“Oi be Tau Namo Hereana Ta”!

1-2. Dahaka ese ita ia durua diba, unai amo ita diba Iehova ena matana ai ita be mai anina bada?

IEHOVA ese ena hesiai taudia ia laloa bada. To haida be unai bamona hemami idia abia lasi. Reana haida ese idia kara namo henia lasi dainai idia laloa idia be anina lasi. Oi be unai bamona oi mamia, a? Bema oibe, edena bamona do oi abia dae oi be Iehova ena matana ai mai anina bada?

² Oi do ia durua gauna ta be Baibel ai idia noho sivarai oi duahia, badina unai sivarai haida ese idia hahedinaraia Iehova ia ura taunimanima ita kara henia. Iena Natuna Iesu ese taunimanima be mai hemataurai ida ia kara henia. Unai amo ia hahedinaraia, ia bona ena Tamana be sibona idia laloa maragi taudia idia laloa bada. (Ioa. 5:19; Heb. 1:3) Inai atikol ai, henanadai rua do ita herevalaia: (1) Iesu ese edena dala ai taunimanima ia durua idia abia dae idia be Dirava ese ia laloa bada? Bona (2) edena dala ai ita diba momokani Dirava ese ita ia laloa bada?—Hag. 2:7.

IESU ESE TAUNIMANIMA IA DURUA DALANA

3. Edena dala ai Iesu ese ia dekenai idia mai Galilea taudia ia durua?

³ Iesu be Galilea ai ia haroro neganai, taunimanima momo be ia dekenai idia mai ena hereva idia kamonai bona gorere taudia hanamoa totona. Iesu ia itaia “idia be mamoe naria tauna ese ia naria lasi mamoe bamona, haida ese idia haberoa bona idia dadaraia.” (Mat. 9:36) Tomadiho gunalaia taudia ese idia laloa maragi bona idia gwauraia “Dirava ena lalonamo do idia abia lasi” taudia. (Ioa. 7:​47-49) To Iesu ese idia ia matauraia, idia ia hadibaia bona edia gorere ia hanamoa. (Mat. 9:35) Ma danu, taunimanima momo ia durua totona, ia ese ena aposetolo taudia ia treinia haroro gaukara totona bona siahu ia henia gorere idauidau idia hanamoa totona.—Mat. 10:​5-8.

4. Iesu ese ena manau kamonai taudia ia kara henia dalana amo, dahaka ita dibaia?

⁴ Iesu be mai hemataurai ida ena kamonai taudia ia kara henia dalana amo ia hahedinaraia, ia bona ena Tamana be haida ese idia laloa maragi taudia idia laloa bada. Bema oi be Iehova oi hesiai henia, to oi daradara bema Iehova ese oi ia laloa bada eiava lasi, Iesu ese manau taudia dekenai ia hahedinaraia karana oi laloa. Unai ese oi do ia durua oi abia dae Iehova ena matana ai oi be mai anina bada.

5. Iesu ese ia hedavari henia Galilea hahine ena mauri be edena bamona?

⁵ Iesu be hutuma taudia ia hadibaia sibona lasi, to taunimanima ta ta ia laloa bada danu. Hegeregere, Galilea ai ia haroro neganai, Iesu ese hahine ta ia hedavari henia, unai hahine be lagani 12 lalonai rara ia diho gorerena ia abia. (Mar. 5:25) Iena gorere dainai Taravatu hegeregerena ia be ia goeva lasi, bona ta ese ia dogoatao neganai, unai tauna do ia goeva lasi. Unai dainai ia be sibona ia noho. Ma danu, tomadiho eiava aria karadia lalonai taunimanima ia bamoa diba lasi. (Lev. 15:​19, 25) Unai dainai unai hahine be gorere ena hisihisi ia mamia sibona lasi, to ia mamia haida ese ia idia lalokau henia lasi.—Mar. 5:26.

