Matamata Taudia Idia Henanadai . . .

Edena Bamona Lauma Dalana Dekenai Do Lau Goada?

“Lau lao dubu neganai, lau daradara momokani. Edia hereva lau lalo-pararalaia lasi dainai, dubu lao henia karana lau hadokoa. Lau laloa dubu ta dekenai oi guriguri be gau badana lasi Dirava dekenai oi abidadama totona.”​—⁠Mai ena lagani seventeen kekeni ladana Carrie ena hereva.

DAHAKA dainai dubu idauidau ese matamata taudia edia lalona ia hahesikudia? Tau ta ladana George Gallup, ese matamata taudia ia henanadai henidia neganai, edia haere haida be inai: ‘Edia haroro herevadia be mai hesikudia.’ ‘Idia be Dirava bona Bible idia hahedibalaia lasi.’ ‘Idia be nega ibounai moni totona idia noinoi.’ ‘Dubu biagudia bona dubu dekenai idia lao taudia edia hereva be edia mauri lalonai idia hamomokania lasi.’ Momokani, dubu gunalaia taudia ese matamata taudia be lauma dalanai idia durua namonamo lasi.

To oi ura “kwalimu ahuna, mauri hanaihanai” do oi abia, a? (1 Timoteo 6:12) Oi ura Keristen tauna bamona oi do idia matauraia bona gaukara maduna oi do idia henia diba, a? Oi ura Dirava danu “ena gaukara” umui karaia hebou bona haida oi ura durua mauri hanaihanai do idia davaria totona, a? (1 Korinto 3:⁠9) Bema unai bamona oi ura, namona be lauma dalana dekenai oi goada noho! Iehova ena Witness taudia oi hebamo henidia neganai, gau idauidau do oi moalelaia, to Kerisendom ena matamata taudia be unai gaudia idia moalelaia diba lasi. Oi lao hebou Kingdom Hall dekenai, unuseniai Bible ena hereva mai dobudia idia gwauraia hedinarai. Oiemu tamana bona sinana ese oi idia naria namonamo ruma bese ena Bible stadi karana amo. Nega ibounai edia mauri lalonai Bible ena hereva idia badinaia taudia danu oi hebamo. Unai sibona lasi, bema oi ura lauma dalana dekenai oi goada oi lao, gau ma haida idia noho oi karaia totona. Aposetolo Petro ia gwau, “kara namodia do umui karaia.” (2 Petero 1:⁠5) Unai kara namodia karaia gaudia haida mani ita itaia.

Lauma Gaudia Ura Henia Karana

Iesu ia gwau: “Idia diba lauma gaudia idia tahua be namo taudia idia moale.” (Mataio 5:⁠3, NW) Greek gado dekenai unai hereva idia hahanaia neganai, ena anina be “lauma dekenai idia noinoi taudia.” Noinoi tauna be mai hisihisi danu tauanina dalana dekenai aniani ia tahua noho tauna bamona, ia diba aniani ia abia be gau badana, oi danu lauma aniani oi tahua noho be gau badana. Iesu ia gwau: “Mauri hanaihanai be inai, idia ese oi Dirava momokani tamona do idia diba, bona Iesu Keriso danu.”​—⁠Ioane 17:⁠3.

Matamata taudia momo be lauma dalana dekenai nega sisina sibona idia gaukara. Buka ta ladana The Psychology of Adolescence ese matamata taudia momo inai bamona ia herevalaidia, ia gwau: “Iena diba ena dubu dekenai be reana ia maragi, to reana ena dubu ia laloa bada.” Inai kara idia tahua taudia edia sivarai ta lalonai matamata taudia be Bible ena henanadai handred idia henanadai henidia. Idia ese unai henanadai 100 amo 17 sibona idia haerelaia diba. Sivarai ma ta dekenai idia gwau natudia 10 10 amo 7 7 be Taravatu Matamatana ena buka ginigunadia 4 edia ladana idia diba lasi.

