Karoa 12

Dahaka Dainai Sibogu Lau Moalelaia Lasi?

KEKENI ta ladana Louise ia gwau: “Lau laloa lau be anina lasi.” Oi danu be nega haida unai bamona oi laloa, a?

Momokani, namona be ita ta ta ibounai be sibona ita matauraia. Unai bamona hemataurai ese iseda mauri ia hanamoa. Danu, Baibel ia gwau: “Oiemu badibadinai tauna dekenai oi lalokau henia, oi sibona dekenai oi lalokau henia bamona.” (Mataio 19⁠:19) Bema ita be sibona ita laloa dika, reana ma haida do ita lalodia dika danu.

‘Gau ta Lau Karaia Maoromaoro Diba Lasi!’

Dahaka dainai oi be sibomu unai bamona oi laloa? Reana badina ta be, kara haida oi karaia diba lasi dainai oi lalo-metau. Memero kekeni momo idia tubu daekau noho lalonai, idia hemarai badina be gau haida idia hamorudia kava eiava idia raka neganai gau haida idia bampaia kava. Danu, lalohisihisi gaudia idia vara murinai emu lalona ia goada lou haraga lasi, taunimanima badadia hegeregeredia. Bona oiemu “lalona” oi do “hadibaia lou, hadibaia lou” lasi dainai, reana gau haida oi lalohadailaia kerere. (Heberu 5⁠:14) Reana nega haida oi laloa gau ta oi karaia maoromaoro diba lasi!

Memero kekeni haida be edia tamadia sinadia edia ura idia hahegeregerea diba lasi dainai, sibodia edia kara idia lalohisihisilaia. Mero ta ia gwau: “Bema sikuli dekenai maka namo sisina lau abia, lauegu tamana sinana idia ura diba dahaka dainai maka namo herea lau abia lasi, bona idia gwau lau kwalimu momokani lasi.” Vaia, tama sina ese edia natudia idia hagoadadia, sikuli dekenai do idia gaukara namonamo totona. Bema emu tamana sinana edia ura maorona hegeregerena oi karaia lasi, momokani oi do idia sisiba henia. Baibel ia gwau: “Natugu e, oiemu tamana ena sisiba oi kamonai, bona oiemu sinana ena taravatu oi rakatania lasi.” (Hereva Lada-isidia 1⁠:​8, 9) Namona be oi lalo-metau lasi, to unai sisiba herevadia aukadia oi abia dae bona oi badinaia be namo.

To, bema oiemu tamana sinana ese sikuli dekenai oi abia makana bona oiemu kakana ese ia abia makana idia hahegeregeredia, bena idia gwau, “Dahaka dainai maka namona oi abia lasi oiemu kakana Raka bamona?” edena bamona oi laloa be namo? Ena be edia hereva ese emu lalona ia hahisia, to ia be mai anina bada. Idia ura oi ese namo do oi davaria. Bema oi laloa edia hereva be auka, namona be mai emu manau ida oi hamaorolaidia, ani?

Sibomu Do Oi Matauraia Dalana

Oi be sibomu edena bamona do oi matauraia diba? Kara ginigunana be, emu kara namodia bona kereredia oi lalohadailaia mai emu momokani ida. Do oi davaria emu kerere momo be maragi. To emu kerere badadia, hegeregere badu haraga karana eiava sibomu emu namo tahua karana, be edena bamona? Namona be mai emu momokani ida oi hadokodia toho, bena oi be sibomu do oi matauraia diba.

Danu, oiemu kara namodia oi laloaboio lasi! Reana oi laloa aniani oi nadua diba eiava motuka ena taea oi hanamoa diba be gau ta lasi. To, hitolo tauna eiava ena motuka ena taea ia dika tauna ese oi do ia hanamoa, unai gaukara oi diba dainai! Emu kara maoromaorodia oi lalodia danu. Oi stadi goadagoada a? Oi haheauka a? Oi hebogahisi a? Oi be hariharibada tauna a? Unai bamona kara edia namo ese kerere maragidia edia dika ia hanaia momokani.