6. Unai hahine be dahaka ia karaia ena gorere ia namo totona?

⁶ Unai gorere hahine ia ura Iesu ese ia do ia hanamoa. To Iesu ia noia lasi ena gorere ia hanamoa totona. Dahaka dainai? Reana ena gorere dainai ia hemarai. Eiava ia gari badina hutuma huanai ia noho be kerere dainai Iesu ese ia do ia dadaraia. Unai dainai Iesu ena dabua ia dogoatao, badina ia abidadama unai dala amo ena gorere do ia namo. (Mar. 5:​27, 28) Ena abidadama dainai ena gorere ia namo. Bena Iesu ia henanadai daika ese ena dabua ia dogoatao, bona unai hahine be ia karaia gauna ia gwauraia. Iesu ese edena dala ai ia kara henia?

7. Iesu ese edena dala ai unai hahine ia durua? (Mareko 5:34)

⁷ Iesu ese unai hahine be mai hebogahisi bona hemataurai ida ia kara henia. Iesu ia itaia “ia gari bada bona ia heudeheude.” (Mar. 5:33) Iesu be ena hemami ia laloa dainai, ia kara namo henia bona ia hagoadaia. Unai hahine dekenai ia gwau “natugu e.” Baibel ai unai be nega tamona Iesu ese unai hereva ia gwauraia. Unai amo ia hahedinaraia ia be mai hebogahisi bona lalokau ida ia hereva henia. (Mareko 5:34 duahia.) Mani oi laloa, unai hahine ia moale bada badina Iesu ese ia kara namo henia bona lalokau ia hahedinaraia! Bema Iesu be unai bamona ia hereva lasi, reana ena gorere amo ia namo lou, to do ia mamia ia kerere badina Iesu ena dabua ia dogoatao bona hutuma huanai ia noho. To, Iesu ia ura unai hahine ia laloparara ia be lalokau guba Tamana ena natuna kekeni namona.

8. Brazil ai ia noho taihu ta be dahaka ia haheaukalaia?

⁸ Hari inai negai danu, Dirava ena hesiai taudia be gorere dainai idia lalometau bona idia mamia idia be anina lasi. Brazil ai ia noho regula painia taihu ta ladana Maria,a be ia vara neganai, ena aena bona lauri imana be lasi. Ia gwau: “Lau diseibol dainai, sikuli ai natudia ese lau idia buli henia. Lau dekenai lalona hahisia ladadia idia gwauraia. Bona egu ruma bese taudia ese lau idia kara namo henia lasi.”

9. Edena dala ai Maria be heduru ia abia, unai amo ia itaia Iehova dekenai ia be mai anina bada?

⁹ Maria be edena dala ai heduru ia abia? Iehova ena Witnes ta ai ia lao neganai, tadikaka taihu ese ia idia hagoadaia bona ia idia durua, unai amo Iehova ese ia laloa hegeregerena sibona do ia laloa. Ia gwau: “Tadikaka bona taihu momo ese lau idia durua! Iehova ena ruma bese badana lalonai lau noho dainai, mai kudouna ibounai ida Iehova lau tanikiu henia.” Tadikaka bona taihu ese Maria idia durua dainai, ia abia dae Dirava ena matana ai ia be mai anina bada.

10. Maria Magadala be dahaka hekwakwanai ia davaria? (Laulau itaia danu.)

¹⁰ Iesu ese ia durua hahine ta, Maria Magadala, mani ita laloa. Ia be lauma dikadia 7 ese idia biagua! (Luka 8:2) Ia be demoni ese idia biagua dainai reana ia kara kava, unai dainai taunimanima ese ia idia dadaraia. Unai nega lalonai, reana ia mamia haida ese ia idia laloa maragi, bona ta ese do ia durua lasi. Gabeai Iesu ese ia amo lauma dikadia ia lulua, bena ena hahediba hahine ta ai ia lao. To edena dala ma haida ai Iesu ese Maria Magadala ia durua, unai amo ia abia dae ia be Dirava ena matana ai mai anina bada?

11. Edena dala ai Iesu ese Maria Magadala dekenai ia hahedinaraia Dirava ena matana ai ia be mai anina bada? (Laulau itaia danu.)

