Buruka Negana ai Oi Moale Noho

1-2. Iehova ese buruka taudia be edena bamona ia laloa? (Salamo 92:​12-14; ena laulau itaia danu.)

TANO HAIDA ai taunimanima idia laloa, oi buruka oi lao neganai unai be gau namona. To, tano haida ai taunimanima be gau idauidau idia karaia idia buruka lasi totona. Hegeregere, haida be edia kwarana ai huina kurokuro ta idia itaia neganai, idia kokia haraga. To herevana dahaka idia karaia, unai idia koua diba lasi.

² To, iseda guba Tamana be ia idia hesiai henia buruka taudia ia laloa bada. (Aon. 16:31) Iehova ese idia ia herevalaia neganai, au huahua idia atoa au hairaidia ida ia hahegeregerea. (Salamo 92:​12-14 duahia.) Dahaka dainai au hairaidia ida ia hahegeregerea? Badina lagani momo lalonai idia mauri au be mai edia raurau bona flaoa namodia. Unai au hairaina ta be Japan ena au ta ladana Cherry Blossom. Unai au haida be lagani tausen lalonai idia mauri. Unai au hegeregerena, Iehova dekenai buruka taudia be mai edia hairai. Iehova ese buruka taudia edia kara namodia ia laloa bada. Badina idia ese lagani momo lalonai ia idia hesiai henia bona nega namodia bona nega aukadia ai Iehova idia badinaia.

3. Iehova be ena ura ia hagugurua totona buruka taudia ia gaukaralaia dalana mani oi gwauraia.

³ Ita buruka ita lao neganai, Iehova ese ita do ia laloa bada noho.a Oibe, nega momo Iehova ese buruka taudia ia gaukaralaia iena ura ia hagugurua totona. Mani Sara oi laloa. Sara ia buruka neganai, Iehova ese ia hadibaia ia be bese badana ena sinana ai do ia lao bona Mesia ena tubuna ai do ia lao. (Gen. 17:​15-19) Bona Mose be ia buruka neganai, Iehova ese ia hadibaia Israela taudia be Aigupito amo do ia hakaua raka-lasi totona. (Eso. 7:​6, 7) Danu Iehova ese aposetolo Ioane ia abia hidi Baibel ena buka 5 ia torea totona neganai, ia be ia buruka vadaeni.

4. Aonega Herevadia 15:15 hegeregerena, dahaka ese buruka taudia ia durua diba hekwakwanai idauidau idia haheaukalaia totona? (Laulau itaia danu.)

⁴ Ita buruka ita lao lalonai hekwakwanai idauidau ita davaria. Unai dainai momo idia gwau, “Buruka maurina be auka.” To buruka taudia idia moaleb neganai, unai ese idia do ia durua idia davaria hisihisi idauidau idia haheaukalaia totona. (Aonega Herevadia 15:15 duahia.) Inai atikol ai, buruka taudia idia moale noho totona idia karaia diba gaudia do ita herevalaia. Danu kongrigeisen ai idia noho buruka taudia be haida ese idia durua dalana do ita herevalaia. Ginigunana be, ita buruka ita lao neganai ita moale noho be auka ena badina do ita herevalaia.

ITA BURUKA ITA LAO NEGANAI ITA MOALE NOHO BE AUKA ENA BADINA

5. Dahaka dainai buruka taudia haida idia lalohisihisi?

⁵ Dahaka ese oi dekenai lalohisihisi ia havaraia diba? Reana guna oi karaia gaudia be hari oi karaia diba lasi. Eiava oi matamata bona oi goada negana oi laloa lou. (Had. 7:10) Hegeregere, taihu ta ladana Ruby ia gwau: “Dabua lau atoa totona be auka badina egu tauanina ia hisihisi bona lau marere be auka. Nega haida egu aena ai sokisi lau atoa diba lasi. Egu imana be goada lasi bona egu turia idia hisihisi, unai dainai gaukara maragidia lau karaia be auka.” Bona Harold, Betele ai ia gaukara tadikaka, ia gwau: “Nega haida lau badu, badina guna lau karaia gaudia lau karaia diba lasi. Lau matamata neganai, lau goada. Bona lau ura henia spot gadara be baseball. Haida idia gwau, ‘Harold dekenai bolo umui henia, do ita kwalimu.’ To hari, ia auka bolo lau negea totona.”