Inai kara mani oi lalodia:

Oi karaia diba karadia oi tahudia: Oi karaia diba lasi karadia bema oi tahudia, do oi lalohisihisi. Do oi karaia diba karadia sibodia oi tahudia. Taipia gaukarana dekenai diba oi tahua be edena bamona? Gita o ma miusik gauna ta gadaralaia dalana oi dibaia toho eiava gado idauna ta oi dibaia toho. Emu duahiduahi karana oi hanamoa. Kara ta oi karaia namonamo diba neganai, oi be sibomu do oi matauraia.

Gaukara karaia namonamo: Bema oiemu gaukara oi karaia namonamo lasi, oi be sibomu do oi moalelaia lasi. Dirava ese gau iboudiai havaraia gaukarana ia moalelaia bona gau ta ta ia havaraia murinai ia gwau idia “namo.” (Genese 1⁠:​3-31) Ruma dekenai eiava sikuli dekenai oi karaia gaukarana bema mai emu diba bona mai emu momokani ida oi karaia, do oi moalelaia.​—⁠Hereva Lada-isidia 22⁠:29 itaia.

Haida oi durudia: Bema oi helai kava bona oi ura taunimanima ese oi do idia durua hanaihanai, sibomu do oi matauraia diba lasi. Iesu ia gwau: “Umui ta ia ura be tau bada herea gwauraia, be hesiai gaukara ia karaia.”​—⁠Mareko 10⁠:​43-45.

Haheitalai ta be inai: Kekeni badana ta ladana Kim be sikuli amo ia laga-ani huadia lalodiai ena nega ia haria, bena hua ta ta ai hora 60 lalodiai ma haida ia durudia Baibel ena hereva momokanidia do idia dibaia totona. Ia gwau: “Unai ese lau ia durua Iehova kahirakahira dekenai do lau noho totona. Danu, lau ia durua ma haida do lau lalokau henidia totona.” Hari moale kekenina be ena kara dainai sibona ia matauraia diba!

Haida oi abidia hidi namonamo emu turadia ai oi halaodia totona: Kekeni badana ta ladana Barbara ia gwau: “Lau be sibogu lau moalelaia lasi. Ena be lau idia abidadama henia taudia ida lau noho neganai gaukara lau karaia namonamo, to, lau idia laloa maragi taudia ida lau noho neganai lau kara kava.”

Hekokoroku taudia eiava oi idia gwauraia dika taudia ese oiemu lalona idia hadikaia diba, bena oi be sibomu emu kara do oi lalohisihisilaia. Unai dainai namona be oiemu namo idia tahua momokani taudia oi abidia hidi oiemu turadia ai do idia lao totona.​—⁠Hereva Lada-isidia 13⁠:20.

Dirava be oiemu turana namona ai oi halaoa: Salamo torea tauna David ia gwau: “Iehova be egu nadi-gini bona egu magu.” (Salamo 18⁠:2) Sibona ena diba ia abidadama henia lasi, to ena lalona ia goada badina be Iehova ia tura henia momokani dainai. Unai dainai, gabeai, dika ia davaria neganai, ena be idia gwauraia dika to ia haheauka diba. (2 Samuel 16⁠:​7, 10) Oi danu be “Dirava dekenai do [oi] raka kahirakahira lao” diba, bena oi be sibomu do oi “heagilaia” lasi, to Iehova do oi heagilaia.​—⁠Iakobo 2⁠:​21-23; 4⁠:8; 1 Korinto 1⁠:31.

Doko Dikadia

Buka torea tauna ta ia gwau: “Memero kekeni badadia haida, sibodia idia laloa bada lasi taudia, be taunimanima vairadiai edia toana korikorina idia hahedinaraia lasi.” Haida be goada tauna ena toana, o pati momo dekenai ia lao lebulebu kekenina ena toana, o disko dekenai ia lao tauna mai ena dabua idaudia ena toana idia hahedinaraia. To edia lalona korikoridia ai idia laloa idia be hegeregere lasi.​—⁠Hereva Lada-isidia 14⁠:13.