¹¹ Iesu ese Maria Magadala ia boiria ena haroro gaukara ai ia bamoa totona.b Unai dala amo, Iesu ese ma haida ia hadibaia neganai, Maria be diba ia abia bona unai ese ia durua. Danu Iesu ia toreisi lou dinana ai ia dekenai ia hedinarai. Unai dina ai Maria be Iesu ese ia hereva henia hahediba hahine ginigunana ta. Danu Iesu ese ia hamaoroa aposetolo taudia do ia hadibaia ia be ia toreisi lou vadaeni. Unai amo Iesu ese ia dekenai ia hahedinaraia Iehova ena matana ai ia be mai anina bada!—Ioa. 20:​11-18.

12. Dahaka dainai Lidia ia mamia ia idia lalokau henia lasi?

¹² Maria Magadala bamona, hari inai negai momo idia mamia ta ese idia ia lalokau henia lasi. Spain ai, taihu ta ladana Lidia, ia gwau ia do vara lasi neganai, ena sinana ia ura bogana lalonai ia do ia hamasea. Bona ia maragi neganai, ia laloatao ena sinana ese ia rakatania kava bona ia hereva dika henia. Ia gwau: “Lau ura bada haida ese lau do idia abia dae bona lalokau henia. Lau gari badina lau mamia ta ese lau do ia lalokau henia lasi badina egu sinana ese lau ia hamaoroa lau be kekeni dikana.”

13. Dahaka ese Lidia ia durua, unai amo ia abia dae Iehova ena matana ai ia be mai anina bada?

¹³ Lidia be hereva momokani ia dibaia murinai, ena guriguri, stadi karana, bona tadikaka taihu edia hagoadaia herevadia bona kara namodia ese ia idia durua, unai amo ia abia dae Iehova ena matana ai ia be mai anina bada. Ia gwau: “Nega momo egu adavana ese lau ia hamaoroa lau ia lalokau henia bada. Nega momo lau dekenai egu kara namodia ia herevalaia. Egu tura namodia be unai bamona idia karaia danu.” Oi ese ta oi durua diba, unai amo do ia abia dae Iehova ena matana ai ia be mai anina bada?

IEHOVA ENA LALOHADAI ITA ABIA

14. Edena dala ai Samuela Ginigunana 16:7 ese ita ia durua Iehova ese taunimanima ia laloa dalana ita lalopararalaia totona? (Maua ladana “Dahaka Dainai Iehova ese Ena Taunimanima Ia Laloa Bada?” itaia.)

¹⁴ Laloatao Iehova ese oi ia laloa dalana be tanobada taudia ese oi idia laloa dalana amo ia idau. (1 Samuela 16:7 duahia.) Iehova be emu toana, dagi, eiava edukeisen hegeregerena oi ia itaia lasi. (Isa. 55:​8, 9) Unai dainai Iehova ese oi ia laloa hegeregerena sibona oi laloa, to tanobada taudia ese oi idia laloa hegeregerena lasi. Baibel ai haida edia sivarai idia noho, unai ese ia hahedinaraia Iehova ese sibona idia laloa maragi taudia ia laloa bada. Hegeregere Elia, Naomi, bona Hana. Reana oi davaria ekspiriens haida lalonai Iehova ese oi ia lalokau henia bona laloa bada karana oi itaia, unai bamona ekspiriens be buka ta ai oi torea diba. Ma danu, iseda pablikeisen amo Iehova ese ita ia laloa bada ena infomeisen haida oi itaia diba.c

15. Dahaka dainai Iehova ia gwau Daniela be “tau namo hereana ta”? (Daniela 9:23)

¹⁵ Laloatao, oi be Dirava oi badinaia dainai, Iehova ena matana ai oi be mai anina bada. Reana peroveta tauna Daniela ena mauri lagani be 90 mai kahana neganai, ia “lalomanoka momokani” bona ia lalometau. (Dan. 9:​20, 21) Edena dala ai Iehova ese ia hagoadaia? Dirava ese aneru Gabriela ia siaia bona ia hadibaia ia be “tau namo hereana ta” bona Dirava ese ena guriguri ia kamonai. (Daniela 9:23 duahia.) Edena dala ai Daniela be Dirava vairanai tau namo hereana? Iena kara namodia ia hahedinaraia, bona ia ura kara maoromaoro bona Dirava ia badinaia. (Ese. 14:14) Iehova ese ena sivarai be Baibel ai ia atoa ita ia hagoadaia totona. (Roma 15:4) Danu Iehova ese iseda guriguri ia kamonai, bona ita ia laloa bada badina ita ura kara maoromaoro ita badinaia bona ia ita hesiai henia.—Mika 6:​8, ftn.; Heb. 6:10.

