Inai Nega ena Matamata Taudia—Lagani 1990 Murinai Edia Hekwakwanai Idauidau Idia Vaira Henidia
NOVEMBER 1985. Tano 103 edia tau badadia be United Nations ena hedikwota opesi dekenai idia hebou “tanobada hegegemadai lalonai matamata taudia edia hekwakwanai durua dalana idia herevalaia totona.”—UN Chronicle.
Lagani 6 idia lao vadaeni, bona harihari matamata taudia edia hekwakwanai idia bada idia lao momokani. Politikol taudia edia lalohadai idauidau dainai, moni lasi dainai, bona idia tahua gaudia idia haidaua hanaihanai dainai, ena be gavamani idia ura matamata taudia idia durudia totona idia gaukara hebou to idia karaia diba lasi.
Tomadiho oreadia danu be kara namo idia havaraia lasi. Vanegai sibona United States dekenai, Gallup stadi ta idia karaia taunimanima edia lalohadai idia diba totona bona idia davaria matamata taudia momo (100 100 amo 90 90) be Dirava (eiava gau ibounai dekenai ia noho laumana ta) idia abidadama henia, to idia amo taunimanima momo lasi ese edia mauri lalonai tomadiho idia laloa bada. Ma danu, tomadiho oreadia ese gau ta idia karaia lasi matabodaga kara dika idia koua totona.
Bena ma aonega taudia haida idia noho—taunimanima edia lalohadai idia stadilaia taudia, taunimanima edia noho hebou karana idia stadilaia taudia, sisiba henia taudia, bona ma haida—idia ese matamata taudia idia sisiba henidia. Edia sisiba haida be namo bona heduru bada. To, sisiba idia henia neganai, nega momo idia gwauraia gaudia be tauanina dekenai idia abia diba hekwakwanaidia sibona, inai bamona: bogana idia abia kava to moni be hegeregere lasi unai natuna naria totona; AIDS gorerena idia koua, bona drag ania kava karana ena dika tauanina dekenai. Nega momo mauri ena kara goeva dalana idia herevalaia lasi. Unai “aonega taudia” edia kara be taunimanima ese idia abia dae haraga herevadia amo eiava taunimanima idia gwauraia momo herevadia idia gaukaralaidia, hegeregere: “Hekwakwanai ia havaraia lasi mahuta hebou karana” eiava “Namona be oi gwau oi ura lasi!”
To tama sina be edena bamona? Idia momo idia bisi mauri ena hekwakwanai idauidau dainai. Anina bada gaudia eiava hemarai gaudia idia vara neganai tama sina idia herevalaia lasi badina heduru idia henia diba lasi eiava idia hemarai dainai. Unai dainai, ita hoa lasi, bema matamata taudia momo be edia bamodia dekenai idia lao heduru idia abia totona.
Matamata Taudia Edia Heduru Gauna Namona
Vadaeni, edena dala ai matamata taudia edia daradara eiava henanadai edia haere namodia idia abia diba? Edia henanadai haida be inai: ‘Drag ania karana bona kekero muramura inua karana lau karaia toho, a?’ ‘Mahuta hebou karana, headava lasi neganai be edena bamona?’ ‘Edena bamona lau diba inai be lalokau momokani?’ ‘Gabeai dahaka do ia vara lau dekenai?’
Haida idia kamonai Dirava ena Hereva, Buka Helaga unai, be matamata taudia sisiba henia gauna namo hereana neganai, idia hoa. Buka Helaga, a? Oibe, ia be mai ena hereva namodia momo matamata taudia dekenai. (Hereva Lada-isidia, karoa 1-7; Efeso 6:1-3 itaia.) Bona danu, unai buka be “[matamata taudia] edia lebulebu kara” ia itaia bona ia bogahisi henia tauna, ita Ia Havaraia Tauna unai, ese ia torea. (2 Timoteo 2:20-22; 3:16) Vadaeni, namo lasi oi gwau unai idau negai idia torea buka be anina lasi lagani 1990 murinai, to mani inai oi laloa: Hari inai nega ena “aonega taudia” edia sisiba be lagani 50 murinai do idia duahia noho bona do idia matauraia noho, a? Ena be lagani tausen momo idia hanai vadaeni, to taunimanima momo ese Buka Helaga idia laloa bada noho!
