Iesu be Iseda Hebogahisi Hahelaga Tauna Badana

1-2. (a) Dahaka dainai Iehova ese ena Natuna be tanobada dekenai ia siaia mai? (b) Inai atikol ai dahaka do ita herevalaia? (Heberu 5:​7-9)

LAGANI 2,000 haida gunanai, Iehova Dirava ese ena Natuna tamona sibona be tanobada dekenai ia siaia mai. Dahaka dainai? Taunimanima be kara dika bona mase amo ia hoia lou bona Satani ese ia havaraia hisihisi ibounai ia haorea totona. (Ioa. 3:16; 1 Ioa. 3:8) Danu Iehova ia diba Iesu be taunimanima bamona ia noho dainai, ia hegeregere ita totona mai hebogahisi ida Hahelaga Tauna Badana ena hesiai gaukara ia karaia totona. Iesu be lagani 29 C.E.a ai ia bapatiso neganai, unai gaukara ia matamaia.

² Inai atikol ai, Iesu be tanobada ai ia itaia gaudia ese edena dala ai ia durua hebogahisi Hahelaga Tauna Badana ai ia lao totona do ita herevalaia. Iesu be ena gaukara totona ia “hegeregere momokani” dalana ita lalopararalaia neganai, unai ese ita do ia durua Iehova dekenai iseda kara dika eiava iseda manoka gaudia ese idia havaraia hemami ita herevalaia totona.—Heberu 5:​7-9 duahia.

IESU BE TANOBADA DEKENAI IA MAI

3-4. Iesu be dahaka senisi badana ia karaia?

³ Ita momo be iseda mauri ai senisi haida ita karaia, hegeregere iseda noho gabuna, famili bona turadia ita rakatania gabu matamata dekenai ita lao totona. Unai bamona senisi be auka. To Iesu dekenai senisi badana ia vara. Guba ai, Iehova ena aneru ibounai amo ia be aneru badana. Iena Tamana Iehova ese ia lalokau henia bona hanaihanai ia ida ia gaukara. (Sal. 16:11; Aon. 8:30) To, Filipi 2:7 ia gwau, mai ura ida guba ai ena dagi badana bona “gau ibounai ia rakatania.” Bona tanobada ai goevadae lasi taudia ida ia noho.

⁴ Danu, Iesu ia vara bona ena mero negana mani ita laloa. Iesu be ogogami famili lalonai ia vara. Unai ita diba badina Iesu ia vara murinai, ena tama sina be boubou gauna totona pune manu rua idia henia. (Lev. 12:8; Luka 2:24) King dikana Heroda be Iesu ena vara sivaraina ia kamonai neganai, ia ura do ia hamasea. Heroda amo Iesu idia hamauria totona, Aigupito dekenai idia lao. (Mat. 2:​13, 15) Tanobada ai, Iesu ena noho dalana be guba ai ia noho dalana amo ia idau momokani!

5. Iesu be tanobada ai ia noho neganai, dahaka ia itaia? Bona edena dala ai unai ese ia durua mai hebogahisi ida Hahelaga Tauna Badana ena gaukara ia karaia totona? (Laulau itaia danu.)

⁵ Iesu be tanobada ai ia noho neganai, idia vara hisihisi idauidau ia itaia. Ena lalokau taudia, ena ubua tamana Iosepa danu, edia mase ena hisihisi ia mamia. Iesu ena haroro gaukara lalonai, lepera taudia, aena dika taudia, mata-kepulu taudia bona idia lalometau tama sina ia hedavari henia bona idia ia hebogahisi henia. (Mat. 9:​2, 6; 15:30; 20:34; Mar. 1:​40, 41; Luka 7:13) Momokani, guba amo unai hisihisi idauidau ia itaia. To tanobada ai ia noho neganai, taunimanima ese idia davaria hisihisi ia mamia. (Isa. 53:4) Bona taunimanima ese idia abia hemami, hisihisi, bona lalohekwarahi ia lalopararalaia namonamo. Danu taunimanima hegeregerena, ia hesiku, ia lalohekwarahi, bona ia lalohisihisi.