6. (a) Buruka taudia idia lalohisihisi ena badina ma haida be dahaka? (b) Dahaka ese buruka taudia ia durua, unai amo do idia diba motuka idia taria noho diba eiava lasi? (Inai magasin ai atikol ladana “Motuka Lau Taria Noho be Namo, A?” itaia.)

⁶ Do oi lalohisihisi badina gau haida be sibona oi karaia diba lasi. Unai ia vara diba bema oi be ma haida ese idia naria eiava emu natudia edia heduru oi abia be namo. Eiava oi lalohisihisi momokani badina oi gorere momo dainai gabu haida oi lao diba lasi eiava matana ia dika dainai motuka oi taria diba lasi. Ena be unai gaudia ita karaia eiava lasi, to namona be ita laloatao, Iehova bona ma haida ese ita idia laloa bada. Danu ita abia dae Iehova ese iseda hemami ia lalopararalaia. Iehova ia diba ita ese ia bona iseda tadikaka taihu ita lalokau henia bada. Bona Iehova be unai ia laloa bada.—1 Sam. 16:7.

7. Bema haida idia laloa tanobada oromana ena dokona do idia itaia lasi dainai idia lalohisihisi, dahaka ese idia do ia durua?

⁷ Reana oi lalohisihisi badina oi laloa inai tanobada oromana ena dokona do oi itaia lasi. Bema unai bamona oi laloa, dahaka ese oi do ia durua? Namona be oi laloatao, Iehova be mai haheauka ida ia naria noho inai tanobada dikana ia haorea totona. (Isa. 30:18) To Iehova ia haheauka noho dainai, taunimanima milioni momo be mai edia nega ia idia dibaia bona hesiai henia totona. (2 Pet. 3:9) Unai dainai oi lalohisihisi neganai, namona be inai oi laloa, Iehova ena haheauka karana dainai taunimanima momo be mauri do idia abia. Reana unai taudia haida be oiemu bese taudia.

8. Buruka taudia be idia gorere eiava hisihisi idia davaria neganai, dahaka idia karaia diba?

⁸ Ena be ita be matamata eiava buruka taudia, to gorere eiava hisihisi ita davaria neganai, nega momo ita kara eiava hereva kerere diba. (Had. 7:7; Iam. 3:2) Hegeregere, abidadama tauna Iobu be hisihisi ia davaria neganai, ia “hereva kava.” (Iobu 6:​1-3) Ma danu nega haida buruka taudia be gorere eiava idia abia muramura dainai, idia hereva kava eiava kara kava. Momokani, ita ura lasi ita buruka eiava ita gorere dainai, kara namona ita hahedinaraia lasi eiava haida ita doria iseda ura gaudia idia karaia totona. Bona bema ita laloparara ta dekenai ita gwauraia herevana be namo lasi, karaharaga ia ita sori henia be namo.—Mat. 5:​23, 24.

ITA MOALE NOHO DALANA

9. Dahaka dainai haida edia heduru ita abia be namo? (Laulau itaia danu.)

⁹ Ma haida amo heduru abia. (Gal. 6:2) Reana do oi laloa unai be auka. Taihu ta ladana Gretl ia gwau: “Nega haida ma haida edia heduru lau abia be auka, badina lau laloa idia dekenai maduna lau henia. To nega ia hanaia lalonai egu lalohadai lau haidaua bona mai manau ida heduru lau abia dae.” Ma haida amo heduru oi abia dae neganai, do idia moale. (Kara 20:35) Bona do oi moale bada badina do oi itaia haida be oi idia lalokau henia bona laloa bada.

