“Lalotamona Karana Umui Badinaia”
Aposetolo Paulo ese Efeso Keristani taudia ia hagoadaia, ia gwau: “Mai lalokau ida umui ta ta emui kara do umui haheaukalaia. Do umui gaukara goada lauma helaga ese ia henia lalotamona karana umui badinaia totona, bona maino ese umui do ia hatamonaia.”—Efe. 4:2, 3.
Ita hahedinaraia “lalotamona karana” be “lauma helaga ese ia henia.” Unai ena anina be ia be Dirava ena gaukara siahuna ese ia havaraia kara namona ta. To, Paulo ia hereva bamona, nega ibounai lalotamona ai ita noho totona, gau haida ita karaia be namo. Edena bamona unai ita karaia diba? Keristani taudia ta ta be gau haida idia karaia be namo, unai amo “lauma helaga ese ia henia lalotamona karana” be iseda huanai ia noho diba.
Mani inai haheitalai ita laloa. Bema ta ese oi dekenai motuka ta ia henia, daika ese unai motuka do ia naria? Unai be oi ese do oi naria. Unai dainai bema motuka oi naria lasi bona ia dika, motuka ia henia tauna do oi bleim lasi, ani?
Unai hegeregerena, lalotamona ai ita noho be Dirava ese ia henia harihari gauna, to iseda huanai lalotamona ia noho totona ita ta ta be mai iseda maduna. Bema gau haida dainai iseda tadikaka eiava taihu ta ida ita lalotamona lasi, sibona dekenai inai henanadai ita henia be namo, ‘Lau be dala lau karaia unai hekwakwanai hamaoromaoroa totona, unai amo lalotamona do ia noho, a?’
‘GAUKARA GOADA,’ UNAI AMO LALOTAMONA DO IA NOHO
Paulo ena hereva hegeregerena, nega haida do ia auka iseda tadikaka eiava taihu ida maino ita karaia totona. Hegeregere, bema tadikaka eiava taihu ta ese ita ia hahisia. To bema hekwakwanai ia noho, anina be hanaihanai ta ita hereva henia be namo unai hekwakwanai ita hamaoromaoroa totona, a? Lasi. Sibona oi nanadaia, ‘Bema unai tadikaka eiava taihu lau hereva henia, unai ese hekwakwanai do ia hamaoromaoroa eiava ia habadaia sibona?’ Nega haida dala maorona be unai gauna ita laloaboio eiava ena dika ita gwauatao sibona.—Aon. 19:11; Mar. 11:25.
Sibona oi nanadaia, ‘Bema tadikaka eiava taihu lau hereva henia, unai ese hekwakwanai do ia hamaoromaoroa eiava ia habadaia sibona?’
Aposetolo Paulo ia hereva bamona, namona be ‘mai lalokau ida ta ta edia kara do ita haheaukalaia.’ (Efe. 4:2) Buka ta ia gwau, unai hereva be inai bamona ita gwauraia diba, “edia kara hegeregerena idia ita abia dae.” Unai ena anina be ita abia dae idia be goevadae lasi taudia, ita hegeregerena. Oibe, ita ura dabua bamona ‘kara matamata do ita atoa.’ (Efe. 4:23, 24) To, ita be goevadae lasi dainai, kerere ita karaia diba. (Roma 3:23) Bema unai lalohadai ita abia dae, do ia auka lasi haida edia kara ita haheaukalaia bona edia kerere ita gwauatao totona, unai amo ‘lalotamona karana ita badinaia’ noho diba.
Kongrigeisen ai maino bona lalotamona ai do ita noho bema ita idia hahisia taudia edia dika ita gwauatao bona ita laloaboio. Efeso 4:3 ai ia noho hereva “hatamonaia,” ena Grik herevana be Kolose 2:19 ai idia hahanaia “varovaro.” Iseda tauanina ai, varovaro ese turia ta ta idia hatamonaia. Unai hegeregerena, iseda tadikaka ita lalokau henia bona maino karadia ita hahedinaraia neganai, unai ese ita do ia durua mai lalotamona ida ita noho totona, ena be nega haida edia kara haida ita ura henia lasi.
Unai dainai tadikaka eiava taihu ta ese ita ia habadua eiava hahisia neganai, namona be mai hebogahisi ida ia ita kara henia, to ia ita gwauraia dika lasi. (Kol. 3:12) Ita ibounai be goevadae lasi taudia dainai, reana oi danu be nega haida ta oi habadua eiava hahisia. Unai ita laloatao neganai, ita do ia durua ‘lalotamona karana ita badinaia noho totona.’