IESU ESE TAUNIMANIMA IA HEBOGAHISI HENIA

6. Isaia ena peroveta herevana amo Iesu ena hebogahisi karana dekenai dahaka ita dibaia? (Isaia 42:3)

⁶ Iesu ena haroro gaukara lalonai, taunimanima ia hebogahisi henia, badina haida ese idia hahisia. Unai kara ia hahedinaraia dainai Isaia ena peroveta herevana ia hagugurua. Heberu Toretoredia lalonai, Iehova idia abidadama henia taudia be nega haida uma gabu namona eiava au goadana ta ida idia hahegeregerea. (Sal. 92:12; Isa. 61:3; Ier. 31:12) To idia ogogami bona taunimanima ese idia laloa maragi taudia be siriho manokana bona lamepa ena wiki mai ena kwalahu ida ia hahegeregerea. (Isaia 42:3 duahia; Mat. 12:20) Iehova ena siahu henunai, peroveta tauna Isaia ese unai laulau herevana amo ia hahedinaraia, Iesu be haida ese idia laloa maragi taudia ia lalokau henia bona hebogahisi henia.

7-8. Edena dala ai Iesu ese Isaia ena peroveta hereva ia hagugurua?

⁷ Mataio ese ia hahedinaraia Iesu ese Isaia ena peroveta herevana ia hagugurua, ia gwau: “Ia ese siriho manokana do ia makohia lasi, bona lamepa ena wiki mai ena kwalahu do ia habodoa lasi.” Haida ese idia hahisia taudia idia mamia idia be siriho manokana bona lamepa ena wiki mai ena kwalahu bamona. Unai dainai Iesu ese hoa karadia ia karaia idia ia durua totona. Idia ta be lepera gorere tauna. Reana unai lepera tauna ia mamia ena gorere be ta ese do ia hanamoa lasi bona ena famili bona turadia ida do ia hebamo diba lasi. (Luka 5:​12, 13) Danu Iesu be taia kudima bona hereva namonamo lasi tauna ia hedavari henia. Mani ena hemami oi laloa, unai tauna be ia itaia taunimanima idia herevahereva, to edia hereva ia lalopararalaia lasi.—Mar. 7:​32, 33.

⁸ To unai sibona lasi, Iesu ena nega ai, Iuda taudia momo idia laloa ta be ia gorere eiava tauanina ia dika neganai, unai be ia eiava ena tama sina ese idia karaia kara dika ena panisi. (Ioa. 9:2) Unai hahediba hereva koikoina dainai, taunimanima ese gorere eiava tauanina dika taudia idia kara namo henia lasi. Unai dainai idia mamia idia be anina lasi. Iesu ese gorere eiava aena dika taudia ia hanamoa bona ia hahedinaraia Dirava ese idia ia laloa bada. Unai kara amo Iesu ese Isaia ena peroveta herevana ia hagugurua. Unai ese edena dala ai iseda abidadama ia hagoadaia?

9. Edena dala ai Heberu 4:​15, 16 ese ia hahedinaraia, iseda Hahelaga Tauna Badana be goevadae lasi taudia ia hebogahisi henia?

