Motuka Lau Taria Noho be Namo, A?

Oi dekenai unai ia vara, a? Bema oibe, dahaka ese oi ia durua diba, unai amo do oi diba bema oi hegeregere motuka oi taria noho totona?

Tano haida ai, buruka taudia idia ura laiseni matamata idia abia neganai, namona be doketa ena gwaumaoro idia abia. Unai tano ai idia noho Keristani taudia be unai taravatu idia badinaia be namo. (Roma 13:1) To herevana edena tano ai oi noho, namona be emu taria karana bona seifti oi laloa bada.

EMU TARIA KARANA OI LALOA

Emu taria karana oi laloa totona, National Institute on Aging (NIA) United States ena websait ai idia noho hereva hegeregerena, henunai idia noho henanadai oi laloa diba:

• Dala dekenai idia noho sain eiava hanuaboi ai dala lau itaia namonamo lasi, a?

• Lau be mira amo gabu lau itaia totona lau hekwarahi, a?

• Egu aena be ekselareita amo lau kokia bona breik dekenai lau atoa haraga lasi, a?

• Lau taria metairametaira dainai, motuka haida idia heau dalana lau koua, a?

• Nega momo kahirakahira lau bampa eiava egu motuka be mai ena maka momo, a?

• Egu taria karana dainai pulisi taudia ese lau idia stopu, a?

• Lau taria noho lalonai lau mahuta, a?

• Lau inua muramura dainai, motuka lau taria namonamo lasi, a?

• Egu famili taudia eiava turadia be egu taria karana dainai idia hereva momo, a?

Bema henanadai ta o rua dekenai emu haere be oibe, namona be emu taria karana oi lalohadailaia. Hegeregere, reana hanuaboi ai motuka oi taria lasi. Nega ta ta ai emu taria dalana oi sekea. Famili taudia o turana ta oi nanadaia emu taria dalana dekenai dahaka idia laloa. Danu seifti sikuli oi abia be namo. To, bema ataiai idia noho henanadai haida dekenai emu haere be oibe, namona be motuka oi taria lasi.a

BAIBEL ENA HAKAUA HEREVADIA BADINAIA

Do oi laloparara lasi, emu taria dalana hari be guna amo ia idau. Unai dainai haida ese oi idia hamaoroa motuka oi taria lasi neganai, oi lalohisihisi. Edena Baibel hakaua herevadia ese oi idia durua diba, emu hekwakwanai oi lalopararalaia bona abia hidi namona oi karaia totona? Hakaua herevadia rua ita laloa.

Oi Manau. (Aon. 11:2) Ita buruka ita lao neganai, iseda matana ia dika ia lao, hereva ita kamonai namonamo lasi bona iseda goada ia ore. Taunimanima momo be edia mauri lagani ia bada dainai, spot gadara haida idia rakatania, badina idia mamia bero idia davaria haraga. Unai hegeregerena manau tauna be ena seifti do ia laloa dainai motuka taria karana ia hadokoa. (Aon. 22:3) Bona bema haida idia laloa emu taria karana oi hadokoa be namo, namona be oi manau bona edia hereva oi abia dae bona badinaia.—2 Samuela 21:​15-17 hahegeregerea.

Ita ura lasi mase ita havaraia. (Deu. 22:8) Bema ta be motuka ia taria namonamo lasi, ia sibona eiava taunimanima haida ia haberoa eiava hamasea diba. Bona ia be rara dekenai ia kerere diba.

Bema ia auka motuka taria karana oi hadokoa ena abia hidi oi karaia totona, namo lasi oi laloa bema taria karana oi hadokoa dainai, haida be oi do idia laloa bada lasi. Emu kara namodia, hegeregere manau bona ma haida laloa karana dainai Iehova be oi ia lalokau henia. Bona ia gwauhamata ia ese oi do ia naria bona hagoadaia. (Isa. 46:4) Ia ese oi do ia rakatania lasi. Unai dainai ia oi noia, oi dekenai aonega ia henia bona Baibel ena hakaua herevadia hegeregerena abia hidi maorona oi karaia totona.