Oi be edena bamona? Oi be Bible stadilaia karana oi karaia momo, eiava? Hahediba koikoi hereva, hegeregere Toi Tamona bona ia mase diba lasi laulauna do oi hakoikoia diba, eiava? Bible dekena amo mauri hanaihanai ena helaro guba bona tanobada dekenai do oi hamomokania diba, eiava? Do oi hamomokania diba lagani 1914 ema bona hari ita be “nega dokonai” ita noho, a? (2 Timoteo 3:​1-5) Eiava oi ura “tau ta ese Dirava ena hereva, diba hamatamaia gaudia [oi] dekenai ia hadibaia lou be namo,” a?​—⁠Heberu 5:⁠12.

Bema unai bamona oi laloa neganai, namona be umui ese “lauma ena rata goevagoeva do umui ura henia. Badina be unai umui inua neganai do umui tubu daekau, bona hahemauri do umui abia.” (1 Petero 2:⁠2) Reana do oi hekwarahi bada unai oi karaia totona. To, Dirava ena Hereva oi stadilaia momo neganai, lauma gaudia do oi ura tahua momo danu.

Oi Daradaralaia Gaudia

Kevin ena mauri lagani be 19 bona ia gwau: “Dubu ena anina lau dekenai lau diba lasi. Lau be unai gau ibounai dekenai lau daradara momokani.” Matamata taudia momo Kerisendom dekenai be unai bamona idia mamia danu. To, reana lauma dalana dekenai oi tubu lasi badina oi daradara momo dainai, ani?

Hegeregere, oi sibona oi laloa Bible ena hereva hegeregerenai oi noho be dala hereadaena, a? Eiava ‘kara dika taudia oi itadia neganai oi ura unai bamona kara oi karaia’? (Salamo 73:⁠3) Oiemu kudou lalonai oi diba momokani ita be nega dokodia dekenai ita noho, a? Eiava oi ura gaukara badana ta inai tanobada gunana dekenai do oi tahua? Oi diba maoromaoro Bible ena Hereva be Dirava ese ia havaraia, a? Eiava nega haida oi daradara, oi laloa saiens ena aonega herevadia ese Bible idia hakoikoia noho? Bema oi daradara noho neganai, namona be Bible ena hereva Iakobo 1⁠:6 dekenai oi laloatao, ia gwau: “To unai tau ia noinoi neganai, namona be ia abidadama sibona, bona daradara lasi. Badina be daradara tauna be davara ena hurehure bamona. Lai ese ia doria lao doria mai, ia be gini gabuna lasi.” Bema oiemu abidadama karana dekenai oi daradara, unai be hegeregere bouti ta mai ena matu bamona. Bema matu ia bada bouti do ia mutu diba.

Bema nega haida oiemu henanadai idia haerelaia lasi, unai anina be oiemu abidadama be do ia mutu gwauraia, a? Lasi, unai bamona ia vara momo lasi. To bema oi be mai emu daradara, namona be oi gaukara goada unai daradara kokia totona. Haheitalai be inai, bema oi ura dabua ta oi hoia, ena toana do oi itaia namonamo guna, idia turia namonamo, dabua ia goada, bona ena davana do oi itaia guna, gabeai do oi hoia, ani? Unai hegeregerena, bema oi daradara neganai, namona be Bible oi stadilaia namonamo eiava emu daradara gauna be lo Keristen tauna ta danu umui kikilaia hebou.a Hereva Lada-isidia 15⁠:14 ia hereva bamona, ia gwau: “Lalo-parara tauna ena lalona ese aonega ia tahua.”

Lauma Gaudia Tahua Dalana

Aposetolo Paulo ese mero matamata Timoteo ia hamaoroa, ia gwau: “Oiemu diba bona goada do oi gaukaralaia, mai oiemu lalona ibounai. Vadaeni taunimanima ibounai ese oiemu goada do idia itaia, ia bada lao noho.” To inai oi laloa, Paulo ese Timoteo dekenai ia karaia diba lasi gaukarana ia henia lasi. Ia ese Timoteo dekenai gaukara namona ia henia ia tahua totona, ia gwau: “Abidadama taudia edia toana namona bamona do oi lao. Vadaeni oiemu hereva namona, kara namona, lalokau, abidadama bona laloa goevagoeva idia itaia neganai, oiemu kara bamona do idia karaia.”​—⁠1 Timoteo 4:​12-15.