⁹ Heberu 4:​15, 16 duahia. Ita abia dae diba Iesu be hanaihanai ita do ia hebogahisi henia. Unai ena anina be dahaka? Hebogahisi tauna be haida ese idia davaria hisihisi ia mamia bona ia ura idia ia durua. Grik herevana idia hahanaia “hebogahisi” ena anina be, ta be haida ese idia davaria hisihisi eiava edia hemami ia mamia. (Heberu 10:34 itaia danu, inai siri ai Paulo be unai Grik herevana ia gaukaralaia.) Iesu ese ia karaia hoa karadia edia sivarai ese ia hahedinaraia, hisihisi idia davaria taudia ia hebogahisi henia. Iesu be taunimanima edia gorere bona tauanina ia hanamoa neganai, ia hahedinaraia taunimanima ia laloa bada bona ia ura idia ia durua. Hegeregere, lepera tauna ia hanamoa neganai, daudau amo unai ia karaia diba. To lasi, ia mai bona unai tauna ia dogoatao. Mani oi laloa, reana lagani momo lalonai ta ese ena tauanina ia dogoatao lasi dainai, unai be nega ginigunana ta ena imana ia mamia. Danu, Iesu ese taia kudima tauna be hutuma amo ia hakaua siri bona taunimanima lasi gabuna dekenai ia hanamoa. Bona ena kara dika amo ia helalo-kerehai hahine ta ita laloa. Ia ese ena mata ranu amo Iesu ena aena ia huria. Farisea tauna ta ese unai hahine ia kara namo henia lasi neganai, Iesu be unai tauna dekenai ia hahedinaraia hahine be kara namona ia karaia. (Mat. 8:3; Mar. 7:33; Luka 7:44) Iesu be gorere taudia eiava kara dika badadia idia karaia taudia ia dadaraia lasi. To, idia ia abia dae bona mai hebogahisi ida idia ia hagoadaia. Unai dainai ita abia dae Iesu be ita ia laloa bada.

ISEDA HAHELAGA TAUNA BADANA ITA TOHOTOHOA

10. Taia kudima bona mata kepulu taudia durua totona, dahaka gaudia ita gaukaralaia diba? (Laulau itaia danu.)

¹⁰ Ita be Iesu murinai ita raka taudia dainai, namona be lalokau, ma haida laloa bada karana bona hebogahisi ita hahedinaraia. (1 Pet. 2:21; 3:8) Ena be taia kudima taudia edia taiana bona matakepulu taudia edia matana ita hanamoa diba lasi, to idia ita durua diba Iehova idia diba totona. Hegeregere, Baibel pablikeisen be saini gado 100 mai kahana ai idia noho. Bona matana dika taudia totona, gado 60 mai kahana ai braille pablikeisen idia noho bona gado 100 mai kahana ai vidio idauidau idia noho. Unai amo taia kudima taudia bona mata kepulu taudia ita durua diba Iehova bona ena Natuna idia diba namonamo totona.

11. Iesu hegeregerena, edena dala ai Iehova ena orea ese ia hahedinaraia taunimanima idauidau idia laloa bada? (Kara 2:​5-7, 33) (Laulau itaia danu.)

¹¹ Iehova ena orea ia gaukara goada taunimanima idauidau ia durua totona. Laloatao, Iesu ese lauma helaga ia bubua diho, unai amo Pentekoste dinana ai idia haboua taudia ta ta be edia gado ai sivarai namona idia kamonai diba. (Kara 2:​5-7, 33 duahia.) Hari, Iesu ena hakaua henunai, orea ese gado 1,000 mai kahana ai Baibel pablikeisen idauidau idia halasia, unai gado haida be taunimanima momo ese idia herevalaia lasi. Hegeregere, North bona Sauth America ai, Amerindian taudia edia gado haida be momo ese idia herevalaia lasi. To, pablikeisen idauidau 160 mai kahana be unai gado haida ai idia halasia, unai amo unai taudia be sivarai namona idia dibaia diba. Danu iseda pablikeisen be Romany gado 20 mai kahana ai idia halasia. Unai gado idauidau idia herevalaia taudia tausen momo be hereva momokani idia abia dae noho.

12. Iehova ena orea be dahaka heduru ma haida ia henia?

¹² Danu Iehova ena orea ese disasta idia davaria taudia dekenai heduru idia henia. Volantia taudia momo be mai ura ida disasta idia davaria tadikaka bona taihu idia durua. Danu orea ese Kingdom Hall namodia idia haginia, unai amo taunimanima be Dirava ese idia dekenai ia hahedinaraia lalokauna idia dibaia.

