina ia ita lalokau henia bona ia ita tomadiho henia! Danu Iesu ia gwau, iseda “kwarana huina ibounai ia duahia vadaeni.” Iehova be unai gau maragidia ia diba dainai, ita abia dae diba ia ese ita ia lalokau henia bada. Oibe, Iesu ia ura ita abia dae momokani iseda guba Tamana ena matana ai ita be dava bada gauna bamona.

15. Ioane 6:44 ai, Iesu ese edena dala ai oi dekenai emui guba Tamana ia hadibaia?

¹⁵ Iesu ese inai hereva “Tamana” ia gaukaralaia negana iharuana ita laloa. (Ioane 6:44 duahia.) Emu guba Tamana ese hereva momokani dekenai oi ia hakaua mai. Dahaka dainai oi ia hakaua mai? Badina ia itaia oi be kudou-maoro tauna. (Kara 13:48) Iesu ese Ioane 6:44 ena hereva ia gwauraia neganai, ia be Iehova ena hereva Ieremia 31:3 dekenai ia herevalaia, unai siri ai Iehova ese taunimanima ia hereva henia: “Lau ese mai lalokau [eiava, noho hanaihanai lalokauna] ida oi lau hakaua mai lau kahirakahira.” (Ier. 31:3; ftn.; Hosea 11:4 ida hahegeregerea.) Unai hereva ena anina mani ita laloa. Iseda guba Tamana be emu kara namodia ia itaia noho, ena be inai oi lalopararalaia lasi.

16. (a) Iesu be ita dekenai dahaka hereva ia gwauraia, bona dahaka dainai ena hereva ita abidadama henia? (b) Edena dala ai oi hamomokania diba Iehova be emu Tamana Hereadaena? (Maua ladana “Iseda Tamana” itaia.)

¹⁶ Iesu ese Iehova ia gwauraia iseda Tamana. Unai be hegeregere ia gwau: “Iehova be lauegu Tamana sibona lasi, to ia be emu Tamana danu. Bona ia ese oi ia lalokau henia bona oi ia laloa bada.” Unai dainai bema nega haida oi laloa Iehova ese oi ia lalokau henia lasi, namona be Iesu ena hereva oi laloatao bona ia oi abidadama henia. Badina ia be nega ibounai hereva momokani ia gwauraia bona ia be iseda Tamana ia diba namonamo.—1 Pet. 2:22.

OI ABIA DAE NOHO IEHOVA ESE OI IA LALOKAU HENIA

17. Dahaka dainai ita abia dae noho Iehova ese ita ia lalokau henia?

¹⁷ Namona be ita gaukara goada noho, unai amo ita abia dae Iehova ese ita ia lalokau henia. Guna ita herevalaia bamona, koikoi tauna badana Satani be ia gaukara goada noho, ita do ia koua Iehova ita hesiai henia lasi totona. Ia ura ita ia hamanokaia, unai dainai ia ura ita ia koia bona do ita abia dae Iehova ese ita ia lalokau henia lasi. To, ita ura lasi Satani do ia kwalimu!—Iobu 27:5.

18. Dahaka oi karaia diba unai amo do oi abia dae Iehova ese oi ia lalokau henia?

¹⁸ Inai atikol ai, oi abia dae Iehova ese oi ia lalokau henia totona do oi karaia gaudia oi dibaia. Ia oi guriguri henia diba, bona oi noia oi do ia durua ena kara namodia oi itaia totona. Iehova ese ia idia lalokau henia taudia ia lalokau henia bada karana ia herevalaia Baibel siridia oi laloa dobu. Laloatao, Iehova be hanaihanai ia idia lalokau henia taudia ia lalokau henia bada. Oi totona ia henia mauri davalaia boubouna ena harihari gauna oi laloa dobu. Bona Iesu ese ia gwauraia herevana Iehova be emu guba Tamana oi abia dae. Bema tau ta ia henanadai: “Oi abia dae Iehova ese oi ia lalokau henia, a?” Do oi gwau diba: “Oibe, lau ia lalokau henia! Bona dina ta ta, lau gaukara goada ia dekenai lalokau lau hahedinaraia totona!”