Beibi, Rara bona AIDS

NIUSPEPA TA, The New York Times, ena rau ginigunana dekenai inai hereva idia torea: “Romania dekenai natu maragidia momo ese AIDS gorerena idia abia. Unai natu maragidia momo be tamana bona sinana lasi natudia edia ruma dekenai bona kliniki dekenai idia noho. Beibi idia vara matamata neganai rara idia henia dainai, beibi ese AIDS gorerena idia abia.”​—⁠February 8, 1990.

Toana be Romania doketa haida ese rara sisina be injeksen amo beibi edia hudo (umbilical cord) dekenai idia atoa. Idia laloa unai rara ese beibi do ia durua do idia tubutubu namonamo totona. Unai kara dainai, AIDS gorerena be beibi dekenai ia hanai. Rara lita kahana sibona ese AIDS gorerena be beibi momo dekenai ia henia diba.

World Health Organization ese doketa haida ia siaia lao haraga Romania dekenai. Ia gwau ia laloa Romania maragidia 700 ese AIDS gorerena ena virus idia abia, bona maragidia ma 50 ese AIDS gorerena badana idia davaria vadaeni. Unai orea ena AIDS department ena kwarana tauna ese Times toretore taudia ia hadibaia, tanobada ibounai lalonai, Romania natudia ese AIDS gorerena idia abia badabada, ma natudia iboudiai edia AIDS gorerena idia hanaia.

Ceausescu ese Romania gavamani ia lohiaia neganai, Romania ena AIDS gorerena idia gwauraia hedinarai lasi. Bema AIDS gorerena be ma taunimanima haida dekenai ia hanai, gavamani ese unai ia hunia. Rara idia henia taudia idia sekea lasi, AIDS gorerena idia tahua totona. Hari, edia kara idia haidaua. Lagani ta mai kahana Romania gavamani gunana idia do hamorua lasi neganai, Romania doketa momo idia itaia beibi momo ese gorere idia abia bona unai gorere idia ore lasi. To unai idia itaia neganai, AIDS gorerena idia laloa lasi. Idia ta ia gwau: “Ai idia hadibaia, Romania dekenai AIDS gorerena be lasi, vadaeni, do ai stadilaia be anina lasi, ani?”