Haida idia lebulebu “edia lalo-metau hadokoa totona, sibodia idia laloa bada totona, idia sihari totona, bona ma ta ena lalokau, edia lebulebu amo idia havaraia natuna ena lalokau unai, idia abia totona.” (Coping With Teenage Depression) Haneulato ta ia gwau: “Lauegu lalohisihisi koua totona, lauegu hetura karana Dirava dekenai lau hagoadaia lasi, to lau sihari kava. Lauegu kara amo egu lalona lau hametaua bada, bona lau lalohisihisi lau sibona lau noho dainai.” Unai dainai oi naria namonamo, unai bamona dokona dikadia ta do oi davaria garina.

Naria Namonamo

Baibel ena siri momo ese idia hahedinaraia, sibona ita laloa bada be namo lasi! Dahaka dainai? Badina be taunimanima momo be sibodia edia lalona idia hagoadaia toho neganai, idia kara kerere. Idia momo be hekokoroku taudia ai idia lao bona edia diba idia heagilaia kava. Haida ese ma haida idia gwauraidia dika, sibodia edia ladana abia isi totona.

Aposetolo edia nega lalonai, Iuda taudia bona idau bese taudia idia mama heheni dainai Roma ena Keristen kongregesen idia hadikaia. Unai dainai Paulo ese idau bese taudia ia hamaorodia, Dirava ena “bogahisihisi” sibona dainai iena lalo-namo idia davaria vadaeni. (Roma 11⁠:​17-36) Namona be hekokoroku Iuda taudia danu idia diba idia be mai edia kerere. Paulo ia gwau: “Ita ibounai ita kara dika vadaeni, bona Dirava ena hairaina ita abia be hegeregere lasi.”​—⁠Roma 3⁠:23.

Paulo ese ia hahemaraidia lasi, to ia gwau: “Dirava ena bogahisihisi ia bada herea lau dekenai. Unai dainai umui ta ta dekenai lau hamaoroa, . . . sibona do umui habadaia lasi.” (Roma 12⁠:3) Unai dainai, ita be sibona ita matauraia be maoro, to ita hekokoroku be kerere.

Doketa Allan Fromme ia gwau: “Sibona ia laloa namonamo tauna ia lalohisihisi lasi, to reana ia moale badabada lasi. . . . Ena lalona dekenai ia gwau lasi dika sibona do ia davaria, bona ia gwau lasi namo sibona do ia davaria. Sibona ena mauri ia naria dainai ia kara kava lasi, bona gau haida ia garilaidia . . . Ia diba nega haida ia kwalimu bona nega haida ia kwalimu lasi.”

Unai dainai namona be oi lalo-manau. “Dirava ese hekokoroku taudia edia dala ia koua, to manau taudia dekenai iena hariharibada ia henia.” (Iakobo 4⁠:6) Oiemu kara namodia oi lalodia, bona oiemu kerere oi lalodiaboio lasi to oi hamaoromaorodia toho. Nega haida sibomu emu kara do oi daradaralaia. To inai do oi daradaralaia lasi be namo: Oi be mai emu kara namodia haida, bona Dirava ese oi ia laloa. Badina be “tau ta ese bema Dirava ia lalokau henia, Dirava be ia diba unai tau be iena.”​—⁠1 Korinto 8⁠:3.

Inai Henanadai Herevalaia

◻ Dahaka dainai memero kekeni haida ese edia kerere sibona idia laloa? Nega haida oi be unai bamona oi laloa a?

◻ Emu tamana sinana edia ura oi dekenai be oi hagugurua lasi neganai, dahaka do oi karaia diba?

◻ Oi sibomu do oi matauraia totona, dahaka do oi karaia be namo?

◻ Edena kara haida ese oi idia durua lasi oi sibomu do oi matauraia totona?

◻ Dahaka dainai oi hekokoroku be namo lasi?

[Picture on page 99]

Oi lalometau bona oi laloa oi hegeregere lasi, a? Emu lalona hanamoa dalana ia noho

[Picture on page 101]

Emu hemarai kokia totona oi heagi be anina lasi

[Picture on page 102]

Nega haida oi laloa gau ta oi karaia maoromaoro diba lasi, a?