Lagani 1914 Ena Anina Korikorina

RAU 4 ai ia hedinarai hegeregerena, “inai magasin ese taunimanima ia durudia, do idia diba momokani, gau ibounai ia karaia Diravana ese maino bona noho namo tanobadana matamatana do ia karaia, lagani 1914 ai idia vara gaudia idia itaia uruna idia do mase ore lasi neganai.”

Reana duahia taudia momo be unai hereva dekenai idia hoa. To, guna, December 1879 ai​—lagani 35 idia do noho ela bona 1914 ia abia negana​—The Watchtower (unai neganai idia gwauraia Zion’s Watch Tower and Herald of Christ’s Presence) Baibel ena peroveta hereva amo idia hamomokania 1914 be mai anina bada laganina. Lagani 1879 amo lagani haida gunanai​—lagani 1840 murinai​—Baibel idia stadilaia taudia ma haida idia laloa reana 1914 be mai anina, Baibel ena peroveta hereva dainai.a

Peroveta herevadia idia gwauraia inai bamona: Idia do vara lasi, to idia torea vadaeni sivaraidia. Unai sivarai idia hahedinaraia Dirava ese Baibel ia torea. Nega vairai dahaka do ia vara ita ia hamaoroa sibona lasi, to nega haida naria negana ena lata ia henia danu. Unai peroveta hereva haida be dina, lagani haida, eiava lagani handred momo idia herevalaia.

Daniela, Mesia ia mai negana ginigunana ia perovetalaia tauna ta, ese edena nega Mesia do ia giroa ena “noho” totona danu ia perovetalaia. Baibel ia gwau “dokona neganai” do ia lou mai. (Daniela 8:​17, 19; 9:​24-27) Unai Baibel peroveta herevana ena lata be lagani handred haida sibona lasi, to lagani 2000 ia hanaia​—lagani 2,520! Luka 21:​24 ai, Iesu ese unai nega ia gwauraia, “idau bese edia nega.”b

1914 ai Idia Vara Gaudia ese Nega Dikana Idia Matamaia

Idia vara vadaeni Baibel peroveta herevadia ese idia hamomokania 1914 amo ema bona hari, nega dokona lalonai ita noho. Iesu ia gwau unai nega be ‘hisihisi amo do ia hamatamaia mai hisihisi ida.’ (Mataio 24:8) Apokalupo 12:​12 ai, ita duahia: “Tanobada bona davara, madi o, dika bada do umui davaria! Badina be Satani ese umui dekenai ia lao vadaeni, mai ena badu dikadika. Ia badu, badina ia diba iena nega be ia kwadogi sibona.” Unai ese dahaka dainai 1914 amo tanobada ese daradara bada herea ia mamia ia hahedinaraia.

To, inai nega dokona ena lata do ia kwadogi​—uru ta ena nega sibona. (Luka 21:​31, 32) Badina 1914 amo ema bona hari lagani 80 idia ore vadaeni, ita diba Dirava ena Basileia ese ita do ia ruhaia negana be kahirakahira. Ena anina be “hekokoroku lasi tauna”​—Iesu Keriso​—ese “basileia” ena kahana tanobada dekenai do ia lohiaia bona kara maoromaoro maino tanobada matamatana do ia havaraia.​—Daniela 4:17.

[Footnotes]

[Box on page 11]

Lagani 1914 Bona Murinai Idia Herevalaia

“Ena be tanobada ibounai tuari rua idia reaia diba lasi, to niuklia bomu idia karaia dainai tanobada ibounai tuari ihatoina vareai garina ia havaraia. Lagani 1900 murinai, maino negana sisina lata ia havaraia gauna be, niuklia bomu ese iboudiai ia hamasea diba garina. . . . Taunimanima ese dahaka kerere idia karaia? Dahaka dainai lagani 1800 murinai idia noho helaro namodia idia hadikaia? Dahaka dainai iseda nega be gari bada negana, eiava haida ese idia gwauraia, dika bada herea negana, ai ia lao?”—A History of the Modern World​—From 1917 to the 1980s, Paul Johnson ese ia torea.