10. Dahaka dainai tanikiu karana ita hahedinaraia be namo? (Laulau itaia danu.)

¹⁰ Tanikiu karana hahedinaraia. (Kol. 3:15; 1 Tes. 5:18) Ta ese ita dekenai kara namo ia hahedinaraia neganai, unai ita laloa bada to ita laloaboio tanikiu herevana ita gwauraia totona. To, mai kiri ida tanikiu herevana ita gwauraia neganai, iseda turadia ita hamoalea bona idia mamia idia ita laloa bada. Betele ai buruka taudia ia naria taihu ta ladana Leah, ia gwau: “Taihu ta be lau dekenai tanikiu nouti ia torea. Ena be hereva kwadogina, to unai be namo herea. Lau diba egu heduru ia laloa bada dainai lau moale.”

11. Edena dala ai ma haida oi durua diba? (Laulau itaia danu.)

¹¹ Ma haida oi durua. Emu nega bona goada be ma haida durua totona oi gaukaralaia neganai, emu hekwakwanai do oi laloa momo lasi. Africa ena aonega hereva ta ia gwau, buruka taudia be laiberi ta bamona. Laiberi lalonai idia noho buka lalonai aonega herevadia momo idia noho. To bema taunimanima be unai buka idia duahia lasi, diba do idia abia lasi. Unai dainai bema oi diba gaudia be matamata taudia dekenai oi hadibaia lasi, mai anina bada gaudia do idia diba lasi. Matamata taudia oi diba totona idia oi hereva henia, bona idia hereva neganai oi kamonai. Idia oi hadibaia nega ibounai Iehova ena taravatu badinaia karana be edia namo totona bona do idia moale. Matamata taudia oi hagoadaia neganai, do oi moale.—Sal. 71:18.

12. Isaia 46:4 ai, Iehova be buruka taudia dekenai dahaka gwauhamata ia henia? (Laulau itaia danu.)

¹² Goada totona Iehova guriguri henia. Ena be oi hesiku bona oi laloa oi hegeregere lasi, to Iehova be “ia hesiku diba lasi eiava ia manoka diba lasi.” (Isa. 40:28) Iehova ese edena dala ai ena siahu bada ia gaukaralaia? Dala ta be ia ese abidadama buruka taudia ia hagoadaia. (Isa. 40:​29-31) Oibe, ia gwauhamata idia ia durua totona. (Isaia 46:4 duahia.) Bona hanaihanai Iehova ese ena gwauhamata ia badinaia. (Ios. 23:14; Isa. 55:​10, 11) Oi guriguri bona Iehova ena lalokau bona heduru oi mamia neganai, do oi moale.

13. Korinto Iharuana 4:​16-18 hegeregerena, dahaka ita laloatao be namo? (Laulau itaia danu.)

¹³ Namona be oi laloatao oi davaria hekwakwanai be nega sisina sibona. Bema ita laloatao ita davaria hekwakwanai be do ia noho daudau lasi, do ita haheauka diba. Bona Baibel ia gwau buruka bona gorere be do idia ore. (Iobu 33:25; Isa. 33:24) Unai dainai oi moale diba badina nega vaira ai do oi gorere lasi bona emu goada do oi abia lou. (2 Korinto 4:​16-18 duahia.) To haida be dahaka idia karaia diba buruka taudia idia durua totona?

OI DURUA TOTONA HAIDA ESE IDIA KARAIA GAUDIA

14. Dahaka dainai buruka taudia vadivadi henia bona ring henia be namo?

¹⁴ Buruka tadikaka bona taihu ita vadivadi bona ring henia. (Heb. 13:16) Buruka taudia idia mamia sibona idia noho. Tadikaka ta ladana Camille ia gwau: “Nega haida lau laloa momo bona lau badu, badina lau be ruma dekenai lau noho sibona. Unai dainai lau hesiku. Nega haida lau laloa lau be magu lalonai ia noho laiona burukana ta bamona.” Buruka taudia ita vadivadi henia neganai, idia dekenai ita hahedinaraia idia ita laloa bada bona ita lalokau henia. Reana nega haida ita ura idia ita ring henia eiava vadivadi henia, to ita karaia lasi. Badina ita bisi bada. To, dahaka ita karaia diba “mai anina bada gaudia” ita reaia lasi totona? Hegeregere, buruka taudia vadivadi henia totona. (Fili. 1:10) Kalenda ai maka oi atoa diba, unai ese oi do ia hadibaia kongrigeisen ai idia noho burukadia oi teks henia bona ring henia totona. Danu nega oi makaia diba idia oi vadivadi henia totona. To oi gwau lasi nega ia noho neganai do lau karaia.