Momokani, Buka Helaga ena sivarai negadia ema bona hari, taunimanima edia mauri dalana ia idau vaitani, to vaia taunimanima edia kara idia idau diba lasi. Matamata taudia edia ura gaudia danu be idia do idau lasi. Unai dainai, Buka Helaga be do mai ena anina, guna bamona. Bona ia ese matamata taudia edia hekwakwanai momo edia badina ia gwauraia. Bona matamata taudia edia gabeai negana ena helaro namona ia henia.
Buka Helaga ena sisiba ita abia dae bona ita ia durua badina ia be ita Ia Havaraia Tauna amo ia mai. Inai be momokani badina Keristen natudia tausen momo idia hahedinaraia idia ese Buka Helaga ena sisiba idia abia dae! Matamata taudia idia durua totona, Watch Tower Society ese buka matamata ta ia halasia, ladana be Questions Young People Ask—Answers That Work. Unai buka ese matamata taudia edia hekwakwanai idauidau ia herevalaidia bona ena sisiba be nega ibounai Buka Helaga amo ia mai. Matamata taudia edia moale inai buka dainai ese ia hahedinaraia, Buka Helaga ena sisiba namona sibona idia moalelaia lasi, to ena heduru herevadia idia ura henia bona edia mauri lalonai idia badinaia dainai edia mauri ia namo.
Herevana oi matamata eiava oi buruka, oi sibona Buka Helaga oi diba bena do oi namo. Iehova ena Witness taudia ese taunimanima milion momo idia durua vadaeni, davana lasi Buka Helaga stadilaia dalana amo, bona do idia moale bada bema oi idia durua danu. Matamata taudia be Buka Helaga idia diba bona ena sisiba herevadia idia badinaia ese heduru ia henidia sibona lasi, to edia hekwakwanai idauidau dekenai do ia durudia; unai kara amo Dirava ese matamata taudia do ia abidia dae bona ia boiridia ena hesiai gaukara idia karaia totona.—Kohelete 12:1.
[Box on page 8]
Questions Young People Ask—Answers That Work
Hari inai negai idia vara hekwakwanai dekenai unai buka ena Bible sisiba haida ai torea.
AIDS Dai-Hanai Gorerena: “Heudahanai karadia umui rakatania. Kara dika ibounai taunimanima ese idia karaia be edia tauanina idia hadikaia lasi. To heudahanai karadia ia karaia tauna ese sibona ena tauanina ia hadikaia noho.”—1 Korinto 6:18; Hereva Lada-isidia 5:3-20 danu hahegeregerea.
Inuinu Kekero Karana: “Uaina idia inua momo taudia ida umui do inuinu hebou lasi, bona idia aniani momo taudia ida do umui aniani hebou lasi. Badina kekero tauna bona aniani momo tauna be do idia ogogami, bona mahuta momo tauna ese dabua dikadia do ia karaia. Dokona ai ia do ia koria, gaigai bamona; gaigai dikana bamona ia ese ia koria.”—Hereva Lada-isidia 23:20, 21, 32.
Gaukara: “Ena gaukara dalana ia diba momo tauna ta oi itaia, a? Pavapava vairadiai do ia gini; ladana maragi taudia vairadiai do ia gini lasi.”—Hereva Lada-isidia 22:29.
“Emui hesiai gaukara ibounai lalonai, mai emui kudouna ibounai do umui karaia. Do umui karaia, ia be tau ta ena gaukara lasi, to Lohiabada ena gaukara umui karaia bamona.”—Kolose 3:23.
Niuklia Tuari Dainai Taunimanima Idia Gari Bada: “Guba karaia Diravana, Iehova, be inai bamona ia hereva, Ia be Dirava Momokani, Ia ese tanobada ia karaia bona ena oromana ia henia, bona Ia haginia ia gini goada totona; ia karaia kava lasi, to taunimanima ese idia noholaia totona ia karaia.”—Isaia 45:18; 55:10, 11; Kohelete 1:4.
Moni Lasi Dainai Daradarana: “Dohore idia ese ruma do idia haginidia, bena do idia noholaidia bona idia ese vine umadia do idia hadodia, bona edia anina do idia ania. Ruma do idia haginidia lasi bena idauna ta ese do ia noholaidia; bona do idia hadohado lasi bena idauna ta ese do ia ania. . . . Do idia hekwarahi kava lasi.”—Isaia 65:21-23.