“Europe ena oromana idia haidaua gaudia badadia amo Tuari Badana bona murinai idia karaia maino gwauhamatana be ena oromana ia haidaua haraga. Guna idia karaia bisinesi, taunimanima edia kara heheni karana, bona politik dalana idia haidaua momokani. . . . Tuari ia ore murinai, guna mai moale ida idia gaukara hebou karana ia ore vaitani. Europe be mai ena moni lasi bona ena moni gaukaralaia dalana ia haidaua, danu tanobada hegegemadai moni ena goada ia diho. . . . Unai hekwakwanai be dika herea dainai ia do namo lou lasi neganai, tanobada ibounai tuarina iharuana ia vara.”—The World in the Crucible 1914-1919, Bernadotte E. Schmitt bona Harold C. Vedeler ese idia torea.

“Tanobada Ibounai Tuarina Iharuana lalonai, taunimanima edia tura heheni karadia iboudiai idia ore vaitani. Hitler ena lohia siahuna idia abia dae Germany taudia ese kara dika bada herea idia karaia; taunimanima edia histori lalonai unai bamona kara dika ena bada bona ena dika hegeregerena do oi davaria lasi. Genghis Khan be ala-ala bada herea ia karadia, to Germany ena kamepa dikadia lalonai kara dika rohoroho idia karaia. Tatau, hahine, bona natudia milioni 6 o 7 idia aladia mase. Germany bona Russia be East kahana ai idia tuari neganai, idia ese tano haida taudia iboudiai idia ura hamasedia. . . . Unai dibura, kohu hadikaia, bona kara namo rakatania negana, guna unai bamona negana ita laloa diba lasi, amo ita mai.”—The Gathering Storm, Volume I of The Second World War, Winston S. Churchill ese ia torea.

“Hari, ogogami bona taga, bese idauidau, bona kopi idauidau taudia edia maoro daladia idia lalo-pararalaia to, nega tamona ai ogogami bona taga idia heatu, bese idauidau bona kopi idauidau idia hepapahuahu. Edia lalohadai dikadia idia hahedinaraia edia kara dika amo, kara dika idia palanilaia guna bena mai edia lalona ida idia karaia; hari dina taunimanima be lalo-rua bona kara rua. Taravatu ia noho bona ia gwau unai be maoro lasi, bona taunimanima edia lalohadai bona kara idauna ta ia noho danu. Idia ruaosi idia noho tanobada tamona dekenai sibona lasi to nega haida idia noho tano tamona lalonai, reana tauanina tamona lalonai.”—Civilization on Trial, Arnold Toynbee ese ia torea.

“Nega ia ore to ia lao haraga lasi laumana ta bamona, lagani 1800 ia lao 1899 ia ore to unai nega ena lalohadai idauidau​—gaukara karaia namonamo lalohadaina, lalo-goada, taunimanima ena namo do ia bada ia lao lalohadaina abia dae karana​—idia noho ela bona August 1914. Unai nega murinai, Europe ena tano goadadia ese kavakava karana idia hamatamaia bona unai amo edia uru ena tatau matamata namodia milioni milioni idia mase. Lagani hani mai kahana idia ore murinai, Tuari Badana ena daradara havaraia karana murinai, momo idia itaia (to iboudiai lasi) edia mauri dalana 1914 ia do mai lasi negana ai, ia ore bona kahana ta ia noho lasi. Taunimanima be nega matamata ta ai idia vareai, bona idia noho taudia momo ese lalohadai kererena idia abia haraga bona ma ta ena kerere idia ura lasi gwauatao. Idia laloa maino ese tanobada do ia hanamoa taudia be lagani 1919 ai idia lalohisihisi.”—1919​—The Year Our World Began, ena hamatamaia hereva amo, William K. Klingaman ese ia torea.

[Picture on page 10]

Bavarian Alps