ISEDA HAHELAGA TAUNA BADANA ESE OI IA DURUA DIBA

13. Edena dala haida ai Iesu ese ita ia durua?

¹³ Iesu be iseda mamoe naria tauna namona dainai, ia ura bada ita ia durua iseda hetura karana Iehova ida ia goada noho totona. (Ioa. 10:14; Efe. 4:7) Nega haida, ita lalometau momokani badina ita gorere bada, kerere ta ita karaia o ita bona tadikaka eiava taihu ta huanai hekwakwanai ia noho. Unai neganai do ita mamia ita be lamepa ena wiki ena kwalahu eiava siriho manokana bamona. Reana do ia auka vaira nega ena helaro namona ita laloa totona bona hari ita davaria hekwakwanai ita haheaukalaia totona. To, namona be ita laloatao, ita davaria hekwakwanai be Iesu ese ia itaia bona ia lalopararalaia. Unai dainai ita ia hebogahisi henia bona ia ura ita do ia durua. Hegeregere, ita manoka neganai Iesu ese lauma helaga ia gaukaralaia diba ita ia hagoadaia totona. (Ioa. 16:7; Tito 3:6) Danu, Iesu ese elda taudia bona tadikaka taihu ia gaukaralaia ita ia hagoadaia bona durua totona.—Efe. 4:8.

14. Ita lalometau neganai, dahaka ita karaia diba?

¹⁴ Oi lalometau neganai, Iesu be iseda Hahelaga Tauna Badana bona oi totona ia karaia gaukara oi laloa dobu. Danu laloatao, Iehova ese Iesu ia siaia mai tanobada dekenai ena mauri ia henia totona sibona lasi, to goevadae lasi taudia ese idia mamia bona davaria hekwakwanai do ia lalopararalaia totona. Iseda kara dika bona manoka gaudia dainai ita lalohisihisi neganai, Iesu be ia noho hegaegae bona mai ura ida “nega maorona ai” heduru ia henia.—Heb. 4:​15, 16.

15. Mani ekspiriens ta oi herevalaia, unai ese ia hahedinaraia orea ia rakatania tauna be heduru ia abia diba kongrigeisen dekenai ia giroa totona.

¹⁵ Iesu ese tadikaka ia gaukaralaia, Iehova ena orea idia rakatania taudia idia tahua bona durua idia giroa lou totona. (Mat. 18:​12, 13) Mani Stefanob ena ekspiriens ita laloa. Stefano be kongrigeisen amo idia kokia bona lagani 12 murinai, ia ura hebou dekenai do ia lao. Ia gwau: “Ia auka unai lau karaia totona, to lau ura Iehova ena famili dekenai lau giroa lou. Elda taudia ese lau idia welkam henia. Nega haida, lau laloa lau hegeregere lasi bona lau ura lasi hebou dekenai lau lao. To, tadikaka ese lau idia hadibaia Iehova bona Iesu idia ura hebou do lau mai bona do lau goada. Orea lalonai lau vareai lou neganai, kongrigeisen taudia ibounai ese lau bona egu famili idia welkam henia. Egu adavana be Baibel stadi ia matamaia bona hari lau bona egu famili be Iehova ai hesiai henia.” Ta be orea dekenai ia giroa lou neganai, iseda lalokau Hahelaga Tauna Badana do ia moale bada!

16. Iesu be iseda hebogahisi Hahelaga Tauna Badana dainai, oi moale ena badina haida be dahaka?

¹⁶ Iesu be tanobada ai ia noho neganai, nega korikori ai taunimanima momo ia durua. Unai dainai hari inai negai, ita abia dae diba heduru ita ura neganai ia ese ita do ia durua. Bona tanobada matamata ai ia ese ita do ia durua mauri namona bona goevana ita moalelaia totona. Iseda Dirava Iehova ita tanikiu henia bada badina ena lalokau bona hebogahisi bada dainai, ena Natuna be iseda Hahelaga Tauna Badana ai ia lao totona ia abia hidi!