Timoteo bamona, lauma gaudia oi tahua neganai, namona be oi karaia diba gaudia sibona oi tahua. Hegeregere, inai mani oi laloa, bema nadunadu dalana oi ura diba neganai, hanuaboi tamona lalonai nadunadu hereadae tauna ta ai oi lao diba lasi! To, sisina sisina unai aonega oi abia diba​—⁠reana guna uma aniani hegaegaelaia dalana oi diba bona gabeai vamu, paraoa, vamu ena vasiahu eiava aniani mai digara karaia dalana do oi diba. Unai hegeregerena, lauma dalanai oi goada momokani diba bema sisina sisina unai gaudia oi tahua noho. Unai gaukara ta ta ese lauma dalana dekenai oiemu goada do ia hahedinaraia. Oi karaia gaukarana ta oi hagugurua neganai, emu goada do ia bada ia lao. Unai ese oi do ia durua bona gaukara ma haida do oi ura karaia.

Oi Tahua Gaudia Oi Hagugurua Dalana

Hari oiemu mauri lalonai do oi tahua diba gaudia haida do ita laloa. Oi be Bible ibounai oi duahia vadaeni, eiava? Oibe, Bible be buka badana, to namona be sisina sisina oi duahia, ani? (United States lalonai taunimanima ta ta iboudiai be aniani ena metau 630 kilogram be lagani tamona dekenai idia ania. To, daika ese unai aniani ibounai nega tamona dekenai do ia ania diba?) Berea taudia ‘namodia’ be “dina ibounai Buka Helaga idia tahua.” (Kara 17:11) Bema dina ta ta ibounai miniti 15 oi atoa Bible oi duahia totona​—⁠unai be reidio dekenai ane 5 oi kamonai henia ena nega hegeregerena​—⁠oi ese Bible ena hereva ibounai be lagani tamona lalonai do oi duahia haorea diba.

Reana oi ura nega do oi atoa Gima Kohorona bona Noga! magasin iboudiai do oi duahia totona. Unai magasin dekenai idia torea gaudia ese oi do idia durua lauma dalana dekenai do oi tubu haraga totona. Bema oi be pablisa gaukara oi do karaia lasi, namona be unai gaukara oi tahua, bona unai neganai Iehova ena Witness taudia edia kongregesen dekenai bapatiso lasi pablisa tauna ta ai do oi lao diba. Unai oi karaia totona nega ibounai ruma ta ruma ta gaukara do oi karaia bona hua ibounai emu gaukara do oi ripotilaia. Bema oi ura diba edena bamona do oi hegeregere unai gaukara oi karaia totona, namona be emu tama bona sina eiava kongregesen ena elda tauna ta oi hereva henia.

Do oi tahua diba lauma gaudia haida be dahaka? Oi ese emu lalona oi hadibaia oi manada bona maoro bona kerere daladia do oi diba namonamo totona. (Heberu 5:14) Oi ese lauma ena huahua iboudiai emu mauri dekenai oi badinaia toho diba. (Galatia 5:​22, 23) Oiemu guriguri dalana oi hanamoa diba. (Filipi 4:⁠6) Emu tamana bona sinana edia kwarana dagina matauraia karana oi habadaia diba. (Efeso 6:⁠1) Namona be dala oi tahua bena taunimanima ese emu abidadama ena badina idia henanadailaia neganai, oi ese idia oi haere henia namonamo diba totona. (1 Petero 3:15) Unai be tahua gaudia namodia bona oi karaia diba!

Inai oi laloatao, gau haida do oi tahua sibona be hegeregere lasi. Gau badana be oi tahua gaudia oi badinaia! Guna Britain ena praiminista Benjamin Disraeli, ia gwau: “Do oi kwalimu totona gau badana be oi hekwarahi noho oi tahua gauna do oi abia totona.” Oibe, lauma gaudia tahua karana do oi habadaia. Lauma dalana dekenai do oi hagugurua diba gaudia oi tahua. Bona oi hekwarahi noho oi tahua gaudia oi badinaia totona. Unai negai lauma dalanai do oi goada oi lao.

[Footnotes]

[Picture on page 27]

Bema dina ta ta ibounai miniti haida oi atoa Bible oi duahia totona, unai be dala namona ta lauma dalanai do oi goada oi lao totona