Ruma Naria Gaudia Namo Hereadia

Noga! toretore tauna South Africa ai ia torea

AFRICA ena medu bada siahu gabudia edia uda dekenai, au ta ladana barteria idia tubu, bona ena rigi lalodiai be anina lasi. Ena lata korikorina ia abia totona, ma au haida ia hanaidia toho. Unai hekwarahi dekenai ia kwalimu totona namona be heduru ia abia, badina tubutubu gaudia ma haida ese barteria idia hamasea toho bona moss ese unai au ena rau ia botaia diarina ia koua diba. Korup, Cameroon ena uda ta lalonai, dimairi bona unai au idia gaukara hebou dalana be televisen dekenai idia hahedinaraia; unai piksa ena ladana be African Rainforest: Korup, Phil Agland bona Michael Rosenberg ese idia karaia.

Unai piksa ese barteria auna ia tahua dimairi kwini matamatana ta ia hahedinaraia. Ia vara neganai, ia diba unai au ena rigi lalodiai anina be lasi dainai unai be gabu namona ena bese do ia havaraia. Rigi ta dekenai matu ia karaia murinai, ena gatoi be lalonai ia atodia. Danu, unai mai anina lasi rigidia lalodiai be manumanu maragidia momo bona au ranuna idia ania. Dimairi ese unai manumanu idia naridia boromakau oreadia hegeregerena, bona idia amo rata bamona gauna idia abia idia inua totona.

Dimairi besena ena bada ia hegeregere neganai, unai rigi idia noholaia gaudia ma haida ia luludia bona au idia hagoevaia hamatamaia. Unai diba momo ruma naria taudia ita itaia neganai be lalona ia veria momokani! Haida be au ena badina dekenai idia diho bona au idia hamasea diba tubutubu gaudia idia tuari henia; edia badina idia koria bena unai amo idia hamasedia. Ma dimairi haida oi itaia diba, unai au ena raudia amo moss, lichen, bona momoru idia kokia. Rau henunai ia hunia rautuna danu idia lulua.

Unai televisen piksa dekenai ia gwau, ‘Sisina sisina, dimairi be momoru ibounai idia kokia. Barteria idia hadikaia diba manumanu bona tubutubu gaudia iboudiai idia kokia vadaeni, bona unai au ena dimairi ese ia naridia dainai ma au haida ia hanaidia diba. Dimairi be unai au amo idia abia heduruna be inai: barteria ena rigi lalodiai anina be lasi dainai dimairi be edia manumanu idia naridia​—edia aniani abia dalana tamona unai​—bona edia natudia idia ubudia diba.’

Unai dimairi be gaukara goadagoada gaudia! Idaunega aonega herevana ta ia gwau: “Lahedo tauna e, dimairi dekenai oi lao; ena kara oi laloa, bona aonega oi davaria.”​—Hereva Lada-isidia 6:6.