Sibona Matauraia Karana Dekenai Dahaka ia Vara?

SIBONA OI MATAURAIA ENA BADINA

Sibona idia matauraia taudia be idia gari lasi bona mauri ena hekwakwanai hanaia dalana idia diba. Bona idia hesiku haraga lasi.

Tahua gaukarana ta ese ia hahedinaraia sibona edia mauri idia laloa lasi taudia be idia lalohekwarahi, lalometau bona idia aniani namonamo lasi. Danu alkahol idia inua momo bona drag idia ania.
Sibona idia matauraia taudia be ma haida ida sibona idia hahegeregerea lasi, unai dainai ma haida ida idia herevahereva namonamo bona hetura karana ia hagoadaia. To, sibona idia laloa lasi taudia be ma haida idia gwauraia dika, unai ese edia hetura karana ia hadikaia.
Sibona idia matauraia taudia be hekwakwanai idia davaria neganai, idia haheauka, bona idia vara gaudia ese idia ia koua lasi edia tahua gaudia idia hagugurua totona. To sibona idia matauraia lasi taudia ese kerere maragidia be nega momo gau badana bamona idia laloa. Unai dainai idia hesiku haraga diba.

EDENA DALA AI SIBONA OI MATAURAIA DIBA?

Oi do idia hagoadaia turadia oi abia hidi. Namona be oi idia matauraia, emu namo idia laloa bada, bona oi idia hagoadaia taudia oi bamoa.

“Tura korikori be nega ibounai lalokau ia hahedinaraia, bona hekwakwanai negadia ai ia be tadikaka korikori ta bamona oi ia durua.”—Aonega Herevadia 17:17.

Ma haida oi durua. Bema haida oi durua bona idia totona gau haida oi karaia—ena be oi totona gau ta do idia karaia lasi—henia karana amo moale korikori do oi abia. Oibe, unai do ia vara, ena be emu kara namodia dainai hanamoa oi abia lasi.

“Henia kara ena moale be bada, to abia kara ena moale be maragi.”—Kara 20:35.

Emu natudia durua sibona idia matauraia totona. Unai oi karaia dalana ta be idia dekenai nega oi henia edia hekwakwanai idia hamaoromaoroa totona. Unai amo natudia ese nega aukadia haheaukalaia daladia do idia diba. Unai ese idia ia durua sibona idia matauraia totona bona idia bada neganai idia do ia durua.

“Mero dekenai dala maorona oi hadibaia, ia buruka neganai unai dala do ia rakatania lasi.”—Aonega Herevadia 22:6, futnout.

Iehova ena Witnes ta be café ai hahine ta ida Baibel stadi idia karaia.

EDENA DALA AI IEHOVA ENA WITNES TAUDIA BE SIBONA MATAURAIA KARANA IDIA HAHEDINARAIA?

Iehova ena Witnes taudia edia kongrigeisen heboudia bona Baibel stadi program ese taunimanima ia durua edia mauri idia hanamoa bona sibona idia matauraia danu.

EMAI WIKI TA TA HEBOUDIA

Emai wiki ta ta heboudia ai, Baibel tok idauidau ai kamonai, nega momo sibona matauraia daladia ai dibaia. Emai hebou be davana lasi bona pablik idia mai diba. Hegeregere, inai gaudia do oi dibaia;

Dirava dekenai oi be mai anina bada ena badina
mauri ena anina korikorina
emu hetura karana ma haida ida hagoadaia dalana

Tura korikoridia do oi davaria, idia be ta ta “idia durua heheni.”—1 Korinto 12:25, 26.

Emai kongrigeisen heboudia karaia dalana oi diba totona, jw.org ai inai vidio kwadogina, Kingdom Hall ai Dahaka Idia Karaia? oi itaia.

EMAI BAIBEL STADI KOSI

Ai ese davana lasi Baibel stadi kosi be Mauri Moalelaia Hanaihanai! bukana amo ai karaia. Inai stadi buka ai, Baibel siri, stadi ena badina, henanadai, vidio bona laulau namodia idia noho. Emai Baibel stadi kosi ese taunimanima ia durua sibona edia mauri idia hanamoa bona idia matauraia.

Iehova ena Witnes taudia ida Baibel oi stadilaia ena namo oi itaia totona, jw.org ai inai vidio kwadogina, Dahaka Dainai Baibel Stadilaia? oi itaia.