15. Matamata taudia bona buruka taudia be dahaka idia karaia hebou diba?

¹⁵ Bema oi be matamata ta, do oi daradara buruka taudia ida dahaka do oi herevalaia eiava dahaka gaudia do oi karaia. To unai oi laloa momo lasi. Edia turana namona ai oi lao. (Aon. 17:17) Hebou ia do matamaia lasi eiava hebou murinai, buruka taudia ida oi herevahereva. Reana idia oi nanadaia diba idia ura henia siri ta eiava idia maragi neganai, ia vara fani sivaraina ta idia gwauraia totona. Danu idia oi invait JW Brodkastin umui itaia hebou totona. Dala namodia haida ai buruka taudia oi durua diba. Hegeregere, edia fon oi apdeit eiava magasin matamata oi daonloud. Taihu ta ladana Carol ia gwau: “Oi moalelaia gaudia be buruka taudia ida umui karaia hebou. Ena be lau be buruka, to lau ura mauri lau moalelaia. Lau ura sitoa dekenai lau lao, turadia ida aniani hebou bona gabu namodia dekenai lau lao.” Bona taihu ta ladana Maira ia gwau: “Egu turana ta ena mauri lagani be 90. Bona egu mauri lagani be 33. To unai lau laloa lasi badina ai kiri hebou bona muvi ai itaia hebou. Hekwakwanai ai davaria neganai, ta ta ena heduru ai tahua.”

16. Buruka taudia be doketa idia itaia totona, dahaka dainai idia ita durua be namo?

¹⁶ Buruka taudia be doketa idia itaia totona idia oi bamoa. Emu motuka amo idia oi durua sibona lasi, to idia ida hospital dekenai umui lao. Bona doketa eiava nesi ese idia durua neganai, oi sekea bema heduru maorona idia henia. (Isa. 1:17) Bona idia totona doketa ese ia gwauraia gaudia be nouti buka ai oi torea. Buruka taihu ta ladana Ruth ia gwau: “Nega momo, hospital dekenai sibona lau lao neganai, doketa ese lau ia sekea namonamo lasi. Reana idia gwau, ‘Inai be emu lalohadai sibona, oi dekenai gorere ta ia noho lasi.’ To ta be lau ia bamoa neganai, doketa ena kara ia idau. Egu tadikaka bona taihu lau tanikiu henia badina lau idia bamoa.”

17. Edena dala ai buruka taudia ida oi haroro diba?

¹⁷ Haroro ai idia ida oi gaukara. Buruka taudia haida idia hegeregere lasi ruma-ta-ruma-ta haroro gaukara idia karaia totona. Unai dainai taihu burukana ta ida pablik haroro oi karaia diba. Reana ia totona sea ta oi abia, unai amo troli badinai ia helai diba. Eiava tadikaka burukana ta ida Baibel stadi ta oi karaia diba, reana unai be iena ruma dekenai umui stadi. Elda taudia be dala idia karaia buruka taudia edia ruma ai haroro ena hebou idia karaia totona, unai amo idia be haroro grup idia bamoa diba. Buruka taudia ita durua neganai, Iehova ia moale.—Aon. 3:27; Roma 12:10.

18. Stadi atikol 45 ai, dahaka do ita herevalaia?

¹⁸ Inai atikol ese ita ia hadibaia, Iehova be buruka taudia ia lalokau henia bona ia laloa bada. Kongrigeisen taudia ibounai danu be buruka taudia idia laloa bada! Buruka taudia e, ena be hekwakwanai momo do umui davaria, to Iehova ese umui do ia durua diba umui moale noho totona. (Sal. 37:25) Danu, vaira nega ena mauri namona umui laloa neganai, do umui moale! Bema oi be buruka tauna ta, natuna eiava turana namona ta ia gorere dainai oi naria, dahaka oi karaia diba, unai amo do oi moale noho? Unai henanadai ena haere be stadi atikol 45 ai do ita herevalaia.