Stadi 8
Revareva Torea Dalana
1 Reana nega haida gavamani taudia dekenai revareva ita torea, Basileia gaukarana dainai. Eiava gabu daudauna dekenai idia noho taudia ita tore henidia, sivarai namona hadibalaidia totona. Eiava iseda tadikaka, kongregesen idauna ta dekenai idia hanai neganai, be ita tore henidia, eiava iseda varavara, gabu daudauna dekenai idia noho taudia, ita tore henidia, ita lalokau henidia dainai. Namona be edia lalona hagoadaia herevadia ita torea. (1 Kor. 8:1) Namona be hereva ita torea goevagoeva bona maoromaoro.
2 Bisinesi bona Association tore henidia dalana. Inai bamona revareva oi torea neganai, oiemu ladana, emu adres, bona dina, hua bona lagani be pepa ena atai kahana ena idibana kahanai oi torea. (Association oi tore henia neganai, emu kongregesen ena ladana oi torea danu.) Unai henunai, pepa ena lauri kahanai, oi tore henia tauna ena ladana bona adres oi torea. Unai henunai, hanamoa herevana oi torea. Murimuri taudia oi tore henidia neganai, inai hereva, “Dear Sir” eiava “Dear Mr. . . . ” be revareva ena matamanai oi torea, bona inai hereva, “Yours faithfully” be ena dokonai oi torea. Association eiava Iehova ena Witness tauna ta oi tore henia neganai, revareva ena matamanai inai hanamoa herevana, “Tadikaka e” oi torea. Association ena revareva dokonai inai hereva, “Lau be emui tadikaka” eiava “Lau be umui ida lau gaukara hebou tauna” oi torea. Iehova ena Witness tauna ena revareva dokonai inai hereva, “Lau be emu tadikaka” eiava “Lau be emu turana” oi torea. Unai hereva be rau ena ihuana amo oi torea, bena edia dokonai koma (,) oi torea. Unai henunai emu ladana oi torea. Bema kongregesen ena ladana ai Association oi tore henia, emu ladana henunai emu dagi oi torea, hegeregere, “Kongregesen gunalaia tauna” eiava “Kongregesen ena seketere.”
3 Emu revareva ena hereva oi torea matamaia neganai, ena badina oi gwauraia guna. Bema revareva ta oi haere henia, unai revareva bona ena badina oi gwauraia lou guna. Hereva badadia ta ta be paragraf ta ta lalodiai oi toredia. Bema ta ena heduru oi abia vadaeni, revareva lalonai oi tanikiu henia.
4 Bema ta oi tore henia Dirava ena Basileia oi hadibalaia totona, namona be oi hadibaia guna oi be daika, bona emu revareva ena badina be dahaka. Iseda Basileia Gaukara pepana, eiava Gima Kohorona, eiava Society ena buka ta amo hereva haida oi abia diba, revareva lalonai do oi torea totona. Bema hegeregere, Society ena pepapepa ta danu be unai revareva ida oi siaia be namo. Stem maorona be envelop dekenai oi atoa, bona emu adres be envelop ena murina kahanai oi torea.
5 Emu varavara bona emu turadia tore henidia dalana. Inai revareva lalonai, emu sivarai o ekspiriens namona ta, eiava hebou dekenai oi kamonai herevana namona ta, oi torea be namo. Bema oi stadi henia tauna ta be gabu idauna ta dekenai ia lao, unuseniai do ia noho totona, namona be oi tore henia, oiemu lalokau ia dekenai oi hahedinaraia totona. Bema natu ta be idau gabuna ta dekenai ia noho neganai revareva ta ia siaia ena tamana sinana dekenai, bona bema revareva lalonai ia tanikiu henidia badina be Iehova ena dala idia hadibalaia dainai, do idia moale. Bema tadikaka o painia taudia be idau gabuna ta dekenai idia lao haroro totona, oi tore henidia be namo, edia lalona hagoadaia totona.
6 Revareva ena dokonai, hereva namodia oi torea. Baibel lalonai, revareva hadokoa herevadia namodia haida idia noho. (Gal. 6:18; 2 Kor. 13:14; 3 Ioa. 14) Revareva ita torea neganai, iseda lalokau ita hahedinaraia.