16. Dahaka ese oi ia durua diba Iehova be lalokau Tamana bamona oi laloa totona?

¹⁶ Iehova be oi ia lalokau henia Tamana ta bamona oi laloa. Ia be emu kerere do ia tahua lasi, to ia ura oi do ia durua. (Sal. 130:3; Mat. 7:11; Luka 12:​6, 7) Momo be unai idia laloa dobu dainai, idia ia durua haida ese idia laloa maragi lalohadaina idia dadaraia totona. Hegeregere, Spain ai, taihu ta ladana Michelle ita laloa. Lagani momo lalonai iena adavana ese ia hereva dika henia dainai, ia mamia haida ese ia idia lalokau henia lasi. Ia gwau, “Lau mamia lau be anina lasi neganai, lau laloa Iehova ese mai lalokau ida ena imana amo lau ia huaia bona ia gimaia.” (Sal. 28:9) South Africa ai, taihu ta ladana Lauren, be sibona ia hadibaia, ia gwau, “Bema Iehova be lalokau dainai ia dekenai lau ia veria lao, bona lagani momo lalonai lau kahirakahira ia noho, bona lau ia gaukaralaia ma haida lau hadibaia totona, unai ese ia hamomokania ia dekenai lau be mai anina bada.”—Ioa. 6:44.

17. Dahaka ese oi ia durua diba, unai amo do oi abia dae Iehova be oi ia lalonamo henia? (Salamo 5:12) (Laulau itaia danu.)

¹⁷ Oi abia dae Iehova ese oi ia lalonamo henia. (Salamo 5:12 duahia.) Davida ese Iehova ena lalonamo karana be “kesi badana ta” ida ia hahegeregerea, unai ese kara maoromaoro taudia ia gimaia. Namona be oi diba Iehova be oi ia lalonamo henia bona oi do ia durua. Unai ese oi do ia gimaia bona lalohadai kereredia do oi abia lasi. Edena dala ai do oi diba Iehova ena lalonamo oi abia? Ita herevalaia bamona, Iehova be Baibel amo ita ia hagoadaia. Ma danu, ia ese elda taudia, tura namodia, bona ma haida ia gaukaralaia oi idia hadibaia iena matana ai oi be mai anina bada. Unai bamona hagoadaia hereva oi abia neganai, dahaka do oi karaia?

18. Dahaka dainai hanamoa herevadia oi abia dae be namo?

¹⁸ Oi idia diba bona oi idia lalokau henia taudia edia hanamoa hereva oi dadaraia lasi. Laloatao, Iehova ese idia ia gaukaralaia noho oi idia durua totona, unai amo do oi diba Iehova be oi ia lalonamo henia. Ita herevalaia taihu Michelle, ia gwau: “Lau be haida ese idia henia hagoadaia hereva lau abia dae karana lau diba noho. Ia auka, to lau diba unai be Iehova ena ura.” Elda taudia ese mai lalokau ida Michelle idia durua dainai, unai ese ia hagoadaia. Ia be hari painia gaukara ia karaia bona Betele gaukara ia durua.

19. Dahaka dainai oi abia dae diba, Dirava ena matana ai oi be mai anina bada?

¹⁹ Iesu ese ita ia hadibaia iseda guba Tamana ese ita ia laloa bada. (Luka 12:24) Unai dainai ita abia dae Iehova dekenai ita be mai anina bada. Unai ita laloaboio lasi! Bona ita gaukara goada ma haida ita hadibaia, Dirava ena matana ai idia be mai anina bada!